Por que debe a muller respectar o principio de autoridade?

“A cabeza da muller é o home” (1 COR. 11:3).

1, 2. a) Que escribiu o apóstolo Paulo sobre o principio de autoridade que estableceu Xehová? b) Que preguntas imos analizar neste artigo?

 O APÓSTOLO Paulo falaba do principio de autoridade que Xehová estableceu cando dixo que “a cabeza de todo home é Cristo” e que “a cabeza de Cristo é Deus” (1 Cor. 11:3). No artigo anterior aprendemos que para Xesús foi un privilexio someterse á súa Cabeza, Xehová. Tamén vimos que o home ten que someterse a Cristo. Xesús tratou as persoas con cariño, amabilidade, compaixón e xenerosidade. E os homes da congregación tamén teñen que tratar igual os demais, sobre todo ás súas mulleres.

² Pero no caso das mulleres, quen é a súa cabeza? Paulo escribiu que “a cabeza da muller é o home”. Como deberían ver as mulleres estas palabras? Teñen que aplicar este principio incluso se o seu home non serve a Xehová? Significa isto que a muller non pode expresar a súa opinión ou dicir como se sente cando hai que tomar decisións? Como pode unha muller gañarse o respecto do seu home?

“Vou facer para el unha axuda”

3, 4. Como lles axuda ós matrimonios o principio de autoridade?

³ Está claro que foi Deus quen creou o principio de autoridade. Despois de crear a Adam, Xehová dixo: “Non está ben o home só. Vou facer para el unha axuda ó seu xeito”. Entón creou a Eva. Adam estaba tan contento de ter unha compañeira que lle axudase, que comentou: “Esta é coma min, o mesmo óso, a mesma carne” (Xén. 2:18-24). Adam e Eva tiñan a oportunidade de ser pais duns nenos perfectos que poderían vivir para sempre na Terra feita un paraíso.

⁴ Non obstante, cando se rebelaron perderon a oportunidade de vivir para sempre (le Romanos 5:12). Aínda así, o principio de autoridade non deixou de existir. De feito, se o seguimos correctamente, este principio beneficiaranos moito e fará que teñamos un matrimonio feliz. Sentiremos o mesmo ca Xesús cando vivía no ceo baixo a autoridade do seu Pai. A Biblia di que antes de vir á Terra sempre estaba “feliz diante del [de Xehová]” (Pr. 8:30, TNM). Por culpa da imperfección, nin os homes son capaces de cumprir perfectamente coa súa responsabilidade como cabezas nin as mulleres poden seguir a súa guía á perfección. Pero se o home e a muller se esforzan por seguir este principio o mellor posible, poderán ser felices xuntos aínda que sexan imperfectos.

5. Por que deberían os matrimonios esforzarse por aplicar o consello de Romanos 12:10?

⁵ Para que un matrimonio sexa feliz, os dous necesitan aplicar este consello das Escrituras que se escribiu para tódolos cristiáns: “Sede cariñosos uns cos outros, coma irmáns; competide na estima mutua” (Rm. 12:10, cursivas nosas). Ademais, tanto o home como a muller deben esforzase por aplicar as seguintes palabras: “Sede bondadosos e misericordiosos uns cos outros, perdoándovos mutuamente” (Ef. 4:32).

Cando o home non serve a Xehová

6, 7. Que podería pasar se unha muller cristiá respecta a autoridade do seu home aínda que el non sirva a Xehová?

⁶ Moitas veces unha cristiá está casada cun home que non é testemuña de Xehová. Que pasa neses casos? Como debería tratar a muller ó seu home? A Biblia di: “No tocante ás mulleres, que se sometan ós seus homes; deste xeito, se algúns non cren na Palabra, sen necesidade de palabra ningunha poderanos gañar polo bo xeito de vida por respecto ó Señor” (1 Pe. 3:1, 2).

⁷ A Biblia anima a muller a respectar a autoridade do seu home, aínda que el non sirva a Xehová. A súa boa conduta pode facer que el sinta curiosidade. Grazas a iso, pode chegar a interesarse polas súas crenzas e co tempo, aceptar a verdade.

8, 9. Que pode facer a muller cristiá se o seu home non acepta a verdade?

⁸ Pero que pasa se o home nunca chega a aceptar a verdade? A Biblia anima a muller a demostrar sempre calidades cristiás, aínda que non sexa fácil. Por exemplo, 1 Corintios 13:4 (TNM) di: “O amor é paciente”. Por iso, a muller cristiá debería mostrarlle amor ó seu home e seguir comportándose “con total humildade, sinxeleza e paciencia” (Ef. 4:2). Coa axuda do espírito santo, a forza activa de Deus, poderá seguir demostrando calidades cristiás ata en situacións difíciles.

⁹ Paulo escribiu: “Teño forzas para todo gracias a quen me fai forte” (Flp. 4:13). O espírito santo pode axudarlle á muller cristiá a facer cousas que doutra forma poderían parecer imposibles. Por exemplo, se o seu home a trata mal, pode que ela se sinta tentada a tratalo da mesma maneira. Pero a Biblia dille ós cristiáns: “Non volvades mal por mal a ninguén [...] pois está escrito: miña é a vinganza, eu darei o merecido, di o Señor” (Rm. 12:17-19). Ademais, 1 Tesalonicenses 5:15 aconséllanos algo parecido: “Mirade que ninguén lle devolva a ninguén mal por mal; polo contrario, procurádevos sempre o ben uns ós outros, e a todos”. O que é imposible para nós convértese en algo posible grazas á axuda do espírito santo de Xehová. Por iso é importante que lle pidamos a Deus o seu espírito para que nos axude.

10. Como reaccionou Xesús cando outros o trataron mal?

¹⁰ Xesús púxonos un excelente exemplo de como actuar cando a xente nos fale ou nos trate mal. 1 Pedro 2:23 di o seguinte: “Cando o aldraxaban, non devolvía aldraxes; mentres sufría, non ameazaba, senón que se puña nas mans do que xulga con xustiza”. Temos que esforzarnos por seguir o seu exemplo e non deixar que o mal comportamento doutros nos provoque. Tódolos cristiáns deberiamos esforzarnos por cumprir as seguintes palabras: “Tede un corazón compasivo e un xeito humilde; non vos volvades mal por mal, nin insulto por insulto” (1 Pe. 3:8, 9).

Pode unha muller dar a súa opinión?

11. Que gran privilexio terán algunhas mulleres cristiás?

¹¹ Significa o principio de autoridade que unha muller non lle pode dicir ó seu home o que pensan sobre asuntos familiares e outros temas? Claro que non. Xehová deulles moitos privilexios tanto ós homes como ás mulleres. De feito, algunhas mulleres teñen o grande honor de formar parte dos 144.000 reis e sacerdotes que estarán con Cristo cando el goberne a terra (Gál. 3:26-29). Está claro que Xehová lles deu un papel moi importante na súa organización.

12, 13. Pon un exemplo que demostre que no pasado algunhas mulleres profetizaban.

¹² Por exemplo, en tempos bíblicos algunhas mulleres profetizaban. Xoel 3:1, 2 [2:28, 29, TNM] predixo: “Verterei o meu Espírito sobre toda carne, e os vosos fillos e mailas vosas fillas converteranse en profetas. [...] Tamén sobre os servos e mailas servas verterei naqueles días o meu Espírito”.

¹³ No Pentecostés do ano 33 da nosa era, uns 120 discípulos de Xesús estaban reunidos nunha casa de Xerusalén. Alí había tanto mulleres coma homes, e Xehová derramou o seu espírito santo sobre todos eles. Pedro aplicou as palabras de Xoel a este grupo: “Isto é o que dixera o profeta Xoel: Acontecerá, nos derradeiros días, di o Señor, que espallarei o meu Espírito sobre toda carne: os vosos fillos e as vosas fillas profetizarán [...]. Neses días espallarei o meu Espírito sobre os meus servidores e servidoras e profetizarán” (Feit. 2:16-18).

14. Como axudaron a difundir o cristianismo as mulleres no primeiro século?

¹⁴ No primeiro século as mulleres tiveron un papel moi importante na difusión do cristianismo. Esforzáronse moito por predicar as boas noticias e por axudarlles a outros de maneiras prácticas (Lc. 8:1-3). Por exemplo, o apóstolo Paulo dixo que Febe era “unha ministra da congregación que está en Céncreas” (Rm. 16:1, TNM). Ademais, ó enviar saúdos a outros cristiáns, Paulo mencionou moitas mulleres fieis. Nunha ocasión dixo: “Saúdos a Trifene e Trifosa, que traballan polo Señor. Saúdos á querida Pérside, que tanto traballou polo Señor” (Rm. 16:12).

15. Cal é o papel das mulleres na predicación hoxe en día?

¹⁵ Nos nosos días, unha gran parte dos máis de sete millóns de persoas que predican as boas noticias por todo o mundo son mulleres de tódalas idades (Mt. 24:14). Moitas delas son pioneiras, misioneiras ou serven en Betel. O salmista David cantou: “Xehová dá a orde; as mulleres que proclaman as boas noticias son un exército grande” (Sal. 68:11, TNM). Que gran verdade! Xehová valora moito tódolos esforzos que fan estas mulleres por predicar as boas noticias e por cumprir a súa vontade. Está claro que o principio de autoridade non implica que as mulleres non poidan dar a súa opinión.

Dúas mulleres que deron a súa opinión

16, 17. Como demostra o exemplo de Sara que as mulleres poden dar a súa opinión no matrimonio?

¹⁶ Se Xehová valora tanto o que fan as mulleres, non deberían os seus homes facer o mesmo e pedirlles a súa opinión antes de tomar decisións importantes? Claro que si, iso sería moi sabio. A Biblia menciona varias mulleres que falaron ou actuaron sen que os seus homes llo pediran. Vexamos dous destes exemplos.

¹⁷ Sara, a muller de Abraham, insistiulle ó seu home para que botase a súa segunda muller e o seu fillo porque non eran respectuosos. A Biblia di: “A cousa doeulle a Abraham, pois tratábase de seu fillo. Pero Deus díxolle: ‘Non teñas dó do neno nin da escrava. Fai o que Sara che di’” (Xén. 21:8-12). Abraham obedeceu a Xehová, escoitou a Sara e fixo o que lle pedira.

18. Como tomou a iniciativa Abigail?

¹⁸ Outro exemplo é o de Abigail, a muller de Nabal. Cando David escapaba do orgulloso rei Xaúl, acampou cerca dos rabaños de Nabal. David e os seus homes protexeron as terras dese home rico e non lle sacaron nada. Pero Nabal “era áspero” e facía cousas malas, así que tratou mal os homes de David. A Biblia di que era “un parvo” e un insensato. Cando os homes de David lle pediron que lles dese algunhas provisións, Nabal negouse. Que fixo Abigail cando soubo o que pasara? Sen dicirlle nada a Nabal, “a toda présa, colleu douscentos pans, dous pelexos de viño, cinco cordeiros cocidos, cinco tegas de gran torrado, cen acios de uvas pasas e duascentas tortas de figos” e levoullo todo a David e ós seus homes. Fixo o correcto? O que pasou máis tarde demostra que si. A Biblia di que Xehová “feriu a Nabal e este morreu”. Despois, David casou con Abigail (1 Sam. 25:3, 14-19, 23-25, 38-42).

“A muller que [...] merece ser louvada”

19, 20. Que fai que unha muller mereza ser louvada?

¹⁹ A Biblia felicita as mulleres que fan as cousas como quere Xehová. O libro de Proverbios destaca as boas calidades da “muller xeitosa” ó dicir: “O seu valer supera o das perlas. O seu marido pon nela a confianza e non lle han faltar ganancias; procúralle felicidade, e non desgracia, tódolos días da súa vida”. Ademais, engade: “Cando abre a boca é con sabedoría, e na súa lingua hai unha instrucción piadosa. Está pendente do ir e vir dos da casa, e non xanta un pan ocioso. Érguense os seus fillos e bendícena, e o marido fai a súa louvanza” (Pr. 31:10-12, 26-28).

²⁰ Que fai que unha muller mereza ser louvada? Proverbios 31:30 di: “A gracia engana e a fermosura esvaece: só a muller que teme ó Señor merece ser louvada”. Unha muller que teme a Xehová comprende que é importante someterse de boa gana ó principio de autoridade. Este principio di que “a cabeza da muller é o home”, que “a cabeza de todo home é Cristo” e que “a cabeza de Cristo é Deus” (1 Cor. 11:3).

Agradezamos o regalo de Deus

21, 22. a) Que razóns teñen os casados para agradecerlle a Deus o regalo do matrimonio? b) Por que deberiamos respectar o principio de autoridade que Xehová estableceu? (Ver o recadro da páxina 17).

²¹ Os matrimonios cristiáns teñen moitas razóns polas que darlle grazas a Deus. Unha delas é que poden desfrutar da vida xuntos. Pero o que máis agradecen é que Xehová lles dese a oportunidade de servilo xuntos (Rut 1:9; Miq. 6:8). Xehová, que creou o matrimonio, sabe exactamente o que necesitan o home e a muller para ser felices. Se facemos as cousas como Xehová nos pide, aínda que vivamos nun mundo cheo de problemas, veremos como se cumpre o que di Nehemías 8:10: “O gozo do Señor é a vosa forza”.

²² Un home cristián que ama a súa muller coma a si mesmo cumprirá coa súa responsabilidade como cabeza con cariño e consideración. E a muller que ama a Xehová demostraralle que o apoia e o respecta. Pero o máis importante de todo é que ó facer isto o seu matrimonio honrará a Xehová.

Recórdalo?

• En que consiste o principio de autoridade que estableceu Xehová?

• Por que deben o home e a muller respectarse o un ó outro?

• Como debe tratar unha muller o seu home se el non serve a Xehová?

• Por que deberían os homes ter en conta a opinión das súas mulleres antes de tomar decisións importantes?

[Preguntas de estudo]

[Recadro]

Por que debemos respectar o principio de autoridade?

Xehová decidiu quen debería ter autoridade e como debería usala. Este principio de autoridade aféctalles ós anxos e tamén ós humanos, e dálles a oportunidade de usar a súa liberdade de elección para servir a Deus unidos e en paz (Sal. 133:1).

Os cristiáns unxidos recoñecen que o seu cabeza é Xesucristo e respectan a súa autoridade (Ef. 1:22, 23). Xesús tamén respecta a autoridade do seu Pai. Por iso a Biblia di que, no seu debido momento, “se someterá a quen lle someteu a El todo: para que Deus sexa todo en todo” (1 Cor. 15:27, 28). Que importante é que os humanos que servimos a Xehová tamén nos esforcemos por obedecer o principio de autoridade na congregación e na familia! (1 Cor. 11:3; Heb. 13:17) Se o facemos, Xehová bendiciranos e daranos a súa aprobación (Is. 48:17).

[Imaxe]

A oración pode axudar ás mulleres a demostrar calidades cristiás.

[Imaxe]

Xehová valora moito os esforzos que fan as mulleres a favor do Reino.