Korintkarank Poili Chitt 1:1-31
1 Devache khuxe pormonnem Krist Jezucho apostl zaunk apoila to hanv Paulu, amcho bhav Sostenesa sangata
2 hi chitt Korintant asa tea Devache sobhek boroitam. Tumi Krist Jezuchim xis zalʼlean tumkam povitr keleant ani tumkam Devache lok* zaunk apoileant. Toxench, hanv tea sogleank boroitam, jim sogle koddem Somi Jezu Kristachem nanv ghetat, zo amcho ani tancho-i Somi zaun asa:
3 Dev zo amcho Bap zaun asa, tachea thaun ani Somi Jezu Krista thaun tumkam favo nasloli doia ani xanti mellom.
4 Devan Krist Jezu udexim tumkam ji favo nasloli doia dakhoilea tea pasot hanv sodanch mhojea Devache upkar attoitam.
5 Tannem tumkam utor sangonk sogli tank ani purnn ginean diun, Kristachea ekvottant soglea vattamnim girest keleant.
6 Krista vixim sondex tumchea bhitor ghott rigla.
7 Tea pasot, tumchea modem kosleach denneachem unnemponn na, ani amcho Somi Jezu Krist apli xokti dakhoitolo tachi tumi axeun vatt polloitat.
8 Toxench, Dev tumkam xevott mhunnosor ghott dovortolo. Jea vorvim, amcho Somi Jezu Kristachea disa tumi niropradi urtolim.
9 Dev visvaxi, ani tannem aplo Put ani amcho Somi, Jezu Kristachea ekvottant ieunk tumkam apounnem dilam.
10 Bhav-bhoinnimno, atam hanv tumkam amcho Somi Jezu Kristachea nanvan, oxi vinoti kortam ki tumchem sogleanchem ulovop ek-sarkench aschem ani tumchea modem futt aschi nhoi. Tachea bodlek, tumchim sogleanchim chintnam ani tumchem mon ek-sarkench aschem, jea udexim tumchea modem ekvott urtolo.
11 Karonn mhojea bhav-bhoinnimno, tumchea modem vad-vivad zata mhunn Kloechea ghorantlea thoddeamnim mhaka sanglam.
12 Mhaka oxem mhunnpachem asa, ki tumchea modlo dor eklo “Hanv Paulucho xis,” “Hanv Apolosacho xis,” “Hanv Kefasacho* xis,” vo “Hanv Kristacho xis,” oxem mhunnttat.
13 Kristache vantte zaleat kitem? Tumchea pasot Pauluk khambear khillaun jivexim marlolo kitem? Vo tumkam Pauluchea nanvan bautizm dilʼlo kitem?
14 Krispusak ani Gaiusak soddun tumchea modlea anik konnankuch hanvem bautizm diunk na dekhun hanv Devacho khub upkari.
15 Hea toren, tumi mhojea nanvan bautizm ghetla oxem konnankuch mhunnonk mellchem na.
16 Hoi, hanvem Stefanasachea ghorantleank bautizm dila. Tankam soddun hanvem anik konnankui bautizm dila mhunn mhaka ugddas zaina.
17 Karonn Kristan mhaka bautizm diunk nhoi, punn bori khobor porgottunk dhaddla. Ani hem hanvem zannaranchea bhaxent* korunk zaina, karonn toxem kelear Krist khambear mel’lo tem kainch upeogachem na oxem zatolem.
18 Karonn je nas zaunchea vatter asat tankam trasanchea khambeacho* sondex pixeponn koxem dista, punn ami jim salvar zaunchea vatter asat tanchea pasot to Devache xoktecho puravo zaun asa.
19 Karonn oxem boroilʼlem asa: “Hanv zannar munxanchi zannvai kabar kortolom, ani huxar munxanchem ginean nakartolom.”*
20 Hea sonvsarantlo* zannar munis khoim asa? Xastri* khoim asa? Vad-vivad korpi khoim asa? Devan hea sonvsarachi zannvai pixeponn mhunn dakhoun diunk na kai?
21 Hea sonvsarak svotache zannvaien Devachi vollokh mellonk na. Punn, lokank pixeponn oxem dista tea sondexa udexim visvas dovorta tankam salvar korop, Devak sarkem dislem ani hantuntlean Devachi zannvai dison ieta.
22 Judev vizmitam* korun dakhoi mhunn sangtat ani Grik zannvai sodhit astat.
23 Punn ami khambear khillailʼlea Krista vixim porgott kortat. To, Judevank addkhollon poddonk karonn ani videxi lokank pixeponn koxem zaun asa.
24 Punn zankam apoileant, zaum tim Judev vo Grik, Krist tanchea pasot Devachi xokti ani Devachi zannvai zaun asa.
25 Karonn Devacheo vostu jeo munxank pixeponn koxeo distat, teo munxanchea zannvaie poros vorteo asat. Ani Devacheo jeo vostu munxank oskot koxeo distat, teo munxanchea xokte poros chodd xoktivont asat.
26 Bhav-bhoinnimno, tumi tumcheach vixim hem pollounk xoktat ki Devan zankam apoileant tantuntlim choddxim, munxanchea nodren* zannvaiechim nant, xoktivont nant, vo unch ghorabeant zolmank ieunk nant.
27 Punn zannvaiechea munxank lojent ghalunk Devan sonvsarantlea pixeank vinchleant, ani xoktivont munxank lojent ghalunk Devan sonvsarantlea oskotank vinchleant.
28 Devan oslea lokank vinchle zankam sonvsar kainch valor na mhunn somzota, unnea molache mhunn lekhta, ani te nanch koxe chintʼta. Mhotvacheo mhunn lekhtat tea vostunk kainch valor na mhunn dakhounk Devan oxem kelem.
29 Hea udexim konnuch munis Deva mukhar boddai marunk xokchona.
30 Punn tumi Devak lagon Krist Jezuchea ekvottant asat. Kristan Devachi zannvai ani tachem nitivontponn amkam dakhoun dilem ani amkam povitr tharaun soddvonnechem* mol farik korun amkam suttka dili.
31 “Zo boddai marta, tannem Jehova* vixim boddai marchi.” Hem boroilʼlem aslem tem purnn zaunchem mhunn oxem zalem.
Footnotes
^ Vo “povitr lok.”
^ Haka Pedru pasun mhunnttale.
^ Vo “aplea budvontkaien.”
^ Vo “kuxin uddoitolom.”
^ Mhunnche, kaide zannam aslolo munis.
^ Utran utor, “khunna.”
^ Vo “munxanchea dorjeam pormonnem.”
