1-2. Baikara kangaanga ake a kaaitarai ana aomata Iehova aika bati, ao tera aron rotakia iai?

IANGOI baika riki aika tenua aikai: E tuangaki te tari te mwaane ae ataei bwa e ituaki n te aoraki ae e na rikirake ni kakaiaki iai. E bua ana mwakuri te tari ae te rorobuaka matoa ae mwakuri korakora, ao e kakorakoraa ni kakaaea ana mwakuri teuana ma e aki reke. E a aki kona ni karaoa are e taneiai ni karaoia n ana beku ibukin Iehova, te tari te aine ae kakaonimaki ae e a kara.

² Ngkana ko rinanon teuana mai buakon akanne, ko bae n namakina ae ai akea bongam. A kona kangaanga akanne ni kabuaa kimwareireim, ni karekea namakinan ae ai akea bongam, ao n urua reitakim ma tabemwaang.

3. Tera ana iango Tatan ma naake a kairaki irouna, ni kaineti ma kakawakini maiuia aomata?

³ N te waaki ae ngkai i aon te aba, e a kaotiotaki ana iango Tatan ibukini maiuia aomata. Aroaron Tatan nakoia aomata e kaotia iai bwa bon akea bongaia. E bangaomata n tuanga Ewa bwa e na inaomata ngkana e aki ongeaba iroun te Atua, e ngae ngke e bon ataia ae e na mate iai. Bon Tatan ae kairi waaki ni bitineti, tautaeka, ao Aaro, n te aonnaba aei. Ngaia are ti aki mimi ngkai a bati taani bitineti, taan tautaeka, ao mataniwi n Aaro, aika aki karinei maiuia aomata ao a aki tabe ma aia namakin.

4. Tera ae ti na rinanona n te kaongora aei?

⁴ N te itera are teuana, e tangiria Iehova bwa ti na namakinna  ae ti kakawaki, ao e buokira ngkana ti kaaitara ma baika riki ake a na karekea namakinan ae akea bongara. (TaiAre. 136:23; IRom 12:3) E na maroroakinaki n te kaongora aei aron Iehova ni buokira n itera aikai: (1) Ngkana ti rotaki n te aoraki, (2) ngkana ti kaaitara ma aki taun te mwane, ao (3) ngkana ti a kara ao ti a namakina ae ai akea te bwai ae ti kona ni karaoia ae manena ibukin Iehova. Ma ti na noria moa bwa e aera ngkai ti kona ni kakoauaa raoi bwa ti kakawaki iroun Iehova n tatabemanira nako.

5. Tera ae ko kakoauaa iai bwa a kakawaki aomata iroun Iehova?

⁵ E ngae ngke ti karikaki man te tano, ma ti boni kakawaki riki nakon te tano. (KBwaai 2:7) Iangoi bukina tabeua aika ti ataia iai bwa ti kakawaki iroun Iehova. E karikiia aomata ma aia konabwai ae a kona ni katotonga aroarona. (KBwaai 1:27) Ni karaoan anne, e a karietataira riki i aon ana karikibwai nako n te aonnaba, bwa e mwiokoira bwa ti na taua aron te aonnaba ma maan.​—TaiAre. 8:4-8.

6. Tera riki bukina ae ti kakoauaa iai bwa a kakawaki iroun Iehova aomata aika aki kororaoi?

⁶ E ngae naba ngke e a tia ni bure Atam, ma a teimatoa ni kakawaki aomata iroun Iehova. Ti rangi ni kakawaki irouna n te aro are e a anga Natina ae tangiraki ae Iesu bwa te kaboomwi ibukin ara bure. (1Ioa. 4:9, 10) Man te kaboomwi anne, e na kautiia Iehova naake a a tia ni mate imwin ana bure Atam, ‘aika raoiroi ma aika aki raoiroi.’ (Mwa. 24:15) E kaotaki n ana Taeka bwa ti rangi ni kakawaki irouna, e ngae ngke ti aoraki, ti maiu ni kainnano, ke ti a kara.​—Mwa. 10:34, 35.

7. Baikara riki bukina ake a kona iai ana toro Iehova ni kakoauaa bwa a boni kakawaki irouna?

⁷ Iai riki bukina aika ti kona ni kakoauaa iai bwa ti kakawaki iroun Iehova. E a tia ni katikira nakoina ao e nora arora ni butimwaea te rongorongo ae raoiroi. (Ioa. 6:44) Ngkana ti kaania Iehova, e na boni kaanira naba. (Iak. 4:8) E kabanea naba ana tai Iehova ao korakorana n reireinira, ni kaotia bwa ti rangi ni kakawaki irouna. E atai arora aika ngkai n tatabemanira nako, ao e ataia naba ae ti kona ni kanakoraoi riki. E reireinira naba ni kaetiira ibukina bwa e tangirira. (TaeRab. 3:11, 12) Anne bon te bwai ni kakoaua bwa ti kakawaki iroun Iehova!

8. A na kangaa taeka ake n Taian Areru 18:​27-29 n rotii arora n iaiangoi ara kangaanga?

⁸ A iangoia tabeman bwa akea bongan te Uea ae Tawita, ma e ataia Tawita bwa e tangiria Iehova ao e boutokaia. E buokaki n anne bwa e na bwaina te iango ae riai ni kaineti ma kangaanga ake e kaaitarai. (2Tam. 16:5-7) Ngkana ti namakina te bwarannano ke ti kaaitara ma kangaanga, e kona ni buokira Iehova n iangoi bwaai n te aro ae kaokoro, ao ni buokira n tokanikai i aoni kangaanga nako. (Wareka Taian Areru 18:27-29.) Ngkana e boutokaira Iehova, akea te bwai ae kona n tukira man ara beku ibukina ma te kimwareirei. (IRom 8:31) Ti na nori itera akana tenua akanne ake ti kainnanoa riki iai ururingan ae e bon tangirira Iehova ao ti kakawaki irouna.

9. Tera arora n iangoira ngkana ti aoraki?

⁹ E kona ni karawawataira te aoraki ao ni karekea namakinan ae ai akea bongara. Ti kona ni maamaa ngkana ti noraki bwa e a kerikaaki ara konabwai, ke ngkana ti a riai ni katan i aaia tabeman ibukini buokara. E  ngae ngke a aki ataia tabemwaang ae ti aoraki, ma ti kona ni kabokorakora ma namakinan te maamaa ibukini kerikaakin ara konabwai. N taai akana karawawata akanne, e boni kaungai nanora Iehova. N te aro raa?

10. Ni kaineti ma Taeka N Rabakau 12:​25, tera ae kona ni buokira ngkana ti aoraki?

¹⁰ Ngkana ti aoraki, e kona ni kaungai nanora “te taeka ae raoiroi.” (Wareka Taeka N Rabakau 12:25.) N te Baibara, e kawakin iai Iehova taeka aika raraoi aika kauringira bwa ti rangi ni kakawaki irouna, e ngae ngke ti aoraki. (TaiAre. 31:19; 41:3) Ngkana ti wareki taeka aika kairaki koreaia n te taamnei aikai ao n okioki ni wareki, e na boni buokira Iehova n tokanikai i aon namakin aika kabwaranano ngkana ti aoraki.

11. E kangaa te tari te mwaane temanna ni buokaki iroun Iehova?

¹¹ Iangoa rongorongon Jorge. Ngke te roro n rikirake teuaei e a reke irouna te aoraki teuana ae ririkirake ni kakaiaki, ao e a namakinna iai bwa ai akea bongana. E taku Jorge: “I aki tauraoi ni kaitaraa te namakin are reke man aorakiu n ikotaki ma te maamaa ngkai a a tataraai aomata. Ngke e a kekerikaaki marurungiu, I iaiangoa aroni bitakini maiuu iai. E uruaki nanou ao I bubutiia Iehova ana ibuobuoki.” Tera aron Iehova ni kateimatoa? E taku teuaei: “I aki kona ni kaatuua au iango, ngaia are I a kaungaaki bwa N na wareki kibun Taian Areru aika uarereke ake a kaota ana mwamwannano Iehova ibukia ana toro. I okioki ni wareki kiibu akanne ni katoabong, ao I noria bwa a rangi ni kabebetenano. Imwina riki, a a noria tabemwaang bwa I a momoangare riki. A tuangai naba bwa a kaungaaki man arou ni kateimatoa kukureiu. I ataia ae e kaekai au tataro Iehova! E buokai bwa N na bita arou n iaiangoa au kangaanga.  I a iaiangoa riki ngkai te baere kaotaki n ana Taeka ni kaineti ma ana iango ibukiu, e ngae ngke I aoraki.”

12. Ko na kangaa ni karekea buokam mairoun Iehova ngkana ko kabokorakora ma te aoraki?

¹² Ngkana ko kabokorakora ma te aoraki, karaua nanom bwa e bon nora Iehova te bwai ae ko rinanona. Bubutiia ana ibuobuoki bwa ko aonga ni karikirakea te iango ae riai ibukin aorakim. Ao kamanena te Baibara ibukini karekean taeka aika karaunano, ake e kawakin Iehova ibukim. Iaiangoi riki kiibu ake a kaotaki iai bwa a rangi ni kakawaki iroun Iehova ana toro. Ni karaoan anne, ko na noria iai bwa e raoiroi Iehova nakoia akana kakaonimaki ni beku ibukina.​—TaiAre. 84:11.

13. Tera ae kona n namakinna atun te utu ngkana e bua ana mwakuri?

¹³ A tangiria atun utu nako bwa a na kona ni katauraoi baike a kainnanoi kaain aia utu. Ma iangoia bwa e bua ana mwakuri te tari te mwaane temanna, e ngae ngke bon tiaki ana bure. E kakorakoraa ni kakaaea ana mwakuri teuana, ma e bon aki reke. Ibukin anne, e a kona n namakinna bwa ai akea bongana. E na kangaa ni buokaki mani kaatuuan ana iango i aon ana berita Iehova?

14. E aera ngkai e kakakoroi bukin ana berita Iehova?

¹⁴ E kakoroi bukin ana berita Iehova n taai nako. (Iot. 21:45; 23:14) E karaoa anne i aani bukina aika bati. Te moan, e bon irekereke iai arana ao taekana. E a tia Iehova ni berita bwa e na tabeakinia ana toro aika kakaonimaki ni koaua, ao e kabaeaki iai bwa e na boni kakoroa bukin anne. (TaiAre. 31:1-3) Irarikina, e ataia Iehova ae ngkana e aki tabeakinia kaain ana  utu, a na boni bwara nanora. E berita bwa e na boni katauraoi baika ti kainnanoi n te itera n rabwata ao n te itera n taamnei, ao bon akea te bwai ae e na tukia mani kakororaoan ana berita anne!​—Mat. 6:30-33; 24:45.

15. (a) Tera te kangaanga are a kaitaraa Kristian n te moan tienture? (b) Ni kaineti ma Taian Areru 37:​18, 19, tera ae ti kona ni kakoauaa raoi?

¹⁵ Ngkana ti ururinga bukini kakororaoan ana berita Iehova, ti na boni kona riki ni kaaitarai ara kangaanga ni kaineti ma aki taun te mwane. Iangoa aia katoto Kristian n te moan tienture. Ngke e a ueke bwainikirinan te ekaretia i Ierutarem ae korakora, “a a bane ni maenako kaaina . . . ma tii abotoro n tiku.” (Mwa. 8:1) Iangoia bwa tera ae irekereke ma anne. Bon aki taun te mwane! A boni bae ni bua mwengaia Kristian akanne ao aia bitineti. Ma e bon aki kitania Iehova, ao e aki naba bua kimwareireia. (Mwa. 8:4; Ebera 13:5, 6; Iak. 1:2, 3) E boutokaiia Kristian aika kakaonimaki aikai Iehova, ao e na boni boutokaira naba.​—Wareka Taian Areru 37:18, 19.

16. Tera ae kona ni kairira bwa ti na iangoia bwa e a aki kakawaki ara taromauri iroun Iehova?

¹⁶ Ngkana ti a kara, ti kona n iangoia bwa e a karako te bwai ae ti kona n angan Iehova. E boni bae te Uea ae Tawita n namakina naba anne ngke e a kara. (TaiAre. 71:9) E na kangaa ni buokira Iehova?

17. Tera reireiara man rongorongon te tari te aine ae Jheri?

¹⁷ Iangoa rongorongon te tari te aine ae Jheri. E kaoaki bwa e na ira te reirei ni kataneiai n te Tabo n Taromauri ibukin te onobwai, ma e aki kan iri. E taku: “I a kara, e a tia ni mate buu, ao bon akea au tarena ae e kona ni kamanena Iehova. Bon akea  bongau.” N te tairiki are imwain te reirei, e bunra nanona nakon Iehova n te tataro. Ngke e a roko n te Tabo n Taromauri n te bong are imwina, e bon teimatoa naba n iangoia bwa e riai n roko ke e aki. Ngke e a waaki te reirei, e katuruturua te tia kabwarabwara temanna bwa ara tarena ae kainnanoaki riki, bon tauraoira ni kan reiakinaki iroun Iehova. E ururing ni kangai neiei: “I iango ao I taku, ‘Iai irou anne!’ I bon tang ngke I a ataia ae e kaekaa au tataro Iehova. E karaua nanou bwa iai te bwai ae kakawaki ae I kona n anga, ao e tauraoi n reireinai!” E ururing rikaaki Jheri ao e taku: “I rinnako ni kaea te reirei anne ma te nakonnano, te bwarannano, ao namakinan ae akea bongau. Ma I otinako ma namakinan ae iai au konabwai, I kaungaaki, ao iai bonganau!”

18. E kangaa ni kaotaki n te Baibara bwa e teimatoa ni kakawaki iroun Iehova ara taromauri ngkana ti a kara?

¹⁸ Ngkana ti a kara, ti kona ni kakoauaa bwa bon iai naba te bwai ae ti kona ni karaoia ibukin Iehova. (TaiAre. 92:12-15) E reireinira Iesu bwa e ngae ngke e taraa n uarereke iroura ara konabwai ke korakorara, ma e rangi ni kakawaki iroun Iehova te bwai ae ti kona ni karaoia n ara beku ibukina. (Ruka 21:2-4) Ngaia are kaatuua am iango i aon te bwai ae ko kona ni karaoia. N te katoto, ko kona n tataekina taekan Iehova, n tataro ibukia taari, ao ni kaungaia tabemwaang man arom n teimatoa ni kakaonimaki. E iangoiko Iehova bwa raona ni mwakuri, tiaki ibukin te bwai ae ko kona ni karaoia, ma ibukini kukurein nanom ni kan ongeaba irouna.​—1Kor. 3:5-9.

19. E kangaa ni karauaki nanora n I-Rom 8:38, 39?

¹⁹ Ai kakaitaura ngaira ngkai ti taromauria Iehova, ae te Atua ae a kakawaki irouna naake a beku ibukina! E karikira bwa ti na karaoa nanona, ao bon te taromauri ae koaua ae karekea te kakukurei ni maiura. (TeKao. 4:11) E ngae ngke a iangoira kaain te aonnaba bwa akea bongara, ma e aki iangoira n aron anne Iehova. (Ebera 11:16, 38) Ngkana a bwara nanora n te aoraki, aki taun te mwane, ke te kara, ti bia ururingnga ae akea te bwai teuana ae kona ni karaureira man tangirara iroun Tamara are i karawa.​—Wareka I-Rom 8:38, 39.