Eng, bon iai anera aika buakaka. A riki mai ia? Uringnga are e karikiia anera te Atua ma te bwaintangira ae inaomataia. Tabeua te tai imwini karikan te moani mwaane ao n aine are Atam ma Ewa, ao e a kabongana buaka naba inaomatana n rinerine, te anera temanna are kororaoi, ao ni kauekea te karitei n te aonnaba. E nakoraoi ana waaki ni kairaraangia Atam ma Ewa bwa a na karitei nakon te Atua. (Karikani Bwaai 3:​1-7; Te Kaotioti 12:9) E aki kaotaki raoi n te Baibara aran te anera aei ke te karinan n anera raa ngaia i karawa imwaini kariteina. Ma imwin ana karitei ao e a aranna te Baibara bwa Tatan, ae nanona “Te Tia Kakaaitara,” ao te Riaboro ae nanona “Te Tia Uarao.”​—Mataio 4:​8-11.

E kananokawaki bwa e aki toki ikai te karitei nakon te Atua. N ana bong Noa ao iai anera aika aki ataaki mwaitiia ake a “kitan oini mwengaia ae riai,” ake kaain ana utu te Atua i karawa. A ruo nakon te aonnaba ao n onikiia bwa aomata bwa a na karaoi mwakuri aika buakaka ao ni kammaira, ae kaokoro ma are e kantaningaaki ibukia ngke a karikaki.​—Iuta 6; Karikani Bwaai 6:​1-4; 1 Betero 3:​19, 20.

Tera ae riki nakoia anera akana buakaka akanne? Ngke e karokoa te ieka are kabutaa te aonnaba te Atua bwa e na kaitiakia, ao a a manga onikiia bwa taamnei ao n okira karawa. Ma e aki roko n te kariaia anera aika tau ni kamaamaeaki aikai te Atua bwa a na okira ‘mwiokoaia ngkoa.’ Ma e karenakoia nako Tatarati, ae kabotauaki ma te karabuuti. Moan te mangori aroaroia iai, ao a mena n “te rotongitong” ni kaineti ma ataakin ana kantaninga te Atua. (Iuta 6; 2 Betero 2:4) A kaakiia taimonio aikai i bon irouia i aani mwaakan Tatan te Riaboro, are “aia tia tautaeka taimonio,” are “e oninikia . .  . bwa te anera ae kaotiota te oota.”​—Mataio 12:24; 2 I-Korinto 11:14.

E reiakinaki n te Baibara bwa e tei n 1914 Ana Tautaeka n Uea te Atua rinanon te Mesia, ae te tautaeka i karawa. * Imwin te tai ane kakawaki anne, ao a a karenakoaki Tatan ma ana taimonio mai karawa ao ni katukaki n te aonnaba. Taabangakin te buakaka ao te aroaro ae kammaira n ara aonnaba aei, e oti iai korakoran unia ao aia kariri ae korakora.​—Te Kaotioti 12:​9-12.

Ma rikiraken te buakaka ao te iowawa ae korakora, e oti iai bwa e a kaan tokin aia tai n tautaeka ae kakamaaku. E nang waekoa ni katokaki aia waaki anera aika karawawataa te aba aikai. A na manga anganaki aia tai teutana anera aika buakaka aikai bwa a na kataiia aomata, imwini koron ana tai ni kairiri Ana Tautaeka n Uea te Atua ae 1,000 te ririki n te aonnaba ae te bwaretaiti. Ao imwina a a kamaunaaki naba n aki toki.​—Mataio 25:41; Te Kaotioti 20:​1-3, 7-10.