Dee deè nvéè Nàànù Ténì Zelí e Jíízọ̀s beè sẹlẹ beè ié nú ea tõó dọ̀. Boo beè kọọ̀ tṍó ea é gé ù a íná kuló, a beè noo gè zọ̀ pá a gbò tóm sẹlẹ Nàànù Ténì Zelí vaá nvèè ene kà ãa sẹ̀lẹ̀nù kẽ, ea dú Sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe ea é sẹẹà ene tóm buù gbáá. Vó beè naa kọ á kọ́ nè Pítà nè Jọ́ọ̀n kọ bàá gé kpoogè dee ló tọ e bàé tõo. (Lúùk 22:7-13; ẹ̀b fùtó ea di boo kóó kpáí.) Níí kẽeí nyíe kọọ̀ à dú bíi kọ é kpoogá dee ló nyòòmà Sẹ̀lẹ̀nù Ge Kẽ̀èa Boo Ú Kráìst ea é sẹẹa March 27. Àé láá dú kọọ̀ gã́bug bõ̀ònatõ̀ò a íé nen ea é ne lòbèl, fétúlú nè míí e bàé tú sẹ̀ẹ̀mà, nè dõòna kà gbò nú ea dú bíi. Sõò, éé ní e buù bẹ̀ì é láá naa mm̀ ge kpoogá dee ló nyòòmà sẹ̀lẹ̀nù Ge Kẽ̀èa Boo Ú Kráìst é?

Ge kpáá palàge Ié lèèma ló ú Jíízọ̀s. Bugi vaá ò bugi togó boo gbò dọ̀ Kpá Káí ea nyoone Sẹ̀lẹ̀nù Ge Kẽ̀èa Boo Ú Kráìst. Nòònù ea kuu gbò dọ̀ Kpá Káí ea dì nè dee di mm̀ Examining the Scriptures Daily. Gbò dọ̀ Kpá Káí nè sìgà gbò émì nu ea kil ló Sẹ̀lẹ̀nù Ge Kẽ̀èa Boo Ú Kráìst di mm̀ Appendix B12 1 nè 2 kpò mm̀ revised New World Translation of the Holy Scriptures. (Ẹ̀b nàgé mm̀ Dùm Nè Kpá Bõ̀onaló Sìtóm Kọ̀ Kpẹ̀a níí April 2020.) Pá tọ é láá mòn gbò nú e bàé sẹẹmà fã̀ pá tọ ea kil ló bélè e íè lọl ló nu ààa mm̀ Watch Tower Publications Index àbèè Research Guide for Jehovah’s Witnesses.

Kolí dõòna gbò kọ bàá sí kẽ. Piiga boo gè kolí gã́bug nen siimá kẽè sẹ̀lẹ̀nùí. Bugi togó boo gbò eo é láá kolí, dì belí gbò eo ólò kãa, gbò eo beè olòó noòmà Kpá Káí, gbò eo nyímà ló, nè pá o dúà ló. Gbò kànen á pììga boo gè kolí gbò e lóó va ọọ. Kẽ̀èa boo kọọ̀, kọbèè nen eo monì náa ólò tõó kiẽ́e eo dì, òó láá gbĩ́ tṍó nè kiẽ́e bàé tõo sẹlẹ sẹ̀lẹ̀nùí lọl boo jw.org. Naa klíìk boo NÚ EA KILÍÍ LÓ vaá ò gbóó naa klíìk boo “Sẹ̀lẹ̀nù Ge Kẽ̀èa Boo Ú Kráìst.”

Éé ní eo é láá kpáá naa mm̀ ge kpoogá dee ló é?