E tia rairani moani mwakoron Te Rairai ae te Aonnaba ae Boou n 1950. Ni moa man te tai anne ao a a kakanakoi aia taeka aomata tabeman ke a tititiraki ni kaineti ma etin raoi Te Rairai ae te Aonnaba ae Boou, a ibukina bwa n taabo tabeua e kaokoro te rairai iai ma rairai ni Baibara tabeua. A bae ni kaineti bukin taiani kakaokoro aikai, ma teuana mai buakoni baika tenua aika i nano.

•   E Tau n Onimakinaki. E boto Te Rairai ae te Aonnaba ae Boou i aon te kakaae ni kaineti ma te rabakau ni boong aikai ao kanoan te koroboki nikawai ae kona n onimakinaki. Ni kaitaraan anne te Baibara ae te King James Version ae bwain 1611 e boto i aoni koroboki nikawai aika aki bati ni kakoauaaki, ao a tuai rangi ni maan n aroni maanin baike a kamanenaaki ni katauraoan Te Rairai ae te Aonnaba ae Boou.

•   Te Kakaonimaki. E kakorakoraa Te Rairai ae te Aonnaba ae Boou ni kaota onimakinan te moan rongorongo are e koreaki iroun te Atua. (2 Timoteo 3:​16) A bati rairai n taiani Baibara ake a a kabuaa aia kakaonimaki nakon ana rongorongo te Atua n aroia n irii riki aia katei aomata. N te katoto a onea mwin aran te Atua ae Iehova, n taian nakoa aika te Uea ke te Atua.

•   Rairan Raoi te Taeka n te Taeka. E aki kabongana te aeka n rairai Te Rairai ae te Aonnaba ae Boou, are ko a taekina naba te bae nanonaki n te rongorongo, ma e karaoa te aeka n rairai are e raira raoi te taeka n te taeka, ma e taraia bwa e na ota raoi ke e na aki bua te bae nanonaki n te koroboki nikawai. Rairai ake a rairaki man te moani Baibara ake a aki kamanena te anga ae rairan raoi te taeka n te taeka, a kona aomata ni karin iai aia iango ke ni kamaunai baika kakawaki man te moani koroboki anne.

 Booki aika akea n te moani Baibara. N aia Baibara Aaro aika te Katorika ao te Eastern Orthodox, a boni karini booki ake a ataaki irouia tabeman bwa taian Abokaribwa. Ma booki akanne a bon aki karinaki n aia Baibara I-Iutaia, ao e kakawaki ataakin ae e taekinaki n te Baibara bwa bon I-Iutaia aika “mwiokoaki n te rongorongo mairoun te Atua.” (I-Rom 3:​1, 2) Ngaia are Te Rairai ae te Aonnaba ae Boou ao Baibara ni boong aikai aika bati riki, a bon aki karini booki aika taian Abokaribwa.

 Kiibu aika akea n te moani Baibara. Tabeua rairai a karini kiibu ao kibuntaeka aika akea n taiani koroboki nikawai ake a a rangi ni maan taia, ma Te Rairai ae te Aonnaba ae Boou e bon aki karin taeka akana karakaaki akanne. A bati rairai ni boong aikai aika aki karini naba taeka akana karakaaki akanne, ke a kakoauaa bwa taeka akanne a bon aki boutokaaki iroun Nibwan taiani koroboki ae moan te mwaaka. b

 Kakaokoron taian taeka. N tabetai ao rairai aika kamanena te rairai are rairan te taeka n te taeka, a kona n aki mataata nanoia ke ni bure te ota iai. N te katoto, ana taeka Iesu ni Mataio 5:3 e aki toki n rairaki ni kangai: “A a kabaia akana nanorinano.” (Te Baibara) A bati ake a noria bwa te rairai are rairan te taeka n te taeka, ni kaineti ma “nanorinano” e aki mataata ae nanonaki iai, ao a iangoia tabeman bwa Iesu e kabwarabwaraa kakawakin te nanorinano ke te maiu ni kainnano. Ma te bwai ae e kabwarabwaraa Iesu ikai, bon taekan te kukurei ni koaua ae reke man ataakini kainnanoan ana kairiri te Atua. Te Rairai ae te Aonnaba ae Boou e kaota raoi ae e nanonna Iesu n taeka aikai, “akana ataia bwa a kainnanoa te Atua.”​—Mataio 5:3. c

•   N te reta are koreaki n Ritembwa 8, 1950, e kakoauaaki bwa e korea ae kangai te tia raira te Baibara ao te tia rabakau naba ae Edgar J. Goodspeed ni kaineti ma Te Baibara ae Tabu​—te Rairai ae te Aonnaba ae Boou​—Mataio Nakon Te Kaotioti: “E ringaki nanou n aia mwakuri ni mitinare am aomata, ao ni butanakona ni katobibia te aonnaba, ao I rangi ni kukurei naba n te mwakuri n rairai ae aki kabooaki, ae eti raoi ao e karaoaki ma te nano ni koaua. E kaotaki iai te bonnano ni mwakuri i marenaia aomata aika bati ao te ukeuke mwaaka n aron ae I kona n noria.”

•   E taekina Te Rairai ae te Aonnaba ae Boou Professor Allen Wikgren man te reirei ae rietata i Chicago, bwa te rairai ae koreaki n te taetae ae kabonganaaki ngkai, e aki tii katotongi rairai ake tabeua. E bon okoro ma n “raoiroi rairan taeka aika bati iai.”​—The Interpreter’s Bible, Volume I, iteraniba 99.

•   E korea ae kangai temanna te tia nenera te Baibara ae Alexander Thomson ae kaaini Buritan ibukin Te Baibara ae Tabu​—te Rairai ae te Aonnaba ae Boou​—Mataio Nakon Te Kaotioti: “E oti n te rairai aei bwa bon aia mwakuri aomata aika mwaatai aika taan rabakau aika wanawana ake a a tia ni kataia n ukera rairan raoi nanon te taetae ni Kuriiti nakon te taetae n Ingiriti.”​—The Differentiator, Eberi 1952, iteraniba 52.

•   E ngae ngke e nori taian rairai aika okoro te tia kororongorongo ae Charles Francis Potter ma e bon taekina naba aei: “A a bon tia taan rairai aika aki kaotaki araia n raira te koroboki nikawai ae rangi n tamaroa man te taetae ni Kuriiti ao n Ebera, n aron te tia rabakau ae konabwai ma ni wanawana.”​—The Faiths Men Live By, iteraniba 300.

•   E ngae ngke e namakinna Robert M. McCoy bwa iai baika kamimi ao aika rangi n tamaroa ni kaineti ma Te Rairai ae te Aonnaba ae Boou, ma e motika ana ukeuke n taeka aikai: “E noraki n rairan Te Rairai ae te Aonnaba ae Boou bwa bon aia waaki taan rabakau [Ana Tia Kakoaua Iehova] aika kakoauaaki bwa a boni kona ni karaoa te rairai n aki ongei kangaanga aika bati n rairakin te Baibara.”​—Andover Newton Quarterly, Tianuare 1963, iteraniba 31.

•   Iai rairai tabeua n Te Rairai ae te Aonnaba ae Boou ake e aki inanoi ma ngaai Professor S. MacLean Gilmour, ma e ngae n anne e boni kakoauaa ae aomata ake a karaoa te rairai aei, bon “iai wanawanaia ae rianako n te taetae ni Kuriiti.”​​—Andover Newton Quarterly, Tebetembwa 1966, iteraniba 26.

•   E a manga nenera Te Rairai ae te Aonnaba ae Boou are e riki bwa kanoan te Baibara ae te Kingdom Interlinear Translation of the Greek Scriptures, Associate Professor Thomas N. Winter ao e korea ae kangai: “E kaineti ma boong aikai ao e eti raoi te rairai ae karaoaki iroun te komete ae aki kaotaki arana aei.”​—The Classical Journal, Eberi-Mei 1974, iteraniba 376.

•   E taekina aei n 1989 i Iteraera Professor Benjamin Kedar-Kopfstein, ae te tia rabakau ae te Ebera: “Ngke I karaoa au kakaae i aon taian taetae ni kaineti ma te Baibara n Ebera ao rairai riki tabeua, I aki toki n okira te Baibara n te taetae n Ingiriti ae ataaki bwa Te Rairai ae te Aonnaba ae Boou. Ni karaoan anne, I a kakoauaa raoi bwa te mwakuri n rairai nakon te Baibara aei e kaotaki iai bwa a kakorakoraia taan rairai aikai ma nanoia ni bwabwaina te koaua, ni karekea otaia ni kiibu n te aro are e na kona n eti raoi n aron aia kabanea ni konaa.”

•   E korea ae kangai Jason David BeDuhn ae te tia rabakau i aon te Aro, imwin rinanoan taian rairai n te Ingiriti aika ruaiwa aika rangi n ataaki: “E teretere bwa te NW [Te Rairai ae te Aonnaba ae Boou] e bon rangi n eti raoi ana rairai ni kabotauaki ma rairai riki ake tabeua.” E ngae ngke a taku angia aomata ao taan rabakau i aon te Baibara aika bati bwa a kaokoro rairani kiibu tabeua n Te Rairai ae te Aonnaba ae Boou ibukina bwa a kataia taan rairai ni kaboraoa te Baibara ma aia koaua, ma e taekina ae kangai BeDuhn: “Angiin te kaokoro a riki ibukina bwa e eti raoi riki te NW, bwa te rairai aei e kakairi raoi n te taetae nikawai ae kabonganaaki ni moani korean te Nu Tetemanti ao e aki bitii koaua mai iai.”​—Truth in Translation, iteraniba 163, 165.