1. Tera aia iango aomata aika bati ibukin te mwakuri?

TERA aia iango angia kaain am tabo ibukin te mwakuri? N aaba aika bati, a a mwakuri korakora riki aomata i nanon aoa aika bati nakon are mai mwaina. Aomata aika riao mwamwakuria e a aki reke aia tai ni motirawa, ni mena i rarikia aia utu, ke n reiakina taekan te Atua. (TeMin. 2:23) N te itera are teuana, iai aika a bon aki kani mwamwakuri teutana, ao a karekei aonaia iai.​—TaeRab. 26:​13, 14.

2-3. Tera aia katoto Iehova ao Iesu ibukin te mwakuri?

² A bati kaain te aonnaba aika riao mwamwakuria ao iai naba aika aki mwamwakuri. Ma nora ana iango Iehova ao Iesu ibukin te mwakuri. Akea te nanououa bwa e mwamwakuri Iehova. E kaota raoi anne Iesu ngke e taku: “E teimatoa ni mwakuri Tamau ni karokoa ngkai, ao ngai naba I teimatoa ni mwakuri.” (Ioa. 5:17) Iangoi ana mwakuri te Atua ake e karaoi ngke e karikiia anera aika mwaitikurikuri ao te iuniweeti ae buburakaei. Ti nora naba koauan ana mwakuri ni karikibwai te Atua n te aonnaba ae tamaroa ae ti maeka iai. E bon eti ana taeka te tia areru aei: “Ai mwaitira am mwakuri ngkoe ae Iehova! Ko karaoi ni kabane n te wanawana. E on te aonnaba ni baike ko karaoi.”​—TaiAre. 104:24.

³ E kakairi Iesu iroun Tamana. E aranaki te Nati bwa te wanawana, ao e buoka te Atua ngke e “katauraoa karawa.” E raona Iehova “bwa te tia mwakuri ae mwaatai.” (TaeRab. 8:​27-31) Imwina riki ni menan Iesu i aon te aba, e karaoa te mwakuri ae rianako. Titeboo te mwakuri anne ma kanana, ao baike e karaoi a kaota koauan ae e boni kanakoaki iroun te Atua.​—Ioa. 4:34; 5:36; 14:10.

4. Tera reireiara mairoun Iehova ao Iesu ibukin te motirawa?

 ⁴ Te koaua bwa aia katoto Iehova ao Iesu ibukin te mwakuri korakora, e nanonaki iai bwa ti aki riai ni motirawa? Tiaki ngaia anne. E aki kona ni kua Iehova ngaia are e aki kainnanoa te motirawa. Ma e taekinna te Baibara bwa imwini karikani karawa ao te aonnaba irouna, “e motirawa n te kaitiua ni bong ma ni motika rawana iai.” (TeOti. 31:17) E nanonaki iai bwa e katoka ana mwakuri Iehova ao e karekea kukureina ni baike e karaoi. Ao e ngae ngke e mwakuri korakora Iesu ni menana i aon te aba, ma e boni karekea naba ana tai ni motirawa ao n amwarake ni kukurei ma raoraona.​—Mat. 14:13; Ruka 7:34.

5. Tera te kangaanga ae a kaitaraa ana toro te Atua aika bati?

⁵ A kaungaaki ana aomata te Atua n te Baibara bwa a na mwamwakuri. A riai ana toro ni mwakuri korakora ao n aki taningaroti. (TaeRab. 15:19) Tao ko mwakuri ni kareketianti ibukia am utu. Ao a bane ni kabaeaki taan rimwini Kristo bwa a na uataboa tataekinan te rongorongo ae raoiroi. Ma ko bon riai naba ni karekea am tai ni motirawa ae tau. Ko namakinna n tabetai bwa e a aki tau am tai ibukin te mwakuri ni kareketianti, te mwakuri ni minita, ao te motirawa? Ti na kangaa n ataia bwa mwaitira ae ti riai ni karaoia ao mwaitira ara tai ni motirawa?

6. E kangaa Mareko 6:​30-34 ni kaotia bwa e bwaina te iango ae riai Iesu ibukin te mwakuri ao te motirawa?

⁶ E kakawaki bwainan te iango ae riai ibukin te mwakuri. E kairaki n te taamnei te Uea ae Toromon bwa e na korea aei: “Iai te tai ae baireaki . . . ibukini mwakuri nako.” E taekina te ununiki, te kateitei, te tang, te ngarengare, te mwamwaie, ao mwakuri riki tabeua. (TeMin. 3:​1-8) E teretere bwa iai baika uoua aika kakawaki ni maiura, bwa te mwakuri ao te motirawa. E bwaina te iango ae riai Iesu ibukin te mwakuri ao te motirawa. N te tai teuana, a oki abotoro imwin aia mwakuri n uarongorongo. A rangi n tabetabe n te aro are ai “akea aia tai . . . ni motirawa ke ni kamarikeia.” E taku Iesu: “Kam na irai bwa ti na nako ni kaokoroira n te tabo ae raroa ao kam na motirawa iai teutana.” (Wareka Mareko 6:​30-34.) E ngae ngke e aki rereke n taai nako ana tai ma taan rimwina ni motirawa, ma e ataia Iesu ae a bane ni kainnanoa te motirawa.

7. Ti na kangaa ni buokaki man rinanoan te tua ibukin te bongi n Taabati?

⁷ N tabetai e a boni kainnanoaki te motirawa teutana ke bitakin ara babaire. Ti kona n nora anne man ana babaire te Atua ibukia ana aomata rimoa, ae kawakinan te bongi n Taabati ni katoa wiki. Ti a aki mena i aan te Tua Rinanoni Mote, ma ti kona ni kakabwaiaaki man rinanoan te bae taekinaki iai ibukin te bongi n Taabati. E kona ni buokira reireiara mai iai n nenera ara iango ibukin te mwakuri ao te motirawa.

8. Ni kaineti ma Te Otinako 31:​12-15, e karekeaki te bongi n Taabati ibukin tera?

⁸ E kaotaki n Ana Taeka te Atua bwa imwin onoua “te bong” ni karikibwai, ao e a toki ana mwakuri ni karikibwai te Atua n te aonnaba. (KBwaai 2:2) Ma e kani mwamwakuri Iehova, ngaia are e “teimatoa ni mwakuri” n aanga tabeua. (Ioa. 5:17) Te babaire ae kawakinan te bongi n Taabati ni katoa wiki, bon titeboo ma tein ana bong ni motirawa Iehova are taekinaki ni Karikani Bwaai. E taekinna te Atua bwa te bongi n Taabati bon te kanikina i marenana ma tibun Iteraera. Bon te bong “ni motirawa  . . .  ae tabu nakon Iehova.” (Wareka Te Otinako 31:​12-15.) Akea ae e kariaiakaki ni mwakuri n ikotaki ma ataei, tooro, ao maan naba. (TeOti. 20:10) E a reke iai aia tai aomata n iaiangoi bwaai n taamnei.

9. Tera te iango ae aki riai ibukin te bongi n Taabati n ana bong Iesu?

⁹ E raoiroi te bongi n Taabati ibukia ana aomata te Atua, ma a bati mataniwi n Aaro n ana tai Iesu ake a karaoi tuua aika riao ibukin te bong anne. A taekinna bwa e katabuakaki naba n te bongi n Taabati kinikan amwi ni uita ke kamarurungan te aomata ae aoraki. (Mareko 2:​23-27; 3:​2-5) Ma bon tiaki anne ae e tangiria te Atua, ao e katereterea anne Iesu nakoia naake a ongora.

10. Tera reireiara ni Mataio 12:​9-12 ibukin ana iango Iesu ni kaineti ma te bongi n Taabati?

¹⁰ A kawakina te bongi n Taabati Iesu ma taan rimwina aika I-Iutaia ibukina bwa a mena i aan te Tua Rinanoni Mote. * Ma e kaotia Iesu n ana taeka ao n ana mwakuri bwa e aki bure karaoani mwakuri n akoi ao n ibuobuoki n te bongi n Taabati. E taku: “E boni kariaiakaki karaoan te mwakuri ae raoiroi n te bongi n Taabati.” (Wareka Mataio 12:​9-12.) E aki iangoa te mwakuri n akoi ao n ibuobuoki bwa a urua te bongi n Taabati. E katereterea Iesu ni baike e karaoi bwa e ataa kakawakin te bongi n Taabati. Ibukina bwa a motirawa ana aomata te Atua man aia mwakuri korakora, a a kona ni kaatuui aia iango i aon taromaurian te Atua. E ikawairake Iesu n te utu ae a bae ni kakamanena te bongi n Taabati ibukin taromaurian  te Atua. E kaotaki anne n te bae ti warekia ibukin Iesu ngke e mena n ana kaawa ae Natareta, ae kangai: “E rin i nanon te tinakoka n aron are e tataneiai iai [Iesu] n te bongi n Taabati, ao e teirake bwa e na wareboki.”​—Ruka 4:​15-19.

11. Tera te katoto ae raoiroi are e kateia Iesu ibukin te mwakuri?

¹¹ Bon titeboo ana iango Ioteba ma te Atua ibukin te mwakuri, ngaia are e reireina natina are e kaikawaia ae Iesu bwa e na riki bwa te kabentaa. (Mat. 13:​55, 56) Ao e boni bae Iesu n nonora Ioteba ni mwakuri korakora ni katoabong ibukini boutokaan ana utu ae bubura. E kakaongora bwa e taekina aei Iesu imwina riki nakoia taan rimwina: “E riai bwa e na anganaki te tia mwakuri boona.” (Ruka 10:7) Eng, e taneiai Iesu n te mwakuri korakora.

12. Baikara kiibu ake a kaota ana taeka te Baibara ibukin te mwakuri korakora?

¹² Titeboo naba ma te abotoro Bauro. Ana mwakuri ae kakawaki riki boni kaotiotan aran Iesu ma ana angareirei. Ma e mwakuri ni kareketianti naba Bauro ibukini boutokaana. A ataia raoi I-Tetaronike bwa e “bekutata ma te korakai ni ngaina ao ni bong” bwa e aonga n aki karawawataa temanna “n te kabanemwane ae bati.” (2Tet. 3:8; Mwa. 20:​34, 35) E bae n nanona Bauro ana mwakuri ni karaoi umwanrianna aika kunnikai. Ni menana i Korinto, e tiku i rarikia Akura ma Beritikira ao e “mwamwakuri ma ngaiia, bwa bon taani karaoi umwanrianna aika kunnikai.” Ma tiaki nanona bwa e a boni mwamwakuri nako naba Bauro ngke e taekinna bwa e mwakuri “ni ngaina ao ni bong.” E momotirawa naba man ana mwakuri ni karaoi umwanrianna. N te katoto, e motirawa n te bongi n Taabati. E reke ana tai iai n uarongorongo nakoia I-Iutaia ake a aki mwakuri naba n te bongi n Taabati.​—Mwa. 13:​14-16, 42-44; 16:13; 18:​1-4.

13. Tera reireiara man ana katoto Bauro?

¹³ E katea te katoto ae raoiroi te abotoro Bauro. E riai ni mwakuri ni kareketianti, ma e taraia raoi naba bwa e na katoatai n uataboa “te mwakuri ae tabu ae tataekinan te rongorongo ae raoiroi ibukin te Atua.” (IRom 15:16; 2Kor. 11:23) E kaungaia tabemwaang bwa a na karaoa naba anne. Akura ao Beritikira bon ‘raoni [Bauro] ni mwakuri i nanoni Kristo Iesu.’ (IRom 12:11; 16:3) E kaungaia kaaini Korinto Bauro bwa a na ‘kakorakoraia n ana mwakuri te Uea ni kamwaiti.’ (1Kor. 15:58; 2Kor. 9:8) E kaira naba te abotoro Bauro Iehova bwa e na korea aei: “Ngkana iai ae e aki kani mwakuri ao ke e tai amwarake.”​—2Tet. 3:10.

14. Tera ae e nanonna Iesu n ana taeka ake n Ioane 14:12?

¹⁴ Te mwakuri ae moan te kakawaki ni kabaneani boong aikai bon te uarongorongo ao karekeaia taan rimwini Kristo. E bon taetae ni burabetinna Iesu bwa a na karaoi mwakuri aika kakannato riki taan rimwina nakon ana mwakuri! (Wareka Ioane 14:12.) E aki nanonna bwa ti na karaoi kakai n aron are e karaoia. Ma e nanonna bwa a na uarongorongo ao n angareirei taan rimwina n te aono ae bubura riki, nakoia aomata aika bati riki, ao n te tai ae maan riki, nakon are e karaoia.

15. Baikara titiraki aika ti riai n titirakinira iai, ao bukin tera?

¹⁵ Ngkana ko mwakuri ni kareketianti, titirakiniko ni kangai: ‘I ataaki n au tabo ni mwakuri bwa I mwakuri korakora? I katiai au mwakuri i aon taia ao n aron au kabanea ni konaa?’ Ngkana am kaeka eng, e na bae n onimakiniko am tia kammwakuri, ao a na kan ongora riki naba n rongorongon te Tautaeka n Uea raom ni mwakuri. Ni kaineti ma te mwakuri n uarongorongo ao n  angareirei, titirakiniko ni kangai: ‘I ataaki bwa I mwakuri korakora n te mwakuri ni minita? I kakatauraoi raoi imwaini kawaraia aomata? I waekoa n okiriia naake a kan ongora ni maroro ma ngaiia? Ao I katoatai n uataboi iteran te mwakuri ni minita aika kakaokoro?’ Ngkana am kaeka eng, ko na boni karekea kimwareireim n am mwakuri.

16. Tera kaokoron ana iango Iesu ma ana abotoro ibukin te motirawa, ni kabotauaki ma aia iango aomata aika bati ni boong aikai?

¹⁶ E ataia Iesu ae n tabetai e kainnanoa te motirawa ma ana abotoro. Ma a bati aomata n taai akanne ao ni boong aikai naba aika kona ni kabotauaki ma te mwaane ae kaubwai are n ana kaikonaki Iesu. E taku te mwaane anne i nanona: “N nangi bon aorai n amwarake ma ni moi, ao ni kimwareirei.” (Ruka 12:19; 2Tim. 3:4) E iangoia bwa e kakawaki riki te motirawa ao te kakukurei. Ma a aki kabotoi maiuia Iesu ao ana abotoro i aoni kakukureiaia i bon irouia.

17. Tera arora ni kamanenai ara tai ake ti a aki mwakuri ni kareketianti iai?

¹⁷ Ni boong aikai, ti kataia ni katotonga Iesu n arora ni kamanenai raoi ara tai ake ti a aki mwakuri ni kareketianti iai. Ti kamanena ara tai anne tiaki tii ibukini karekeani motirawara ma ibukin naba karaoani baika raraoi, n aron te uarongorongo ao kaeani bobotaki ni Kristian. E rangi ni kakawaki iroura te mwakuri ni karekeia taan rimwini Kristo ao kaeani bobotaki, ngaia are ti kakorakoraira ni kakaraoi baikai. (Ebera 10:​24, 25) E ngae ngkana ti nakon te tabo teuana ni motirawa iai, ma ti teimatoa ni kaei bobotaki n taabo ake ti mena iai, ao ti kakaaei aanga ake ti kona iai ni moana te maroro ma naake ti kaitiboo ma ngaiia.​—2Tim. 4:2.

18. Tera ae e tangiria ara Uea ae Kristo Iesu bwa ti na karaoia?

¹⁸ Ti kakaitau bwa e aki kantaningaa ae riaon ara konaa ara Uea ae Kristo Iesu, ao e buokira naba bwa ti na bwaina te iango ae riai ibukin te mwakuri ao te motirawa! (Ebera 4:15) E tangiria bwa ti na karekea motirawara ae tau. E tangiria naba bwa ti na mwakuri korakora ibukini karekeani baika ti kainnanoi ao n uataboa te mwakuri ae kakukurei ae karekeaia taan rimwini Kristo. N te kaongora are imwina, ti na maroroakina taben Iesu ni kaineti ma kainaomataara man te bwai teuana ae ti tautoronaki iai.