1-3. (a) Tao e koreaki n ningai Taian Areru 147? (b) Tera reireiara ngkana ti rinanon Taian Areru 147?

NGKANA iai temanna ae karaoa ae raoiroi ni mwiokoana teuana, ke e kaotiota te aroaro ni Kristian ae tamaroa, e bon riai ni kamoamoaaki. Ngkana e riai karaoan anne nakoia aomata, ai batira riki bukina ae ti riai ni karaoiroa iai Iehova ae te Atua! Ti kona ni karaoiroia ibukini mwaakana ae korakora ae kona n noraki ni kamimin ana karikibwai, ke ibukin tangiraia aomata irouna rinanoni katauraoan Natina bwa te karea ni kaboomwi.

² E kairaki bwa e na karaoiroa Iehova te tia korea te ka-147 n Areru. E kaungaia naba aomata bwa a na karaoiroa te Atua ma ngaia.​—Wareka Taian Areru 147:​1, 7, 12.

³ Ti aki ataia bwa antai ae korea te areru aei, ma n taraana, e maiu te tia areru aei n te tai are e a kaokiia iai tibun Iteraera Iehova nako Ierutarem man te taenikai i Baburon. (TaiAre. 147:2) E kairaki te tia areru bwa e na karaoiroa Iehova ngkai e kaokiia ana aomata nakon te tabo are a kona iai ni waakina te taromauri ae koaua. Ma e bon taekin naba bukina tabeua. Ae baikara? Baikara bukina aika ko riai n takaruaea iai “Areruia!” ni maium?​—TaiAre. 147:​1, kabwarabwara mai nano.

4. Tera aia namakin tibun Iteraera ake a taenikai ngke e kainaomataia te Uea ae Tairati, ao bukin tera?

⁴ Iangoa aia namakin tibun Iteraera ake a taenikai i Baburon. A kakaniko ni kangai taani kataenikaiia: “Anenea nakoira kunan Tion tekorana.” N te tai anne, e a tia ni kamaunaaki Ierutarem ae bukini kimwareireia ae moan te bati. (TaiAre. 137:​1-3, 6) A aki kan anene I-Iutaia bwa e uruaki nanoia, ao a tangira karauan nanoia ao kabebeteaia. Ma e koro bukin ana taetae ni burabeti te Atua, ao a kamaiuaki iroun Tairati are ueani Botia. E kataenikaia Baburon teuaei ao e katanoataa aei: “E mwiokoai [Iehova] bwa N na katea ana auti i Ierutarem . . . Ngkana iai ana aomata i buakomi ni kabane, ao ke e memena Iehova ae Atuana irouna, ao ke e nako Ierutarem.” (2Rong. 36:23) Ai karaunanora aei irouia tibun Iteraera ake a maeka i Baburon!

5. Tera ae e taekinna te tia areru ibukini mwaakan Iehova ni kabebetei naano?

⁵ E aki tii kabebetea te natannaomata ae Iteraera ae bwanin Iehova, ma e kabebeteia naba kaaina n tatabemania nako. E karaoa naba anne ni boong aikai. E korea aei te tia areru ibukin te Atua: “E kabebeteia akana uruaki nanoia, ao e bautii ikoakia.” (TaiAre. 147:3) Eng, e tabeakinia Iehova naake iai aia kangaanga ke a rawawata. Ni boong aikai, e ingainga Iehova ni kani kabebeteira ao ni karaui nanora ngkana ti rawawata. (TaiAre. 34:18; Ita. 57:15) E anganira te wanawana ao te korakora bwa ti aonga n tokanikai i aoni kangaanga ake ti kaaitarai.​—Iak. 1:5.

6. Ti kangaa ni kakabwaiaaki n aron te tia areru ni bita ana maroro n Taian Areru 147:4? (Nora te taamnei ni moan te kaongora aei.)

⁶ Imwina, e a tararake nako karawa te tia areru ao n tuangira ae Iehova e “wareki mwaitin taian itoi, ao e weteiia ni kabane n araia.” (TaiAre. 147:4) E aera ngkai e a bita ana maroro ao n taekini bwaini karawa? Iangoa aei: E kona n nori itoi te tia areru ni matana, ma e aki atai raoi mwaitiia. I nanon ririki aika bati, e a ririkirake mwaitin itoi aika ti kona n nori. A taku tabeman bwa iai birion ma birion itoi aika mena n ara nna n itoi ae Naiabu n tii ngaia. Ao bon iai tirion ma tirion mwaitini nna n itoi n te iuniweeti! Iroura, a a bon aki kona ni warekaki! Ma e angania araia ke kabwarabwaraaia ni kabane te tia Karikiriki. Ae nanona bwa e rangi ni kakawaki te itoi teuana ma teuana iroun Iehova. (1Kor. 15:41) Ma tera aroia ana karikibwai aika aomata i aon te aba? Te Atua ae atai mwin itoi nako, e kinako raoi naba, e ataa te tabo ae ko mena iai, am namakin, ao te bwai ae ko kainnanoa n te tai teuana ma teuana!

7, 8. (a) Ngkana e kamaiuia ana aomata Iehova mani kataakia, tera ae e ururingnga? (b) Kabwarabwaraa aron ana nanoanga Iehova ni buokiia aomata aika aki kororaoi.

⁷ E aki tii tabeakiniko Iehova, ma iai naba mwaakana ma ana nanoanga ni kona ni buokiko n am kangaanga. (Wareka Taian Areru 147:5.) Ko kona n namakinna ae e a riao am kangaanga ao ko a aki konaa uotam. E ataa tian am konabwai te Atua, bwa ‘e uringko ae te tano ngkoe.’ (TaiAre. 103:14) Ti kona n okioki ni karaoa te kairua teuana ibukin aki kororaoira. Ti bae n uringaaba ni baike ti a tia n taekin, kaibwabwarun rabwatara ake ti namakini, ke te bakantang ni baika reke irouia tabemwaang! E aki kona Iehova n namakini aeka n namakin akanne, ma e ngae n anne moan te bati ana ataibwai ibukira ao e aki kona n ukeraki!​—Ita. 40:28.

⁸ Ko bae n tia n namakina aroni buokam  ni bain Iehova ae korakora bwa ko na tokanikai i aoni kataaki. (Ita. 41:​10, 13) N te katoto, e rangi ni bwara nanon Kyoko ae te tari te aine ae bwaiania, ngke e mwaing nakon te tabo ae boou ae mwiokoaki iai. E kangaa Iehova ni kaota ana ataibwai ibukin ana kangaanga neiei? N ana tabo ae boou aei, e a noria Kyoko bwa a rangi ni bati aika kona n ota n ana namakin. E namakinna bwa ai aron ae e kangai Iehova nakoina: “I tangiriko, tiaki tii ibukin ae ko bwaiania, ma ibukina bwa natiu ngkoe ae ko katabua maium nakoiu. I tangiria bwa ko na kukurei ni maium ngkai te tia Kakoaua ibukiu ngkoe!” Ma e kangaa Teuare Moan te Mwaaka ni kaotia “bwa e aki kona n ukeraki ana ataibwai” ni kaineti ma te baere riki nakoim?

9, 10. Tera ae moanibwai ngkana e buokira Iehova? Kabwarabwaraa.

⁹ N tabetai ao baike ko kainnanoi boni bwaai n rabwata. N te katoto, ko kona n raraoma bwa e a aki tau kanam. Ma bon Iehova ae karikii bwain te aonnaba aika kona ni katauraoa te amwarake, ibukia naba reeben aika ataei aika tangitang ibukini kanaia! (Wareka Taian Areru 147:​8, 9.) Ngkana e teimatoa Iehova ni kaamwarakeia reeben, ko kona n onimakinna bwa e na katauraoi naba baika ko kainnanoi n te itera n rabwata.​—TaiAre. 37:25.

¹⁰ Ae moan te kakawaki riki, e katauraoa Iehova te amwarake n taamnei bwa ti aonga ni karekea “te rau are mairoun te Atua ae riaon aia iango aomata.” (IBir. 4:​6, 7) N te katoto, iangoa Mutsuo ma buuna, ake a nora mwaakan Iehova ni kateimatoaia imwin te tsunami i Tiaban n 2011. A boni kurimaraa maiuia ngke a tamwarakea taubukin aia auti. N te bong anne, a boni kuri ni bane ni bua aia bwai. A tiku n te rotongitong n te ruu teuana ae mwaitorotoro ni borauataon aia auti. Ngke e a ingabong, a kakaaea te bwai ae e na karekea kaungaaia. A tii kunea te boki ae te 2006 Yearbook of Jehovah’s Witnesses. E teke matan Mutsuo n te kaongora ae atuna “Te Tsunami ae Moan te Kamamate ae Akea n ai Arona.” Bon taekan te mwaeiei i Sumatra n 2004 are e a karekea te tsunami ae moan te korakora ae tuai n riiriki mai mwaina. E bon tang Mutsuo ma buuna ngke a wareka te rongorongo aei. A namakina ana tangira te Atua ni katauraoan te kaungaunga ae a boni kainnanoia raoi. E katauraoi naba Iehova baike a kainnanoi n te itera n rabwata. A reke bwaai n ibuobuoki irouia mairouia tariia n te onimaki. Ma te bwai ae a kakorakoraaki riki iai, boni kawaran aia ekaretia irouia taan tei man ana botaki te Atua. E taku Mutsuo: “I namakinna bwa ai aron ae e boni mena Iehova i rarikira n tatabemanira nako ao e tabeakinira. Ai boni karaunanora!” E katauraoi moa te Atua baika a na kateimatoaira n te onimaki, ao imwina baika ti kainnanoi n te itera n rabwata.

11. Tera ae a riai ni karaoia naake a kani kakabwaiaaki ni mwaakan te Atua ni kakamaiu?

¹¹ E tauraoi n taai nako Iehova ni buokiia ao ni “kateirakeia akana nimamannei.” (TaiAre. 147:6a) Ma ti na kangaa ni kakabwaiaaki man tauraoina ni kani buokira? Ti riai ni karekea ara iraorao ae kaan ma ngaia. Ngkana ti na karaoa anne, ti riai ni karikirakea te nimamannei. (Teb. 2:3) Aomata aika nimamannei, a kantaningaa te Atua bwa e na kaetii baika kairua ao ni katoki rawawataia. E iaiangoiia Iehova aeka n aomata aikai ao e reke akoaia irouna.

12, 13. (a) Ngkana ti na kakabwaiaaki n ana ibuobuoki te Atua, tera ae ti riai n rarawa iai? (b) Antai ake e kukurei irouia Iehova?

 ¹² N te itera are teuana, “e tewenakoia akana buakaka nako aontano” te Atua. (TaiAre. 147:6b) A matoatoa taeka aikai! Ngkana ti na kakabwaiaaki man ana tangira ae koaua Iehova ao n aki kaunna, ti riai n ribaa te bwai ae e ribaia. (TaiAre. 97:10) N te katoto, ti riai n ribaa te wene ni bure. E nanonaki iai bwa ti na kararoaira mani baika kona ni kairira nakon te bure anne, n ikotaki ma matakuakinan te bwaitingako. (TaiAre. 119:37; Mat. 5:28) E kona ni kangaanga te kabokorakora iai, ma e materaoi karaoana bwa e karekea ana kakabwaia Iehova.

¹³ Ngkana ti kabokorakora, ti aki riai n onimakinira ma ti na onimakina Iehova. E na kukurei Iehova ngkana ti kataia ni karekei maiura mani “korakoran te aoti,” n aron ae a kakarekea iai buokaia aomata? E aki! Ngaia are ti na aki onimakina “korakoran rangan te aomata,” bwa aongkoa ti kona ngaira ke tabemwaang ni karekea te kamaiuaki. (TaiAre. 147:10) Ma ti riai ni kawara Iehova ni bubutiia buokara. E kaokoro ma taan anga te taeka n reirei aika aomata bwa e aki kona n ebu n ongoraean ara bubutii, e ngae naba ngkana ti okioki ni butiia. “E kukurei Iehova irouia akana maakua, ao irouia akana kantaningaa ana tangira ae koaua.” (TaiAre. 147:11) Ibukina bwa iai ana tangira ae koaua, ti onimakinna bwa e na teimatoa ni mena iroura ao ni buokira n tokanikai i aoni baika ti tangiri aika bure.

14. Tera ae e koaua raoi iai te tia areru?

¹⁴ E karaui nanora Iehova bwa ti boni kona ni kakoauaa ae e na buokiia ana aomata ngkana iai kainnanoia. Ngke e iaiangoa manga katean Ierutarem te tia areru, e anene ni kangai ibukin Iehova: “E kamatoai kaini mataroan oon am kaawa, ao e kakabwaiaia natim mwaane akana iroum. E uota te raoi nakon am aono.” (TaiAre. 147:​13, 14) E kabebeteaki nanon te tia areru n ataakin ae te Atua e na kamatoai mataroan oon te kaawa, ibukini kamanoaia taan taromauria.

15-17. (a) Tera ara namakin n tabetai ibukini kataakira, ma e kangaa Iehova ni kamanena ana Taeka ni buokira iai? (b) Kabwarabwaraa bwa e kangaa ni ‘waekoa n roko ana taeka te Atua.’

¹⁵ Ko kona ni kaaitarai kangaanga aika karekea tabeaiangam. E kona n anganiko Iehova te wanawana bwa ko aonga n tokanikai. E taekina Atuana te tia areru bwa e “kanakoa ana tua nakon te aonnaba, ao e waekoa n roko ikekei ana taeka.” Imwina, e taekina Iehova bwa ‘e kanakoa te tino, e kamaenakoa te aoi ae te aiti ao e kabwakaa te karau ae te aiti,’ ao e titiraki ni kangai te tia areru: “Antai ae kona ni kaitaraa ana kamwaitoro?” E reitia n taekinna bwa Iehova e “kanakoa ana taeka ao e a ran te buraoki.” (TaiAre. 147:​15-18) E kona Atuara ae wanawana ma ni mwaaka ae taua aron te karau ae te aiti ma te tino, ni buokiko n tokanikai i aon am kangaanga.

¹⁶ Ni boong aikai, e kairirira Iehova n ana Taeka ae te Baibara. Ao ‘e waekoa n roko ana taeka,’ bwa e tauraoi n anganira kairara n te tai are ti kainnanoia iai. Iangoa kakabwaiaam mani warekan te Baibara, nenerani booki ake mairoun “te toro ae kakaonimaki ma ni wanawana,” matakuakinan te JW Broadcasting, kawaran te atureti ae jw.org, te maroro ma unimwaane, ao te ikoikotaki ma raao ni Kristian. (Mat. 24:45) Tiaki bwa ko a tia n nora waekoan Iehova ni katauraoa ana kairiri ibukim?

¹⁷ E a tia Simone n nora mwaakan Ana Taeka te Atua. E namakinna neiei bwa akea bongana, n te aro are e a nanououa  naba bwa e kukurei te Atua irouna ke e aki. Ma n taai ake e bwara nanona iai, e botumwaaka n tataro ni butiia Iehova buokana. E teimatoa naba ni katabetabea n ana ukeuke reirei n te Baibara. E taku: “I aki toki n namakina korakoran Iehova ao ana kairiri ni kangaanga ni kabane ake I rinanoi.” E buokaki n aei neiei bwa e na kateimatoa te iango ae raoiroi.

18. E aera ngkai ko namakina tangiram iroun te Atua, ao baikara bukina aika ko kan takaruaea iai “Karaoiroa Iah!”?

¹⁸ E ataia te tia areru ae e tangiriia ana aomata ake rimoa te Atua. Bon tii ngaiia te natannaomata ae a anganaki ana “taeka” te Atua ao “ana tua ma ana moti.” (Wareka Taian Areru 147:​19, 20.) Ni boong aikai, ti kakabwaiaaki bwa tii ngaira n te aonnaba ae ti aranaki n aran te Atua. Ngkai ti kinaa Iehova ao ti maiuakina ana Taeka, ti a karekea kakabwaiaara ae ti kona n iraorao ma ngaia. N aron te tia korea Taian Areru 147, tiaki a bati naba bukina aika ko kan takaruaea iai “Karaoiroa Iah!” ao ni kaungaia tabemwaang bwa a na karaoiroia naba?