N te kaongora are mai mwaina, ao e oti iai ae te Atua e nang waekoa ni kamauna te botannaomata ae aki tangira te Atua aei ma ana kangaanga ni kabane. Ti kona ni kakoauaa raoi bwa e na bon riki aei. Bukin tera? Ibukina bwa e boni beritanna te Baibara ae Ana Taeka te Atua:

“A tabe ni maunanako kaain te aonnaba.”​—1 IOANE 2:17.

Ti kona ni koaua raoi bwa e na iai aika kamaiuaki, ibukina bwa e taekinaki naba n te kibu ae i eta aei bwa:

“E teimatoa n aki toki ane e kakaraoa nanon te Atua.”

Ngaia are kiingini karekean te kamaiuaki, boni karaoan nanon te Atua. Ngkana ti kan ataia bwa tera nanon te Atua, ti riai moa n ataa te Atua.

E taku Iesu: “Ibukini karekean te maiu are aki toki, a riai n ataiko ae tii ngkoe te Atua ae koaua.” (Ioane 17:3) Ngkana ti na kamaiuaki n te toki aei ao ni maiu n aki toki, ti riai moa n ataa te Atua. E nanonaki n anne bwa e raka riki nakon ae ti na tii ‘ataa’ te Atua bwa iai ke n atai tabeua koaua ibukina. Ti riai naba n riki bwa raoraona. N aron ae ngkana ti kani kanakoraoa ara iraorao, ti riai ni kabanea ara tai iai. Ai bon titeboo naba anne ma ara iraorao ma te Atua. Ti na nori koaua tabeua aika kakawaki ake ti reiakini man te Baibara, aika buokira ni karikirakea ao ni kateimatoa ara iraorao ma te Atua.

Ti aki toki n amwarake bwa ti aonga n teimatoa ni maiu. Ma e taku Iesu: “E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.”​—Mataio 4:4.

Ni boong aikai, ao ti kona n nora ana taeka te Atua n iteranibaan te Baibara. Ngkana ko reirei n te boki ane tabu anne, ao ko na kunei koaua aika kakawaki, ni kaineti ma aroia aomata n reitaki ma te Atua n taai aika nako, n taai aikai, ao n taai aika a na roko.

Tera ae ko na karaoia ngkana ko kan ongeaba iroun te Atua, ma iroum e rangi ni kangaanga katokani mwakuri ake e taku bwa a kairua? N te aro anne, ko na bon rangi ni buokaki ngkana ko a ataa raoi te Atua.

Iangoa te aine ae ti na aranna bwa Sakura, ae maiuakina te aroaro ni maiu ae aki riai. Ngke e moana ana reirei n te Baibara ao e reiakina ana tua te Atua ae “birinako man te wene ni bure.” (1 I-Korinto 6:18) E tataro buokana Sakura nakon te Atua bwa e na kakorakoraaki ao e a kona ni katoka te mwakuri ae buakaka. Ma e teimatoa ni kekeiaki ma kataakina, e taku, “Ngkana e rio n au iango te iango ae aki riai, ao I a bon tataro naba nakon Iehova bwa I ataia bwa I aki kona ni kaitaraa aei n tii ngai. E buokai mwaakan te tataro bwa N na kaania riki Iehova.” Mirion ma mirion naba aomata ngkai aika a ataa te Atua n aron Sakura. E angania te korakora bwa a na kona ni karaoi bitaki ni maiuia ao ni maiu n te aro ae e na kukurei iai.​—I-Biribi 4:13.

Ngkana ko a ataa riki te Atua, ao ane ‘kam na ataaki iroun te Atua’ bwa raoraona. (I-Karatia 4:9; Taian Areru 25:14) Ao ko nang tau ngkanne nakon te kamaiuaki nakon ana aonnaba ae boou te Atua. Ma aekakira te aonnaba ane boou anne? E na kabwarabwaraaki n te kaongora ae imwina.