ƝAAKWƐLƐI 21
Nwɛlɛɛ lɛlɛɛ laa kaa ma yɛ həli ləi ?
Ɉu ho kea kwea li, Zehova kaa pai gu wɔ mɔnɔɠaa kəlee kpɛɛi ŋɔ Tɔɔlaa haalai. Nwɛlɛɛ tii lɛlɛɛ kpɔ kɛnɛ, ə lɛɛ maanɛɛ nu kəlee ə mɛn. Zesu ə kɛ bɔ ŋɔ kalan nea di nwɛlɛɛ lɛlɛɛ tii laahəli nu kəlee ɓa (Matie 28:19, 20, ɉɛɓɛ yili ninɛ). Mɛnii ŋɛi Zesu ə mo, Zehova ŋɔ Kəlaɠaa da kɛ bɔ tuwɔ ɓoi ləi ?
1. Matie 24:14 laa kaa ma yɛ hwɛɛ ləi háákələi ?
Zesu ə mo yɛ ma : “ Yálá taa Tɔɔlaa yii gaa pai, ho kɛ li maa wɛlɛɛ lɛlɛɛ laa ə həli yɛnɛɛ nu kəlee ɓa ” (Matie 24:14). Zehova ŋɔ Kəlaɠaa kwəinɛɛ góló lɛlɛɛ tii kɛ mɛni ɓa. Kwa kɛ nwɛlɛɛ lɛlɛɛ tii laahəlii lɔi mɛi naa kəlee, híín-woo waa tɔnɔ da da hu. Góló kɛnɛɛ tii kɛ mɛni a lowai həɠə kpɔ kɛnɛ da hwaŋa ə lɛɛ maanɛɛ góló kɛ pələ hiɛ kpɔ gbaŋa a neelee. Akɛ Zehova ŋɔ kpɔnmaa hwəi, góló tii hwa pɛli kɛi.
2. Lə mɛniɠaa ɓə kwa kɛ gɛi, kuɔ Yálá Lawoo laahəli nua diɛ ?
Kwa kɛ Yálá Lawoo laahəlii ɓɛi lɔpee kwa nua kaa laa. Kwa kɛ Yálá Lawoo laahəlii “ pɛlɛɠaa laa ləi ”, yɛ pələi Kilistalea tolooɠaa di kɛi gɛ la (Gɛlaɠaa 5:42). Bələi tii kwa kɛ Yálá Lawoo laahəlii la kuɔ tɛɛ la pɛlɛɠaa kəlee laaləi, yili a gɛ kuɔ pɛli hwaa nu miliɔn damaa pɔ kwəlan gəlee. Ə lɛɛ nwɔnɔ kwa kɛ Yálá Lawoo laahəlii nu kpulu kɛɛnaaɠaa, maahɔlɔɓo nu tamaa di hwa kɛ kɛi di pɔɔli. Kwa kɛ nwɔnɔ kpaaləɠaa kwɛlii a lowai lɔpee gəlee yii yaan ku Zehova maamɛni hukulɔ nua diɛ.
3. Gbɛɛ ɓə maanɛɛ ə Yálá Lawoo laahəli ?
Nwɛlɛɛ lɛlɛɛ laahəli mɛni gbɔu laai Kilistalea leeleeɠaa kəlee nwuɔ. Kwa góló tii həɠə a ku yee hweelɛ. Yii kpɔ gaa a ku tɛi-tɛi kəlee ku yee pɛlimaa mɛni, kwa gɛ kuɔ pɛli nwɛlɛɛ lɛlɛɛ laahəlii, maahɔlɔɓo ku gɔlɔn kuɔ ma yili a pɛli ə nua di wɔ yɛnɛɛ nwun maaɓo (Timote dɔlɔɔ 4:16 ɓo). Di hwa ku hala gólói ŋɛi kɛ mɛni ɓa, maahɔlɔɓo Biblə kaa kɛi ma : “ Bələi ka ɉɔlɔɓo la a mɛinɛɛ, ka dɛɛ tii a mɛinɛɛ ” (Matie 10:7, 8). Nu kəlee hwəi a ɲəi hee ku wɔ wɛlɛɛwoo mu, kɛlɛɛ yili hwa ku hwiikpɛɛ maahɔlɔɓo Yálá Lawoo laa həliɛ kaa a ku wɔ Yálá ɓatoo pələ ta ə lɛɛ yili a Zehova kwəinɛɛ.
Ə́ WƆ MƐNIKƆLƆNŊAA TA PƐLƐ MA
Pələi Zehova ŋɔ Kəlaɠaa da Yálá Lawoo laahəli la lɔi mɛi naa kəlee, ə́ wɔ mɛnikɔlɔnŋaa ta pɛlɛ ma yɛ hwilɛn na yili ɓa, ə lɛɛ ə́ gaa pələi Zehova a kpɔnmaa tɛɛ la ku pɔ.
Di kaa Yálá Lawoo laahəlii lɔi mɛi naa kəlee : A) Costa Rica, B) États-Unis, C) Bénin, D) Thaïlande, E) Yap, F) Suède
4. Kwa mɛni kəlee kɛ ə gɛ ku Yálá Lawoo laahəli nu kəlee ɓa
Zehova ŋɔ Kəlaɠaa da mɛni kəlee kɛ di Yálá Lawoo laahəli nu kəlee ɓa kɛɛnaa lɔpee. VIDIO kaa, ə lɛɛ ka lono kɛ gɛɛmaalən ŋɛi mɛi.
-
Zehova ŋɔ Kəlaɠaa da mɛni kəlee kɛ ə gɛ di Yálá Lawoo laahəli. Lə ɓə yili a gɛ yɛ́ ?
Matie 22:39 da Romə 10:13-15 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Ku Gɛlaɠaa wɔ Yálá Lawoo laahəli kóló a nɛ ləi yɛ ma nu takpɛliɠaa wɛli kaa kuɔ ?
-
Nuai da kɛ nwɛlɛɛ lɛlɛɛ laa həlii, Zehova a giliŋahiɛ ləi yɛ vilɛn diɛ ? (nwookpuɔ 15 kaa)
5. Kwa Yálá ni kwa kóló kɛ gee ɓa
Kɔɔmaa tamaa a nɛ yɛ ma Zehova ɓə a ku wɔ kólói tənəndɔɔ. Nouvelle-Zélande lɔi hu, ku nan non ɉulɔnu ta yii da kɛ naa ɓaa Polə, ə kɛi Yálá Lawoo laahəli pɛlɛɠaa laaləi midi tɛɛ pulu, ɓɛlowai ə nɛɛnu ta kaa la ɲəi bɛlɛ laaləi. Volo tɔnɔn tii yələwalapɔ, nɛɛnu tii ə Yálá hwɛli yɛ dəli a naa Zehova yɛ kɛ ma : “ Nuta tɔɔ ə pa ə nwoo pili míí ”. Ku nan non Polə kaa kɛi ma lɛɛlɛ haaɓa tɛɛ pulu, ə nɛɛnui tii ŋɔ kpɔn maakɛlɛ.
Korɛntə dɔlɔɔ 3:9 ɓo, ə lɛɛ ka lono kɛ gɛɛmaalən ŋɛi mɛi :
-
Kɔɔmaaɠaa yɛ pələi ku nan non ŋɛi Nouvelle-Zélande lɔi hu nwɛi a nɛ la, da nɛ ləi diɛ ma Zehova kpinii ɓə Yálá Lawoo laahəli kóló ɲɛitɔwɔ ?
Gɛlaɠaa 1:8 ɓo, ə lɛɛ ka lono kɛ gɛɛmaalən ŋɛi mɛi :
-
Lə mɛni ɓa, ku maakpaan gaa Zehova ŋɔ kpɔnmaa ɓa, kuɔ pɛli gólói ŋɛi kɛi ?
Ə́ kili kaa ɉu ?
Nɔwɔ kuu mu ŋaakpɔn gəlee, da kɛ ku maakwɛlii Yálá Lawoo laahəli pələ ɓa. Akɛ yaa ta pa ku wɔ ŋaakpɔnŋaa tii ta ɓa pələi da kɛ ku maakwɛlii la, ya kɛ ə́ kiliŋahiɛi ləi yɛ́ vilɛn na ma ?
6. Yálá ə kɛ kuɔ, kuɔ Nawoo laahəli, kwa kɛ yili kɛi
Kilistalea tolooɠaa di yowoɠaa di mɛni kəlee kɛ yii yaan di kpəla Yálá Lawoo laahəlii. Kɛlɛɛ di ho nɛɛ laa di yee ho lɔ. Di mɛni kəlee kɛ yii yaan maalaa yii di yəi diɛ pɛli Yálá Lawoo laahəlii, diɛ pɛli ɉukɔlɔn ɉii diɛ. Ə lɛɛ diɛ ‘ nwɛlɛɛ lɛlɛɛ laahəli mɛni maakɔnwɔn kiti pɛlɛ la ’ (Filipə 1:7). Pələ lɔ ɓə Zehova ŋɔ Kəlaɠaa da gɛ la háákələi. a
Gɛlaɠaa 5:27-42 ɓo, ə lɛɛ ka lono kɛ gɛɛmaalən ŋɛi mɛi :
-
Lə mɛni ɓa ku ho pai kpəlai Yálá Lawoo laahəliɛ ɓa ? (Nwookpuɔ 29, 38, da 39 kaa).
NUTAƓAA DA KƐ KƐI MA : “ Lə mɛni ɓa Zehova ŋɔ Kəlaɠaa da kɛ lii pɛlɛɠaa laaləi diɛ Yálá Lawoo laahəli ? ”
-
Da mo tii yɛ́, lə ɓə ə́ kaa pai moi ?
YII GU GALAN
Zesu ə mo ŋɔ kalan neai diɛ yɛ ma di nwɛlɛɛ lɛlɛɛ laa həli lɔi mɛi naa kəlee. Zehova kaa ma yɛ kpɔnmaa tɛɛ matoonua pɔ diɛ pɛli gólói tii kɛi.
Nɛɛ ə́ kili pɔ
-
Nwɛlɛɛ lɛlɛɛ laa kaa ma yɛ həli ləi lɔi mɛi naa kəlee ?
-
Ku wɔ Yálá Lawoo laahəliɛ a nɛ ləi yɛ ma kwa nu takpɛliɠaa wɛlilakɛ ?
-
Ə́ wɔ kili ɓa nu a kɛi Yálá Lawoo laahəli, yili a kwəinɛɛ tɛɛ bɔ ? Lə mɛni ɓa ə́ kaa moi tii ?
MƐNI TAKPƐLIƓAA
Gaa pələi Zehova ŋɔ Kəlaɠaa da kɛ Yálá Lawoo laahəlii la taa kpea-kpeaɠaa hu.
Paris : Yálá Lawoo laahəli pələ yii vilɛnŋaa taa kpea-kpeaɠaa diɛ (5:11)
Nuai da pa di maakilɛi, mɛni ləkɛɛɠaa ɓə Zehova ŋɔ Kəlaɠaa da gɛ yii yaan diɛ pɛli Yálá Lawoo laahəlii diɛ ?
Daa kpələ wɛli kulɔ nua diɛ di wɔ Yálá mɛni hu, diɛi pa di maakilɛi (5:59)
Ə́ wəli tɔɔ nɛɛnu ta ɓa, yii aa ŋɔ lowai kəlee həɠə Yálá Lawoo laahəli mɛni ɓa, ə ɉukulɔ lə mɛni ɓa gólói tii a gwəinɛɛ.
Gaa pələi kitiɠaa di nɛɛ la kuɔ ə lɛɛ pələi yili ə gɛ la Yálá Lawoo laahəli mɛni yɛ tɛ tɔwɔ.
a Yálá ɓə kɛ kuɔ ku Nawoo laahəli. Yili ɓa Zehova ŋɔ Kəlaɠaa maakpan ho ma yii yaan ɲɛitɔwɔnua di hwaa ma, diɛ təɠa pa lii Yálá Lawoo laahəlii.
