Korintkarank Poili Chitt 6:1-20
6 Tumchea modem dog zannancho vad-vivad zata tednam tumi to vad-vivad suttavo korunk Devachea lokam* mukhar voichea bodlek, neai-sobhent onitivont lokam fuddem vochonk kiteak fuddem sortat?
2 Vo Devache lok* hea sonvsarachi zhoddtti kortole mhunn tumi nokllo kai? Ani zor tumi sonvsarachi zhoddtti kortole zalear, tumchea modem je barik-barik vad-vivad zatat te suttave korunk tumchean zaina?
3 Ami devdutanchi zhoddtti kortole mhunn tumkam khoborna? Toxem zalear, tumchean atanchea jivitacheo oddchonneo suttaveo korunk zainant?
4 Tumkam osleo oddchonneo suttaveo korcheo astat tednam tumi oslea lokank kiteak vinchun kaddttat, zankam sobha neai korunk purte na mhunn somzota?
5 Hanv tumkam lojent ghalunk oxem uloitam. Tumchea modem oso ek pasun zannvaiecho munis na kai zo aplea bhavam modem neai korunk xokta?
6 Tachea bodlek, ek bhav dusrea bhavak neai-sobhent vhorta, tem-ui zalear bhavarth naslolea lokam mukhar!
7 Khorem mhunnttlear, tumi eka-mekak neai-sobhent vhortat hacho orth tumi harleat. Tumi svota onʼneai kiteak sosun ghenant? Dusro tumkam nagoita tednam tumi tem sosun kiteak ghenant?
8 Tachea bodlek, tumi svota onʼneai kortat ani nagoitat, ani tem-ui zalear tumchea bhavank!
9 Je lok Devachea nitichea dorjeam pormonnem cholonant, te tachea Rajeache daiji zaunchenant mhunn tumkam khoborna? Tumi tumkanch fosoum nakat. Onoitik kuddicho sombond dovorpi, murti-puza korpi, pordvar* korpi, xindollki korpi dadle,* dadleam sangata kuddicho sombond* dovorpi dadle,
10 chori korpi, as korpi, bebdikai korpi, gallio marpi ani luttun vhorpi Devachea Rajeache daiji zaunchenant.
11 Tumchea modle thodde lok adim oslim kamam kortale. Punn tumkam dhuvun xudʼdh keleat, povitr keleat. Ani amchea Somi Jezu Kristachea nanvan ani amchea Devachea povitr xokten tumkam nitivont lekhleat.
12 Hanvem sogleo vostu korum ieta,* punn sogleoch vostu faideacheo nant. Hanvem sogleo vostu korum ieta, punn hanv mhaka khoincheach vostuncho gulam zaunk diunchona.*
13 Jevonn potta khatir ani pott jevnna khatir asa, punn Dev heo donui vostu kabar kortolo. Kudd onoitik kuddichea sombonda* khatir nhoi punn Somia khatir asa, ani Somi kuddi khatir.
14 Punn Devan aplea xokten Somiak meloleantlo jivont kelo ani to amkam-i jivont kortolo.
15 Tumcheo kuddi, Kristachea kuddiche sandhe mhunn tumkam khoborna? Tor Kristachea kuddiche sandhe vhoron hanvem xindoll bailechea kuddichea sandheank zhoddche kai? Kednanch na!
16 Zo konn xindoll baile lagim kuddicho sombond dovorta to tichea sangata ek kudd zata mhunn tumkam khoborna? Karonn Dev mhunntta, “tim dogaim ek kudd zatolim.”
17 Punn zo Somiachea ekvottant asta, to tachea sangata ek monacho zata.
18 Onoitik kuddichea sombonda* thaun pollon vochat! Urlolim soglim patkam zo ek munis korta, to tim tachea kuddichea bhair korta. Punn zo onoitik kuddicho sombond dovorta, to apleach kuddi add patok korta.
19 Tumchi kudd povitr xoktechem mondir ji tumchea bhitor ravta ani ji Devan tumkam dilea mhunn tumkam khoborna? Ani tumcho tumcheruch odhikar na,
20 karonn tumkam vhodd mol farik korun viktim ghetleant. Tor, tumchea kuddin Devachi mhoima korat.
Footnotes
^ Vo “povitr lokam.”
^ Vo “povitr lok.”
^ Mhunnche, osle dadle je apunn bail mhunn somzon dadleam sangata kuddicho sombond dovortat.
^ Vo “sogleo vostu korunk mhaka porvangi asa.”
^ Vo “khoincheach vostuk mhojer odhikar cholounk diunchona.”
