1. Mókà kà kà bel ea kil ló Jìhóvà ní e Kpá Káí náa kọ é nyimáé?

É KỌ àé léémá ni kọ gbò nen á beelàẹ̀ ni bel ló boo béè o kpá ló, bé e sĩ́ ni meà naa, àbèè bé eo mèà dì naa? Náa é léémá ni. Ẹ̀b bé ea ẹ́ẹ̀lẹ̀i nyíe naa, tṍó e nyímà kọọ̀ Jìhóvà náa ólò tú nú e dẽè nen moà beemái bel ló! Dì belí nu dòòmà bá, tṍó e Sámuẹ̀l géè ẹ̀bgì pá nvín Jésì, ẹlẹ náa beè mòn nú e Jìhóvà mon. Jìhóvà beè kọ́ nè Sámuẹ̀l kọọ̀ ene kà nvín Jésì ní ea é bẹl Ízràẹ̀l ẹ. Sõò mée ea dì vá zẹ̀ẹ̀ ẹ? Tṍó e Sámuẹ̀l beè mòn Èláíàb ea dú sã́áná Jésì, a beè kọọ̀: “Kà lèlà ẹlẹí ní e Jìhóvà ni sa gè tṍ nóo bólé.” Èláíàb beè ié lé mèà belí méné. “Sõò Jìhóvà beè kọ́ nè Sámuẹ̀l kọọ̀: ‘Ó gá ẹ̀b bé ea mèà dì naa nè bé ea bọọ́ gã boo naa, mè nda ním saà ẹlẹá.’ ” Éé ní e níí nóòmài ẽ́? Jìhóvà beè kilsĩ́ gè kọọ̀: “Nen ólò ẹ̀b áá nu ea monmà dẽe, sõò Jìhóvà ólò ẹ̀b mm̀ nyíè nen.”—1 Sám. 16:1, 6, 7.

2. Dẹ̀ẹ̀a boo nú ea di mm̀ kpá Jọ́ọ̀n 7:24, éé ní ea náa vaá náa bọ́ló kọ é beelá bel ló dõòna nèn dẹ̀ẹ̀a boo bé e monìe naa ẽ́? Nè nu dòòmà bá.

² Dì belí gbò e bè née gbõomà, à ólò valíí ló gè beelá bel ló dõòna gbò dẹ̀ẹ̀a boo nu e monì. (Bugi Jọ́ọ̀n 7:24.) Sõò néé láá nyimá dénè nú ea kil ló nen dẹ̀ẹ̀a boo bé e monìe naa. Dì belí nu dòòmà bá, neǹ dóm biè ea nyímá tóm náa é láá nyimá dénè nu ea kil ló nen e kpá lóe gé zọ, be à gá náa vaá à dõogẽ ẹ̀bvie áá sĩ́. Be à gbĩ́ gè nyimá bé e kpá lóe gé zọ naa, àé íè ge pãanée tṍ ló tṍó ea gé nootẽ́ a dìtõ̀ò àbèè bé e nuá gé zọ́ẹ naa. Neǹ dóm bièa é láá kọ á sí kiẽ́e e bàé tú ńzì ẹ̀bmàe m. Be níì vó nì, náa é láá nyimá bé ea é bóe naa. Mm̀ tẽ̀ènè sĩ́deèá, néé láá palàge dã́tẽ́ ló pá bẹẹ vígà tení dú ló áá nú e monmà dẽe. À bọ́ló kọ é pììga boo gè nyimá íb nen e bà dú. Beele néé láá dã́tẽ́ ló dõòna gbò belí Jìhóvà, boo béè kọ née nyímà nu ea dì vá  nyíe. Sõò èé láá pììgà bé e bẹẹ kpóó sim tùlà naa gè belí Jìhóvà. Mósĩ́ deè e?

3. Mósĩ́ deè ní e gbò nòòtẽ́ ea di mm̀ Kpá Káí ea di mm̀ togó belí é nveè bá nèi kọ é nó Jìhóvà ẹ?

³ Mó bá ní e Jìhóvà ólò zọ̀ gbò e bà gé fã́e naaá nu ẽ́? À ólò pãané va tṍ ló. À ólò bugi togó boo nú ea kil ló ba dìtõ̀ò nè dénè nu e bà ni téní bá. Vaá à ólò tó va sàn. Boo tṍó e gé nó bé e Jìhóvà beè naa gbò nuí kilma ló Jónà, Èláíjà, Hégà, nè Lọ́t naa, naanii mè é ẹb bé eé láá nó Jìhóvà tṍó e gé zọ pá bẹẹ vígà naaá nu naa.

4. Éé ní ea é láá naa kọ é ẹ̀b Jónà mm̀ bá e bè náa bọ́ló é?

⁴ Boo béè kọọ̀ née nyímà dénè nú ea kil ló dìtõ̀ò Jónà, èé láá bugi togó kọọ̀ à dú nen e bà náa é láá dẹlẹ́ẹ nyíé boo àbèè kọọ̀ náa beè bọ́ló dẹ̀lẹ̀ nyíé boo. Jìhóvà beè kọ́ nèe kọọ̀ á vee a bèèla bel nè pá Nínevà. Sõò tãá ea gban tṍ ló, Jónà beè bã mm̀ mìàlo gbĩ́ gè kil dõòna ketõ̀ò, “aa kè sĩ́ Jìhóvà.” (Jónà 1:1-3) Be a beè dú olo à, é kọọ̀ ò gáẹ̀ láá kpáá nèe dõòna kà nèà deè kọ á sí tómá? Be à sẹlẹ, nóo gáẹ̀ beè naa vó. Sõò, Jìhóvà beè mòn kọọ̀ à bọ́ló gè kpáá nèe dõòna kà nèà deè.—Jónà 3:1, 2.

5. Éé ní e olo nóò ea kil ló Jónà lọl ló gbò a moǹ bel ea di mm̀ kpá Jónà 2:1, 2, 9 é?

⁵ Jónà beè tẹlẹ bàlà kẽ íb nen e ẹlẹ dú mm̀ a tã̀àgã ló Bàrì. (Bugi Jónà 2:1, 2, 9.) Tọ́ọ̀ kà bàà-bàà bùlà á gé ló, Jónà beè tã̀àgã ló Bàrì gã́bug tṍó. Gbàà dénè a tã̀àgã ló, ní ea beè tõó gbàà gyã́à tã̀àgã̀a, nveè bá nèi kọ é nyimáe ló èlmà pọ́ì nen ea beè teá aa ló tóm e Jìhóvà beè nèe. Gbò a moǹ bel zógè kọọ̀ a beè dú neǹ kìlmà kpá ló kẽ, nen ea íe dùm ṍà zaa, nè nen ea beè beeláfùl ge gbàn tṍ ló Jìhóvà. Ńgá kọ́ vó e Jìhóvà beè lọ̀l dẽe sĩ́ gbò a lọ̀, aalá a tã̀àgã ló, vaá kilsĩ́ gè túe naamá nen ea é kọ́ a bùlà!

6. Éé ní ea náa vaá àé dọ bélè be è palàge pãane tṍ ló dõòna gbò e?

⁶ Kọbé è láá palàge pãane tṍ ló dõòna gbò, à dú bíi kọ é kìlmà kpá ló kẽ vaá ié ĩ̀ìmà. Kọ̀láá bé ea kil kẽ naa, àé palàge dọ̀ bélè nèi mm̀ taà sĩ́deè. Túá kà, àé náa kọ é gá vàlẹ̀ bá ié pọ́lọ́ bùlà kilma ló dõòna gbò. Ní ea égè bàà kà, àé nveè bá nèi kọ é láá nyimá tóm̀ bùlà nè tọa ló pá bẹẹ vígà, vaá níá é nveè bá nèi kọ é tó va sàn. Ní ea égè taà kà, tṍó e sọọ̀ tọ́ deè kọ nen á kọ́ a tã̀àgã̀, àé nveè bá nè áá ẹ̀ẹ̀ kọ á dã́tẽ́ ló a bá. Sìgà tṍó, née ólò láá palàge  dã́tẽ́ ló bẹẹ tọa ló dọ̀ọ̀mà tṍó e kọ́ọ̀ nè nen. (Pró. 20:5) Ene kà neǹ kànen ea di Asia beè kọọ̀: “Nda kẽèa boo tṍó em beè dõogẽ ló bel e bè ním nyímà dénè nu ea kil ló. M beè kọ́ nè ene kà vígà pábia kọ á kpáá pììga boo bé ea áálá bel gbẹá nònù naa. Tṍó e tṍó téní, m beè gbóó nyimá kọọ̀ náa ólò valíé ló gè bugi nu, vaá à ólò palàge pììgà besĩ́ à kálá láá aalá bíb.” Ẹ̀b bé ea dú lé kọọ̀ buù neǹ kànen á “nyimá dénè nu” ea kil ló nen besĩ́ à kálá nè dùùlà bá deè tṍ naaà!—Pró. 18:13.

7. Éé ní e olo nóò lọl ló bé e Jìhóvà beè zọ̀ Èláíjà naaá nu naa ẽ́?

⁷ À ólò tàvala ló sìgà pá bẹẹ vígà págbálà nè pábia gè láá ló bel ea kil ló bé e nu tọ́a vá ló naa, boo béè gbò nú ea beè naaá vá ló. Mósĩ́ deè ní eé láá naa kọ á valí vá ló gè láá ló bel nèi ẽ́? Kẽ̀èa boo bé e Jìhóvà beè zọ̀ Èláíjà naaá nu naa tṍó ea géè gũá ló Jézibẹ̀l. A beè tú kà tõ̀ò dee bá Èláíjà besĩ́ à kalá kọ́ bé e nu beè tọáẹ́ ló naa nè Jìhóvà. Jìhóvà beè palàge pãanée tṍ ló. A beè gbóó siè kpóó ló Èláíjà vaá nèe tóm ge sì. (1 Kíǹg 19:1-18) Àé láá tú gã́bug tṍó bá pá bẹẹ vígà gè láá taaá ló kọ́ ba bùlà nèi, sõò áá tṍó e bà náa vó, ní eé láá nyimá ba tọa ló é. Be à gá náa vaá è ié ĩ̀ìmà belí Jìhóvà, bàé láá dẹlẹ́i nyíé boo. Tṍó e bà gbĩ́ gè kọ́ ba tọa ló nèi, à bọ́ló kọ é palàge pãané va tṍ ló.

8. Dẹ̀ẹ̀a boo nú ea di mm̀ kpá Jénesìs 16:7-13, mósĩ́ deè ní e Jìhóvà beè nvèè bá nè Hégà ẹ?

⁸ Hégà, ea dú nvín tọọ̀ Sérài, beè labví láb neǹ ból tṍó e Ébràm ni ílíe lọ̀l. Tṍó e Hégà nííná gbàà, a beè dààmà togó ge ẹ̀b Sérài e náa beè ié nvíná tẹlẹ kẽ. Dìtõ̀òa beè zoogá naa ní e Sérài kpóe. (Jén. 16:4-6) Boo béè kọọ̀ née gbõomà, èé láá bugi togó kọọ̀ Hégà beè dú kà neǹ dàlà kpá ló boo ea bọ́ló kọ bàá nèe kpọ̀té. Sõò, Jìhóvà náa beè ẹ̀b Hégà naa vó. A beè lẹ̀ẹ̀là a nyómá tóm máe. Tṍó e nyómá tómá ínaé ló, a beè nvèè bá nèe naa ní ea nyááná bá ló a láb vaá a beè gbóó tãanìè dee bá. Hégà beè gbóó nyimá kọọ̀ Jìhóvà géè ẹbvìèe vaá nyimá dénè nu ea kilìè ló a dìtõ̀ò. Nyíée beè ẹẹ naa ní ea kólíe, “Bàrì ea ólò mòn dénè nu, . . . ea moním.”—Bugi Jénesìs 16:7-13.

9. Éé ní ea náa vaá Bàrì beè tú lé bá faamá Hégà ẹ?

⁹ Éé ní e Jìhóvà beè nvèè kpíí ló ea kil ló Hégà ẹ? A beè nyimá nu ea beè naaá ló Hégà nè kọ̀láá kà nu ea géè tení bá. (Pró. 15:3) Hégà beè dú neǹ Íjèpt ea beè kìl kyáà tọọ̀ neǹ Híbrù. É kọ a beè tõoé ló belí kọ náa bọ́ẹ̀ ló gè di tọá? É kọ a beè tànie gè kpáá di ló pá a tọ nè pá ba bon? Níì áá ẹlẹ ní e Ébràm beè ilíé nì. À íe tṍó, e sìgà gbò gbálà e ba beè bọ́ló dẹ̀lẹ̀ nyíé boo beè ilí nu ea sígá ló ene kà va. Sõò, náa beè dú bùlà Jìhóvà naa vó. (Máát. 19:4-6) Ńgá kọ́ vó, e dìtõ̀òí ólò bọọgẹ̀ naa kọọ̀ bẹẹ nyíe nè ọ́la á di mm̀ tọ. Jìhóvà beè nyimá kọọ̀ náa lelà kọọ̀ Hégà á gá fã̀ dẽè Sérài. Sõò, a beè dã́tẽ́ ló dìtõ̀ò nè tọa ló Hégà, e vó beè naa kọ á tú lé bá faamáe.

10. Mósĩ́ deè ní eé láá palàge nyimá ló pá bẹẹ vígà ẹ?

¹⁰ Èé láá nó Jìhóvà tení dú ló gè pììga boo gè dã́tẽ́ ló ene. Gbĩ́ gè nyimá ló pá vígà leevè. Zọ̀ va loá sọ́l besĩ́ nònù kálá dààmà togó nè tṍó e bà ni zaalà, zọ̀ va kọá kpẹ̀a, vaá be à válí, ò kólí va kọ bàá dù gé zọ̀ ni deá gyã́á. Tṍó eo náà vó, àé láá bọọ́ ní ló gè nyimá kọọ̀ vígà pábia eo beè dòòmà kọọ̀ náa ólò láá bã ló nená, mè kẹ́ẹ ní ea dú báẹ́, òó mon kọọ̀ vígà  págbálà ea íe kpègè eo doòmà kọọ̀ à ólò bọọgẹ̀ gbó gyọ́á, ólò dõo nu taalẹ bá, àbèè kọọ̀ pá tọ e bà ólò bọọgẹ̀ dú kpẹ̀ nvée tṍó nònùa, gé téní bá nàà uú boo. (Jóòb 6:29) Mm̀ kà kà, náa dú lé kọ é “sọlẹ̀ gã́ m bel e bè náa [kuúi].” (1 Tím. 5:13) Kọ̀láá bé ea dì naa, à dú lé gè nyimá nu ea kuu pá bẹẹ vígà nè gbò nu e bà ni téní bá, boo béè kọọ̀ níí é nveè bá nèi kọ é palàge dã́ va tẽ́ ló.

11. Éé ní ea náa à dú bíi kọ gbò kànen á nyimá ló pá vígà leevè e?

¹¹ À palàge dú bíi kọọ̀ gbò kànen á nyimá nu ea kuu pá vígà e bà gé kudẽe ló. Bugi togó boo nu dòòmà bá ene kà vígà págbálà ea bée kọlà Artur ea géè sí tóm dì belí nen ea ólò kùdẽe ló sẹ́kiùt. Dõòna kà neǹ kànen nè ẹ̀ẹ̀ beè kãa ene kà vígà pábia e bè náa ólò láá zọ̀ gbò nen naaá nu. Artur beè kọọ̀: “E beè gbóó mòn kọọ̀ a dóm beè ú pọ́ì ńkem̀ tṍó aa ló tṍó e ba beè ilá. Kè bá dénè ànà-ànàí, a beè láá bumá bàà kà a nvín pábia kọ bàá vùlè Jìhóvà vaá bà dì e bà gé fã́e. Kátogóí, a vulè kilma ló Jìhóvà nè a zìgà di agẹ, náa kal ló béè kọọ̀ náa láá bọọgẹ̀ mònnà nu, vaá à dì ea gé ié tã̀àgã̀ bùlà. E beè gbóó nyimá kọọ̀ è íè kà tõ̀ò nu gè nó lọl ló nu dòòmà bá vígà pábiaí.” (Fíl. 2:3) Vígà ea ólò kùdẽe ló sẹ́kiùtí, géè nó nu dòòmà bá Jìhóvà. Jìhóvà nyímá ló pá a gyóòlo e bà bọ́ló dẹ̀lẹ̀ nyíé boo nè gbò tã̀àgã̀ e bà gé téní bá. (Ẹ́xọ. 3:7) Àé palàge valí ló gbò kànen gè nvèè bá nè pá vígà tṍó e bà nyímá nu ea kil vá ló.

12. Mósĩ́ deè ní e vígà Yip Yee beè ié dọ̀ bélè lọl ló gè nyimá ló ene kà vígà pábia leevè e?

¹² Tṍó eo piigà boo gè nyimá nu ea kil ló neǹ vígà ea láb náa ólò leemá ni, àé náa kọ ó palàge tóe sàn. Dì belí nu dòòmà bá. Yip Yee ea dú Asia beè kọọ̀: “Ene kà vígà pábia ea di beélè bõ̀ònatõ̀ò ólò bọọgẹ̀ ló bel agẹlẹ mon. A beè tõo ḿ ló kọọ̀ níà pọ́lọ́ láb. Sõò tṍó e nda zọọ̀ẹ kọá kpẹ̀a, m beè gbóó nyimá kọọ̀ à ólò nvèè bá oo gyã́à nè a tẹ̀ nè a kà gbẹá kè ki. À ólò palàge agẹlẹ mon kọbé à kólí bùlà gbò e bàé zálí.” Yip Yee beè kpáá kọ nágé kọọ̀: “M beè nyimá kọọ̀, kọbé m̀ láá palàge dã́tẽ́ ló pá nà vígà, à dú bíi kọ ḿ nyimá vá ló leevè.” À ólò bĩiná sìà kpóó ló kọbé ò nyímá ló pá o vígà leevè. Nagé, tṍó eo túù dùùlà bá deè tṍ ea di mm̀ Kpá Káí ea kọọ̀ ó zogè kè tẽ́ o nyíe siimá tóm, ò gé nó Jìhóvà ea ólò vùlè “dénè nen.”—1 Tím. 2:3, 4; 2 Kọ́r. 6:11-13.

13. Dẹ̀ẹ̀a boo nú ea di mm̀ kpá Jénesìs 19:15, 16, éé ní e gbò nyómá tómá beè naa tṍó e Lọ́t géè kọ̀ọ̀gà ẹ, vaá boo béè éé?

¹³ Kà tàvàlà tṍó mm̀ a dùm, Lọ́t beè ọọ ló gè gbàn tṍ ló gbò dùùlà bá deè tṍ Jìhóvà. Bàà kà nyómá tóm beè kọ́ nè Lọ́t kọ á tú pá a tọ lọl Sọ́dọ̀m. Ló éé? Ba beè kọọ̀: “Èé gé kyọ̀gàlà sĩ́ boní.” (Jén. 19:12, 13) Bòm deè deé ea bẽene, Lọ́t nè pá a tọ beè di dí boná. Boo béè vó, gbò nyómá tómá beè kpáá ãane nagé Lọ́t. Sõò “a beè dì ea géè kọ̀ọ̀gà.” Èé láá tuumá kọọ̀ nu e Jìhóvà beè kọ́ nè Lọ́ta náa beè tõoé ló dú tọ́ọ̀ nu, àbèè kọọ̀ ẹ̀ẹ̀ neǹ lọ̀l togó kè bá. Sõò, Jìhóvà náa beè sọ̀ẹ bá gbẹẹ́ kẽ. “Boo béè tóe sàn e Jìhóvà beè ié kìlmàé ló,” gbò nyómá tómá beè sii bá ló bá pá tọọ̀ Lọ́t teemá lọl boná.—Bugi Jénesìs 19:15, 16.

14. Éé ní ea beè láá naa kọ Jìhóvà á tó sàn Lọ́t e?

¹⁴ Jìhóvà beè láá tó sàn Lọ́t boo béè gã́bug nu. Be à sẹlẹ, Lọ́t beè siiá pọ̀ ló gbò e bà di nvéè boná vaá níà nú ea náa, náa beè vàlẹ̀ bá ààẹ. Dõòna kà gbò nuù gẹẹ-gẹẹ ló beè dì nàgé. Lọ́t beè láá nyimá nú ea kil ló bàà kà méné e ba beè dọ mm̀ bànà ea di kolo-kolo kẽ ea di kuló kĩáá, e nú ea kọlà bitumen e bà ólò tõomá kòlò tá beè di m. (Jén. 14:8-12) Dì belí tẹ̀ boo tọ, Lọ́t beè láá ié tã̀àgã̀ bùlà ea kil ló pá a tọ. Nagé, Lọ́t beè neǹ méné, boo béè vó, a beè láá ié kà lé tọ mm̀ boǹ Sọ́dòm. (Jén. 13:5, 6) Mm̀ kà kà, dénè gbò nuá náa gáẹ̀ beè láá naa kọ Lọ́t á gá gbàn tṍ ló Jìhóvà tẽ̀ènè tṍóá. Sõò, Jìhóvà náa beè ẹ̀b lọ̀ Lọ́t, tãa vó a beè ẹ̀bvie belí “lé nen.”—2 Pít. 2:7, 8.

15. Tãa vó e dõogẽ beelá bel ló láb e nen lábví, éé ní ea bọ́ló kọ é naa ẽ́?

¹⁵ Tãá vó eo dõogẽ beelá bel ló láb dõòna nèn, pììga boo gè dã́tẽ́ ló a tọa ló. Ene kà vígà pábia ea di Europe ea kọlà Veronica, beè pììga boo gè naa vó. A beè kọọ̀: “À íe ene kà vígà pábia ea ólò belí nú e kọ̀láá tṍó nyíée gé biilà. À ólò kpòòlà a lóó lọl ló dõòna gbò. Pọ̀ beè zẹ́ẹ́ siím ge bã̀é ló. Sõò m beè gbóó bugi togó  kọọ̀: ‘Be aẹ̀ bèè nda, m̀ gáẹ̀ beè ié bíi ló nen eḿ láá bã ló.’ Boo béè vó, m beè beeláfùl ge bĩináe bé e kpá lóe dì naa. Vaá a beè dààmà togó gè kọ́ a bùlà nèm! Kátogóí, m palàge dã́tẽ́ ló gã́bug nú ea kilíe ló.”

16. Éé ní ea náa à bọ́ló kọ é bàn Bàrì kọ á nvèè bá nèi kọ é ié tóè sàn ẽ?

¹⁶ Áá Jìhóvà ní ea palàge dã́i tẽ́ ló é. (Pró. 15:11) Boo béè vó, bànie kọ á nvèè bá nè ni kọ ó ẹ̀b dõòna gbò belí bé e ẹlẹ ẹb va naa nè ge dã́tẽ́ ló bé eé láá ié tóè sàn kìlmà vá ló naa. Ge tã̀àgã̀ ló Bàrì beè nvèè bá nè ene kà vígà pábia ea kọlà Anzhela kọ á láá kpáá palàge ié tóè sàn. A beè olòó tàvàlàẹ́ ló gè zọ̀ ene kà vígà pábia ea di mm̀ ba bõ̀ònatõ̀ò naaá nu. Anzhela beè kọọ̀: “À gáẹ̀ beè láá valíḿ ló gè beeláẹ bel ló vaá kùb ge zọ̀ẹ naaá nu. Sõò, m beè bàn Jìhóvà kọ á nvèè bá nèm kọ ḿ láá dã́tẽ́ ló vígà pábiaí.” É kọọ̀ Jìhóvà beè aalá gé tã̀àgã ló Anzhela? Ẹlẹ beè kọọ̀: “Tṍó em zọọ̀ẹ kọá kpẹ̀a lọ̀l, e beè tú gã́bug ávà loomá sọ́l. M beè palàge pãanée tṍ ló. Kátogóí, m̀ palàge vùlèe vaá di kpènà ló gè nvèè bá nèe.”

17. Éé ní eé bééláfùl ge naa ẽ́?

¹⁷ Nóo é láá sà vígà págbálà àbèè vígà pábia ea bọ́ló kọ ó tó sàn. Dénè ọ̀và gé téní bá tã̀àgã̀ belí Jónà, Èláíjà, Hégà, nè Lọ́t. Gã́bug tṍó, àé dú gbò tã̀àgã̀ e ba beè kolmà bá. À dú kà kà kọọ̀ sìgà tṍó, dénè bẹ̀ì ólò láá kolmà bá tã̀àgã̀ tẹẹá boói. Boo béè vó, à lelà kọ Jìhóvà á kọ́ nèi kọ é tó sàn ene. (1 Pít. 3:8) Tṍó e gban tṍ ló Jìhóvà, èé kpáá palàge agẹlẹ ló gbaa ló ea di zẹ̀ẹ̀ pá bẹẹ vígà beeá ló bàlà booí. Boo béè vó, tṍó e gé zọ ene naaá nu, naanii mè é bééláfùl ge pãane tṍ, dã́tẽ́ ló, vaá ié tóè sàn.