Ngkana ko wareki taeka akana uoua akanne, e nga ae boraoi ma ae ko iangoia? A bati aika kunea bwa a karaunano ao n anainano ana taeka Tauro mai Tareto are e aranaki naba bwa te abotoro Bauro. (Mwakuri 17:26, 27) Iai naba taeka ni karaunano tabeua ae aron aei n te Baibara. Te katoto, e taekina te tataro teuana Iesu are a kona n aki nanokokoraki iai taan rimwina ni karekean te atatai ibukin te Atua ao kakabwaia mairouna.—Ioane 17:3.

E ngae n anne, n aroni Philo iai naba taan rabakau ake a kaokoro aia iango mangaia. A taekinna bwa ti aki kona n ataa te Atua ibukina bwa e boni kangaanga ataakina. Tera te koaua iai?

E katuruturuaki n te Baibara bwa iai bwaai tabeua ibukin te Atua are e kangaanga otaia aomata iai. Te katoto, moan rikin te tia Karikiriki, rabakauna ae rangi n rianako, wanawanana ae aki kona ni katautauaki, ni baireaki ke n iangoaki raoi. E riaoni wanawanaia aomata. E ngae n anne, a kaotaki man aroaron te Atua aikai bwa bon akea te bwai ae kona n totokoa karekean te atatai ibukina. Ni koauana, ti kona ni “kaania te Atua” mani kananoan ara iango i aon aroarona akanne. (Iakobo 4:8) Ti na rinanoi katoto tabeua n aroarona aika e kangaanga ataakia. Imwina ti na manga rinanoi aroarona aika a kona n ataaki.

TE ATUA AE AKEA TOKINA: E reiakinaki n te Baibara bwa bon iai te Atua “ma ngkoangkoa ao n aki totoki.” (Taian Areru 90:2, BG) N taekinana riki teuana, bon akea moan te Atua ao akea tokina. Ni kaineti ma aia iango aomata, “e aki konaki n ataki raoi maitin ana ririki.”—Iobi 36:26, BG

Arom ni kakabwaiaaki: E beritana te maiu are akea tokina te Atua nakoim ngkana ko a kinaa raoi. (Ioane 17:3) E na kangaa n onimakinaki te berita aei ngkana ngaia bwa e aki maiu n aki toki te Atua? Bon tii “te Uea ae akea tokina” ae kona ni kakoroa bukin te berita aei.—1 Timoteo 1:17.

ANA IANGO TE ATUA: E reiakinaki n te Baibara bwa “e aki konaki n ataki rabakauna” ibukina bwa ‘a rietata riki nanona nakon nanora.’ (Itaia 40:28; 55:9, BG) E bon riai n tabekaki te titiraki man te Baibara ae aki kona ni kaekaaki ae kangai: “Antai ae kona n ataa ana iango Iehova, ae tao e na reireinna?”—1 I-Korinto 2:16.

Arom ni kakabwaiaaki: E kona te Atua n ongoraei aia tataro aomata aika mirion ma mirion mwaitiia n te tai ae tii teuana. (Taian Areru 65:2) E bon noriia naba tibaaro aika bwaka i aontano. E kona n onrake ana iango te Atua n te aro are e a aki kona n noriko ao ongoraea am tataro? E aki ibukina bwa akea tian ana iango. Ao tera “kam kakawaki riki nakoia tibaaro aika mwaiti” irouna.—Mataio 10:29, 31.

KAWAIN TE ATUA: E reiakinaki n te Baibara bwa e “aki kona te aomata ni kunea aron te makuri ae E karaoia te Atua mai moana ni karokoa te toki.” (Te Minita 3:11) Ngaia are ti bon aki kona n atai bwaai ni kabane ibukin te Atua. A ‘kangaanga kuneakini’ kawaina ake a boto mai iai wanawanana. (I-Rom 11:33) Ma e bon tauraoi ni kaotii kawaina nakoia te koraki ake a kani kakukureia.—Amota 3:7.

Arom ni kakabwaiaaki: Ngkana ko wareka ao n reiakina te Baibara, ko na teimatoa n reiakini baika boou ibukin te Atua ao kawaina nako. E nanonaki iai bwa ti kona ni kaanira riki ma Tamara are i karawa.

E aki nanonaki bwa e kangaanga ataakin te Atua ibukina bwa ti aki kona n atai aroarona nako. A a bati rongorongon te Atua n te Baibara aika ti na buokaki iai ni kinaa raoi. Iangoi katoto tabeua:

ARAN TE ATUA: Ti reiakinaki man te Baibara bwa iai aran te Atua. E taku: “Bon Iehova Ngai; bon arau aei.” E oti aran te Atua n te Baibara 7,000 te tai mwaitina nakon aara riki tabeua.—Itaia 42:8, BG.

Arom ni kakabwaiaaki: E taku Iesu n ana tataro ni katoto: “Tamara are i karawa, e bia katabuaki aram.” (Mataio 6:9) Ko kona ni kamanena aran te Atua ngkana ko tataro? E kukurei Iehova ni kamanoia aomata aika kaota raoi karinean arana.—I-Rom 10:13.

NNENA NI MAEKA: E reiakinaki n te Baibara bwa iai uoua ‘taabo’—bwa karawa are a mena iai anera aika a aki kona n noraki ao naano ae mena iai ara aonnaba ao te iuniweeti. (Ioane 8:23; 1 I-Korinto 15:44) N angiin te tai, e nanonaki te taeka ae “taiani karawa” n te Baibara bwa te aba n taamnei. E mena te tia Karikiriki i ‘karawa are nnena ni maeka.’—1 Uea 8:43, BG.

Arom ni kakabwaiaaki: Ko a ataa ngkai te Atua. Te tia Karikiriki bon tiaki tii te mwaaka ae kona n  noraki n taabo nako ao ni bwaai ni kabane. Bon te Aomata ni koaua Iehova ae iai ana tabo ni maeka. Ni koauana, bon “akea te karikibwai teuana ae aki oti i matana.”—Ebera 4:13.

AROARONA: E reiakinaki n te Baibara bwa iai aroaron Iehova aika a anainano. Te “Atua bon te tangira.” (1 Ioane 4:8) E aki kona ni kewe. (Tito 1:2) E aki inanonano, e nanoanga, e atataiaomata ao e iremwe n un. (Te Otinako 34:6; Mwakuri 10:34) A a tia n ataia aomata nako bwa e tangiria te tia Karikiriki ni karekea ana “iraorao ae kaan” ma te koraki ake a karinea.—Taian Areru 25:14, NW.

Arom ni kakabwaiaaki: Ko kona n riki bwa raoraon te Atua. (Iakobo 2:23) Ngkana e rikirake ataakin aroarona iroum, ko a kona ni mataata riki n rongorongo aika n te Baibara.

E kabwarabwaraaki raoi taekan Iehova ae te Atua n te Baibara n te aro are ti boni kona iai ni karekea ataakina. Ni koauana, ti a ataia bwa e tangirira te tia Karikiriki bwa ti na kinaa. E beritanaki n ana Taeka ae te Baibara ni kangai: “Ngkana tao ko ukoukoria, ao E na reke i roum.” (1 Rongorongo 28:9, BG) E aera ko aki karekea ataakina ni warekan ao kananoan am iango n rongorongona aika n te Baibara? Ni karaoan anne, e beritanaki n te Baibara bwa “e na kaaningkami” te Atua.—Iakobo 4:8.

Ko bae n iango ni kangai: ‘Kioina ngkai I aki kona n atai bwaai ni kabane ibukin te tia Karikiriki, N na kangaa ngkanne n riki bwa raoraona?’ Iangoa aei: E kona raoraon te taokita ae te tia korokoro ni kainnanoa ana reirei ae rietata ibukin te bwainnaoraki? E bon aki! Tao e bae ni kaokoro rabakaun teuare raoraon te taokita. Ni koauana, e na teimatoa ni kaan aia iraorao. Ma ae kakawaki riki, e riai teuare raoraon te taokita n atai aroaron teuanne n aroni baike e tatangiri ao ake e riribai. N aron naba anne, ti kona ni karekea reireiara man te Baibara bwa te aeka n aomata raa Iehova, ae te bae ko riai n ataia bwa ko aonga ni karekea am iraorao ma ngaia.

Ti kona n reiakina taekan te tia Karikiriki kioina ngkai iai n te Baibara rongorongo aika ti kainnanoi bwa ti aonga ni kinaa raoi. Ko kan reiakina ae bati riki ibukin Iehova? A kona Ana Tia Kakoaua Iehova ni waakina te reirei n te Baibara ma ngkoe ni mwengam n aki kabooaki. Ti kaoko bwa ko na reitaki ma taani Kakoaua n am aono ke ni kawarira n ara Atureti ae www.dan124.com.