IAI te tari te mwaane ke te tari te aine ae ko ataia bwa e mwaing nakon te aba ae ianena ae korakora riki iai kainnanoaia taan uarongorongoa te Tautaeka n Uea? Ti aki toki n taekinia taani Kakoaua akanne bwa taan ibuobuoki. Ko a tia n titirakiniko ni kangai: ‘Tera ae kaungaia bwa a na beku n te aba ae ianena? A kangaa ni katauraoiia ibukin te mwakuri aei? I kona n uataboia naba?’ Te anga ae raoiroi ae e na reke iai kaekaan titiraki akanne bon te maroro ma taari mwaane ao aine akanne. Ti na rinanon anne ngkai.

Tera ae kaungako bwa ko na moana iangoan te beku n te aba ae ianena ae korakora riki iai kainnanoan te ibuobuoki? E roko Amy man te United States ae ai 30 tabun ana ririki ngkai. E taku: “I nanon ririki aika bati, I iangoa te beku n te aba ae ianena, ma n taraana I aki kona ni karaoia.” Tera ae bita ana iango neiei? “N 2004, a kaoai te taanga ae a mwakuri i Belize bwa N na bwaiania ma ngaiia i nanon teuana te namwakaina. I bon nako ao I rangi n tangira te mwakuri aei! Teuana te ririki imwina, I a mwaing nako Ghana ni bwaiania iai.”

Tabeua te ririki n nako ao Stephanie ae kaain naba te United States, ae e a kaani koro ngkai 30 ana ririki, e karaua n tirotiroa arona ao e iango ni kangai: ‘I marurung ao akea katabeau n au utu. I kona ni karaoa ae bati riki ibukin Iehova nakon ae I karaoia ngkai.’ Imwin tuoan raoi arona anne i bon irouna, e a kaungaaki bwa e na mwaing nako Ghana ni karababaa ana mwakuri ni minita. Filip ao Ida, ae te taanga mai Denmark aika bwaiania ake a a mwaane ao n aine, a aki toki n iangoa te mwaing nakon te aono ae korakora riki iai kainnanoan te ibuobuoki. A kakaaei aanga ake a na kakororaoa iai aia iango aei. E taku Filip: “Ngke e a angaraoi mwanangara ai aron ae e tuangira Iehova ni kangai: ‘Waaki nako!’ ” N 2008, a a mwaing nako Ghana ao ni beku iai n te maan ae raka i aon tenua te ririki.

A beku ngkai n te United States Hans ao Brook ae te taanga ae a bwaiania ae ai 30 tabun aia ririki. N 2005 ao a ira buakon te mwakuri n ibuobuoki n te kabuanibwai are riki imwin Hurricane Katrina. Imwina, a a bubutii bwa a na ibuobuoki n taiani mwakuri ni kateitei ni katobibia te aonnaba ma a aki butimwaeaki. E ururing rikaaki Hans ao e taku: “Imwina riki, ti a ongora n te kabwarabwara n te bwabwaro teuana ae taekinaki iai te Uea are Tawita bwa e nanoraoi ngke e aki kariaiakaki ni katea te tembora, ngaia are e a bita tiana. Ti buokaki n te reirei anne bwa ti na ataia ae akea bureni bitakin tian temanna ma temanna n ana mwakuri ibukin Iehova.” (1Rongo. 17:1-4, 11, 12; 22:5-11) E reitia ni kangai Brook: “E tangirira Iehova bwa ti na bitii ara babaire.”

Imwin ongoraean rongorongo aika kakaongora mairouia raoraoia ake a beku n aaba tabeua, a a kaungaaki Hans ao Brook bwa a na kataia ni bwaiania n te aba teuana. N 2012, a a mwaing nako Ghana ao ni beku aua te namwakaina iai ni buoka te ekaretia ae kamanena te taetae n te bai. E ngae ngke a riai n okira te United States, ma aia beku i Ghana e a kakorakoraaki iai nanoia ni kani moanibwai baika irekereke ma te Tautaeka n Uea. Man te tai anne, a a tia n ibuobuoki n te mwakuri ni kateitei ibukin te aobiti n tararua i Micronesia.

Ko kangaa ni katauraoiko ibukin te beku n te tabo ae korakora riki iai kainnanoan te ibuobuoki? E taku Stephanie: * “I karaoa au kakaae n taiani kaongora man Te Taua-n-Tantani aika irekereke ma te beku n te tabo ae korakora riki iai kainnanoan te ibuobuoki. I maroro naba ma unimwaane n te ekaretia ao te mataniwi n te aono ae uarereke ma buuna, ibukin nanou ni kani beku n te aba teuana. Ma ae moan te kakawaki riki, I aki toki ni mwanewea tiau aei n au tataro nakon Iehova.” N te tai naba anne, e kateimatoa maiuna ae bebete Stephanie, ike e a kona iai ni kaikoa ana mwane ibukini boutokaana ngkana e a beku n te aba teuana.

E taku Hans: “Ti tataro nakon Iehova ibukin ana kairiri ngkai ti kan nakon te tabo are e tangiria bwa ti na nako iai. Ti tataroakina naba te bong are ti iangoia bwa ti na waaki iai.” A kanakoi aia reta te taanga aei nakon aobiti n tararua aika aua. Imwin reken te kaeka ae kaunganano man te aobiti n tararua i Ghana, a a mwananga ao a baireia bwa a na tiku i nanon uoua namwakaina. E taku Hans: “Ti rangi ni kukurei ni mwakuri ma te ekaretia iai ao ti a karakaa riki ara tai n tiku.”

George ao Adria mai Kanata, ae te taanga ae e a kaani koro 40 aia ririki, a teimatoa n uringa are e kakabwaiai motinnano aika raraoi Iehova, ao tiaki tii babaire aika raraoi. Ngaia are a a karaoi mwaneka aika a na bon roko iai n tiaia. A reitaki ma te tari te aine ae beku i Ghana ae korakora riki iai kainnanoan te ibuobuoki, ao a tabeki titiraki aika bati nakoina. A kororeta naba nakon te aobiti n tararua i Kanata ao i Ghana. E taku Adria: “Ti kakaaei naba aanga ake ti na kabebetei riki iai maiura nakon are ti a kamani karaoia.” Man aia motinnano akanne, a a kona ni mwaing nako Ghana n 2004.

Baikara am kangaanga imwini mwaingim, ao tera arom iai? Ana moani kangaanga Amy bon ururingakia ana utu. “A rangi ni kaokoro bwaai nako ma baike I taneiai iai.” Tera ae buoka neiei? “Man aia tatareboon au utu ni kamoamoaai ibukin au beku, I buokaki iai n ururinga au motinnano ibukini mwaingiu. Imwina riki, I a moanna ni mamaroro n te intanete ma au utu. Kioina ngkai ti a kona n norira, ai aron ae a aikoa rangi n raroa au utu.” E taekinna Amy bwa te iraorao ma te tari te aine n te tabo anne ae mwaatai, e a buokia n atai katei aika kakaokoro. “E riki raoraou aei bwa te aomata ae I onimakinna ao I kakarekea buokau irouna n taai ake I aki ota raoi iai n aroaroia aomata tabeua. Man ana ibuobuoki neiei, I a ataa te bwai ae N na karaoia ao ae N na rawa iai, ike I a rangi ni buokaki iai ni karaoan au mwakuri ni minita ma te kimwareirei.”

A taekinna George ao Adria bwa ngke a moani mwaing nako Ghana, a namakinna bwa ai aron ae a a okiri boong ake akea iai bwaai ni mwakuri. E taku ­Adria: “Ti kamanenai bwaketi n oneani mwin te mitiin n uaati. E kainnanoaki te tai ae maan riki ibukini katauraoan te amwarake nakon are ti taneiai iai. Ma imwin tabeua te tai, a a riki baika kangaanga aikai bwa baika boou aika ti a tibwa rinanoi.” E taku Brook: “N aki ongei bwaai n tutuki aika ti kaaitarai ngaira bwaiania, ma ti bon rauaki ni maiura. Ngkana ti botii ni kabane baika riki nakoira aika kaungaunga, a karikii ururing aika tamaroa aika kakawaki iroura.”

E aera ngkai ko kaungaia tabemwaang nakon te aeka ni beku aei ibukin te Tautaeka n Uea? E taku Steph­anie: “E kakimwareirei te uarongorongo n te aono ae ko kaitiboo iai ma aomata aika ingainga ni kan ataa te koaua, ao a kan reirei n te Baibara ma ngkoe ni katoabong. Au motinnano ae tamaroa riki ae I a tia n karaoia, bon te mwaing ni beku n te tabo ae korakora riki iai kainnanoan te ibuobuoki!” E mare Stephanie ma Aaron n 2014 ao a a beku ngkai n te aobiti n tararua i Ghana.

E taku Christine ae te bwaiania mai Tiaman ae ai tibwa 30 tabun ana ririki: “Bon te mwakuri ae tamaroa.” E beku Christine i Bolivia imwaini mwaingina nako Ghana. E reitia ni kangai: “Kioina ngkai I a raroanako ma au utu, I okira Iehova ibukini buokau n taai nako. Irou ai bon te aomata ni koaua ngaia nakon are I iangoia mai mwaina. I namakina naba te katiteuanaaki ae rianako i buakoia ana aomata Iehova. E a tia ni katamaroaa maiuu te beku aei.” E mare Christine ma Gideon, ao a teimatoa ni beku i Ghana.

A taekina aroia Filip ao Ida ni buokiia aomata ake a reirei n te Baibara bwa a na rikirake. “Ti taneiai n reirei ma ara aomata aika 15 ke e raka riki, ma ti a kauarerekea nakon 10 bwa ti aonga n reireinia raoi.” A kakabwaiaaki aia reirei n te Baibara? E taku Filip: “I reirei ma te rorobuaka n ataei ae Michael. E kona n reirei ni katoabong ao e katauraoi raoi. E bane te boki ae Ana Reirei te Baibara i nanon teuana te namwakaina. Imwin anne, e a riki Michael bwa te tia uarongorongo ae tuai ni bwabetitoaki. N ana moanibong n te mwakuri ni minita ao e titirakinai ni kangai: ‘Ko kona ni buokai ma naake I reirei ma ngaiia n te Baibara?’ I taraia ao I mimi irouna. E kabwarabwaraa Michael bwa e a tia ni moana te reirei ma teniman aomata ao e kainnanoa te ibuobuoki teutana ni kairan aia reirei.” Iangoa korakorani kainnanoaia taan angareirei, ngkai a a riki naba aomata aika reirei n te Baibara bwa taan angareirei!

E taekina arona Amy ni waekoa n ataa korakorani kainnanoan te mwakuri: “Tabeua te tai imwin rokora i Ghana, ti uarongorongo n te kaawa ae uarereke ni kakaaeia aika bonotaninga. Ti aki kunea tii temanna ae bonotaninga ma boni waniman n te kaawa anne!” Imwin te tai ae aki maan, e a mare Amy ma Eric, ao a a uaia ni beku bwa tibeetio bwaiania. A ibuobuoki n te ekaretia ae kamanena te taetae n te bai ni buokiia tabeman i buakoia taan uarongorongo aika bonotaninga aika 300 tabun, ao aomata naba aika kan ongora n te aba anne. N aia tai ni mwakuri George ao Adria i Ghana, a a nora iai aron te mwakuri ni mitinare. Ai kukureira ngaiia ngke a a kaoaki bwa a na kaea te ka-126 n reirei n te Kuura ni Kireata! A a beku ngkai bwa mitinare i Mozambique.

E kaunganano noraia aika bati man aaba tabeua bwa a mwakuri korakora n te mwakuri n tai i rarikia taari mwaane ma aine i abaia. (Ioa. 4:35) E katautauaki bwa ni katoa wiki i nanon te ririki ao a bwabetitoaki 120 i Ghana. N aron ae a a tia ni mwaing taan ibuobuoki aika 17 nako Ghana, nga ma nga naba taan uarongorongo ni katobibia te aonnaba aika a tia ni kairaki n tangiran Iehova bwa a na ‘kukurei n anga ngaiia.’ A beku n taabo ake e korakora riki iai kainnanoaia taan uarongorongoa te Tautaeka n Uea. Ai kimwareireira nanon Iehova irouia taani mwakuri akana kukurei n anga ngaiia akanne!​​—TaiAre. 110:3; TaeRab. 27:11.