1. E aera Iehova ngke e kabotaua ma te tina ae kammamma?

“E KONA te aine ni mwanuokina natina ae mamma?” Anne te titiraki are e tabekia Iehova n ana bong te burabeti ae Itaia. E taku te Atua nakoia ana aomata: “E ngae ngkana a mwaninga aine aikai ma ngai N na bon aki mwanuokiniko.” (Ita. 49:15) N angiin te tai e aki kakabotaua Iehova ma te tina, ma e a boni karaoia n te tai aei. E kamanena te reitaki i marenan te tina ma natina ni kaota iai kaanin ana reitaki ma ana toro. Angia tiina a kona n ota raoi n ana namakin te tari te aine ae Jasmin are taekina aei, “Ngkana ko kammammaa natim, ko karekea iai te reitaki ae rangi n okoro ae teimatoa n aki toki.”

2. Tera ana namakin Iehova ngkana iai natina temanna ae tiotionako mairouna?

² E nora naba Iehova temanna mai buakoia natina ae e a katoka reitakina ma te ekaretia ao uataboan te uarongorongo. Iangoa ngkanne marakina n noraia nga ma nga ana toro ni katoa ririki ake a a katoka aia beku ibukina. *

3. Tera ae e tangiria Iehova?

³ A bati i buakoia taari ake a katoka aia beku, ake a a manga oki nakon te ekaretia, ao a rangi ni butimwaeaki raoi! E tangiriia Iehova bwa a na oki, ao ngaira naba. (1Bet. 2:25) Ti na kangaa ni buokiia? Imwaini kaekaan anne, ti riai moa n ataia bwa a aera tabeman ngkai a a katoka irakini bobotaki ao uataboan te mwakuri ni minita.

4. Tera aron rotakia tabeman n te mwakuri ni kareketianti?

⁴ A rangi n reketaati tabeman n aia mwakuri ni kareketianti. E taku Hung * ae te tari te mwaane mai Atia Maiakimainiku: “I kabanea au tai ae rangi ni bati ao korakorau n au mwakuri ni kareketianti. I aki wanawana ao I iangoia bwa ngkana e bati au mwane, e na nakoraoi riki au beku ibukin Iehova. Ngaia are I a karakaa au aoa ni mwakuri. I a aikoa iririi bobotaki aika bati ni karokoa ae e a bon toki reitakiu ma te ekaretia. N taraana ao te waaki n te aonnaba aei e boni katikiianako aomata mairoun te Atua, teutana imwin teutana.”

5. Tera aron rotakin te tari te aine temanna n ana kangaanga aika bati?

⁵ A taonakinako n aia kangaanga taari tabeman. Boni kaaini Buritan Anne ao iai niman natina. E taku neiei: “E mwauku natiu temanna mangke e bungiaki. Imwina riki, e a kabaneaki man te ekaretia natiu te aine temanna ao natiu te mwaane temanna e a reke irouna aorakin te iango. I a rangi n rawawata n te aro are I a katoka kaakaeani bobotaki ao te uarongorongo. N tokina, e a bon toki au beku.” Ti bon nanoangaa Anne ma ana utu n ikotaki ma taari ake a kaaitara ma aeka ni kangaanga akanne!

6. E aera bwa e kona n tiotionako temanna mai buakoia ana aomata Iehova ngkana e aki maiuakina I-Korote 3:13?

⁶ Wareka I-Korote 3:13. Tabeman ana toro Iehova a un irouia raoia n te onimaki. E ataia te abotoro Bauro ae n tabetai e kona n iai ‘bukini ngurengurera’ irouia taari. Tao e a tia naba ni karaoaki ae ribuaka nakoira. Ngkana ti aki taratara raoi, ti kona n un. Teutana imwin teutana e kona te un ni katiotionakoa temanna mai buakoia ana aomata Iehova. Iangoa ana katoto Pablo ae te tari te mwaane mai Amerika Maiaki. E bukinaki bwa aongkoa e karaoa te bure, ao n tokina e a kabuaa mwiokoana n te ekaretia. Tera arona iai? E taku: “I rangi n un ao I a tabe ni beibetinako man te ekaretia.”

7. Tera ae kona n riki nakon te aomata ae teimatoa n tabeaianga mataniwin nanona?

⁷ Ke e kona te mataniwinnano ae tabeaianga ni karawawataa temanna ae e a tia n urua ana tua te Atua, n te aro are e a namakina ae e a aki tangiraki iroun te Atua. E ngae ngke e a tia n raira nanona ao n nanoangaaki, ma e kona n namakinna bwa e a aki tau n riki bwa ana aomata te Atua. E namakina anne te tari te mwaane ae Francisco. E taku: “I boaaki ibukina bwa I wene ni bure. N te moantai ao I kaakaei bobotaki, ma e rawawata nanou ao I namakinna bwa I a aki tau ni mena i buakoia ana aomata Iehova. E teimatoa n tabeaianga mataniwin nanou ao I a iangoia bwa e aki kabwaraa au bure Iehova. Imwina riki, I a katoka reitakiu ma te ekaretia.” Tera am namakin ibukia taari ake a kaaitara ma aekaki akanne? Ko nanoangaiia? Ao ae kakawaki riki, tera ana namakin Iehova ibukia?

8. E mwaninga Iehova taekaia naake a a tia ni beku ibukina? Kabwarabwaraa.

⁸ E aki mwaninga Iehova taekaia naake a a tia ni beku ibukina, ma a a manga katoka ngkai moa reitakia ma ana aomata. E aki naba mwanuokin aia beku ibukina. (Ebera 6:10) E korea te kaikonaki ae tamaroa te burabeti ae Itaia ae oti iai aron  Iehova n tabeakinia ana aomata. E korea aei: “E na tabeakina ana nanai n aron te tia kawakintiibu. E na ikotiia ni kabane tiibutetei ni baina, ao e na uouotiia i bwanibwanna.” (Ita. 40:11) Tera ana namakin te tia Kawakintiibu ae Kakannato ngkana e tiotionako ana tiibu temanna man te nanai? E kaota Iesu ana namakin Iehova ngke e kangai nakoia taan rimwina: “Tera ami iango? Ngkana iai 100 ana tiibu te mwaane temanna, ao e tiotionako temanna, tiaki e na kitania ake 99 i aoni maunga ao n nako ni kakaaea are e tiotionako? Ao ngkana e kunea, ao I tuangingkami bwa e na bati riki kimwareireina ibukin te tiibu anne nakoia ake 99 ake a aki tiotionako.”​—Mat. 18:​12, 13.

9. Tera aroia taani kawakintiibu aika raoiroi nakoia aia tiibu, n taai ake a karakinaki n te Baibara? (Nora te taamnei ni moan te maekatin.)

⁹ E aera ngkai e tonuraoi kabotauan Iehova ma te tia kawakintiibu? Ibukina bwa e rangi n tabeakinia ana tiibu te tia kawakintiibu ae raoiroi n taai ake a karakinaki n te Baibara. N te katoto, e kaitaraa te raian ao te bea Tawita ibukini kamanoaia ana tiibu. (1Tam. 17:​34, 35) Te tia kawakintiibu ae raoiroi e na boni waekoa n ataia ngkana iai temanna ana tiibu ae bua. (Ioa. 10:​3, 14) E na boni katikuia ana tiibu ake 99 i nanon ooia ke irouia raona ni kawakintiibu, ao e na nako ni kakaaea are bua. E kamanena te kaikonaki anne Iesu n reireinira iai te koaua ae kakawaki aei: “E aki tangiria Tamau are i karawa bwa e na bua temanna mai buakoia aika uarereke aikai.”​—Mat. 18:14.

10. Ni kaineti ma Etekiera 34:​11-16, tera are e beritanna Iehova bwa e na karaoia ibukin ana tiibu ae bua?

¹⁰ E tangirira Iehova n tatabemanira nako, n ikotaki ma “aika uarereke” ake a a tiotionako man te nanai. E berita te Atua rinanon te burabeti ae Etekiera, bwa e na bon ukoukora ana tiibu ae bua ao ni buokia ni kaoka marurungin ana onimaki.  Ao e bon taekini mwaneka ake e na karaoi ibukini kamaiuaia, ae boni baike e kakaraoi te ti kawakintiibu ae tibun Iteraera ngkana e bua ana tiibu temanna. (Wareka Etekiera 34:​11-16.) Te moan, e na ukoukora te tiibu te tia kawakintiibu, ae kainnanoaki iai te tai ae bati ao te kakorakora. Ngkana e reke irouna, e na boni kaokia nakon te nanai. Irarikina, ngkana e ikoaki te tiibu anne ke e baki, e na bon tabeakinna raoi te tia kawakintiibu, e na bautii ikoakina, e na uouotia, ao ni kaamwarakea. A riai unimwaane aika taani kawakina “ana nanai te Atua,” ni karaoi naba mwaneka aikai ibukini buokaia taari ake a betinako man te ekaretia. (1Bet. 5:​2, 3) A ukoukoriia, a buokiia ni kaokiia nakon te nanai, ao a kaota tangiraia man aroia ni buokiia n aia onimaki. *

11. Tera ae e ataia te tia kawakintiibu ae raoiroi?

¹¹ Te tia kawakintiibu ae raoiroi e ataia ae a kona ni bua tiibu. Ao ngkana e a tiotionako te tiibu temanna man te nanai, e aki katuuaaea te tiibu anne. Iangoa ana katoto te Atua ngke e buokiia ana toro tabeman ake a tiotionako mairouna.

12. Tera aron Iehova nakon Iona?

¹² E birinako te burabeti ae Iona mani mwiokoana are anganaki. Ma e ngae n anne, e aki waekoa Iehova ni kaaki taekan Iona. N aron te tia kawakintiibu ae raoiroi, e kamaiua Iehova ao e buokia ni kaoka korakorana are e kainnanoia ibukini kakororaoani mwiokoana. (Iona 2:7; 3:​1, 2) Imwina riki, e kamanena te Atua te aroka ae te bangke ni buoka iai Iona bwa e na ataa kakawakini maiun te aomata. (Iona 4:​10, 11) Tera reireiara n anne? A aki riai unimwaane ni waekoa ni kaaki taekaia naake a a katoka aia beku. Ma a riai ni kataia n ota bwa tera ae karika tiotionakon te tiibu anne man te nanai. Ao ngkana e okira Iehova te tiibu anne, a teimatoa unimwaane ni kaotiota tabeakinana.

13. Tera reireiara man aron Iehova nakon te tia korea Taian Areru 73?

 ¹³ E bwara nanon te tia korea Taian Areru 73 ngke e noria bwa a taraa n toronibwai aomata aika buakaka. E a nanououa bwa iai te kakabwaia ni karaoan nanon te Atua ke akea. (TaiAre 73:​12, 13, 16) Tera aron Iehova? E aki kabuakakaa teuanne. E boni kariaia korean ana taeka teuanne n te Baibara. Imwina riki, e a ataia te tia areru aei bwa e kakawaki riki te iraorao ma Iehova nakoni bwaai ni kabane. (TaiAre. 73:​23, 24, 26, 28) Tera reireiara iai? A aki riai unimwaane ni waekoa ni kabuakakaia naake a nanououa bwa a kabwaia ngkai a beku iroun Iehova ke a aki. Ma a riai ni kataia n ota bwa e aera ngkai a karaoa ke n taekina te bwai teuana. Ao ngkanne a a tibwa kona ni kamanena te Baibara ni kaungaia iai.

14. E aera ngke e kainnanoa te ibuobuoki Eria, ao e kangaa ni buokia Iehova?

¹⁴ E birinako te burabeti are Eria mairoun te Ueannaine ae Ietebera. (1Uea 19:​1-3) E iangoia teuaei bwa ai akea te burabeti ae beku ibukin Iehova, ao e namakinna bwa akea uaan ana mwakuri. E a rangi n rawawata Eria n te aro are e a tangiria ni mate. (1Uea 19:​4, 10) Ma Iehova e aki kabuakakaa Eria. E karaua nanona bwa iai riki raona ni beku, e kona n onimakina mwaakan te Atua, ao iai riki ana mwakuri ae e na karaoia. E akoi Iehova ni kakauongo raoi nakon tabeaiangan Eria ao e anganna mwiokoana aika boou. (1Uea 19:​11-16, 18) Tera reireiara iai? Ti riai ngaira  ni kabane, moarara riki unimwaane, n akoiia ana tiibu Iehova. E ngae ngkana e kaota unna temanna ke ana namakin bwa e a aki tau n nanoangaaki iroun Iehova, ma a na boni kakauongo raoi nakoina unimwaane ngkana e bunra nanona. Imwina, a na kataia ni karaua nanon te tiibu ane bua anne n tuangnga bwa e bon teimatoa ni kakawaki iroun Iehova.

15. Ni kaineti ma Ioane 6:​39, tera aron Iesu n iangoiia ana tiibu Tamana?

¹⁵ Tera arora ae riai n iangoa ana tiibu Iehova ae bua? E katea te katoto ibukira Iesu. E ataia ae a bane ni kakawaki i matan Iehova ana tiibu, ngaia are e kabanea ana konaa Iesu ni buokiia “tiibu aika bua aika tibun Iteraera” bwa a na okira Iehova. (Mat. 15:24; Ruka 19:​9, 10) Ngkai te tia kawakintiibu ae raoiroi Iesu, e kakorakoraa bwa e na aki kabuaa temanna mai buakoia ana tiibu Iehova.​—Wareka Ioane 6:39.

16-17. Tera ae a riai n iangoia unimwaane ni kaineti ma buokaia naake a tiotionako? (Nora te bwaoki ae “ Te Bwai ae E Kona n Namakinna te Tiibu ae Bua.”)

¹⁶ E kaungaia unimwaane n te ekaretia i Ebeto te abotoro Bauro bwa a na kakairi n ana katoto Iesu. “Buokiia ake a mamaara, ao kam riai n ururingi ana taeka te Uea ae Iesu ngke e kangai: ‘E kakukurei riki te anga nakon te anganaki.’” (Mwa. 20:​17, 35) E teretere bwa bon anne tabeia unimwaane ae kakawaki ni boong aikai. E taku Salvador ae te unimwaane i Tibein: “Ngkana I iaiangoa aron Iehova n tabeakinia raoi ana tiibu aika bua, I a kairaki iai bwa N na kabanea au konaa ni buokiia. Ngkai te tia kawakintiibu ngai n te onimaki, I ataia ae e bon tangirai Iehova bwa N na tabeakinia ana tiibu.”

¹⁷ Naake a tiotionako ake a taekinaki n te kaongora aei, a bane ni buokaki bwa a na okira Iehova. A a bati riki ngkai ake a a tia n tiotionako aika kan okira Iehova. E na maroroakinaki riki n te kaongora are imwina te bwai ae ti kona ni karaoia bwa ti aonga ni buokiia bwa a na okira Iehova.