E kangai te Baibara: “A ataia akana maiu ae a na boni mate, ma a bon aki ataa te bwai teuana akana mate.” (Te Minita 9:5; Taian Areru 146:4) Ngaia are ngkana ti mate ao ai bon akea naba ngaira. A aki kona maate n iango, ni karaoa te bwai teuana, ke n namakinaaba.

“Ko na manga okira te tano”

 E kabwarabwaraa te Atua te bwai ae riki ngkana ti mate ngke e taetae nakon te moan aomata are Atam. Ibukina bwa e aki ongeaba Atam, e taku te Atua nakoina: “Bon te tano ngkoe ao ko na manga okira te tano.” (Karikani Bwaai 3:19) Imwain ae e karika Atam “man te tano” te Atua ao bon akea Atam. (Karikani Bwaai 2:7) Ao ai arona naba bwa ai akea Atam ngke e a mate bwa e a okira te tano.

 Anne naba aroia naake a mate ni boong aikai. E taekinia aomata ao maan te Baibara ni kangai: “A bane n riki man te tano, ao a bane n okira te tano.”​—Te Minita 3:19, 20.

Tiaki tokini bwaai ni kabane te mate

 E aki toki te Baibara ni kabotaua te mate ma te matu. (Taian Areru 13:3; Ioane 11:11-14; Mwakuri 7:60) E aki ataa te bwai ae riki i rarikina te aomata ae mwanionako ni matu. Ai aroia naba maate bwa akea te bwai ae a ataia. Ma e reirei te Baibara bwa e kona te Atua ni kautiia maate n aron ae kaanga e kautiia mani matuia ao ni manga kamaiuia. (Iobi 14:13-15) Tiaki tokini bwaai ni kabane te mate ibukia te koraki ake e kautiia te Atua.