E kaungaaki n te Baibara bwainan te anganga ae nako man te nano ao e karaoaki ni bukina ae riai. E kaotaki naba n te Baibara bwa te aeka n anganga anne e karekea te kakabwaia nakon te tia anganaki ao te tia anga naba. (Taeka N Rabakau 11:25; Ruka 6:​38) E taku Iesu: “E kakukurei riki te anga nakon te anganaki.”​—Mwakuri 20:35.

•  Te aeka n anganga raa ae e kukurei iai te Atua?

•  Te aeka n anganga raa ae e aki kukurei iai te Atua?

•  Kibun te Baibara ni kaineti ma te anganga

 E kakukurei te anganga ae nako man te nano. E kangai te Baibara: “Ke e karaoa ae e kataua i nanona temanna ma temanna, tiaki n aron ae e aki kukurei iai ke e tebonaki nako iai, bwa te Atua e tangira ane e anga ma kukurein nanona.”​—2 I-Korinto 9:​7, kabwarabwara mai nano.

 Te anganga ae nako man te nano bon ana waaki te Aro ae e kukurei iai te Atua. (Iakobo 1:​27, kabwarabwara mai nano) E boni kakukureia te Atua te aomata ae tituaraoi ni buokiia aika kainnano, ao te Atua e iangoa te aeka n tituaraoi aei bwa kataarauana. (Taeka N Rabakau 19:17) E reirei te Baibara bwa bon te Atua ae e na kaboomwi nakon te tia anga.​—Ruka 14:​12-​14.

 Ngkana e karaoaki ma te nano ni bangaomata. N te katoto:

•   Kan anaakin nanoia aomata.​—Mataio 6:2.

•   Kani karekean te bwai teuana.​—Ruka 14:12-14.

•   Ibukini kani karekeani kamaiuam mairoun te Atua.​—Taian Areru 49:6, 7.

 Ngkana e boutokai mwakuri ao aroaro aika e kabuakakai te Atua. N te katoto, e boni bure anganakin temanna te mwane ibukin ana takaakaro n te mwane ke ibukini kabonganaan te drug n te aro ae riao ke te kamanging. (1 I-Korinto 6:​9, 10; 2 I-Korinto 7:1) E bon aki naba riai te anganga nakon te aomata ae boni konaa ni karekemwane i bon ibukina ma e rawa ni karaoia.​​—2 I-Tetaronike 3:​10.

 Ngkana ti anganga n te aro ae riao ao ni kakeai bongaia iai ara utu. E reirei te Baibara bwa e riai atun te utu ni katauraoi kainnanoia kaaini batana. (1 Timoteo 5:8) E bon aki riai iroun atun te utu ngkana e a rangi ni kabatiaa ana anganga ao ni kakeaia kaaini batana. E kabuakakaia naba Iesu naake a rawa ni karekei kainnanoia aia karo aika kara, ao ni bukinna bwa a a bane aia bwai n riki bwa “te karea nakon te Atua.”​—Mareko 7:​9-​13.