Nòòtẽ́ ea di mm̀ kpá Dìtolónomì 22:25-27 náa gé ló bel ea kuu kọọ̀ págbálàa sí pọ́lọ́, boo béè kọọ̀ ketõ̀ò Kpá Káíí tẹ́lẹ bàlà kẽ kọ à sí pọ́lọ́. Nakà logí gé íbá boo kọọ̀ pábiaá náa sí pọ́lọ́. Nvèè kpíí ló nu e bel ea di mm̀ Kpá Káíá géè kọ̀.

Gbò gã́bel ea dì besĩ́ì kĩá ló bel ea kil ló nen ea kuná pábia e nen nè ẹ̀ẹ̀ beè bilá ló kọ bàé ílàẹ̀ “gbẹá mm̀ pọ̀b boná.” Ge kọ à náa vó, náa kọ à kuná gã̀, tã́gíní bé e kọ̀láá nen ẹb pábia e nen nè ẹ̀ẹ̀ beè bilá ló kọ bàé ílàẹ̀ naamá vaà dómá. Èé kọ́ vàẹ kilma ló pábiaá ẹ́? “Náa beè kòvà kpã́ gbẹá mm̀ pọ̀b boná.” Be à gá náa a beè naa vó, dõòna gbò gáẹ̀ beè dã́e mon vaá teá dù gé nvèè bá nèe. Sõò náa beè kòvà kpã́. Vóá, à kúná gã̀ vaá à dú gè beelá bel ló pálaa ọ̀và kọ bà dọ log.—Dìt. 22:23, 24.

Logá à gbóó ló bel boo dõòna kà dìtõ̀ò kọọ̀: “Kọ̀láá bé ea dì naa, be à gá náa vaá págbálà à gbóó zọ̀ pábia e nen nè ẹ̀ẹ̀ beè bilá ló kọ bàé ílàẹ̀ nyòònà gbẹá boo bàlà ól vaá kpóó págbálàa à èlie ló naa ní ea kúnáe, á dú gè fẹ́ págbálà ea kúnáeá, vaá ó gá naanii tọ́ọ̀ nuù pábiaá. Pábiaá náa sí pọ́lọ́ ea é náa kọ bàá fẹ́ẹ. Nakà belí bélí nágé tṍó e nen bé a vígà vaá à gbóó fẹ́ẹ. Boo béè kọ à zọ́ẹ nyòònà gbẹá boo bàlà ól, vaá pábia e nen nè ẹ̀ẹ̀ beè bilá ló kọ bàé ílàẹ̀ à kòvà kpã́, sõò tọ́ọ̀ nen ea é nveè bá nèe á gé.”—Dìt. 22:25-27.

Be à gá náa à dì naa vó, gbò bèèlaá é gbóó zìgà kọ a beè “kòvà kpã́, sõò tọ́ọ̀ nen ea nveè bá nèe á gé.” Boo béè vó, náa kúná gã̀. Sõò págbálàa dọ log kúnà gã̀ boo béè kọọ̀ a kpóó ‘èlie ló naa ní ea kúná,’ pábia e nen nè ẹ̀ẹ̀ beè bilá ló kọ bàé ílàẹ̀a.

Kọ̀láá bé ea dì naa, kọbèè nakà logí gé íbá boo kọọ̀ pábiaá náa sí pọ́lọ́, nòòtẽ́á palàge tẹlẹ bàlà kẽ kọọ̀ págbálàa dọ log kúnà gã̀. Èé láá palàge dẹlẹ nyíé boo kọọ̀ gbò bèèlaá é “gbĩ́tẽ́ ló belá leevè” vaá nè béèlafùl ea dẹẹ̀a boo nòòkúu e Bàrì beè sẹlẹ́ kẽ vaá òòa boo gã́bug tṍó.—Dìt. 13:14; 17:4; Ẹ́xọ. 20:14.