E taku te tia korea te Baibara ae Ruka ni kaineti ma ana rongorongo ibukini maiun Iesu: “I a tia ni karaui ni barongai bwaai ni kabane mai moana n te aro ae eti raoi.”—Ruka 1:3.

 A taku tabeman bwa rongorongoni maiun Iesu ake n taian Euangkerio ake a koreaki irouni Mataio, Mareko, Ruka, ao Ioane ake naake a maiu n ana tai, a a bitaki n te kaaua n tienture.

 Ma mwakorokoron ana Euangkerio Ioane ae rangi ni kakawaki, e kuneaki i Aikubita ni moan te ka-20 n tienture. E a ataaki ngkai bwa te Papyrus Ryland ao e kawakinaki n te John Rylands Library, i Manchester, i Engiran. A koreaki i nanona baika taekinaki n Ioane 18:31-33, 37, 38 ni Baibara aika ngkai.

 Aei boni mwakorokoron te koroboki nikawai n te Koroboki ni Kristian ae Tabu n te Taetae ni Kuriiti, ae te kabanea ni maan. A bati taan rabakau aika kakoauaa bwa e koreaki tao n 125 C.E., ae tii kuatan te tienture imwini moani korean are te moan. Taeka ake a kuneaki ni mwakorokoron te boki anne, a kuri ni boraoi ma koroboki nikawai ake imwina riki.