Tṍó e gé kãa nen àbèè ge noòmà Kpá Káí nen, à dú bíi kọ é nvèè bá nè nen ea gé pãanéi tṍ ló kọ á dã́ ból ló kà ea di mm̀ bẹẹ bel. Tení dú ló gè nè nu dòòle ló, èé láá ló bel ea é tọ́á ló gbò nen vaá nvèè bá nè va kọ bàá láá kẽ̀èa boo gbò kà ea di m.

Boo tṍó eo gé kpóógá dee ló gè òòà sì gé kãa nen àbèè ge noòmà Kpá Káí nen, nvèe kpíí ló gbò gá ea di mm̀ o bel ea é léémá ni gè tú nu doolé ló, e bè níì dénè bel eo gbĩ́ì ge lò nì. Tṍóá, ò gbóó sà nu dòòle ló ea válí bá ea dẹẹ̀a boo nú ea gé nááá buù dee. (Máát. 5:14-16; Máàk 2:21; Lúùk 14:7-11) Mòn kọ ò bugì togó boo bé e nená dì naa nè tóm ea ólò sì. (Lúùk 5:2-11; Jọ́ọ̀n 4:7-15) Tṍó eo monì kọọ̀ nyíée ẹ́ẹ boo béè kọ à dã́tẽ́ ló kà ea di mm̀ o bel, nyíè olo é ẹ́ẹ nagé.

Ẹ̀B VÍDIÒ EA KỌLÀ IÉ Ẹ́Ẹ́ NYÍE EA AA LÓ GÈ NAA KỌỌ̀ GBÒ NEN Á NYOONE NVÉÈ KRÁÌST—SÌM KILSĨ́ MM̀ O KALÌ GÈ KỌỌMÁ KPẸ̀A—NÈ NU DÒÒLE LÓ EA BAATẼ́ KÀ EA DI M, VAÁ Ò GBÓÓ AALÁ NAGBÒ BÍBVÍ:

• Éé ní ea náa vaá àé dú bíi kọọ̀ nen ea gé nó Kpá Káí á dã́ ból ló nú e buù gã́bel ea di mm̀ Kpá Káí kọ́ ẹ́?

• Mósĩ́ deè ní e Neeta beè nè nu dòòle ló ea baatẽ́ kà kà bel ea di mm̀ kpá Róm̀ 5:12 é?

• Éé ní e kà lé nu dòòle ló é láá naá ló gbò e bà gé pãanéi tṍ ló é?

• Mm̀ bẹẹ sìtóm kọ̀ kpẹ̀a, éé ní ea náa vaá èé tú vídiò nè dõòna kà gbò nuù tóm e bõ̀ònatõ̀òí ni náa nyòòmà ge noòmà Kpá Káí gbò nen siimá tóm ẽ́?