Tesalonikekarank Dusri Chitt 1:1-12
1 Dev zo amcho Bap zaun asa, tachea ani Somi Jezu Kristachea ekvottant aslolea Tesalonikekaranche sobhek Paulu, Silvanus,* ani Timot hi chitt boroitat:
2 Dev zo amcho Bap zaun asa tachea thaun ani Somi Jezu Krista thaun tumkam favo nasloli doia ani xanti mellom.
3 Bhav-bhoinnimno, tumchea pasot sodanch Devache upkar attounk amchi zobabdari zaun asa. Ani oxem korop sarkem, karonn tumcho bhavarth khubuch vaddot asa ani eka-meka pasot tumcho sogleancho mog pasun vaddot asa.
4 Taka lagon, Devachea sobhamnim ami tumchea vixim gorvan uloitat karonn tumi itlea dhumalleancho ani trasancho* fuddo kortana-i thir asat ani bhavarthant ghott asat.
5 Ho Devachea khorea neai-acho puravo zaun asa, ani taka lagon jea Rajea khatir tumi tras sostat, tea Devachea Rajea pasot tumi purte asat mhunn tumkam lekhtole.
6 Je tumcher sonkoxtt haddttat tancher sonkoxtt haddop Devachea nodren sarkem zaun asa.
7 Punn atam tumkam sonkoxtt sosunk poddttat zalear pasun Somi Jezu aplea xoktivont devdutam sangata zollttea ujean sorgar thaun dixtti poddttolo tednam tumkam amchea sangata suttka mellttoli.
8 Je lok Devak vollkhonant ani amchea Somi Jezuchea bore khobre pormonnem cholonant tea lokancho to bodlo ghetolo.
9 Tankam Somiachea mukhavoile ani tachea mhoimevont xokte thaun pois kortole. Toxench, tankam khast lavun, sasnak tancho nas kortole.
10 To Devachea lokam* sangata mhoima melloun gheunk ietolo tednam hem ghoddttolem ani tea disa bhavarth dovortolea sogleam modem tachi vakhannʼnni zatoli, karonn ami dilʼlea govaikecher tumi pasun visvas dovorla.
11 Amchea Devan tumkam tachea apounneak purte asat mhunn lekhum, ani aplea xokten to jim borim kamam korunk sodhta tim soglim korum, ani tannem tumchea bhavarthak lagon tumi kortat tim soglim kamam purnn korum mhunn ami sodanch tumchea pasot magnnem kortat.
12 Hea toren amchea Devachea ani Somi Jezu Kristachea favo naslolea doie pormonnem tumchea udexim amchea Somi Jezuchea nanvak mhoima mellom ani tumkam pasun tachea ekvottant mhoima mellom.
