ƝAAKWƐLƐI 3
Alahabə ə laa Zehova la
Mɛnii ŋɛi gu kaa ɉukulɔi ə wɔlɔ tɛɛ Zəliko daai Kanaa lɔi hu. Gu gu kiliŋahiɛ lɔ yɛ gwa kɛ laa yɛ tɛɛ gu ŋɛi ɓa. Daa tii hu nua di ho kɛ laa li Zehova la. Nɛɛnu ta ə kɛ daa tii hu diɛ kɛ naa ɓaa Alahabə.
Pələi Mowisə ə gbolo-ya ɓəlaɓo la yɛ Isilayɛli lonnii kulɔ Ezipitə lɔi hu, Alahabə ə yili bələ mɛn ɓɛlowai ə kɛ la a nɛɛnon. Pələi Zehova ə kpɔnmaa tɛɛ la Isilayɛli lonnii pɔ di yee yɛ tɛɛ di yowoɠaa diɛ kɔɠaa hu, Alahabə ə yili bələ mɛn nwɔnɔ. Yili pulu, ə bələ mɛn diɛ ma Isilayɛli nua di wɔ kɔ kɔ nua daa di hee kulɔ Zəliko daa kwɛlɛ.
Alahabə ə gɔ nɛlɛɛn hweelɛi tii loo maahɔlɔɓo ə laa Zehova la
Holo ta, yələ wili pɔ, Isilayɛli nua hweelɛ də li Zəliko daai loo pələi, ə gɛ di naa mɛi woo mɛn. Da kɛ diɛ kɔ nɛlɛɛnŋaa. Lii di mo, də li Alahabə yəi bɛlɛ laaləi. Yili ə di hee kulɔ ɲəi bɛlɛn. Kpini pɛlɛɛ, Zəliko tɔɔmun ə ɲaakaa yɛ ma kɔ nɛlɛɛnŋaa daa lɔ naa daai, ə lɛɛ daa li Alahabə pɔɔli. Yili pulu, Zəliko tɔɔmun ə hinaa tɔɔ nua tii hon mɛni ɓa. Alahabə ə gɔ nɛlɛɛn hweelɛi tii loo ŋɔ pɛlɛi mɛi, ə mo dɔɔmun ŋɔ hinaa tii diɛ yɛ diɛ : « Gɔ nɛlɛɛn hweelɛi tii di kɛ ɓɛ, kɛlɛɛ daa kulɔ ɓɛ daai. Ka hwilɛn di pulu kpɔlɔɔŋɛi, ka pɛli di hon ɉii ! » Mɛnii gɛ Alahabə yɛ gɔ nɛlɛɛnŋaa tii loo la ə́ gɔlɔn ? — Maahɔlɔɓo naa kɛ Zehova la, ə lɛɛ gbaɠala ə kɛ ma yɛ ma Zehova kaa kɛ pai Kanaa lɔi tɛɛ Isilayɛli lonnii pɔ.
Gɛɛ gɔ nɛlɛɛnŋaa tii di ho kulɔ Alahabə yəi bɛlɛn, di mo Alahabə ɓa diɛ ma yaa da ɲəi bɛlɛn nua di nwun maa kaa pai ɓoi ɓɛlowai di kaa pai kɛ Zəliko kalaɠalai la. Mɛnii di mo Alahabə ɓa diɛ ma ə gɛ ə́ gɔlɔn ? — Di mo ma diɛ ma : « Ɲɛli kpɔli ŋɛi hon, ə́ gbulɔn ə́ wɔ finɛɛtɛlɛ ɓa ɲɛnɛɛ pələ. Ya yili kɛ, nua kpɔ pai kɛi ə́ yəi bɛlɛn, di kəlee di nwun maa a ɓo. » Yii gɔ nɛlɛɛnŋaa tii di mo Alahabə ɓa ya kpɔlɔɔ ɓə ə gɛ. Yii tɛɛ naa pulu ə́ gɔlɔn ? —
Zehova ə Alahabə da ɲəi bɛlɛn nua di nwun maaɓo
Holo tamaa tɛɛ pulu, Isilayɛli nua di hiɛ di kɔwɔ ɲa, diɛ daa maa tinɛn a di mɛi haa. Di daa maa tinɛn holo mɛida yee mu, diɛ gɛ holo ɓa tanɔn. Kɛlɛɛ volo mɛihweelɛ yələ, di daa maa tinɛn gee mɛi mɛihweelɛ. Yili pulu, di toma kpɔ kɛnɛ. Zehova ə daa maakwəli hiinɠaa pu. Kɛlɛɛ bɛlɛi tii ɲɛli kpɔli kpulɔnŋaa kɛ vinɛɛtɛlɛ laaləi ho pu. Ə́ kaa naa kaai voto hu ? — Alahabə da ɲəi bɛlɛn nua di nwun maa ə ɓo !
Mɛnii tii Alahabə ə gɛ, kili ləkɛɛ ɓə ya pɛli ɉɔlɔɓoi ɉu ? — Alahabə ə laa Zehova la, maahɔlɔɓo ə Zehova kɛ mɛni lɛlɛɛɠaa bələ mɛn. Yɛ́ kpɛli ə́ kaa ma yɛ́ Zehova kɛ mɛni lɛlɛɛɠaa kɔlɔn. Ə́ laai Zehova la yɛ pələi Alahabə ə laa la Zehova la ? — Ku laa na kuɔ ma ə́ laai Zehova la.
VƐLISƐƐƓAA ŊƐI ƁO Ə́ WƆ BIBLƏ HU
Alahabə ə gɔ nɛlɛɛn hweelɛi tii loo maahɔlɔɓo ə laa Zehova la.
