ƝAAKWƐLƐI 53
Pə́lə́ kɛ pələɠaai di wɛli kaa Zehova ɓa
Zehova kaa a “ Yálá yii gwəinɛɛi ” (Timote dɔlɔɔ 1:11, NWT). Gaa bɔ kwəinɛɛ ə kɛ gu yəi ə lɛɛ gu gu wɔ yɛnɛɛ ɲaanɛɛ kulɔ. Gwəinɛɛi gwa kɛi lowai həɠə guɔ gu hwiitɔɔ ə lɛɛ guɔ pə́lə́ kɛ. Ɲaakwɛlɛi ŋɛi hu, gu kaa pai gaai pələi gwa pɛli gu pə́lə́ kɛ lowaiɠaa hon ɉii la a nɛlɛɛ ə lɛɛ Zehova kwəi yɛ lɛɛ a nɛɛ gu pɔ.
1. Lə ɓə maanɛɛ naa kili ə lɛɛ gu ŋaa ɓɛlowai gu kaa gu pə́lə́ kɛ pə́lə́ həɠəi la ɉu ?
Pə́lə́ ləkɛɛɠaa ɓə gɛ wɛli a kɛ too yɛ ? Nu taɠaa kaa bɔ diɛ lɛɛ di yəi bɛlɛlaa ləi diɛ hɛɓɛ ɓo, diɛ wələ woo mɛn, diɛ filimə kaa awala kɛtii diɛ ɓo internet ɓa. Nu taɠaa kaa nwɔnɔ bɔ da di ɓəlaa diɛ pə́lə́ɠaa kɛ yii a hwələn gulɔ nu ɓa yɛ pələi balon gɛlɛɛ da gilɛ həɠɛɛ di kaa la. Pə́lə́ huwui lɔpee gəlee guɔ gu ɉəɠə ɉu yii a gu lii ɓa, maanɛɛ gu kɛ a gu laana guɔ ma, “ a nɛɛ gu Namu ɓa ” (Efɛsə 5:10). Yili kaa kpɔ a mɛni wala-wala, maahɔlɔɓo pə́lə́ huwu tamaa kaa laa diɛi da nua hwaŋalɔ mɛniɠaa kɛ mɛni ɓa yii nwɛli ho Zehova ɓa. Yɛ pələi hwialaa, wɛlimɛni maanɛŋɛn ɉəɠɛɛ, awala kɛtii haali pulu yii (Maatɛnɛ 11:5 ɓo). Lə ɓə a pɛli kpɔnmaa tɛɛi gu pɔ, guɔ pɛli gu pə́lə́ kɛ pə́lə́ɠaa həɠəi ɉu a nɛlɛɛ ? Nuai a gu ɓəlaa, Zehova wɛli a kɛ diɛ, yili kaa pai kpɔnmaa tɛɛ gu pɔ gu túwɔ́ a nɛlɛɛ ə lɛɛ gaa nwɔnɔ pai kpɔnmaa tɛɛ gu pɔ guɔ pɛli gu pə́lə́ kɛ pə́lə́ɠaa həɠəi ɉu a nɛlɛɛ.
Yɛ pələi gu gaa la ɉɛɓɛi ŋɛi ɲaakwɛlɛi 48 hu, nui a hwilɛn kilimaanua pɔ akɛ a kilimaamun. Kəlaa nuai Zehova wɛli ho diɛ, gwa di kɛ a gu hiɛgeepulu, gwa ɉu mɔnɔ mii (Hanwon 13:20).
2. Gwa kɛi pə́lə́ kɛ, lowaɠaai gwa gɛ lə mɛni ɓa maanɛɛ di gu ɉəɠə ɉu a nɛlɛɛ ?
Ɓələɠaai gwa ɉəɠə ɉu gɛ mɛni ɓa, ə ma kɛ bɛliɛ ɉu maanɛɛ gu gɛ a nɛlɛɛ ə gɛ ho pa gu wɔ lowai kɛnɛ həɠə. Gwa wala gɛ tii, mɛniɠaa maamɛni wala-walaa gu yəi gu hwa pɛli lowai kɛnɛ hɔlɔɓoi di kɛ mɛni ɓa. Biblə a gu hwaŋalɔ ə gɛ “ lowai yii gaa gu yəi, gu ho ɉu kala ” (Efɛsə 5:15, 16 ɓo Ɉɛɓɛ yili ninɛ).
Ə́ WƆ MƐNIKƆLƆNŊAA TA PƐLƐ MA
Gaa pələi ya pɛli ə́ pə́lə́ kɛ pə́lə́ɠaa həɠəi la ɉu a nɛlɛɛ.
3. Pə́lə́ɠaa di ho lɛlɛ li, di lɛɛ laa
Pə́lə́ɠaa gu kaa bɔ gu gɛ, lə mɛni ɓa maanɛɛ gu di həɠə ɉu a nɛlɛɛ ? VIDIO kaa, ə lɛɛ ka lono kɛ gɛɛmaalən ŋɛi mɛi.
-
Lə mɛni ɓa gbulɔn gɔ pə́lə́i ŋɛi wɔlɔ di kɛi gɛ Romə da yiihu pə́lə́ɠaa tamaa di kulaa di kee ɓa ?
-
Vidio hu, lə mɛni ɓə Danny ə ɲaakaa yii hwilɛn na pə́lə́ kɛ pə́lə́ɠaa diɛ ?
Romə 12:9 ɓo, ə lɛɛ ka lono kɛ gɛɛmaalən ŋɛi mɛi :
-
Vɛlisɛɛ ŋɛi a kpɔnmaa tɛɛ ləi ə́ pɔ ə́i pə́lə́ kɛ pə́lə́ɠaa həɠə ɉu ?
Mɛniɠaa nwɛli kpɛɛ Zehova ɓa, daɠaa ɓaa lə ? Hanwon 6:16, 17 da Galatə 5:19-21 ɓo. Ka vɛlisɛɛɠaa tii ɓo tɛi-tɛi ə lɛɛ ka lono kɛ gɛɛmaalən ŋɛi mɛi :
-
Mɛniɠaa moɔ vɛlisɛɛ ŋɛi hu, nɛlɛɠaa ɓə gwa kɛ gaai nukanŋaa pə́lə́ kɛ pə́lə́ɠaa hu haakələi ?
Ya kɛi pa ə́ pə́lə́ kɛ pə́lə́ ta həɠəi ɉu…
Gbea ə́ kpɔɔ maaləngɛ :
-
Lə mɛni ? Mɛniɠaa kaa ɉu diɛi di wɛli ho Zehova ɓa ?
-
Mɛni lowai ? Mɛniɠaa di maamɛni wala-walaa a di wɔ lowai taɠaa həɠə ?
-
Gbɛɛ ? Nuai Zehova wɛli ho diɛ, a gɛ mɔɔn kwa diɛni kuɔ lowai kɛ gee ɓa kɛlɛ-kɛlɛ ?
Ə gɛ gu ho too mɛniɲɔn da hu, vialaɓoɔ gu gu maakwea mɛniɲɔn tii ɓa. Yili ɓa, pə́lə́ kɛ pə́lə́ lɔpee gwa gaa guɔ ma ho lɛlɛ li, maanɛɛ gu gu maakwea ma.
4. Ə́ wɔ lowai hon a nɛlɛɛ
VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Nan non ɉulɔnu ŋɛi kɛ vidio hu, yii ə kɛi gaa pələi ma ho kɛ ɲɔnwɔn li la, lə ɓə yili ə gɛ ŋɔ lowai hon ɓələ ɓa ?
Filipə 1:10 ɓo, ə lɛɛ ka lono kɛ gɛɛmaalən ŋɛi mɛi :
-
Lowai yii maanɛɛ gu gɛ guɔ pələ kɛ, vɛlisɛɛ ŋɛi a kpɔnmaa tɛɛ ləi gu pɔ guɔ pɛli nowai tii həɠə ɉu ?
5. Pə́lə́ kɛ pə́lə́ɠaai nɛlɛɛ, ɉəɠə ɉu
Pələi ma pə́lə́ tamaa wɛli ho la Zehova ɓa, pə́lə́ tamaa kaa nwɔnɔ laa diɛi di lɛlɛɛ ə lɛɛ di wɛli yɛ ɓo ma. Kilimaamun 8:15 da Filipə 4:8 ɓo, ə lɛɛ ka lono kɛ gɛɛmaalən ŋɛi mɛi :
-
Pə́lə́ huwu lɛlɛɛ ləkɛɛ ɓə nwɛli kaa yɛ́ ?
Pə́lə́ kɛ pə́lə́ huwu tamaa kaa laa diɛi di lɛlɛɛ.
NUTAƓAA DA KƐ KƐI MA : “ Filiməɠaai hwialaa kaa ɉu, wɛlimɛni maanɛŋɛn yɛ ɓo ɉu, haali pulu yii yɛ ɓo ɉu, di kaa ho a mɛni ɲɔnwɔɔ, yii lɔ ɲɔnwɔɔ yaa ɓaa ya mɛniɠaa tii ta kɛ. ”
-
Ə́ wɔ kiliŋahiɛ kaa ləi ?
YII GU GALAN
Pə́lə́ huwuɠaai di lɛlɛɛ, diɛ ɓə Zehova kaa bɔ gu di həɠə ɉu.
Nɛɛ ə́ kili pɔ
-
Pə́lə́ huwu ləkɛɛɠaa ɓə maanɛɛ kilistalon ə nɛɛ laa ?
-
Lə mɛni ɓa maahonɛɛli pə́lə́ kɛɛ ho gu wɔ lowai kɛnɛ həɠə ?
-
Lə mɛni ɓa maanɛɛ ə́ pə́lə́ɠaa həɠə ɉu yii nwɛli kaa Zehova ɓa ?
MƐNI TAKPƐLIƓAA
Ɓələɠaa maanɛɛ gu di kɛ, gbɛɛ ɓə maanɛɛ ə ɉəɠə ɉu.
Gaa pələi ya pɛli ə́ pə́lə́ kɛ pə́lə́ɠaa həɠəi la ɉu a nɛlɛɛ.
“ Ə́ pə́lə́ kɛ pə́lə́ dɔlɔ kaa ma ? ” (La Tour de Garde, 15 octobre 2011)
Ɓɔlɔkiliinŋaa ŋɛi mɛiwoo kaa kɛi ma “ Nwɛli kpɛɛ maalaa kɛ ɲə́i yɛ hwilɛn na kwiiɠaa diɛ, ɲéé ə pɛli tɛɛ ma, ” gaa yii gɛ hulɔnu ta yɛ bə́lə́ kɛ pə́lə́ɠaa maahwalən.
“ Biblə a nua di wɔ yɛnɛɛ maakwalən ” (La Tour de Garde, 1er février 2010)
Gaa pələi longaalee ta ə túwɔ́ la yɛ hwilɛn na filimə ta ɓa yii haali pulu yii mɛni kaa ɉu.
