Ə́ kiliŋahiɛ mɛnii ŋɛi ɓa : Davidə ə kɛi hiɛ kpinii, taa lon da hu. Ho kea kɛi hɛn lɔpee ta kɔlɔn gwɛlɛ, maahɔlɔɓo kpini pɛlɛɛi kɛ kɛnɛ. Ə ɲaakaa kea yɛ ma aa pili. Aa kɛ holo bələ ɓa kɛɛnaa ta.

Akɛ kɛ yɛ́ ɓə tii kɛ a Davidə lə ɓə ə́ li gɛ ?

Ya pɛli mɛniɠaa ŋɛi dɔnɔ kɛi :

1. Ə́ mo nuta ɓa ə bələ lɛ yɛ́.

2. Ə́ torche həɠə ə́ ə́ kɔwɔ mu pono la.

3. Ə́ kɛ lɔ hiɛi, yɛ́ kɛ ma ə́ kaa lɔ pai lɛɛ lii ə́ hwilɛn bələ ɓa.

Gwa kɛi gaa tii yii ho lɛlɛ li ya ɓaa gɛ pələ 3 naa.

Gɛ pələ 2 naa hwialaɓoɔi gɛ pələ doloo ɓa. Ya pɛli torche həɠəi yɛ́ ə́ kɔwɔ mu pono la.

Bələ lɔ ɓə Biblə a pɛli kpɔnmaa tɛɛi la ə́ pɔ !

Ɉɛɓɛ lɛlɛɛ tii a pɛli :

• Ə́ tənəndɔɔi ə́ wɔ mɔnɔɠaa hu,

• Kpɔnmaa tɛɛi ə́ pɔ ə́i kpɔɔ kɔlɔn, ə lɛɛ ə́ ə́ túwɔ́ pələ lɛlɛ yee ta pɛlɛ ma,

• Əi wɔ yɛnɛɛ ɲaanɛɛ pələ lɛ yɛ́.

Gwa hwaaɓoɔ kɔwɔtɔɔ, gwa kɛ kɛɛmaalənŋaa kɛi.

• Yələkɔlɔn gbəlai kaa ma ?

• Lə ɓə a pɛmɛlɛngɔu hwələ ?

Pulu ɓa, gwa kɛ kɛɛmaalənŋaa kɛi yɛ hwilɛn na yɛnɛɛ ɓa.

• Lə mɛni ɓa mɛniɲɔn gaa yɛnɛɛ ?

• Lə mɛni ɓa nu a haa ?

Gɛɛmaalənŋaa tii mukulaaɠaa da pɛli hɔlɔɓoi Biblə hu.

Nu tamaa da kɛ ma, Biblə kaa a kwələn ɉɛɓɛ, ə lɛɛ ŋɔ lowai aa tɛɛ, awala kɛtii yɛ ɓo a hɛɓɛ yii ɲaakaa laa walaa kpɔ kɛnɛ. Biblə ɓə ɲaakaa laa walaa, ɓaa nua ɓə da ɲaakaa a ɲɔnwɔɔ ? Mɛni ɲɔnwɔɔɠaa ɓə kiɛ di mo diɛ, yɛ hwilɛn na Biblə ɓa.

Gaa nu tamaa kwəi diɛ Biblə a kɛ ma Yálá ɓə yɛnɛɛ ŋaawooɓoi. Yili a pɛli kɛi ləi ? Yɛnɛɛ laahwɛɛi a mɛniɲɔn, liikələngwəi da mɔnɔ, ɲɔn, da haa, yeehowololaa, maawɛli mɛni. Wɛlikɛmaa Yálá a pɛli kɛi ləi mɛniɠaa tii nwun na ?

Ə́ kaa bɔ ə́ gɛɛmaalən tii mukulaa kɔlɔn. Biblə hu woo kaa kiɛ pai ə́ kwəi pilii yɛ́ !

Yaa ɲaakaa yɛ́ ma niɛwooɠaai ɉɛɓɛi ŋɛi hu, di kulɔ Biblə hu. Zehova ŋɔ Kəlaɠaa laana diɛ Biblə a nu tənəndɔɔ. Maahɔlɔɓo “ ə həɠə Yálá yəi, a pɛli nu kalan ɉii a teɲa mɛni, yɛ nu kili la tee, yɛ mɛni ɲɔn gulɔ nu yee pɔ, yɛ nu hutɔɔ təlimo laa hu ” (Timɔtə veelɛnaa 3:16, 17). Ɉɛɓɛ pɔlɔi tii kalan mɛni kaa pai kiɛ ə́ kwəinɛɛi ! Ŋɔ liɛwooɠaa tɔnɔ kaa lɔ nii ma.