Ya kɛi hiɛ kulɔ ya kɛ kɛɛnaa lɛlɛɛɠaa kaai. Kəlaa, mɔnɔ kaa hiɛ kulaa hu. Pələ lɔ ɓə Biblə kalanŋaa kaa la, a kɛ a lowai taɠaa yɛ́ ə́ kpɔɔ maaləngɛ akɛ ə́ kaa lɔ pai lɛɛi ə́ wɔ Biblə kalanŋaa ɓa. Kəlaa lə mɛni ɓa maanɛɛ ə́i hwaŋa həɠə ə́ wɔ Biblə kalanŋaa ɓa ? Lə ɓə pai kpɔnmaa tɛɛ ə́ pɔ ə́ lɛɛ lɔ ma yɛ́ Biblə kalan pələi ma gɛ laa hwa kɛ a nɛɛ la ?

1. Lə mɛni ɓa Biblə kalanŋaa kaa a mɛni yii maamɛni wala-walaa ?

“ Yálá laa woo kaa a vulúmaa vaŋa ə ɓo ɉu ” (Hebreu 4:12). Biblə tɔnɔ kaa ma kpɔ kɛnɛ maahɔlɔɓo Yálá a ŋɔ kiliŋahiɛɠaa lɛ guɔ Biblə hu yɛ hwilɛn na gu maamɛni ɓa. A mɛnikɔlɔnŋaa tɛɛ ə́ pɔ ə ma kɛ kili ə lɛɛ kilitɔɔmaalaa. Ə lɛɛ yii kpɔ nwɔnɔ gaa a mɛinɛɛ kɛnɛ ya ka, a pɛli ə gɛ ə́ kɛ a Zehova məlanmun. Ya kɛi Biblə kalan a pɛli ə ə́ wɔ yɛnɛɛ maahwalən nɛlɛɛ kɔlɔi.

2. Lə mɛni ɓa maanɛɛ Biblə ŋɔ teɲaɠaa dɔnɔ ə kɛ ma ə́ ɲɛi ɓa ?

Biblə ŋɔ teɲaɠaa kaa a hɛngɔu leelee. Yili ɓə a gɛ Biblə yɛ gu hwaŋalɔ yɛ kɛ ma gu ‘ teɲa kwɛli ; gwa ɉɔlɔɓo, gu ho nɔwɔtɔɔ ’ (Hanwon 23:23). Biblə dɔlɔ a kɛ ma gu ɲɛi ɓa, gu kaa pai mɛni kəlee kɛi gu lɛɛ lɔ ma guɔ Biblə kalan ə ma kɛ mɛni tamaa da kpean gu tɔwɔ (Hanwon 2:​4, 5 ɓo).

3. Zehova a pɛli kpɔnmaa tɛɛ ləi ə́ pɔ ə́ lɛɛ lɔ ma yɛ́ Biblə kalan ?

Hɛn gəlee pɛlimun Zehova Yálá, yai a ə́ ɓəlanmun gaa bɔ ə kpɔnmaa tɛɛ ə́ pɔ ə́ gɔlɔn. Yálá a Nawoo kalan mɛni ‘ gɛ lii da gɛ wɛli too guɔ, ’ ə lɛɛ ə yili kɛ mɛni “ hwaŋa ” tɛɛ gu pɔ (Filipə 2:13 ; Esai 40:29 ɓo). Yili ɓa, hwaŋa awala kɛ ə́ yəi hó Yálá Lawoo kalan a lowai taɠaa, awala kɛtii yii ə́ kaa maakwɛlii hwaŋa awala kɛ ə́ yəi hó bɔ túwɔ́ ɓo, a pɛli ə kpɔnmaa tɛɛ ə́ pɔ. A pɛli nwɔnɔ ə hwaŋa tɛɛ ə́ pɔ ə́ tɔɔ kpaan ə ma kɛ daa di muhəɠə ə́ laa ɓa, awala kɛtii mɛni wala-wala takpɛliɠaa da kɛi həli yɛ́. Kɛ́ Zehova hwɛlii kɛlɛ-kɛlɛ yii yaan ə kpɔnmaa tɛɛ ə́ pɔ ə́ lɛɛ lɔ ma yɛ́ Biblə kalan (Tesalonikə dɔlɔɔ 5:17).

 Ə́ WƆ MƐNIKƆLƆNŊAA TA PƐLƐ MA

4. Ə́ wɔ Biblə kalanŋaa tɛɛ ə́ wɔ mɛni kəlee tɔwɔ

Gbəli a gɛ gu maamɛniɠaa di tama a lowai taɠaa yili ə gɛ gu gu kiliŋahiɛ guɔ kɛ ma Biblə kalan mɛni ŋɔ lowai ho gu yəi. Yili a kɛtii lə ɓə a pɛli kpɔnmaa tɛɛ ə́ pɔ ? Filipə 1:10 ɓo, ə lɛɛ ka lono kɛ gɛɛmaalənŋaa ŋɛi mɛi :

• Ə́ wɔ kili ɓa ɲɛnɛɛ ŋɛi hu, “ lə mɛniɠaa kpɔ ɓə nɛlɛɛ awala kɛtii vialaɓoɔ ? ”

• Ya pɛli ə́ wɔ Biblə kalan mɛni tɛɛ ləi ə́ wɔ mɛni kəlee tɔwɔ ?

1. Ya ɲɛa pu soo hu toloo, ə lɛɛ pulu ɓa ə́ mo yɛ́ ma ə́ kaa gwɛniɠaa pui mɛi, gwɛni kəlee ho pai lɔi.

2. Ya gwɛni pu toloo zoo hu, ə́ kaa pai pɛlii ɲɛa mɔlɔmun bui zoo hu. Pələ lɔ ɓə gaa la, mɛniɠaa nɛlɛɛ awala kɛtii vialaɓoɔ ya di tɛɛ tɔwɔ ə́ wɔ yɛnɛɛ hu, ə́ kaa pai pɛlii di kɛi ə lɛɛ lowai a lɛɛ ə́ yəi mɛni takpɛliɠaa kɛ mɛni ɓa.

Gwa kɛi Biblə kalan yili a kpɔnmaa tɛɛ gu pɔ gu Yálá kɔlɔn ə lɛɛ gu matoo. Məlannaa ŋɛi gu maakpaan gaa ma ə kɛ gwa Yálá ni gu lowai Biblə kalanŋaa a məlannaa tii tɛɛ gu pɔ. Matie 4:4 ɓo, ə lɛɛ ka lono kɛ gɛɛmaalən ŋɛi mɛi :

• Gwa Biblə kalanŋaa tɛɛ mɛni kəlee tɔwɔ, mɛinɛɛ ləkɛɛ ɓə gwa ɉɔlɔɓo ?

 5. Lɛɛ lɔ ma yɛ́ Biblə kalan ə ma kɛ daa di muhəɠə ə́ laa ɓa

6. Ə́ kilitɔɔ Zehova ŋɔ kpɔnmaa ɓa

 YII GU GALAN

Pələi ma gɛ laa ho nɛɛ li la, Biblə kalanŋaa a pɛli ə kpɔnmaa tɛɛ ə́ pɔ ə́ yiipoo yii kpɛɛ ho ma hɔlɔɓo. Lɛɛ lɔ ma yɛ́ ə́ kilitɔɔ Zehova ɓa, gaa pai ə́ hwəla kulɔi.

Nɛɛ ə́ kili pɔ

• Lə mɛni ɓa Biblə ŋɔ teɲaɠaa maamɛni wala-walaai ə́ yəi ?

• “ Mɛniɠaa nɛlɛɛ awala kɛtii vialaɓoɔ, ” ya pɛli di tɛɛ ləi tɔwɔ ə́ wɔ yɛnɛɛ hu ?

• Lə mɛni ɓa maanɛɛ ə́ mo Zehova ɓa ə kpɔnmaa tɛɛ ə́ pɔ ə́ lɛɛ lɔ ma yɛ́ Biblə kalan ?