Ngkana e aki karika te rawawata te Atua, ao antai ae karika te baki ae rotiia aomata aika bati, te maiu ni kainnano, te buaka ae katuturaraa, aoraki aika kamwaukuia aomata, ao ai kabuanibwai aika karina? A kaotaki n Ana Taeka te Atua ae te Baibara tenua bukin rawawataia aomata:

1. Te Bangaomata, te Nanonrang, ao te Riribai. “A tautaeka iai aomata i aoia aomata, ni karekea rawawataia.” (Te Minita 8:9) A aki toki n rawawata aomata bwa a karawawataaki irouia aomata aika aki kororaoi, a bangaomata, ke a iowawa.

2. Te Tai Are A Riki Iai Baika Aki Kantaningaaki. A rarawawata aomata “ibukina bwa a taonakinako ni kabane n te tai are a riki iai baika aki kantaningaaki.” (Te Minita 9:11) Nanon anne bwa a mena aomata n te tabo ao n te tai ae a aki kantaningaia bwa a na riki iai kabuanibwai, ke a bon aki taratara raoi ke a boni kairua.

3. Te Tia Tautaeka ae Buakaka n te Aonnaba. E katerea bukin raoi rawawataia aomata te Baibara. E taku: “A bane kaain te aonnaba ni mena i aani mwaakan teuare buakaka.” (1 Ioane 5:19) “Teuare buakaka” bon Tatan te Riaboro, ae te taamnei ae mwaaka are bon ana anera ngkoa te Atua, ma “e aki teimatoa n te koaua.” (Ioane 8:44) A a manga raona riki Tatan anera ake tabeman ni karitei nakon te Atua bwa a aonga ni karekea te bae a tangiria, are a a karikiia iai bwa taimonio. (Karikani Bwaai 6:1-5) Mai imwin aia karitei anne ao Tatan ma ana taimonio a a kabongana mwaakaia ni kaira te waaki n te aonnaba aei n te aro n iowawa. A a rangi ni kakorakoraia riki n ara bong aikai. E a rangi n un ngkai te Riaboro ao e a “burebureiia kaain te aonnaba ni kabutaa,” ao ibukin anne e a “reke kain aon te aba.” (Te Kaotioti 12:9, 12) Bon te tia tautaeka ae buakaka Tatan. E rauaki ngkana a rawawata aomata. Bon Tatan ae karika rawawataia aomata ao tiaki te Atua.

IANGOA AEI: Bon tii te aomata ae akea ana nanoanga, ao ae karoton te buakaka ae e kona ni karawawataia aomata aika akea aia bure. Ma e taku te Baibara: “Te Atua bon te tangira.” (1 Ioane 4:8) Ibukin aroarona ae tatangira, “e bon aki kona te Atua ae koaua n iangoa karaoan ae buakaka, ao Teuare Moan te Mwaaka bwa e na karaoa ae kairua!”—Iobi 34:10.

Ma ko na bae n iango ni kangai, ‘E na maanra te Atua ae Moan te Mwaaka ni kariaia Tatan bwa e na waakina ana kairiri ae rangi ni buakaka?’ N aron ae ti a tia n noria, e ribaa te buakaka te Atua ao e rangi ni maraki naba n rawawatara. E kaumakira naba ana Taeka ni kangai: “Kabanei ami iango n raraoma ni kaaki i aona, ibukina bwa e mumutiakiningkami.” (1 Betero 5:7) E tangirira ao iai mwaakana ni katoka te rawawata ni kabane ao te ribuaka, n aron ae e na kabwarabwaraaki n te kaongora ae imwina. *