É KỌỌ̀ olo ẹbvì o lóó belí nen ea ólò õá Bàrì zaa? À dú bíi kọọ̀ buù bẹ̀ì é bugi togó boo nakà bíbvá. Kpá Káí beè gbẹẹ́ sĩ́ kọ́ nu ea kuu beélè tṍóí kọọ̀ gbò nen “náa é mon lé.” (2 Tím. 3:2) Be à sẹlẹ o beè láá mòn gbò e bà íe bùlà kọọ̀ baala ní e bà íèè dénè nu ẽ́, belí kọọ̀ dénè nu kuulìè bá baala. À gbóó belí kọọ̀ bà náa mon lé e nen náa nè va. Òó zigà kọọ̀ náa bọ́ló gè tõó kpàn íb gbò e bà meà naa vó.

Ge dú kele, à dú gè kọ́ nè gbò gyóòlo Jìhóvà kọọ̀: “Olòó õai Bàrì zaa.” À bọ́ló kọ é ‘õá Bàrì zaa mm̀ kọ̀láá kà dìtõ̀ò.’ (Kọ́l. 3:15; 1 Tẹ̀s. 5:18) Kàsĩ́, àé palàge leeí ló be è ié dùm ṍà zaa. È íè gbele tõ̀ò bug ea náa vaá à dì naa vó.

Ene kà lé bug ea náa vaá à bọ́ló kọ é ié dùm ṍà zaa dú kọọ̀ à ólò nvèè bá nèi kọ é ié dĩ̀ìnè ló. Nen ea ṍá nen zaa ólò ié dĩ̀ìnè ló vaá nen ea tú ṍà zaaá ólò ié nágé dĩ̀ìnè ló. Éé ní ea náa vaá gè õá nen zaa ólò ẹẹlẹ̀ nyíè beele bií ló dõòna gbò e? Lé, na bugi togó boo nakà nu dòòmà báí: Be à gá náa vaá nen à di kpènà ge naa enè íb nu nè ni àé dú boo béè kọ à mon kọọ̀ nuá bọ́ ni ló. Bà bulà nu ea kil ní ló. Tṍó e olo mon naa vó, à bọ́ló kọ á nè ni dĩ̀ìnè ló. Èé láá tuumá kọọ̀ a beè meà naa vó ló Rúùt. Boaz beè dõo nu taalẹ bá nè Rúùt. Tṍó e Rúùt mon kọọ̀ Boaz dì ea gé ẹb nu ea kilìè é ló, nyíée beè palàge ẹẹ.—Rúùt 2:10-13.

À palàge bọ́ló kọ é olòó õá Bàrì zaa. Tọ́ọ̀ kà bàà-bàà bùlà á gé ló kọọ̀ gã́bug tṍó ò ólò bugi togó boo gbò lé-lé nu e Bàrì ni náa vaá kilsĩ́ gè kpáá naa bọ̀ọ̀vẹ̀. (Dìt. 8:17, 18; Tóm 14:17) Tãa vó eo túù gbálà ńkem̀ tṍó bùgmà togó boo bé e Bàrì dú lé naa, éé ní ea náa vaá nóo túù gã́bug tṍó bùgmà togó boo gbò tã́áná dee bá e Bàrì ni ne olo bií ló gbò e olo vulè e. Ge bugi togó boo bé eo Neǹ Dèm Nu dõo nu taalẹ bá naa é náa kọ ó kpáá palàge ié lèèma kìlmàé ló vaá naa kọ ó nyimá bé e ẹlẹ vulè ni vaá ié ni lèèma m naa.—1 Jọ́ọ̀n 4:9.

Ge bugi togó boo gbò nu e Jìhóvà náa nèi é náa kọọ̀ é olòó õáe zaa. (Ps. 100:4, 5) Gbò nen ólò kọọ̀, “ge õá nen zaa ólò náa kọọ̀ nyíè nen á ẹẹ.”

Dõòna kà bug ea náa à dú lé kọọ̀ ó õá nen zaa dú boo béè kọọ̀ à ólò agẹlẹ ló kóò. À ólò tàn dénè bẹ̀ì kọ bàá õái zaa. Tṍó eo ṍà dõòna nèn zaa ló lé nu ea náa, pálaa bọ̀ì é kpáá palàge tõonii bãí kpàn ene. (Róm̀ 16:3, 4) Ge kpáá tẹlẹ ló, nen ea íe dùm ṍà zaa ólò ié tàn ge nvèè bá nè dõòna gbò. Bà ólò mòn lé e dõòna gbò náa kìlmà vá ló vaá níí ólò siè va kpóó ló kọ baala á naa nagé vó. Ẽei, ge nvèè bá nè dõòna gbò ólò màn ẹ́ẹ́-ẹẹ̀ nyíe. Níà gbõ̀òna bé e Jíízọ̀s beè kọ́ naaá kọọ̀: “Tã́áná dee bá [‘ẹ́ẹ́-ẹẹ̀ nyíe,’ NW ] di ló nen e a nè èlmà nen e a tú.”—Tóm 20:35.

Nen ea ólò di ló gbò ge tulè pọ̀b tọọ̀ kpá ea di California ea kọlà Robert Emmons, beè nó nu boo gè ié dùm ṍà zaa, a beè kọọ̀: “Kọbé nen láá ié dùm ṍà zaa, à bọ́ló kọ á nyimá kọ beele gbò nen ólò dẹ̀ẹ̀a boo ene. Sìgà tṍó è ólò dõo nu nè gbò nen vaá baala ooà kẽ dõo nagé nè beele.” Kọbé è láá kilsĩ́ gè tõó dùm vaá ié ẹ́ẹ́-ẹẹ̀ nyíé mm̀ dùm, è ólò dẹ̀ẹ̀a boo dõòna gbò mm̀ kele-kele sĩ́deè. Dì belí nu dòòmà bá, bàé láá kpoogè dee ló gyã́á nèi àbèè kọ ba nveè bá faalái siimá tọọ̀ biè. (1 Kọ́r. 12:21) Nen ea ié dùm ṍà zaa  ólò aa deè zogè lèèma ló nu e dõòna gbò náa nèe. Be à dì naa vó, é kọọ̀ à dú o dùm gè olòó õá dõòna gbò zaa ló nu e bà náa nè ni?

Dõòna kà bug ea náa à bọ́ló kọ ó ié dùm ṍà zaa dú boo béè kọọ̀ àé nveè bá nè ni kọ ó ká o bùlà gbẹẹ́ boo nu ea dú lé èlmà nu ea dú pọ́lọ́. À gbóó belí kọọ̀ bẹẹ nyíe gé sí tóm dì belí nu ea é sa nu eé bugi togó boo nèi. À ólò naa kọ é ká bùlà gbẹẹ́ boo sìgà gbò nu ea dì beeáí ló boo tṍó ea gé máánái bùlà lọl boo dõòna kà gbò nu. Tṍó eo íè dùm ṍà zaa, àé náa kọ ó ká bùlà gbẹẹ́ boo lé-lé nu èlmà gbò o tã̀àgã̀. Bé eo íè dùm ṍà zaa naa, níà bé eo é mon gã́bug lé-lé nu naaé, vaá àé náa kọ ó kpáá palàge ié dùm ṍà zaa. Be à gá náa vaá ò ká bùlà gbẹẹ́ boo gbò nu e olo é láá zogè ṍà zaa ló, àé nveè bá nè ni kọ ó naa nu e neǹ tóm Pọ́ọ̀l kọ́ é naaá kọọ̀: “Iei ẹ́ẹ́ nyíe kọ̀láá tṍó boo bée kọ ò zọi Dõò gbàài ló!”—Fíl. 4:4.

Ge ié dùm ṍà zaa é nveè bá nè ni kọ ó gá bọọgẹ̀ bugi pọ́lọ́ bug togó. À ólò tàvàlà kọọ̀ òó íe dùm ṍà zaa vaá ò ié nágé bẹẹ nyíe, ge kọọ̀ nyíe ni gé biilà, àbèè kọọ̀ súng gé bã́ ni. Gbò e bà íe dùm ṍà zaa náa ólò bọọgẹ̀ ié gyọ́. Nu e bà íe ólò gbõomá vá ló vaá bà náa ólò gbĩì ge kpáá ié bọ̀ọ̀vẹ̀.—Fíl. 4:12.

Dì belí nen eo gé nyoone nvéè Kráìst, ò nyímà kọọ̀ à ólò leemá Sétàn gè kọ nyíé ni á bììlà vaá ò íe ọ́ọ́-ọọ̀ ló boo béè tàvàlà dìtõ̀ò eo gé téní bá mm̀ dee deè nvéè deeí. Àé léémáe be ò ié pọ́lọ́ bùlà nè dùm ge olòó nuumi bel. Be ò dì naa vó, àé palàge tàvala ló gbò nen gè pãané ni tṍ ló tṍó eo gé vee lé kpẹ̀aí. Ge ié dùm ṍà zaa dú láb ea gbaá ló ból súú nyómá káí Bàrì. Dì belí nu dòòmà bá, nyíé ni ólò ẹẹ nágé tṍó eo mon gbò lé-lé nu e Bàrì ni náa nè ni nè zìgà eo íè mm̀ gbò a zìgà nù.—Gàl. 5:22, 23.

Ge kọọ̀ ò dúù nen eo gé fã Jìhóvà, ò palàge zìgà nu e bà kọ́ kè kẽè togó bel ea kil ló gè ié dùm ṍà zaaí. Nagé, olo nyímà kọọ̀ náa ólò bọọ̀gẹ̀ valí gè ié dùm ṍà zaa nè ge ẹ̀b nu boo lé bá. Sõò, níá á gá ọọvẹ́ ni ló. Olo é láá toní vaá ié dùm ṍà zaa. Mósĩ́ deè e? Noo tṍó nè o bá buù dee ge bùgmà togó boo gbò gá ea di ló o di dùm e olo é láá zogè ṍà zaa boo. Gã́bug bé eo náà naa, níá bé e gè ié dùm ṍà zaa é kpáá palàge valí ní ló naaé. Níá é náa kọọ̀ nyíé ni á palàge ẹẹ èlmà gbò e bà ká ba bùlà gbẹẹ́ boo gbò tã̀àgã̀ ea di mm̀ dùm. Bugi togó boo gbò lé-lé nu e Bàrì nè dõòna gbò ni náa ea síè kpóó ló olo vaá ẹẹlẹ̀ ni nyíe. Be à sẹlẹ òó láá dààmà togó gè emí sẹlẹ́ mm̀ kpá. Ge naa vó é láá naa kọọ̀ ó nvèè kpíí ló bàà àbèè taà kà nu eo é zogè dùm ṍà zaa kilma ló buù dee.

Gbò e bà ólò gbĩ́tẽ́ ló nu a mon kọọ̀ “gè olòó õá dõòna gbò zaa, é láá nyaaná bá ló bé e bẹẹ púḿ ólò siá tóm naa, naa ní ea é palàge valíí ló gè ié dĩ̀ìnè ló mm̀ dùm.” Nen ea íe dùm ṍà zaa ólò ié ẹ́ẹ́-ẹẹ̀ nyíe. Boo béè vó, bugi togó boo dénè gbò lé-lé nu eo ni íe, dé kpéè ló gbò lé-lé nu ea ni naaá ní ló vaá ò ólòó ié dùm ṍà zaa! Tãa vó eo ẹb lé nu ea nááá tẹlẹ kẽ à bọ́ló kọ é olòó, “õá Jìhóvà zaa boo béè kọọ̀ ẹlẹ dú lé.” Ẽei, “õai Bàrì zaa m kọ̀láá kà di tõ̀ò.”—1 Kró. 16:34; 1 Tẹ̀s. 5:18.