“E AERA bwa ko na aki taromauria am bakatibu?” e titiraki tinau. “Ko aki ataia ae ko riki mairouia? Te koaua bwa ko na aki kakaitau nakoia? E kangaa n reke ae ko a kaaki katei aika bwainaki mangkoa? Rawam ni karineia ara bakatibu, ai aron ae ko taekinna bwa te waaki n nanobaba ara taromauri.” Imwin anne ao e a tang.

Bon tiaki aei aron tinau n taetae. Irarikina, e boni baireia bwa N na reirei n te Baibara, bwa anne ana anga ni karautaeka nakon te reirei n te Baibara. I ongeaba irouna n taai nako, ao e a kangaanga ngkai bwa N na rawa n ira ana babaire. Ma I a riai ni karaoa anne, bwa I aonga ni kakukureia Iehova. I bon aki kona ni karaoa aei ngke arona bwa e aki kakorakoraai.

N aroia angia kaain Tiaban, bon taiani Buddhist ngaira. Ma i nanon tii uoua namwakaina n reirei ma Ana Tia Kakoaua Iehova, I a kakoauaa te Baibara bwa e koaua. Ataakin ae iai tamau i karawa, e a ingainga riki iai nanou ni kani kinaa. Ti kukurei ni mamaroroakina te baere I reiakinna ngai ma tinau. I a moanna ni kaakaei bobotaki n te Taabati n te Tabo n Taromauri. Ngke e a rikirake au atatai n te koaua, I a tuanga tinau bwa N nang aki manga irekereke ma aia katei taiani Buddhist. E a bitaki naba ana iango ngkekei ao e taku: “Bon te kabwainrang ngkana iai temanna n te utu ae e aki tangiriia ana bakatibu.” Ao e tua bwa N na katoka au reirei n te Baibara ao kaeani bobotaki. I aki kantaningaia ae e na taekina aei tinau! Kaanga ai te aomata ngaia ae I aki kinaa.

I reiakinna man I-Ebeto 6, bwa e tangirai Iehova bwa N na ongeaba irouia au karo. E tei tamau n ana itera tinau. N te moantai, I iangoia bwa ngkana I ongo irouia ao a na manga ongo irou ao e na reke te rau n ara utu. Irarikina, e a kaan naba te ukeuke ni karinrin nakon te reirei ae rietata ao I riai ni katauraoi. Ngaia are I a kariaia bwa N na ira nanoia i nanon tenua namwakaina, ma I berita nakon Iehova bwa N na manga iriri bobotaki ngkana e koro te tai anne.

E aki raoiroi au motinnano anne n aanga aika uoua. Te moan, I taku bwa e na aki bitaki au namakin i nanon tenua namwakaina. N oneani mwin anne, I a waekoa n namakina te baki ni kaineti ma au onimaki, bwa I a raroanako riki ma Iehova. Te kauoua, a bon aki ira  nanou tamau ma tinau, ma a a kairoroai riki bwa N na katoki bwaai nako aika irekereke ma te taromauri ae koaua.

A bati aika I kaitiboo ma ngaiia n te Tabo n Taromauri, aika kaitaraaki naba irouia aia utu. A karaua nanou bwa e na boni kakorakoraai Iehova. (Mat. 10:34-37) A kaotaai bwa boni ngai ae I kona ni karekei angaia ni kamaiuaki kaain au utu. Ngaia are I a kakorakoraai n tataro, bwa I kan reiakina arou n onimakina Iehova.

A bati aeka ni kakaaitara n au utu. E kataia tinau ni bubutiiai ao ni maroro ma ngai, ma n angiin te tai I kainabwabu. Ngkana I taetae ao ti uaia n taonakinako n ara namakin, ngkana ti kataia ni katuruturui ara iango. Ngke arona bwa I a kamani butimwaei riki ana namakin ma ana koaua tinau, tao a na nakoraoi riki iai bwaai. A a kabatiaa riki au mwakuri n te auti au karo, bwa I aonga n titiku n te auti. N tabetai e kainaki te auti imwaiu ke akea kanau ae katukaki.

E kakaaea buokana tinau irouia tabemwaang. E butiia au tia reirei, ma e aki irana temanna iroura. E kairai tinau nakon te manatia n ana tabo ni mwakuri, bwa e aonga teuaei n anaa nanou bwa bon akea bongan Aaro nako. N te auti ao e tareboon tinau nakoia ana koraki ma n tang ni bubutii buokana. E maraki nanou n anne, ma a kaungaai unimwaane n tain te bobotaki, bwa N na iangoiia aomata akekei bwa ai aron ae e uarongorongo nakoia tinau n tiaki nanona.

Imwina, I a kaaitara ma te kangaanga ibukini kaean te kuura n reirei ae rietata. A iangoia au karo bwa a na karekea nakoiu kiingin te  maiu ae a taku bwa te kabanea n tamaroa. A kantaningaia bwa e na reke au mwakuri ae bubura boou iai. Ti aki kona ni maroro raoi ibukin taonakinakora n ara namakin, ngaia are I a korei au reta nakoia au karo ni kabwarabwarai tiau ake I uaiakin. E rangi n un tamau ao e kakamaakai ni kangai: “Ngkana ko taku bwa e kona n reke am mwakuri, ao karekea ningabong bwa ngkana e aki, ao ko na kitana te auti aei.” I tataroakina anne nakon Iehova. N te bong are imwina ngke I uarongorongo, ao a butiiai uoman taari aine ae a aki boraraoi i marenaia, bwa N na riki bwa aia tia reirei natiia. E aki kukurei tamau n aei ao e a aki manga kataetaeai, e a bon aki kubarai. Ao e taku tinau bwa e kukurei riki ngke I riki bwa te aomata ae akiako nakon ae I riki bwa Ana Tia Kakoaua Iehova.

N tabetai ao I iangoia bwa tao e tangirai Iehova bwa N na rawa nakoni baike a tangiri au karo. Ma kabatiaan riki au tataro ao iangoani kiibu aika kaineti ma ana tangira Iehova, e a buokai n iangoi kakaaitara n te aro ae riai, ao n ota iai bwa a bon riki ibukin tabeaiangaia au karo ibukiu. E buokai Iehova ni kaeta au iango ao n nora te kawai ae N na nako iai. Irarikina, kabatiaan riki au tai n te mwakuri ni minita, e a kakorakoraa riki kani karaoana irou. Eng, e a riki te mwakuri ni bwaiania bwa tiau.

Ngke a ataia taari aine tabeman ae I kani bwaiania, a a reireinai bwa N na tataningaa tokin unia au karo. I tataro ibukin te wanawana, I karaoa au ukeuke, I nenera raoi nanou, ao I maroro ma taari aika ikawai n te onimaki. E a moti nanou bwa I kani kakukureia Iehova. Irarikin anne, ngkana I taona moa au bwaiania, e na bon aki bitii aia iango au karo.

I a moana au bwaiania n au kabanea n ririki n te reirei ae rietata. Imwin tabeua te tai ni bwaiania, e a reke tiau bwa N na beku n te tabo ae a kainnanoaki riki iai taan uarongorongo. Ma a aki tangiria au karo bwa N na kitana mwengau. Ngaia are I a taningaa koron 20 au ririki. Ibukini karauan nanon tinau, I a bubutii nakon te aobiti n tararua bwa N na beku i Tiaban maiaki, ike a mena iai ara koraki.

Ni mwiokoau anne, I kakabwaiaaki n noriia tabeman ake I reirei ma ngaiia ni bwabetitoaki. I reiakina naba te taetae n Ingiriti ibukini karababaan riki au beku. Iai uoman taari mwaane n au ekaretia aika tibeetio bwaiania. I kona n nori ingaingan nanoia ao aroia ni buokiia tabemwaang. Ngaia are e a reke bwa tiau te tibeetio bwaiania. Uatai ana tai tinau ni bwaka n aoraki, ao I bon oki nakoni mwengau n taai akanne n tabeakinna. E mimi n aei tinau ao e a moanna riki ni marau nanona.

Imwin itiua te ririki ao e a roko au reta mairoun Atsushi, ae temanna i buakoia tibeetio bwaiania ake a taekinaki mai eta. E taekinna bwa e iangoa te mare ao tera arou ao au namakin iai. Bon akea au namakin ibukin Atsushi, ao I taku naba bwa akea ana namakin ibukiu. Teuana te namwakaina imwina ao I a kaekaa ae I kukurei ngkana ti ikikina riki i marenara. Ti kunea bwa a bati baika titeboo iai arora, bwa ti kan uaiakina kabwaninan ara tai, ao ti kukurei ni beku n aanga nako. Imwina riki ao ti a mare. Ai kukureira ngai ngke a a ira ara mare tamau ma tinau, ao tabeman ara koraki!

N te tai ae aki maan, ngke ti beku bwa urekura bwaiania, ao e a mwiokoaki Atsushi bwa te bonomwi ni mataniwi ibukin te aono ae uarereke. E aki maan ao a a manga reke riki kakabwaia. Ti a mwiokoaki bwa tibeetio bwaiania  ao imwina riki nakon te mwakuri ni mwamwananga n te aono ae uarereke. N te tai teuana imwini kawaran ekaretia nako n te aono, ao ti a tarebooniaki man te aobiti n tararua. Tera te titiraki? ‘Ti kani butimwaea mwiokoara ae te mwakuri ni mwamwananga i Nepal?’

I iangoia bwa tera aia namakin au karo ngkana I a nakon te tabo ae raroa. Ngaia are I a tareboonia. E kaeka tamau ao e taku: “Ko nangi roko n te tabo ae tamaroa.” Teuana te wiki imwaina, ao temanna i buakoia raoraona e anganna te boki ae taekan Nepal, ao e a iangoia tamau bwa bon te tabo ae tamaroa ae e na karekea rokona iai.

N ara tai ni beku ma te kukurei i buakoia kaain Nepal aika momoa aomata, e a manga reke riki iroura te kakabwaia teuana. E a rin naba n te aono are ti mwamwananga iai Bangladesh, ae te tabo ae rangi ni kaan ma e rangi ni kaokoro n itera aika bati. E raababanako aron te mwakuri ni minita iai. Imwin nimaua te ririki, ti a manga mwiokoaki nako Tiaban, ike ti a kukurei iai ngkai ni karaoa te mwakuri ni mwamwananga n te aono ae uarereke.

E bati reireiau aika reke ibukin Iehova n ara tai ni beku i Tiaban, Nepal, ao Bangladesh! E okoro te aba teuana ma teuana n arona ao ni kateina. Ao a okoro naba aroia kaaina. I a tia n nora aron Iehova n tabeakinia aomata n tatabemania nako, ni butimwaeia, ao ni buokiia ma ni kakabwaiaia.

E a tia ni kakabwaiaai Iehova n au atatai ibukina, te mwakuri ae I karaoia, ao kaainnabau ae raoiroi. E a tia ni kairai te Atua ni karaoi motinnano aika eti, ao e a kaan ngkai au iraorao ma ngaia ao au utu. E rabwa Iehova ngkai I a kona ni manga reitaki raoi ma tinau. I rangi ni kakaitau ngkai e a reke te rau i marenau ma Atuau ao tinau.