E mena Mary ma buuna ae John, a n iteran te aonnaba ae e kona n tibwaaki iai te rongorongo ae raoiroi nakoia I-Biribin ake a roko ni mwakuri iai. Ni butinakon COVID-19, ao e a kairi reirei n te Baibara Mary ma kaain te aba are e mena iai, ao taabo riki tabeua n te aonnaba. E kangaa n riki anne?

E titirakinia naake e reirei n te Baibara ma ngaiia ni kangai, “Iai ae kam ataia ae e kan reirei n te Baibara?” Ngkana a kangai eng, ao e a tuangia naba ae a na buokia n reitaki ma ngaiia. N angiin te tai e nanakoraoi mwin tabekan te titiraki ae uarereke aei. Bukin tera? Ibukina bwa aomata aika tangira Ana Taeka te Atua, a aki toki ni kan tibwaa te baere a reiakinna ma aia utu ke raoraoia ae a tangiria. Tera mwin tabekan te titiraki aei?

E kairaki Mary iroun ana reirei n te Baibara ae Jasmin nakoia aman riki aika boou aika kan reirei n te Baibara. Temanna mai buakoia naakai boni Kristine, are e rangi n nano n ana reirei ao e a butiia Mary bwa e na reirei uoua te tai n te wiki. Ngke e titirakinna Mary bwa iai riki ae ataia ae e kan reirei n te Baibara, ao e taku Kristine, “Eng, iai raoraou aikai.” I nanon tabeua te wiki ao e reitaki Mary ma raoraon Kristine aika aman aika kan reirei naba n te Baibara. Imwina riki e a manga kaoia riki raoraona tabeman Kristine, ao tabeman mai buakoia raoraona aikai, a a manga kaoia raoraoia bwa a na reirei naba.

E tangiria naba Kristine bwa a na reirei ana utu ake i Biribin n te Baibara. Ngaia are e a reitaki ma natina te aine ae Andrea. N te moantai ao e iangoiia Andrea ‘taani Kakoaua bwa te koraki n Aro teuana, ae a aki kakoauaa Iesu, ao a tii kakabongana te O Tetemanti.’ Ma imwin ana moan reirei, ao a a kaekaaki raraomana. E aki toki ni kakangai n tain ana reirei, “Ngkana e taekinaki n te Baibara, ngkanne e boni koaua!”

Imwina riki, ao Andrea e a karekea angani Mary n reitaki ma raoraona aika uoman ao raona ni mwakuri temanna are e a moana ana reirei n te Baibara. E aki naba ataia Mary ae e kakauongo n tain aia reirei ai tinan Andrea ae mataki ae Angela. Ao n te bong teuana, e a tuatua Angela nakon Adrea bwa e kan reirei naba ma Mary n te Baibara. E tangira te baere e reiakinna Angela. Ao i nanon teuana te namwakaina ao e a bati naba ana kibu aika e kamatenikunai ao e tangiria n reirei aua te tai n te wiki! Man ana ibuobuoki Andrea, e a moana kaean te taromauri ni katoatai rinanon te intanete.

 Ngke e ataia Mary ae e memena naba i rarikini Kristine buuna ae Joshua, ao e a titirakinna Mary bwa e kan ira naba aia reirei ke e aki. E kaeka Joshua ni kangai, “I tii ongongora, ma tai tititirakinai, ngkana ko titirakinai ao I a nako naba.” Ai tibwa nimaua te miniti n reirei, ao e a bati riki ana titiraki nakoni Kristine ao e a kan reirei n te Baibara.

Tii man ana titiraki ae uarereke Mary ao a reke ana reirei n te Baibara aika bati. Iai tabeman i buakoia ana reirei ake e baireia bwa a na reirei ma taani Kakoaua tabeman. E kairi reirei n te Baibara aika 28 Mary n aaba aika aua aika kakaokoro.

E bwabetitoaki Jasmin n Eberi 2021, are ngaia ae moan reirei n te Baibara. E bwabetitoaki Kristine ni Mei 2022 ao e a tia ngkai n okira Biribin n okiriia ana utu. A bwabetitoaki naba uoman riki ake e kairiia Kristine nakoni Mary. E bwabetitoaki Angela tabeua te namwakaina imwina ao e a beku ngkai bwa te bwaiania ae katoatai. E tabe n ririkirake buuni Kristine are Joshua, ma natiia te aine ae Andrea, n ikotaki naba ma tabeman riki ake a reirei.

N te moan tienture, ao a bati ake a tibwaa te rongorongo ae raoiroi nakoia aia utu ao raoraoia. (Ioa. 1:​41, 42a; Mwa. 10:​24, 27, 48; 16:​25-33) E aera bwa ko aki tuangia am reirei n te Baibara ao naake a kan ongora ni kangai, “Iai ae ko ataia ae e kan reirei n te Baibara?” Ko aki kona n ataia bwa e na iraman aika a na moana aia reirei n te Baibara, tii man te titiraki ae uarereke aei.