Ana Tautaeka n Uea te Atua bon te tautaeka ni koaua ae kateaki iroun Iehova ae te Atua. “Ana Tautaeka n Uea te Atua” e aranaki naba n te Baibara bwa “te Tautaeka n Uea ae bwaini karawa” kioina ngkai e kairiri mai karawa. (Mareko 1:14, 15; Mataio 4:17, King James Version) A bati baika titeboo iai arona ma aia tautaeka aomata, ma e bon rianako riki n aanga nako.

•   Taan Tautaeka. E a tia te Atua n rinea Iesu Kristo bwa te Uea n te Tautaeka n Uea, ao e anganna te mwaaka ni kairiri ae tuai man reke irouia taan tautaeka aika aomata. (Mataio 28:18) E kabongana te mwaaka aei Iesu tii ibukin te bae raoiroi, ao e a tia n noraki bwa bon te tia Kairiri ngaia ae atataiaomata ao e kona n onimakinaki. (Mataio 4:23; Mareko 1:40, 41; 6:31-34; Ruka 7:11-17) I aan ana kairiri te Atua ao e a tia n rineiia aomata Iesu man natannaomata nako ake a na “kairiri bwa ueea n tautaekana te aonnaba” ma ngaia i karawa.—Te Kaotioti 5:9, 10.

•   Maanna. E kaokoro Ana Tautaeka n Uea te Atua bwa “e na bon aki kamaunaaki,” ao aia tautaeka aomata e bon aki kona n teimatoa.—Taniera 2:44.

•   Kaaina. E kona n riki ane e kakaraoa nanon te Atua bwa kaain Ana Tautaeka n Uea te Atua, n aki ongea rikiana ke ana tabo ae bungiaki iai.—Mwakuri 10:34, 35.

•   Tuana. E bati riki ae nanonaki n taian tua ake n Ana Tautaeka n Uea te Atua nakon ae tii katabuakan aroaro aika kairua. A karikirakea te aroaro ae katauaki ibukia kaaina. N te katoto, e taku te Baibara: “‘Ko riai n tangira Iehova ae Atuam ma nanom ni kabane, maium ni kabane, ao am iango ni kabane.’ Te tua aio bon te kabanea ni kakannato, ao te moan tua. Te kauoua, kaanga aekakin naba anne ae kangai, ‘Ko riai n tangira raom n aomata n aron tangiram i bon iroum.’” (Mataio 22:37-39) A kairaki kaain te Tautaeka n Uea n tangiran te Atua ao raoia bwa a na karaoa ae a na kabwaia iai aomata.

•   Reireina. E ngae ngke e katei kaetieti aika rietata Ana Tautaeka n Uea te Atua ibukia ana aomata, ma e bon reireinia naba aroia ni maiuakini.—Itaia 48:17, 18.

•   Ana Mwakuri. Ana Tautaeka n Uea te Atua e aki karekei kaubwaia taani kairiri iai, mairouia ana aomata. Ma e na boni kakororaoa nanon te Atua, n ikotaki ma te berita are a na maiu n aki toki n te aonnaba ae bwaretaiti naake a tangiria.—Itaia 35:1, 5, 6; Mataio 6:10; Te Kaotioti 21:1-4.