Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

E bon eti irouia Kristian bwa a na kamannangaki rabwataia ngkana a mate?

E bon nakon ana motinnano temanna ma temanna, bwa e na kamannangaki rabwatana ke e na aki ngkana e mate. E ngae ngke e aki mwaneweaki te kamannang n te Baibara, ma e kakawaki ataakin ae e kabuekaki rabwatan te Uea ae Tauro ao natina are Ionatan ngke a mate ao imwina a taunaki. (1 Tamuera 31:2, 8-13)—6/15, iteraniba 7.

Ti na kangaa ni koaua raoi bwa e aki karikii baika bubuaka te Atua?

E raoiroi te Atua n arona ni kabane. E kaetitaeka n ae riai, e kakaonimaki ao eti ngaia. E tatangira Iehova ao n nanoanga naba. (Te Tua-Kaua 32:4; Taian Areru 145:17; Iakobo 5:11)—7/1, iteraniba 4.

Baikara kangaanga ake e kona temanna ni kaaitarai, ngkana e mwaing nakon te tabo ae ianena ae korakora riki iai kainnanoan te ibuobuoki?

Kangaanga aika tenua bon (1) te bitaki nakon te aroaro ni maiu ae kaokoro, (2) te kekeiaki ribuakon te uringaaba ao (3) te iraorao ma taari n te aono anne. A bati ake a a tia ni kaaitara ma kangaanga aikai, ake a a rangi ni kakabwaiaaki.—7/15, iteraniba 4-5.

Bukin tera ngke e ribaaki Ioteba irouia tarina?

Teuana bukina bwa e rangi n tatangiraki riki Ioteba iroun Iakoba, ngke e anganna ana kunnikai ae okoro. E rikirake bakantangia tarin Ioteba ao a a kaboonakoa bwa te toro.—8/1, iteraniba 11-13.

Bukin tera bwa a rangi n nakoraoi ao ni bebete kabonganaan turaeki aika boou?

A bane n tii te tikina teia. Ti kaungaaki n turaeki aikai ni kabane bwa ti na wareka te kibu man te Baibara ao n tabeka te titiraki nakoni kaain te auti. E aki akaka bwa e nga iai ana kaeka, ma ti kona n rairia ao ni kaota nakoina te bae e taekinaki n te Baibara. Ti kona naba ni katuka te titiraki irouna ibukini manga okirana.—8/15, iteraniba 13-14.

Tera te Baibara n Turia Rimoa ae te Peshitta?

E taabangaki kabonganaan te taetae n Turia ngkoa, ae te taetae n Aramwaike n te kauoua ke te katenua n tienture C.E. E taraa n ae te taetae anne bon te moan taetae are a rairaki iai mwakoron te Koroboki ae Tabu n te taetae n Ebera. E ataaki te Baibara n te taetae n Turia Rimoa bwa te Peshitta.—9/1, iteraniba 13-14.

Tera ae a kona ni karaoia kaaro aika Kristian ibukini kawakinaia natiia?

E rangi ni kakawaki te kakauongo nakoia ataei bwa ti aonga n atai aroia. Kakorakorako ni kaamwarakeia n te aro n taamnei. N te katoto, ngkana a a moanna n nanokokoraki ibukin aia onimaki, kairiria ma te tangira.—9/15, iteraniba 18-21.

Baikara bwaai aika a nang akea i aan Ana Tautaeka n Uea te Atua?

E nang akea riki te aoraki, te mate, e na reke te mwakuri, e na akea te buaka, taren te amwarake ao te rongo.—10/1, iteraniba 6-7.

Tera te berita n te Baibara are a kariaiakaki iai tabeman bwa a na tautaeka ma Kristo?

Imwini kanakin te Toa ae te Riao ma abotoro, e a karaoa te berita Iesu ma taan rimwina aika kakaonimaki ake a a kona n taekinaki bwa kaain te berita n te Tautaeka n Uea. (Ruka 22:28-30) A a kakoauaa iai bwa a na tautaeka ma Iesu i karawa.—10/15, iteraniba 16-17.

Taekini katoto aika uoua man te Baibara ni kakoauaan ae bon iai Tatan.

E taekinaki n te Baibara bwa e maroro Tatan ma Iesu ao e kakorakoraa ni kariria. E maroro naba Tatan ma te Atua n ana bong Iobi. A kakoauaaki n rongorongo aikai bwa bon te aomata ni koaua Tatan.—11/1, iteraniba 4-5.

Antai “te koraki ake a uouota [aran te Atua]” ake e taekinia Iakobo, n aron ae taekinaki ni Mwakuri 15:14?

Bon taan onimaki aika Iutaia ao aika tiaki Iutaia, ae te reeti n aomata aika a rineaki iroun te Atua bwa a na “kabutaanako taekan raoiroin” Teuare e weteiia nakoina. (1 Betero 2:9, 10)—11/15, iteraniba 24-25.

E mena ia Timgad ao tera aroaroia tabeman ake iai?

Timgad bon aia kaawa kaain Rom ae bubura, i Aberika Maiaki (ae Algeria ni boong aikai). Ni kaotakin aia koaua tabeman ake a maeka iai, e taekinaki ae kangai n te koroboki ae kakaaraki are e kuneaki i aantano: “Aroaron te Maiu Iai Bon te Kaeman, te Tebotebo, te Takaakaro ao te Kukurei!” E kuri n titeboo anne ma ae taekinaki n 1 I-Korinto 15:32.—12/1, iteraniba 8-10.