ƝAAKWƐLƐI 38
Yɛnɛɛ kaa a Yálá ŋɔ mɛinɛɛ gu nɛ guɔ ma gu ɉukɔlɔn
Gu kɛ mɛni yɛnɛɛ a gɛ gu mɛni lɛlɛɛ tamaa kɛ ə lɛɛ gu di ɲaanɛɛ kulɔ. Ə ma kɛ mɛni tamaa kaa gu wəli pulu, mɛni taɠaa kaa ɲɛnɛɛ ŋɛi hu yii gwa pɛli gu di ɲaanɛɛ kulɔ. Gwa pɛli nɛi ləi Zehova ɓa guɔ ma mɛinɛɛ ŋɛi ə gɛ guɔ a yɛnɛɛ gu ɉukulɔn ? Lə mɛni kpɔ ɓə a gɛ guɔ mɛinɛɛ tii hukɔlɔn ?
1. Lə mɛni ɓa maanɛɛ yɛnɛɛ maamɛni ə kɛ a nwala-walaa gu yəi ?
Yɛnɛɛ kaa a Zehova ŋɔ mɛinɛɛ, yili ɓa maanɛɛ maamɛni ə kɛ a nwala-walaa gu yəi. Zehova pɔ pələ ɓə “ yɛnɛɛ nwun gulɔi kaa laa ”, ya ɓə nɔɔn-nɔɔn ɉɛnŋaa kəlee pɛli (Maatɛnɛ 36:10 [36:9, NWT]). “ Yaa tii ɓə a : hɛn nɔpee gəlee tɛɛ nu pɔ, kɛ-yɛnɛɛ, ə ma kɛ nu nɔɔ ” (Gɛlaɠaa 17:25, 28). Yii gu maakpaan gaa ma ə gɛ gu yɛnɛɛ kɛ Zehova a dɛɛ gu pɔ. Kəlaa gəlee lɔ hwəli, a mɛni lɔpee gəlee kɛ ə gɛ guɔ pɛli yɛnɛɛ ɲaanɛɛ kulɔi (Gɛlaɠaa 14:17 ɓo).
2. Ɲɛnɛɛ ŋɛi Zehova ə dɛɛ gu pɔ a mɛinɛɛ gwa pɛli nɛi ləi ma guɔ ma gu ɉukɔlɔn ?
Ə həɠə ɓɛlowai ə́ lee əi maakoo həɠə la, ə́ wɔ yɛnɛɛ maamɛni wala-walaai Zehova yəi. Nii-maahəɠɛɛ haalai Davidə ŋɛi kɛ a Zehova ŋɔ kólókɛmun da ə mo Zehova ɓa yɛ ma : “ Və́ nii kɛ kɛli a nu neelee yili mukulaa ɓaa naa kəlee ɲaa ho nii kɛ pɛli li, ə́ ɲɛi ə kɛ máá ” (Maatɛnɛ 139:16). Ə́ wɔ yɛnɛɛ maamɛni wala-walaai Zehova yəi (Matie 10:29-31 ɓo). Nuta a gili a gɛ a gbɔɔ ŋɔ yɛnɛɛ a nwun na pili awala kɛtii ə nu takpɛli ŋɔ yɛnɛɛ nwun na pili, yili a nwana Zehova ɓa kpɔ kɛnɛ (Lɛɛ gbɔwɔ ɓa 20:13). Gwa gili gwa gɛ gwa gu laa too mɛni ta hu yii a pɔɔ lɛɛ gu wɔ yɛnɛɛ ɓa, awala kɛtii gwa wala mɛni ta hee gbaŋa guɔ pɛli gu ɓəlaa di wɔ yɛnɛɛ hon ɉii a nɛlɛɛ, yili a nwana Zehova ɓa nwɔnɔ kpɔ kɛnɛ. Gwa kɛi gu wɔ yɛnɛɛ hon a nɛlɛɛ ə lɛɛ gu wɔ nu takpɛliɠaa di wɔ yɛnɛɛ hon a nɛlɛɛ, gwa nɛ guɔ ma mɛinɛɛ kɛnɛɛ ŋɛi Yálá ə gɛ guɔ a gu wɔ yɛnɛɛ, gu mɛinɛɛ tii hukɔlɔn.
Ə́ WƆ MƐNIKƆLƆNŊAA TA PƐLƐ MA
Gu wɔ yɛnɛɛ ŋɛi a Yálá ŋɔ mɛinɛɛ, pələi gwa pɛli mɛinɛɛ tii hu kɔlɔn ɉii la ma, gu gɛ pələ taɠaa kaa.
3. Ə́ wɔ kɔlɔipono laahɔnmo
Gɛɛ gu ho batɛɛmu həɠə, gu mo Zehova ɓa guɔ ma gu kaa pai kɛi niiɓa kɛi a lowai kəlee. Yili ɓa gwa kóló kɛ kpɔ ma a gu lii kəlee, gɛ pələ a kɛ lɔ yɛ gwa kɛi gu kpɔɔ kulɔ a halaa Yálá ɓa. Romə 12:1, 2 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə ɓə maanɛɛ əi lii muhəɠə yɛ́ pɛli ə́ wɔ kɔlɔipono laahɔnmoi ?
-
Ə́ wɔ kɔlɔipono laahɔnmo pələ taɠaa hwaaɓo.
4. Gɛ a nɛlɛɛ ə́ kɛ mɛniɠaa lɔpee gəlee hu hó pa ə́ pɔɔ lɛɛ nuta ɓa, awala kɛtii hó nuta ŋɔ yɛnɛɛ nwun na pili
Túwɔ́ lɔpee nu ya mo yii a pɛli ə nuta maanwana awala kɛtii ə maanu paa, Biblə a gu hwaŋalɔ gu duwɔɠaa tii kəlee lɛɛ laa. VIDIO kaa yɛ́ pɛli gɛ pələ taɠaa kaai.
Hanwon 22:3 ɓo, ə lɛɛ ka lono kɛ pələi ya pɛli gɛi la a nɛlɛɛ...
-
ya kɛ bɛlɛ laaləi.
-
ya kɛ ə́ yee góló kɛɛnaa.
-
ya kɛi pə́lə́ ta kɛ yii a wəleen gulɔ nu ɓa.
-
ə lɛɛ ya kɛ hiɛhɛn nɔpee ta hu awala kɛtii yɛ́ kpinii ya kɛi ɉiɛ.
5. Lokolo yii nee kwəi ŋɔ yɛnɛɛ maawiɛ
Ɓɛlowai lokolo a kɛ nii la nee kwəi mɛniɠaa kpɔ a həli ma, Davidə ə ɉukulɔ yɛ ma Zehova a gili lɛɛ mɛniɠaa tii kəlee hu. Maatɛnɛ 139:13-17 ɓo, ə lɛɛ ka lono kɛ gɛɛmaalən ŋɛi mɛi :
-
Zehova ɲɛi mu, nu ŋɔ yɛnɛɛ a gɔwɔtɔɔ a ɓɛlowai da gaa la awala kɛtii ɓɛlowai da maakoo həɠə la ?
Zehova ŋɔ tɔnŋaai ə dɛɛ Israɛlə lonnii pɔ, ə kɛi koonɛaɠaa maakpɛ ə ma kɛ di lonnii kɛ di kwəi. Lɛɛ gbɔwɔ ɓa 21:22, 23 b ɓo, giliŋahiɛ ɉɛɓɛ kɔwɔ la hu, ə lɛɛ ka lono kɛ gɛɛmaalənŋaa ŋɛi mɛi :
-
Lokolo yii nee kwəi nuta a ɓaa yii ho gili li ho gɛ Zehova a maanu kaa ləi ?
-
Maanu a gili kea a mɛni huwu mai tii kɛ Zehova a gaa ləi c ?
-
Ə́ kaa Yálá kiliŋahiɛ pələi ŋɛi kaa ləi ?
Nɛɛnu ta a pɛli ə giliŋahiɛ yɛ ma yɛnɛɛ kaa a hɛn yii maamɛni wala-walaa, kəlaa mɛni taɠaa hu a giliŋahiɛ yɛ ma yii lɔ maanɛɛ ə kɛ ya ɓaa kookulɔmaa. Esai 41:10 ɓo, ə lɛɛ ka lono kɛ gɛɛmaalən ŋɛi mɛi : Nɛɛnu ta kili a pɛli ə kɛ ɉu yɛ ma yɛnɛɛ maamɛni wala-walaai, kəlaa mɛni taɠaa hu yɛ giliŋahiɛ yɛ kɛ ma yii lɔ maanɛɛ ə kɛ ya ɓaa kookulɔmaa
-
Da wəleen nɛɛnu ta pulu yii yaan ə gookulɔ ma gbɛɛ ɓə maanɛɛ ə tinɛ bɔ pələ yɛ pɛli kpɔnmaa hɔlɔɓoi ? Lə mɛni ɓa ə́ kaa moi tii ?
NUTAƓAA DA KƐ KƐI MA : “ Nɛɛnu a kɛ bɔ ə goo kulɔ ma, maalaa kaa ɲəi. Yii lɔpee a kɛ bɔ ə gɛ a gbɔɔkpɔɔ kɔlɔ, a pɛli gɛi. ”
-
Lə mɛni ɓa ə́ laana yɛ́ ma koonɛa ŋɔ yɛnɛɛ maamɛni nwanai Zehova ɲɛi mu ə ma kɛ non dii gaa gwəi ?
YII GU GALAN
Biblə a galan yɛ ma, yɛnɛɛ kaa a Zehova ŋɔ mɛinɛɛ maanɛɛ gu nwɛlilakɛ, gu maawiɛ, ə lɛɛ gu gu wɔ yɛnɛɛ hon a nɛlɛɛ ə ma kɛ nu takpɛliɠaa di wɔ yɛnɛɛ.
Nɛɛ ə́ kili pɔ
-
Lə mɛni ɓa nukan ŋɔ yɛnɛɛ maamɛni nwanai Zehova ɲɛi ɓa ?
-
Nuta a gili a gɛ a nu takpɛli ŋɔ yɛnɛɛ nwun na pili, lə ɓə yili a gɛ Zehova ɓa ?
-
Ɲɛnɛɛ ŋɛi Yálá ə gɛ guɔ a mɛinɛɛ lə mɛni ɓa ə́ kaa bɔ ə́i wɔ mɛinɛɛ hulɔkɔnŋaa lɛ yɛ hwilɛn na ma ?
MƐNI TAKPƐLIƓAA
Ɲɛnɛɛ ŋɛi Zehova aa dɛɛ gu pɔ a mɛinɛɛ gwa pɛli mamaɓoi ləi yili maamɛni ɓa ?
Gɛɛmaalən ŋɛi mukulaa kwɛli : Nɛɛnu yii aa goo kulɔ ma Yálá a pɛli maahwaalɛɛi ?
“ Lə ɓə Biblə a mo yɛ hwilɛn na kookulɔmaa ɓa ? ” (Hɛɓɛ yii gaa gwɛli yɛli ɓa)
Pələi Yálá a yɛnɛɛ kaa la, gaa pələi yili a kpɔnmaa tɛɛ la gu pɔ gu pə́lə́ kɛ pə́lə́ɠaa həɠə ɉu yii hwa pɔɔ lɛɛ guɔ ?
Nuta a kɛ bɔ ə gbɔwɔ paa, gaa pələi Biblə a pɛli kpɔnmaa tɛɛ la bɔ ?
a Nuai di lii yaliɛ di kwəi Zehova a di maaliihɛlɛn ɉee kpɔ kɛnɛ (Maatɛnɛ 34:19 [34:18, NWT]). Giliŋahiɠaai a kɛ gɛi nua kpɔɔ paa mɛni yɛ pa di nwun ɉu a kɛ giliŋahiɛɠaai tii ɲaakaai. Ə lɛɛ a kɛ bɔ ə kpɔnmaa tɛɛ nua tii pɔ. Ɉɛɓɛi ŋɛi da kɛ ma “ Gáá bɔ ŋi haa, Biblə a pɛli kpɔnmaa tɛɛ bɔ́ gbɔ́ɔ́ nwun na pili mɛni a kɛi pa gílí pɔ ? ” Mo yɛ́ pɛli ɲaakaai, pələi Zehova a kpɔnmaa tɛɛ la nua pɔ diɛi di kpɔɔ nwun na pili wɛli a kɛ diɛ. Gaa ɲaakwɛlɛi ŋɛi hu ɓɛi ŋɛi gaa laa pɛɛn ni mɛni takpɛliɠaa.
b Lɛɛ gbɔwɔ ɓa 21:22, 23, NWT, kaa kɛi ma : Hinaa da lɛɛi gɔi da kɛlɛ koonɛa ta hu, ə naayɛɛ kəlaa mɛni ta ho həli nokolo ɓa a ɲɔnwɔɔ, nui mɛnii tii nwulu a lɛɛ nwuɔ a nɛɛnui tii yee kulɔ ɉu a hɛn nɛɛnui ɉilɛ a vaaɓo. Ə lɛɛ a tɛɛ giti tee nua kɔwɔi yɛ nwalii tii hala. Kəlaa nuta a haa mɛnii tii hu maanɛɛ ə́ yɛnɛɛ tɛɛ a yɛnɛɛ hɔnwɔn.
c Nuai daa ta di kookulɔ diɛ, maahonɛɛli di kɛ lɔ kea ma diɛ di kpɔɔ hɔn ɉəɠə mɛnii tii hu, Zehova a pɛli di maahwaalɛɛi. Ya kɛ bɔ ə́ mɛni tamaa kɔlɔn yɛ hwilɛn na yili ɓa, ɉɛɓɛi ŋɛi da kɛ ma : Lə ɓə Biblə a mo yɛ hwilɛn na kookulɔmaa ɓa gaa. Ɉɛɓɛi tii a hɔlɔɓo ɓɛi gaa laa pɛɛn ni “ Mɛni takpɛliɠaa. ”
