E irekereke “te onimaki” ma kakoauaan raoi te bwai teuana ae boto i aoni baika a nonoraki, n aroni kamanenaana n te Baibara. E kakoauaa raoi te aomata ae onimakina te Atua bwa E na boni kakoroi bukin Ana berita ni kabane.

E kabotoa maiuna i aon ana berita nako te Atua. (Karikani Bwaai 22:​15-18) E maiuraoi n aia tabo kaubwai i Aikubita, ma e kitanna ngke “e rinea ae e na bwainikirinaki ma ana aomata te Atua, nakon are e na reke irouna te kimwareirei ae kai toki ae kakukurein te bure.” (I-Ebera 11:25) E koaua bwa e aki raoiroi ana motinnano anne, bwa e a manga uringaaba imwina riki? Tiaki ngaia anne, bwa e taekinaki ae kangai n te Baibara ibukini Mote: “E teimatoa n nene ngke kaanga e nora Teuare aki nonoraki.” (I-Ebera 11:27) E aki uringaaba Mote n ana motinnano are e rineia ibukin ana onimaki.

E kakorakoraa Mote ni buokiia aomata nako bwa e na nene onimakinan te Atua irouia. N te katoto, iangoa te baere riki ngke a a iangoia Iteraera bwa a a mwane ngke a a mena i marenan ana taanga ni buaka Barao ao Taari ae Uraura. Ibukini maakuia ae korakora tibun Iteraera n te bwai are e a taraa n aki kona n tukaki, a a tang nakon Iehova ao Mote. Tera aroni Mote iai?

Tao e aki ataia Mote are e na bwenauaa Taari ae Uraura te Atua ao n reke iai kawaia tibun Iteraera n rawei maiuia. Ma e ngae n anne, e kakoauaa Mote bwa e na boni karaoa te bwai teuana te Atua ibukini kamanoaia Ana aomata. Ao e tangiriia raona n I-Iteraera Mote bwa a na karekea naba te namakin aei. Ti wareka ae kangai: “E taku Mote nakoia aomata akekei, Kam na tai maku, tei moa, ao nora ana aro ni kamaiu Iehova, ae E na makuria i bukimi n te bong aei.” (Te Otinako 14:​13, BG) E tokanikai Mote ni kakorakorai aia onimaki raona n I-Iteraera? Eng, bwa e taekinaki ae kangai n te Baibara ni kaineti ma Mote ao tibun Iteraera ni kabane: “Ibukin aia onimaki ao a rinukan Taari ae Uraura kaanga i aon te tano ae mwau.” (I-Ebera 11:29) E kakabwaiaaki Mote man ana onimaki ao aomata ni kabane naba ake a karekea wanawanaia n onimakina Iehova.

Ti kona ni kakairi irouni Mote ngkana ti kabotoi maiura n ana berita nako te Atua. N te katoto, e berita te Atua bwa e na karekei baika ti kainnanoi ni maiura ngkana ti karimoa taromauriana. (Mataio 6:33) Ni koauana, e kona ni kangaanga bwa ti na rarawa ni moanibwaia bwaikorakin te maiu aei ibukina bwa e a rangi n taabangaki ni boong aikai. Ma ti kona ni kakoauaa bwa e na karekei baika ti kainnanoi ni kabane Iehova, ngkana ti karaoa ara kabanea ni kona ni kateimatoa maiura ae bebete ao ni kaatuua iangoan ara taromauri. E berita ni kangai: “N na bon aki kaakiko ao N na bon aki kitaniko.”​—I-Ebera 13:5.

Ti kakorakoraira naba ni buokiia aomata nako ni karikirakei aia onimaki. N te katoto, a ataia kaaro aika wanawana bwa e rangi ni bati aia tai ibukini karikirakean onimakinan te Atua irouia natiia. Ngkai a a tabe n ikawairake ataei, a kainnanoa te atatai ae rangi ni kakawaki n aron ae iai te Atua ao e a tia n anganira kaetieti ibukin te bwai ae eti ao ae kairua. Irarikin anne, a riai n taraia raoi kaaro bwa a na kakoauaa ao n ota natiia bwa te aroaro ni maiu ae te kabanea n tamaroa bon touani mwin ana kaetieti te Atua. (Itaia 48:​17, 18, BG) A angania natiia te bwaintituaraoi ae rangi ni kakawaki kaaro, ngkana a buokiia bwa a na kakoauaa “bwa bon iai [te Atua] ao ba bon te tia kabo aia onimaki akana kakorakoraia n ukoukoria.”​—I-Ebera 11:​6, BG.