Ana Reirei Iesu i Bon Ibukina

“E aki nanououa Iesu bwa antai ngaia, e roko mai ia, tera bukin rokona n ara aonnaba ao tera ae na riki nakoina n taai ake imwaina.”​—TE TIA KOREA TE BOKI AE HERBERT LOCKYER.

IMWAIN ae ti kona ni butimwaei ao n onimakini baike e reiakin Iesu, ti riai n ataa taekana. Antai raoi Iesu? E roko mai ia? Tera ana kantaninga ibukini maiuna? E ngae ngke ti aki mena ikekei n ongoraei ana kaeka Iesu ma ti kona ni wareki n Euangkerio aika Mataio, Mareko, Ruka, ao Ioane.

E a kamani maiu imwaini bungiakina i aon te aba E taku Iesu n te taina: “Imwain rikin Aberaam, ao bon iai ngai.” (Ioane 8:58) E maiu Aberaam tao 2,000 te ririki imwaini bungiakin Iesu. Ma e ngae n anne, e a kamani maiu Iesu imwain te baatua ane e kakaonimaki anne. E a kamani maiu ia ngkanne Iesu? E kabwarabwaraa ni kangai: “I ruo mai karawa.”​—Ioane 6:38.

Natin te Atua A bati natin Iehova aika anera. Ma e rangi n okoro Iesu. E taekinna ae boni ngaia “Natin te Atua ae ana rikitemanna.” (Ioane 3:18) E nanonaki n anne bwa e karikaki Iesu iroun te Atua n tii ngaia. E kariki bwaai nako te Atua rinanon Natina ae te rikitemanna.​—I-Korote 1:16.

“Natin te aomata” E kakabongana riki te taeka aei Iesu tii ibukina. (Mataio 8:20) Ngaia are e a kaotia iai bwa tiaki ngaia te anera ke te taamnei, ma ai bon te aomata ni koaua. E kamwainga maiun Natina te Atua mai karawa nako aon te aba rinanon taamneina ae raoiroi, nako nanon biroton te ataeinnaine ae Maria. Ao ibukin aei, e a bungiaki Iesu bwa te aomata ae kororaoi ao akea ana bure.​—Mataio 1:18; Ruka 1:35; Ioane 8:46.

Te Mesia are e beritanaki E taku ainen Tamaria nakon Iesu: “I ataia bwa e nang roko te Mesia.” E kaekaa ni kangai: “Boni ngaia ngai ae I taetae nakoim.” (Ioane 4:25, 26) Titeboo te taeka ae “Mesia,” ma “Kristo,” ae nanona “Teuare E Kabiraki.” E kabiraki Iesu ke e rineaki iroun te Atua bwa e na karaoa te mwioko ae okoro ibukini kakororaoan ana berita te Atua.

Bukin raoi rokona i aon te aba E taku Iesu n te taina: “I riai naba n tataekina te rongorongo ae raoiroi ae taekan ana tautaeka n uea te Atua .  . . bwa ngaia aei bukini kanakoau.” (Ruka 4:43) E ngae ngke e karaoi mwakuri aika raraoi aika bati ibukia aomata aika kainnanoa buokaia, ma te bwai ae moanibwaia karaoana ni maiuna bon uarongorongoan Ana Tautaeka n Uea te Atua. E na maroroakinaki imwina riki te baere e reirei iai ibukin te Tautaeka n Uea anne.

E teretere raoi bwa Iesu bon te aomata ae okoro. * N aron ae ti na noria, maiuna are i karawa e a kakorakoraa riki iai nanon taeka ake e mwanewei i aon te aba. Ti aki riai ngkanne ni mimi ngkai e tataekina te rongorongo ae na rotii maiuia aomata aika mirion ma mirion ni katobibia te aonnaba?

[Kabwarabwara ae nano]