E A KAMAN riki te angakarea bwa te bwai ae rangi ni kakawaki ae kanoan naba te taromauri ae koaua. A anganga karea aika maan tibun Iteraera, ao a rangi n ataaki Kristian n taai aikai ibukin aia “karea ni karaoiroi.” Ma iai riki karea tabeua ake e kukurei iai te Atua. (Ebera 13:​15, 16) A karekea te kukurei ao kakabwaia karea aikai, n aron ae oti ni katoto aika imwina.

Bon ana toro te Atua ae kakaonimaki ngkoa Anna, ae e rangi n tangira reken natina te mwaane ma e kanoabo. E taetae ni bau nakon Iehova n ana tataro bwa ngkana e reke natina te mwaane ao e na “anga ngaia [nakon] Iehova ni kabane bongini maiuna.” (1Tam. 1:​10, 11) Imwina riki, e a bikoukou Anna ao e bungia natina te mwaane ao e aranna bwa Tamuera. Ngke e tia ni kakoriraki Tamuera, e a kairia Anna nakon te umwanrianna ae tabu, n aron are e beritanna. E kakabwaiaa Anna Iehova ibukin arona ni kakeaa n taona nanona ngke e anga natina. E kakabwaiaaki bwa a a manga reke riki niman natina, ao Tamuera e riki bwa te burabeti ao te tia korea naba te Baibara.​—1Tam. 2:21.

N aron Anna ao Tamuera, a kakabwaiaaki naba Kristian ni boong aikai ngkai a kona ni kabonganai maiuia n aia beku ibukin aia tia Karikiriki. E berita Iesu bwa baike ti kakeaira iai ibukin taromaurian Iehova, e na bon reke booni mwina ae bati riki.​—Mareko 10:​28-30.

N te moan tienture, e kinaaki te aine ae te Kristian ae Toreka ibukin ana “mwakuri aika bati aika raraoi” ao e “anganga bwaai n tituaraoi,” ae ana karea ibukini buokaia tabemwaang. Ma e kananokawaki bwa “e bwaka n aoraki . . . neiei ao e mate,” ao a a rangi n nanokawaki kaain te ekaretia. Ma ngke a ongo ae e mena Betero n te tabo ae uakaan, ao a a bubutiia bwa e na waekoa ni kawariia. Iangoa kimwareireia ngke e roko Betero ao e kauta Toreka man te mate! Anne te moani kautiuti ae e karaoaki iroun te abotoro ae koreaki taekana! (Mwa. 9:​36-41) E aki mwanuokin te Atua ana karea Toreka. (Ebera 6:10) E kawakinaki rongorongon ana tituaraoi neiei n Ana Taeka te Atua, bwa te katoto ae tamaroa ae ti na kakairi iai.

N aron naba anne, e katea te katoto ae tamaroa te abotoro Bauro n tituaraoi n anga ana tai ao ni mwannanoiia tabemwaang. E korea aei nakoia taari i Korinto: “Bwa ngai irou, I kukurei riki n anga bwaai ni kabane ao ni kabonganaaki ibukimi.” (2Kor. 12:15) E ataia Bauro mani baike e rinanoi bwa e aki tii karekea raun nanona man arona n anga ngaia ibukia tabemwaang, ma ae kakawaki riki, e karekea kakabwaiaana ao akoana iroun Iehova.​—Mwa. 20:​24, 35.

E teretere bwa e kukurei Iehova ngkana ti kabonganai ara tai ao korakorara ibukini karikirakean te Tautaeka n Uea ao buokaia raora n te onimaki. Ma iai riki aanga tabeua ake ti kona iai ni boutokaa te mwakuri n tataekina te Tautaeka n Uea? Eng! Irarikin ara mwakuri n tangira aika bati, ti kona naba ni karinea te Atua n ara bwaintangira aika nako mai nanora. A kabonganaaki bwaintangira aikai ibukini karababaan te uarongorongo ni katobibia te aonnaba, ae irekereke ma boutokaaia mitinare ao naake a kabwanina aia tai n te mwakuri ae okoro. Irarikin anne, a mwanenaki naba iai katauraoan ao rairakini booki ma taamnei, ibuobuoki n tain te kabuanibwai, ao katean Taabo n Taromauri aika boou. Ti kona ni kakoauaa raoi bwa “e na kakabwaiaaki te aomata ae tituaraoi.” Irarikin anne, ti karinea Iehova ngkana ti anga ara bwai aika kakawaki nakoina.​—TaeRab. 3:9; 22:9.