1. Gbò éé ní ea é láá lẹ̀ẹ̀là bel ló bá e págbálà sẹẹmà a va nè pá a nvín ẽ́?

ÉÉ NÍ e moǹ bel ea kọ́ọ̀ “togó ló” kọlà kilma ló olo é? Sìgà gbò gbálà sọtọ́ deè kọọ̀ nàànù kunukẽ̀ àbèè bé e pá ba bálá sĩ́ ólò bugi togó naa á lẹ̀ẹ̀là bel ló bá e bà sẹẹmà ba va nè ba nvín. Ene kà vígà pábia ea kọlà Yanita ea ólò tõó bálá sĩ́ Europe kọ́ọ̀, “Gbẹá kiẽ́e nda ólò tõo, gbò nen ólò nvèè ka ló gbò gbálà èlmà gbò bia vaá ẹ̀b gbò bia dì belí gbò gyóòlo.” Vaá ene kà vígà págbálà ea kọlà Luke, ea ólò tõó dó United State à kọọ̀, “Sìgà gbò tẹ̀ boo tọ ólò noòmà ba nvín págbálà kọ bàá gá dã́ bel gbò bia nè ge kọọ̀ náa bọ́ló gè tú ba lọ̀ọ̀gà bùlà.” Sõò, Jìhóvà náa gbĩ́ kọọ̀ gbò gbálà a tú íb báí sẹ̀ẹ̀mà gbò bia. (Doolé ló Máàk 7:13.) Vóà naa, mósĩ́ deè ní e págbálà é láá nó gè dú lé tẹ̀ boo tọ ẹ́?

2. Éé ní ea bọ́ló kọ tẹ̀ boo tọ á nyimá ẽ́, vaá ló éé?

² Págbálà é íè ge nyimá nú e Jìhóvà ẹ̀bmà dẽe kọ á naa, kọbé à láá dú lé tẹ̀ boo tọ. Àé dú bíi kọ á nyimá nágé nú ea náa vaá Jìhóvà à nè lẹ̀ẹ̀là bel sìgà gbò, nè bé ea é láá nó nu dòòmà bá Jìhóvà nè Jíízọ̀s naa. Éé ní ea náa vaá àé dú bíi kọ á nyimá gbò nuí ẽ́? Níí dú boo béè kọọ̀ Jìhóvà ní ea beè tú kpóó gè lẹ̀ẹ̀mà bel nè gbò tẹ̀ boo tọ ẹ́, vaá à ẹbmà dẽe kọ bàá tú siimá tóm boo bá ea bọ́ló.—Lúùk 12:48b.

3. Éé ní e gbò moǹ bel ea ẽ́á mm̀ 1 Kọ́rìnt 11:3 nóòmài ea kil ló gè dú togó boo dõòna gbò e?

³ Bugi 1 Kọ́rìnt 11:3. Dọ̀ Kpá Káíí baatẽ́ bé e Jìhóvà noo pá a tọ ea di káála nè boo kunukẽ̀í naa. Ge dú togó boo dõòna gbò tõó dọ̀ kọọ̀ nen íe lẹ̀ẹ̀là bel nè ge kọọ̀ dõòna gbò é née kpẹ̀a ea kil ló gbò nú e bà náa. Jìhóvà ní ea dú ‘togó boo,’ àbèè nen ea íe lẹ̀ẹ̀là bel lọ̀l vaá à lee, e dénè pá a nvín ea dú gbò nyómá tóm nè gbò nen é née kpẹ̀a ló kọ̀láá  kà nú e bà náa ẽ́. (Róm̀ 14:10; Ẹ́fẹ. 3:14, 15) Jìhóvà beè íbá ló Jíízọ̀s naamá togó boo a bõ̀ònatõ̀ò, sõò Jíízọ̀s ólò nè kpẹ̀a Jìhóvà ló bá ea sẹẹmài. (1 Kọ́r. 15:27) Jìhóvà beè iná gé bá ló dóm kọ á dú togó boo a va nè pá a nvín, sõò dóm é ne kpẹ̀a Jìhóvà nè Jíízọ̀s ea kil ló bá ea sẹẹmà pá a tọ.—1 Pít. 3:7.

4. Éé ní e Jìhóvà nè Jíízọ̀s íe lẹ̀ẹ̀là bel gè naa ẽ́?

⁴ Dì belí Togó Boo dénè pá tọ, Jìhóvà íe lẹ̀ẹ̀là bel gè kọ́ bé ea bọ́ló kọọ̀ pá a nvín á tõó dùm naa, vaá à íe kpóó gè nè kpọ̀té kọ̀láá nen e bè náa tõó boo gbò a log. (Àìz. 33:22) Jíízọ̀s ea dú togó boo a bõ̀ònatõ̀ò, íe nagé kpóó gè kọ́ nú eé náa nè ge nè kpọ̀té gbò e bà náa tõó boo a tùle.—Gàl. 6:2; Kọ́l. 1:18-20.

5. Mókà lẹ̀ẹ̀là bel ní e tẹ̀ boo tọ ea gé nyoone nvéè Kráìst íe é, vaá ãàe ní ea lẹ̀ẹ̀là bel íná elá ẹ́?

⁵ Tẹ̀ boo tọ ea gé nyoone nvéè Kráìst ólò nó Jìhóvà nè Jíízọ̀s tṍó ea gé tú lẹ̀ẹ̀là bel ea íé boo pá a tọ nèèmà béèlàfùl. (Róm̀ 7:2; Ẹ́fẹ. 6:4) Náa kal ló béè vó, náa íé lẹ̀ẹ̀là bel boo dénè nu. Dì belí nu dòòmà bá, à bọ́ló kọọ̀ gbò log ea ne á dẹ̀ẹ̀a boo gbò nòòkúu ea di mm̀ Kpá Káí. (Pró. 3:5, 6) Vaá tẹ̀ boo tọ náa íe lẹ̀ẹ̀là bel gè kọ́ nú e dõòna gbò e bà náa dṹùnà pá a tọ é náa. (Róm̀ 14:4) Nagé, tṍó e pá a nvín ílí va àbèè ge iá dóm, bàé kilsĩ́ gè fã̀e dẽe, sõò bàá gé ná kè kẽè a lẹ̀ẹ̀là bel—Máát. 19:5.

6. Éé ní ea náa vaá Jìhóvà à nè lẹ̀ẹ̀là bel sìgà gbò e?

⁶ Jìhóvà ne lẹ̀ẹ̀là bel sìgà gbò boo béè kọọ̀ à vulè pá a tọ. À dú dõ̀ònù ea néi. Ge kọọ̀ sìgà gbò íe lẹ̀ẹ̀là bel náa kọọ̀ tọọ̀ Jìhóvà á gá dú làga làga, vaá di mm̀ fẹ́ẹ́-fẹẹ̀ ló. (1 Kọ́r. 14:33, 40) Pá tọọ̀ Jìhóvà gáẹ̀ beè dú làga làga vaá bà náa gáẹ̀ beè ié ẹ́ẹ́ nyíe, be náa beè nè lẹ̀ẹ̀là bel sìgà gbò. Dì belí nu dòòmà bá, née gáẹ̀ nyimá ló gbò ea bọ́ló kọ bàá kọ́ nú e dõòna gbò é náa, nè gbò e bàé túlè dõòna gbò mm̀ ge naa gbò nú e bà kọ́.

7. Dẹ̀ẹ̀a boo nú ea di mm̀ kpá Ẹ́fẹsọ̀s 5:25, 28, móbá ní e Jìhóvà gbĩ́ kọọ̀ dóm á sẹ̀ẹ̀mà a va ẹ́?

⁷ Be à gá náa vaá nòònù Jìhóvà ge kọọ̀ dóm á dú togó boo a tọ à dú lé, éé ní ea náa vaá à tõó ló gã́bug gbò va deè nieí kọọ̀ ba dóm bíìgèe va ló vaá tú ba kpóó lẹ̀ẹ̀màè va bel ló é? Níí dú boo béè kọọ̀ gã́bug tẹ̀ boo tọ ólò naa nu dẹ̀ẹ̀a boo ba nàànù kunukẽ̀ nè bá e gbò e bà di zẹ̀ẹ̀ ólò naamá nu, tãa vó e bà tõó boo gbò kpãà Jìhóvà ea kil ló bá e bàé sẹẹmà pá ba tọ. Bàé láá tú pọ́lọ́ bá sẹ̀ẹ̀mà ba va boo béè ge naa áá baálà lee ló. Dì belí nu dòòmà bá, dóm é láá tú bá kpóó lẹ̀ẹ̀mà bel ló a va kọbé à fãèe dẽe àbèè ge naa kọọ̀ dõòna gbò á nyimá kọọ̀ ẹlẹẹ̀ “kàà págbálà.” Àé láá bugi togó kọọ̀ náa é láá benìè a va kọ á vulèèe, sõò àé láá naanìè kọ á siiàẹ̀ẹ pọ̀ ló. Vaá àé láá olòó siimàe pọ̀ mm̀ ge lẹ̀ẹ̀màe bel ló. * Íb nakà bugí ólò naa kọ bàá gá nvèè ka ló vaá fã̀ dẽè gbò bia belí bé ea bọ́ló naa, vaá Jìhóvà náa gbĩ́ kọ á dì naa vó.—Bugi Ẹ́fẹsọ̀s 5:25, 28.

8. Mósĩ́ deè ní e págbálà é láá nó gè dú lé tẹ̀ boo a tọ ẹ́?

⁸ Págbálà é láá dú lé tẹ̀ boo a tọ tení dú ló gè nó bé e Jìhóvà nè Jíízọ̀s ólò tú lẹ̀ẹ̀là  bel siimá tóm naa. Bugi togó boo bàà kà kpãá e Jìhóvà nè Jíízọ̀s íe nè bé e tẹ̀ boo tọ é láá tú gbò kpãaí siimá tóm naa, tṍó ea gé zọ a va nè pá a nvín naaá nu.

9. Mósĩ́ deè ní e Jìhóvà ólò zogè kọ à íèè dùm kìlmà kpá ló kẽ ẽ́?

⁹ Kìlmà kpá ló kẽ. Jìhóvà ní ea nyímá nu lọ̀l vaá à lee é; sõò, à ólò pãane tṍ ló lọ̀ọ̀gà bùlà pá a gyóòlo. (Jén. 18:23, 24, 32) À ólò nè deè gbò ea gé lẹ̀ẹ̀là bel ló kọ bàá kọ́ ba bùlà. (1 Kíǹg 22:19-22) Jìhóvà gbõoma, sõò náa ẹbmà dẽe kọ é naa nú mm̀ sĩ́deè ea gbõoma. Tãa vó, à ólò nvèè bá nè gbò e bà náa gbõoma e bà gé fã́e kọ bàá láá sìm kilsĩ́. (Ps. 113:6, 7) Kàsĩ́, Kpá Káí kọọ̀ Jìhóvà dú bẹẹ neǹ “nvèè bá.” (Ps. 27:9; Híb. 13:6) Méné Dévìd beè kọọ̀ bé e Jìhóvà kìlmà kpá ló kẽ vaá nveenìè bá neèe naa, ní ea náa kọ á láá siè gbò tóm ea beè siè e.—2 Sám. 22:36.

10. Mósĩ́ deè ní e Jíízọ̀s beè zogè kọ à íèè dùm kìlmà kpá ló kẽ ẽ́?

¹⁰ Bugi togó boo nu dòòmà bá Jíízọ̀s. Náa kal ló béè kọọ̀ ẹlẹ ní ea dú togó boo pá a gbò nyòòne nvéè ẽ́, a beè logí va ká tọ. Éé ní ea náa vaá Jìhóvà à kọọ̀ bàá emí nakà nòòtẽ́í mm̀ Kpá Káí é? À dú boo béè kọọ̀ à gbĩ́ kọọ̀ kọ̀láá nen bọọ èlmà tõ̀ò gbò tẹ̀ boo tọ á nó nu lọl ló. Jíízọ̀s beè kọọ̀: “Nda a zógèi nu dòmà bá. Boolo naanai gé bé e nda náà ló boolo naaá.” (Jọ́ọ̀n 13:12-17) Náa kal ló béè kọọ̀ Jíízọ̀s beè ié gã́bug lẹ̀ẹ̀là bel, náa beè ẹ̀bmà dẽe kọ gbò nen á siè tóm neèe. Tãa vó, a beè sí tóm nè dõòna gbò.—Máát. 20:28.

11. Éé ní e tẹ̀ boo tọ é láá nó lọl ló bé e Jìhóvà nè Jíízọ̀s kilmà kpá ló kẽ naa ẽ́?

¹¹ Gbò nú e nóò lọl ló. Tẹ̀ boo tọ é láá zogè kọ à íèè dùm kìlmà kpá ló kẽ mm̀ gã́bug sĩ́deè. Dì belí nu dòòmà bá, náa é ẹ̀bmà dẽe kọọ̀ a va nè pá a nvín á naa nú mm̀ sĩ́deè ea gbõoma. Àé pãane tṍ ló lọ̀ọ̀gà bùlà a va nè pá a nvín, kọbèè à gá náa vaá nú e bà kọ́ náa gbááá ló a bùlà. Marley ea ólò tõó dó United State kọ́ọ̀: “Sìgà tṍó ńdáà bùlà ólò dú kele ló níí ńdáà dóm. Sõò m̀ nyímà kọọ̀ à ólò nvèèm ka ló vaá fã̀ m dẽe boo béè kọọ̀ à ólò kọ ḿ kọ́ nà bùlà vaá à gbóó bugi togó boo besĩ́ à kálá nè béèlafùl.” Nagé, dóm ea kilmà kpá ló kẽ ólò di kpènà ló gè sí tóm tọ, kọbèè à gá náa vaá gbò e bà di kiẽ́e bà ólò tõo à ẹ̀b naamá tóm gbò bia. Ge naa vó é  láá tàvàlà. Ló éé? Ene kà vígà pábia ea kọlà Rachel kọ́ọ̀: “Gbẹá kiẽ́e e nda dúù, be è dóm nveè bá nè a va logí bọ́lì àbèè ge kpálí kẽ, pá a kè gyṍó nè pá a dúà ló ólò kọọ̀ ẹ̀ẹ̀ níì ‘kàà págbálà’ nì. Àé tõó vá ló belí kọọ̀ náa é láá lẹ̀ẹ̀là bel ló a va.” Be níà bé e gbò e bà di kiẽ́e eo tõò ólò ẹ̀b nu naa ẽ́, à dú bíi kọ ó kẽ̀èa boo kọọ̀ Jíízọ̀s beè logí ká tọọ̀ pá a gbò nyòòne nvée, náa kal ló béè kọọ̀ ba beè olòó ẹ̀b naamá tóm gbò gyóòlo. Lé tẹ̀ boo tọ ólò gbĩ́ gè naa nú ea é náa kọọ̀ nyíè a va nè pá a nvín á ẹẹ èlmà ge naa nú ea é léé ló áá ẹlẹ. Gbá ló kìlmà kpá ló kẽ, mókà kpãa ní ea bọ́ló kọọ̀ tẹ̀ boo tọ á ié é?

12. Éé ní e vulà ólò naa kọ Jìhóvà nè Jíízọ̀s á naa ẽ́?

¹² Vulà. Jìhóvà ólò naa kọ̀láá kà nu mm̀ vulà. (1 Jọ́ọ̀n 4:7, 8) À ólò ẹ̀b nú ea kil ló bé ea é náa vaá è láá ié kà lé gbaa ló kilma ló ẹlẹ, tení dú ló a Moǹ Bel ea dú Kpá Káí nè a bõ̀ònatõ̀ò. À ólò ẹ̀b nú ea kilíí ló tení dú ló gè naa kọ́ é àgala boo kọọ̀ à vulèèi. Vaá èé kọ́ vàẹ kilma ló gbò bíi e íè mm̀ dùm ẽ? Jìhóvà “ólò taalẹ bá nèi kọ̀láá kà nu kọ á nèi ẹ́ẹ́ nyíe.” (1 Tím. 6:17) Tṍó e síì pọ́lọ́, à ólò kọ́i bel, sõò náa ólò òòà aa ló gè vùlèi. Jìhóvà beè nèi nu ààa boo béè kọ à vulèi. Jíízòs palàge vùlèi naa ní ea úí boo. (Jọ́ọ̀n 3:16; 15:13) Tọ́ọ̀ nu náa gé láá naa kọọ̀ Jìhóvà nè Jíízọ̀s á aa ló gè vùlè gbò e bà bọ́ló dẹ̀lẹ̀ nyíé boo kìlmà vá ló.—Jọ́ọ̀n 13:1; Róm̀ 8:35, 38, 39.

13. Éé ní ea náa à dú bíi kọọ̀ tẹ̀ boo tọ á vùlè pá a tọ ẹ́? (Ẹ̀b nàgé ńkpó ea kọ́ọ̀: “ Éé Ní E Nen Ea Ã́àa Ilí Va É Náa Kọbé A Va Fã́e Dẽe Ẽ́?”)

¹³ Gbò nú e nóò lọl ló. Àé bọ́ló kọọ̀ tẹ̀ boo tọ á naa kọ̀láá kà nú mm̀ vulè. Éé ní ea náa à palàge dú bíi é? Neǹ tóm Jọ́ọ̀n beè aalá kọọ̀: “Nen e bè náa vulè a vígà, [àbèè pá a tọ], e a mon, náa é láá vulè Bàrì, e bè à gáà mòn.” (1 Jọ́ọ̀n 4:11, 20) Tẹ̀ boo tọ ea vulè pá a tọ vaá gbĩ́ gè nó nu dòòmà bá Jìhóvà nè Jíízọ̀s é nveè bá nè pá a tọ kọ bàá ié lé gbaa ló kilma ló Jìhóvà; é náa kọ bàá nyimá kọ à vulèè va, vaá ẹ̀b nú ea kil ló bá gbò bíi mm̀ dùm. (1 Tím. 5:8) Àé nóòmà nuù pá a nvín vaá  le-lé va dee bá. Àé kilsĩ́ gè nó gè láá nè béèlàfùl ea é nveè ka ló Jìhóvà vaá dọ̀ bélè nè pá a tọ. Naanii èé ló bel boo buù kà nuí vaá è mon bé e tẹ̀ boo tọ é láá nó Jìhóvà nè Jíízọ̀s naa.

14. Mósĩ́ deè ní e tẹ̀ boo tọ é láá nvèè bá nè pá a tọ kọ bàá ié kà lé gbaa ló kilma ló Jìhóvà ẹ?

¹⁴ Ge nvèè bá nè pá a tọ kọ bàá ié lé gbaa ló kilma ló Jìhóvà. Jíízọ̀s beè zogè kọọ̀ à bélìè a tẹ̀ boo béè kọọ̀ a beè gbĩ́ kọ pá a gbò nyòòne nvée á ié agẹ zìgà. (Máát. 5:3, 6; Máàk 6:34) Mm̀ tẽ̀ènè sĩ́deèá, nú ea é palàge bọọ ló tẹ̀ boo tọ dú bé ea é náa vaá pá a tọ íé kà lé gbaa ló kilma ló Jìhóvà. (Dìt. 6:6-9) À ólò naa níí tení dú ló gè mòn kọọ̀ ẹlẹ nè pá a tọ bugi vaá nó Kpá Káí, olòó sí nònù, kọ́ kpẹ̀a, vaá kilsĩ́ gè dú kóò Jìhóvà.

15. Mósĩ́ deè ní e tẹ̀ boo tọ é láá zogè kọ à vulèè pá a tọ ẹ́?

¹⁵ Ge naa kọ pá a tọ á nyimá kọ à vulèè va. Jìhóvà beè kọ́ nè Jíízọ̀s kọ à vulèèe gbẹá gbàà gbò nen. (Máát. 3:17) Jíízọ̀s beè olòó naa kọọ̀ pá a gbò nyòòne nvée á nyimá kọ à vulèè va tení dú ló gbò nú ea kọ́ vaá naa. Pá a gbò nyòòne nvée beè olòó kọ nágé kọ́ bà vulèè e. (Jọ́ọ̀n 15:9, 12, 13; 21:16) Tẹ̀ boo tọ é láá zogè kọ à vulèè a va nè pá a nvín tení dú ló gbò nú ea naa, dì belí gè zọ̀ va noá Kpá Káí. À bọ́ló kọ á kọ nágé nè va kọ à vulèè vaá nveenìèe va ka ló, vaá á lèèlà va gbẹá gbàà gbò nen tṍó ea bọ́ló.—Pró. 31:28, 29.

16. Éé ní e tẹ̀ boo tọ é náa nagé é, vaá éé ní e bè náa bọ́ló kọ á naa ẽ́?

¹⁶ Ge ẹ̀b nú ea kil ló bíi pá a tọ. Jìhóvà beè ẹ̀b nú ea kil ló bíì pá Ízràẹ̀l bã̀àna tṍó ea né va kpọ̀té boo béè ba lọ̀l togó kèbá. (Dìt. 2:7; 29:5) Deè nieí, à ólò nè nài gé gbò nú e íè bíi ló mm̀ dùm. (Máát. 6:31-33; 7:11) Mm̀ tẽ̀ènè sĩ́deèá, Jíízọ̀s beè nè gyã́á gã́bug nen. (Máát. 14:17-20) A beè bo nágé gã́bug gbò zọ̀ ló. (Máát. 4:24) Kọbé tẹ̀ boo tọ láá naa nú ea é léémá Jìhóvà, àé bọ́ló kọ á ẹ̀b nú ea kil ló bíì pá a tọ. Sõò, à íe nú ea bọ́ló kọ á gá naa. Á gá zìgà kọọ̀ a pííla á naa kọ á gá láá nvèè bá nè pá a tọ kọ bàá ié lé gbaa ló kilma ló Jìhóvà nè ge zogè va kọ à vulèè va.

17. Mósĩ́ deè ní e Jìhóvà nè Jíízọ̀s ólò noòmài nu vaá le-léi dee bá ẹ́?

¹⁷ Ge noòmà nuù pá a tọ. Jìhóvà ólò noòmài nu vaá le-léi dee bá boo béè kọ à gbĩ́ gè nvèè bá nèi. (Híb. 12:7-9) Dì belí a tẹ̀, Jíízọ̀s ólò bumá gbò ea gé lẹẹlà bel ló mm̀ bá vulè. (Jọ́ọ̀n 15:14, 15) À ólò nè dùùlà bá deè tṍ vaá ié nágé tóè sàn. (Máát. 20:24-28) À nyímá kọ née gbõomà vaá èé láá sí pọ́lọ́.—Máát. 26:41.

18. Éé ní ea bọ́ló kọọ̀ lé tẹ̀ boo tọ á kẽ̀èa boo é?

¹⁸ Tẹ̀ boo tọ ea gé nó nu dòòmà bá Jìhóvà nè Jíízọ̀s ólò nyimá kọọ̀ a va nè pá a nvín náa gbõoma. Náa ólò tú “gboo  gboo ló bá” sẹ̀ẹ̀mà a va àbèè pá a nvín. (Kọ́l. 3:19) Tãa vó, à ólò tú nòòkúu ea di mm̀ kpá Gàlésìà 6:1 siimá tóm vaá pììgà ge le-lé va dee bá mm̀ “gbọ́ọ́ gbọọ ló,” boo béè kọ ẹlẹ náa gbõoma nagé. Dì belí Jíízọ̀s, à nyímá kọọ̀ kà lé sĩ́deè ge noòmà nuù nen dú gè nè lé nu dòòmà bá.—1 Pít. 2:21.

19-20. Mósĩ́ deè ní e tẹ̀ boo tọ é láá nó nu dòòmà bá Jìhóvà nè Jíízọ̀s tṍó ea gé ne béèlàfùl e?

¹⁹ Ge nè béèlàfùl e náa é léé ló áá ẹlẹ. Jìhóvà ólò nè béèlàfùl ea é léé ló dõòna gbò. Dì belí nu dòòmà bá, níì boo béè a lee ló ní ea beè naa kọ á beeláfùl ge dèm nué nì, sõò, boo béè kọọ̀ à gbĩ́ kọ é dé kpéè ló dùm. Tọ́ọ̀ nen náa gáẹ̀ láá tãgĩ́e bá kọ á tú a Sã́áná vaamá gyọ́ọ boo bẹẹ pọ́lọ́. A beè naa vó boo béè ge nvèè bá nèi. Jíízọ̀s beè nè nàgé béèlàfùl ea beè nvèè bá nè dõòna gbò. (Róm̀ 15:3) Dì belí nu dòòmà bá, a beè noòmà nuù gbò nen tṍó e lóóe géè ọọ, tãa vó ea bṍ séi.—Máàk 6:31-34.

²⁰ Kà lé tẹ̀ boo tọ ólò nyimá kọọ̀ ge nè lé béèlàfùl ea é léé ló pá a tọ di zẹ̀ẹ̀ gbò nú ea tàvàlà ge naa, vaá à ólò tú gè naa vó kolmá nu. À ólò pììga boo gè mòn kọ náa neè béèlàfùl e bè náa zẹ̀ẹ̀ bugi togó boo àbèè ge nè béèlàfùl dẹ̀ẹ̀a boo pọ́ì bé e nu tọ́aẹ́ ló naa. Tãa vó, à ólò sọ̀tọ́ deè kọ Jìhóvà á noomàèe bé ea é ne lé béèlàfùl naa. * (Pró. 2:6, 7) Be à náa vó, àé náa kọ á bugi togó boo bé ea é láá nvèè bá nè dõòna gbò naa, tãa vó ea bulà nu ea kil ló áá a bá.—Fíl. 2:4.

21. Éé ní eé nó mm̀ togó bel ge nò ea bẽene níí ẽ́?

²¹ Jìhóvà beè tú tóm ea tavàlà nè gbò tẹ̀ boo tọ, vaá à gbĩ́ kọọ̀ bàá sí tóm ea beè nè vaí leevè. Sõò dóm é láá dú lé tẹ̀ boo tọ be à gá náa vaá à pììga boo gè nó nu dòòmà bá Jìhóvà nè Jíízọ̀s. Vaá beè a va sí tóm ea kuúe gè sí, bàé ié ẹ́ẹ́ nyíe mm̀ bà ílà dóm nè va. Mósĩ́ deè ní ea bọ́ló kọọ̀ va á ẹ̀b tóm ea dóm gé sí dì belí tẹ̀ boo tọ ẹ́, vaá mókà gbò ànà-ànà ní ea é láá kpee sĩ́ ló é? Togó bel ge nò ea bẽene níí é áálá gbò bíbvá.