E kaineti te buaka ae Aremaketon nakon te kabanea ni buaka i marenan aia tautaeka aomata ao te Atua. A kaitaraa te Atua ngkai naba tautaeka aikai ma taani boutokaiia, n aroia n rawa n aantaeka nakon ana kairiri. (Taian Areru 2:2) A nang bon roko n tokia aia kairiri aomata n te buaka ae Aremaketon.​—Taniera 2:​44.

 Tii te taina ae taekinaki iai te taeka ae “Aremaketon” n te Baibara, n Te Kaotioti 16:16. E boni kaotaki n Te Kaotioti bwa “ueea n te aonnaba ni kabutaa . . . a na ikotiia nakon te buaka n te bong ae kakannato ae ana bong te Atua ae Moan te Mwaaka” n “te tabo ae aranaki n te taetae n Ebera bwa Aremaketon.”​—Te Kaotioti 16:14.

 Antai aika a na buaka n Aremaketon? E na kairiia kaain te taanga ni buaka mai karawa Iesu Kristo bwa a na totokanikai i aoia taani kairiribai nakon te Atua. (Te Kaotioti 19:11-​16, 19-​21) Taani kairiribai aikai a irekereke naba iai naake a karitei nakoni mwaakan te Atua ni kairiri ao naake a aki karinea te Atua.​—Etekiera 39:7.

 E na boo raoi te buaka ae Aremaketon n aonon te Middle East? E aki. E na aki boo n te aono ae tii teuana te buaka ae Aremaketon, ma e na boni waaki ni katobibia te aonnaba.​—Ieremia 25:32-​34; Etekiera 39:17-​20.

 N tabetai ao e rairaki Aremaketon bwa “Har–​Magedon” (Ebera Har Meghiddohnʹ), ae nanona “Maungani Mekito.” Mekito bon te kaawa ngkoa teuana n aia aono I-Iteraera rimoa. Iai rongorongon rimoa ae taekani buaka aika korakora aika riki n uakaan ma te tabo aei, ao iai naba tabeua aika taekinaki n te Baibara. (Taani Motikitaeka 5:​19, 20; 2 Uea 9:​27; 23:29) Ma e aki kona ni kaineti Aremaketon ma te aono teuana n uakaan ma Mekito rimoa. Akea te maunga ae totoa n te tabo aei, ao a kona n aki bane aomata ake a na buaka ma te Atua n te tabo ae aoraoi ae Ietireera. Aremaketon bon taekan te bwai ae e na riki ni katobibia te aonnaba ike a na botaki iai natannaomata ni kaitaraa ana kairiri te Atua.

 Tera aron te waaki n tain te buaka ae Aremaketon? E ngae ngke ti aki ataia bwa e na kangaa te Atua ni kabongana mwaakana, ma e na bon iai ana bwai ni buaka n aron ake e kakabonganai n taai aika nako, n aron te karau ae te aiti, te mwaeiei, te ieka ae korakora, te ai ma te burimton, te iti, ao ai te aoraki ae kamamate. (Iobi 38:22, 23; Etekiera 38:19, 22; Abakuka 3:​10, 11; Tekaria 14:12) A kona naba n rotaki ao a a manga bon tiringia i marenaia, ma a na bon ataia raoi naakai ae e a buaka te Atua ni kaaitaraia.​—Etekiera 38:21, 23; Tekaria 14:13.

 Aremaketon bon tokin te aonnaba aei? Bon tiaki tokin ara buraneti aei bwa te aonnaba boni mwengaia aomata n aki toki. (Taian Areru 37:29; 96:10; Te Minita 1:4) E na aki kamaunaia te botannaomata Aremaketon ma e na kamaiuia, ibukina bwa “te koraki ae uanao” ae ana toro te Atua a na boni kamaiuaki.​—Te Kaotioti 7:​9, 14; Taian Areru 37:34.

 Te taeka ae “aonnaba” ae taekan te buraneti aei, e kaineti n tabetai nakon te botannaomata ae buakaka ae kaitaraa te Atua. (1 Ioane 2:​15-​17) N te aro aei, ao Aremaketon e na boni karokoa “te toki n te aonnaba aei.”​—Mataio 24:3, King James Version.

 E na waaki n ningai Aremaketon? E taku Iesu ngke e maroroakina taekan te “rawawata ae korakora” are e na roko ni korakorana n te buaka ae Aremaketon: “Akea ae e ataa te bong ma te aoa anne, a aki ataia anerani karawa ao e aki ataia naba te Nati, ma tii te Tama.” (Mataio 24:21, 36) Ma e kaotia te Baibara bwa e na waaki Aremaketon n te tai are e a oki ma n tiku iai Iesu, ao e moanaki te tai anne n 1914.​—Mataio 24:37-​39.