Disciplinar os fillos implica guialos, educalos e, ás veces, tamén corrixilos cando fan algo mal. Pero moitas veces implica ensinarlles valores morais que lles axuden a tomar boas decisións.

Nos últimos anos, moitos pais case non disciplinan os seus fillos porque teñen medo de danar a súa autoestima se os corrixen. Pero os pais sabios póñenlles normas razoables e ensínanlles a obedecelas.

“Os rapaces necesitan límites para chegar a ser adultos responsables. Sen eles son coma un barco sen timón, antes ou despois acabarán desorientados ou incluso afundidos” (Pamela).

Sé consecuente. Faille entender ó teu fillo que se non segue as normas terá consecuencias. Por outra banda, estate atento para felicitalo cando si as cumpra.

“Teño o costume de felicitar os meus fillos polo obedientes que son, sobre todo tendo en conta que no mundo a obediencia brilla pola súa ausencia. Isto fai que lles sexa máis fácil aceptar a corrección cando a precisan” (Christine).

O QUE DI A BIBLIA: “Conforme sementes, recollerás” (Gálatas 6:7).

Sé razoable. Sé equilibrado cando corrixas o teu fillo e ten en conta a súa idade, capacidade e a importancia do que fixo. As consecuencias adoitan ter un mellor efecto cando están relacionadas co que fixo mal. Por exemplo, se non cumpre as normas sobre o uso do móbil, as consecuencias poden ser que quede sen el durante un tempo. Por outro lado, evita facer unha montaña dun gran de area.

“Intento saber se o meu fillo me desobedeceu adrede ou se simplemente cometeu un erro. Non é o mesmo corrixilo por ter unha mala actitude que axudarlle a entender que se equivocou” (Wendell).

O QUE DI A BIBLIA: “Pais non asoballéde-los vosos fillos, para que non saian coitados” (Colosenses 3:21).

Sé cariñoso. Para os rapaces é moito máis fácil aceptar a corrección e levala á práctica cando saben que o que motiva os pais é o amor.

“Cando o noso fillo cometía un erro deixabámoslle claro que estabamos orgullosos de tódalas boas decisións que tomara ata ese momento. Explicabámoslle que ese erro non o marcaría de por vida se se esforzaba por corrixilo. E diciámoslle que estabamos aí para axudarlle” (Daniel).

O QUE DI A BIBLIA: “O amor é de corazón grande, é servicial” (1 Corintios 13:4).