Kakaokoroni baika a tatangiri taanga aika a a tia ni mareaki, n ikotaki ma anuaia ao kateia, boni baika a kona ni karioi kangaanga n tekatekaia n taanga. Ma iai bwaai tabeua aika kona ni karika riki te kangaanga, n aron aikai:

•   Mwaitin te tai ae a na kabanea ma aia koraki

•   Aroia ni bairea biribirin te mwane

•   A na karikiia natiia ke a na aki

 Tera ae ko kona ni karaoia ngkana e kauntaba am iango ma buum?

•  Te bwai ae ko riai n ataia

•  Te bwai ae ko kona ni karaoia

 Aitaram raoi ma iai kakaokoromi. E ngae ngke te buu te mwaane bon aitarana raoi buuna, ma e aki nanonaki iai bwa a nang katoatai naba ni boraoi n iango, i aon naba baika a kakawaki maroroakinaia.

 “I ikawairake n te utu ae a rangi ni kaan i marenaia. N te wikeen, ti na bae n ikoikotaki ma tibura, ai tamara, ai tinara ao ai tarira ma mwaanera. A aki bati n ikoikotaki ana koraki buu. Ai ngaia ae a kaokoro ara iango ni kaineti ma mwaitin te tai ae ti riai ni kabanea ma ara utu, ke mwaitin te tai ae ti na kabanea n te mamaroro ma ara koraki ake a maeka n taabo aika raroanako.”​—Tamara.

 “E kaokoro au iango ma buu ni kaineti ma arora ni kabongana te mwane. N namwakaina ake imwin tekatekara n taanga ao iai taai ake ti kakauntaekaa iai te mwane. E aki toki te kangaanga anne imwin ara moani maroro ke ara kauoua ni maroro.”​—Tyler.

 Tabeua kangaanga a aki kona n eti tii man irirakin nanon are temanna. N te katoto, tera arom ngkana e aoraki ana koraki buum ao e kainnanoa tabeakinana? Ke ngkana e tangiria buum bwa e na riki natimi, ao ngkoe ko rawa iai? a

 “Ti a bon tia ni mamaroro ngai ma buu ni kaineti ma karikaia natira. E a tabe ni kaatuua riki ngkai ana iango buu iai, ao a a moanna ni kaokoro ara iango iai. Titeboo ma e a kangaanga ae ti na ira nanon temanna iroura.”​—Alex.

 E aki riai n rotakibuaka tekatekami n taanga ibukini kakaokoron te iango. A taekinna taan rabakau tabeman bwa ngkana e a kangaanga iroumi te kaai ni boonnano n te iango ae kakawaki teuana, ao ko riai ni kabanea am konaa ni karaoa nanon are ko tangiria, e ngae ngkana nanon anne bwa ko nang raure iai ma buum. Ma te “anga” anne, e kaotia bwa ko a kaatuua riki iai oin am namakin nakoni kakawakin am berita are ko karaoia i matan te Atua, ae ko na nim ma buum n aki ongei baika riki.

 Kananomatoako ni karinea am berita ni mare. E na kairiko anne bwa ko na kona ni boonnanoa kaetan te kangaanga teuana ma buum, nakon are ko na taraa buum bwa aiam.

 Ana boto n reirei te Baibara: “Ane e botiia te Atua ao ke a tai karaureia, aomata.”​—Mataio 19:6.

 Warebwaia te kabanemwane. N te katoto, tao e tangiria te buu temanna bwa e na kariki, ma e rawa n te iango anne buuna. A riai n rinanoaki bwaai tabeua iai n ikotaki ma aikai:

•   Korakoran ami iraorao i marenami.

   Kam konaa uotami ngkana kam a manga ikota ami kangaanga ma kaikawaan te ataei?

•   Tabeia kaaro.

   E bati riki ae a na karaoia irarikini katauraoan te amwarake, te kunnikai, ao te mwenga.

•   Ami kataumwane.

   Kam kona ni kabaeranta te mwakuri, te utu, ao tabemi riki ake tabeua?

 Ana boto n reirei te Baibara: “Antai iroumi ae kani katea te taua, ae e na aki tekateka moa ni warebwaia te kabanemwane n noria bwa iai katiaana irouna ke akea?”​—Ruka 14:28.

 Iaiangoi baike a irekereke iai. E na bae ni buokiko anne ni kaeta te iango teuana are e kauntaba ma are iroum. N te katoto, ngkana e kaineti te kangaanga anne ma karikaia naati, e riai te buu are e rawa n te iango anne n titirakinna ni kangai:

•   ‘Ngke I taekina ae I aki tangiria bwa N na kariki, I nanonna ae N nangi bon rarawa naba nako iai ke tiaki moa ngkai?’

•   ‘I rawa ibukina bwa I aki koaua raoi bwa N na kona n riki bwa te karo ae raoiroi?’

•   ‘I maaka are e na katinanikuai buu?’

 N te itera are teuana, e riai te buu are e tangiria ni kariki n iangoi titiraki aikai:

•   ‘Ti a tauraoi raoi ni karaoa tabeia kaaro?’

•   ‘E tau ara kataumwane ibukini kaikawaan te ataei?’

 Ana boto n reirei te Baibara: “Te wanawana are mai karawa . . . e aki imanono.”​—Iakobo 3:17.

 Ataa raoiroin ana iango buum. A kona uoman aomata ni kaai n taraa te bwai teuana, ma e kaokoro aia iango iai. N aron naba anne, a kona taanga n taraa te kangaanga teuana ma e kaokoro aroia nako iai, n te katoto, aroni kabonganaan te mwane. Ngkana kam maroroakina te kangaanga teuana ae kam kaokoro n iango iai, maroro moa i aoni baika kam nanoteuana iai.

•   Tera tiami ae kam kaai ni boonnano iai?

•   Tera raoiroin ana iango temanna ma temanna iroumi?

•   Ibukin nakoraoin tekatekami, e kona temanna iroumi ke boni ngkami uoman, ni kaangaraoi ami iango bwa e aonga n reke te boonnano?

 Ana boto n reirei te Baibara: “Ke e tai ukera oini kabwaiana temanna ma temanna, ma e na ukera ae e na kabwaia iai raona.”​—1 I-Korinto 10:24.