Dhormdutancho Itihas 7:1-60
7 Uprant mha-iadnikan taka vicharlem: “Hem soglem khorem?”
2 Istevan zobab dilo: “Bhavamno ani bapai sarkea vhoddilamno, aikat. Amcho purvoz Abraham, Haranant vochon ravchea poilim Mesopotamiant ravtalo.
3 Tednam mhoimen bhorlolea Devan taka dorxon dilem ani taka sanglem: ‘Tum tuzo des ani tujea soireank soddun hanv tuka dakhoitolom tea desant chol.’
4 Tednam Abraham Kaldeikarancho des soddun Haranant ravonk laglo. Tachea bapaichea mornna uprant, Devan taka thoim thaun tumi atam ravtat tea desant ravonk dhaddlo.
5 Tori astana, tea vellar Devan Abrahamak ek panvl dovrunk melltta titli pasun zomin diunk na. Punn Devan taka ani tache sonstik ho des daiz mhunn ditolo oxem utor dilem. Tednam meren Abrahamak ekui bhurgem naslem.
6 Ani Devan oxem-i sanglolem ki Abrahamachi sonsot porkea desant videxi koxi ravtoli ani thoinche lok tankam 400 vorsam meren gulamponnant dovrun sotait ravtole.*
7 Uprant Devan mhunnttlem, ‘Jea desant te gulamponnant astole tea desachi hanv zhoddtti kortolom. Ani hem soglem zalea uprant te thoim thaun bhair sortole ani hea zagear mhoji povitr seva kortole.’
8 “Devan Abrahama sangata sunoticho korar pasun kelo. Uprant Abraham, Izakacho bapui zalo, ani atthvea disa tachi sunot keli. Ani Izakak Jakob zalo* ani Jakobak 12 put zolmole, je ap-aplea ghorabeache mukheli zale.
9 Te aplea bhavachi mhunnche, Juzechi nattkai korunk lagle ani tannim taka Ejipttkarank viklo. Punn Dev Juze sangata aslo.
10 Devan taka soglea trasantlean suttka dili ani Ejipttacho raza Faraoh tacher khuxal zai-so kelo. Ani tachea mukhar taka zannvaiecho munis kelo. Faraoh-n taka Ejipttacher ani aplea akʼkhea ghoranneacher odhikar dilo.
11 Uprant akʼkhea Ejipttant ani Kanan desant, ek vhodd sonkoxtt ailem. Thoim bhuk poddli ani amchea purvozank kitench khaunk mellona zalem.
12 Punn Jakoban Ejiptt desant jevnna-khannacheo vostu asat* mhunn aikolem tednam aplea putank, mhunnche, amchea purvozank poilech pavtt thoim dhaddle.
13 Te dusre pavtti thoim gele tednam Juzen tankam apunn konn tem sanglem, ani Faraoh-k tachea kuttumba vixim kollon ailem.
14 Juzen aplea bapaik Jakobak ani aplea ghoranneantlea soglea lokank Kanan desantlean apoun haddle. Te sogle mellon 75 lok asle.
15 Oxe toren Jakob Ejipttant ieun ravonk laglo, ani to thoinch melo. Amche purvoz pasun moron gele.
16 Tanchim haddam Shekemant haddlim ani Abrahaman Shekemant Hamorachea putank chandi diun vikti ghetloli tea dholint* tim dovorlim.
17 “Ani Devan Abrahamak jem utor dilʼlem tem purnn zauncho vell lagim pavlo toso Ejiptt desant Abrahamachi sonsot vaddot ravli, ani tancho ankddo khub vaddlo.
18 Uprant Ejiptt desant dusro munis raza zalo. To Juzek vollkhonaslo.
19 Tannem amchea lokank zaite tras dile ani tanchim bhurgim jivim urchim nhoi mhunn amchea purvozank zobordosten aplea bhurgeank zolmotanch khoimsorui vhoron soddunk lailim.
20 Teach vellar, Moizes zolmolo ani to khub sobit* aslo. Tachea avoi-bapain taka tin mhoine poriant ghorantuch vaddoilo.*
21 Punn taka soddun dilo tednam Faraoh-chea dhuven taka apnnailo ani aplea puta bhaxen taka vaddoilo.
22 Moizesak Ejipttachi soglea torechi xikounn dilʼli. To ekdom bore bhaxen uloitalo ani vhodd kamam kortalo.
23 “To 40 vorsancho zalo tednam aplea bhavank, mhunnche, dusrea Izraelitkarank mellon ieunchem* oxem tachea monant ailem.*
24 Ek Ejipttkar eka Izraelitkaracher onʼneai korta tem tannem polloilem tednam tannem vochon taka vachoilo ani Ejipttkarak jivexim marun bodlo ghetlo.
25 Dev tachea udexim Izraelitkarank taronn dita mhunn te somzotole oxem tannem chintlem. Punn Izraelitkarank tem somzonk na.
26 Dusrea disa don Izraelitkar eka-meka koddem zhogoddttale tednam to tanchea lagim gelo ani tannem tanchea modlim zhogddim suttavim korunk tankam vicharlem: ‘Tumi dogui bhav-bhav, magir tumi eka-meka lagim vaitt toren kiteak vagtat?’
27 Punn zo munis aplea Izraelit bhava sangata vaitt toren vagtalo tannem Moizesak kuxin dhukolʼlo ani mhunnttlem: ‘Tuka amcho odhikari ani neai korpi mhunn konnem nemla?
28 Kal tunvem tea Ejipttkarak marun uddoilo toso, tum mhaka-i marun uddounk sodhta kai kitem?’
29 Hem aikon, Moizes thoinchean pollon gelo ani Midian desant videxi mhunn ravonk laglo. Thoim taka don put zolmole.
30 “Magir 40 vorsam uprant, Moizes Sinai dongra lagim oronnʼnneant* aslo tednam zolltta toslea eka jhilkuttant taka ek devdut dislo.
31 Moizesan hem polloilem tednam to ekdom ojap zalo. Thoim kitem ghoddtta kai mhunn pollounk to jhilkutta lagim voitana, taka Jehovacho* avaz aikonk ailo:
32 ‘Hanv tujea purvozancho Dev, Abrahamacho Dev, Izakacho Dev ani Jakobacho Dev.’ Hem aikon Moizes koddkoddonk laglo ani to anik fuddem vochon pollounk bhieunk laglo.
33 Jehovan* taka sanglem: ‘Tum tujea paim-anchim zotim kadd. Karonn jea zomnir tum ubo asa ti zomin povitr.
34 Ejiptt desant mhojea lokancher zulum kortat tem hanvem polloilam ani hanvem tanchem roddnnem aikolam, ani tankam soddounk lagon hanv sokol denvon ailam. Ieo, hanv tuka Ejipttant dhaddttolom.’
35 ‘Tuka amcho odhikari ani neai korpi mhunn konnem nemla?’ oxem mhunnon jea Moizesak tannim nakarlo, teach Moizesak Devan jhilkuttant dorxon diupi devduta udexim sondex diun odhikari ani salvar korpi mhunn tanche koddem dhaddlo.
36 Heach Moizesan tankam Ejipttant ani tambddea doria lagim vizmitam ani khunna korun dakhoileo ani tankam thoim thaun bhair haddlim. Tannem 40 vorsam oronnʼnneant pasun oslim ojapachim kamam kelim.
37 “Ho toch Moizes, zannem Izraelitkarank oxem sanglolem: ‘Dev tumchea bhavam modlo mhojea sarko ek provadi tumchea pasot ubo kortolo.’
38 Ho toch Moizes, zo oronnʼnneant Izraelitkaranchea sobhent aslo ani Sinai dongracher tache lagim uloilʼlo tea devduta sangata aslo. Ani hoch Moizes amchea purvozam lagim uloilo ani amkam diunk lagon jivim ani povitr utram taka dilolim.
39 Amchea purvozamnim tachem aikonk na ani taka nakarlo. Tim monantlea-monant Ejipttant porot vochpachim sopnam pollounk laglim.
40 Tim Aronak oxem mhunnonk laglim: ‘Amchea mukhar vochonk amkam dev korun di. Karonn amkam Ejipttantlean bhair gheun ailʼlo tea Moizesachem kitem zalem tem amkam khoborna.’
41 Magir tannim paddkuleachi ek murti keli ani tea murte mukhar iodn bhettoile ani apleach hatamnim toiar kelʼlea murte mukhar moja korunk lagle.
42 Haka lagon, Devan tankam fatt keli ani tankam mollba voilea vostunchi puza korunk soddun dile. Hea vixim Provadeanchea Pustokant* oxem boroilam: ‘Izraelachea ghorannea, tum 40 vorsam oronnʼnneant aslem tednam tunvem jeo bhettounneo ani iodn dile, te fokot mhakach dilʼle?
43 Na. Tachea bodlek, tumi Molokacho tombu ani Refan devachi noketrachi murti gheun bhonvtale. Heo vostu tumi tanchi puza korunk lagon toiar kelʼleo. Taka lagon, hanv tumkam hea desantlo bhair kaddun Babilonachea poltoddi dhaddttolom.’
44 “Amchea purvozam koddem oronnʼnneant govaikecho tombu aslo. Devan Moizesak zo nomuno dakhoilʼlo teach pormonnem tombu toiar korunk tannem taka hukum dilʼlo.
45 To tombu amchea purvozank dilʼlo ani tannim Joshua borabor to videxi lokanchea odhikara khala aslolea desant haddlo. Devan tea videxi lokank amchea purvozam mukhar tea desantle bhair ghatle ani Davidachea kalla meren to tombu thoinch aslo.
46 Davidacher Devachi kurpa asli ani tannem apleak Jakobachea Deva pasot ek ghor bandunk sondhi diunchi mhunn vinoti keli.
47 Punn tem ghor Solomonan tachea pasot bandlem.
48 Tori astana, Sogleant Vorto Dev hatamnim bandlolea ghorant ravona. Eka provadean hea vixim oxem sanglolem:
49 ‘Jehova* mhunntta, sorg mhojem xinvason ani prithum mhoji paim dovorpachi monnoi.* Tor mhojea pasot koslem ghor tumi bandtole? Vo mhaka ravonk tumi khoim zago bandtole?
50 Hanvem mhojeach hatamnim heo sogleo vostu rochunk nant kai?’
51 “Hottʼtti munxamno, tumi tumche kan ani kallzam bond keleant. Tumi sodanch povitr xoktecho virodh korit aileat. Zoxem tumchea purvozamnim kelem toxench tumi-i kortat.
52 Oso konn provadi asa zaka tumchea purvozamnim dhumallo* diunk na? Hoi, to nitivont ietolo mhunn poilim thaun porgott kelʼlem tea soglea lokancho tannim jiv kaddlo. Atam tumi pasun tacho visvasghat kelo ani taka marun uddoilo.
53 Hoi, tumi-i toxench kelem. Tumkam devdutam koddlean Kaido mellʼllo, punn tumi tea pormonnem cholonk nant.”
54 Tannim heo vostu aikoleo tednam te samke ragar zale ani tachea add aple dant korkoraunk lagle.
55 Punn, povitr xokten bhoron to sorgar polloit ravlo, ani taka Devachi mhoima dixtti poddli. Toxench, Jezu Devachea uzveak ubo asa tem tannem polloilem.
56 Tednam tannem mhunnttlem: “Mhaka sorg ukto zalʼlo ani munxacho put Devachea uzvea hatak ubo aslolo dixtti poddtta.”
57 Hem aikon tannim mottʼttean bob marli ani aplea hatamnim aple kan bond kele, ani sogle mellon tachea angar gele.
58 Te taka dhuklun xarachea bhair gheun gele, ani taka fatraunk lagle. Sakxeamnim aple kopdde kaddun Saulu nanvachea tornnatteachea paim-am lagim dovorle.
59 Te Istevacher fator martale tednam tannem oxem magnnem kelem: “Somia Jezu, hanv mhozo jiv* tujea hatant ghaltam.”
60 Uprant, tannem dimi ghalun mottʼttean bob marun oxem mhunnttlem: “Jehova* hea patkacho tankam guneanvkari korinaka.” Oxem mhunnttlea uprant to melo.*
Footnotes
^ Vo “tanchea thaim vaitt toren vagtole.”
^ Vo ghoddie, “teach toren Jakobachi sunot keli.”
^ Vo “desant danno asa.”
^ Vo “somadhint.”
^ Vo “Devachea nodren sobit.”
^ Vo “dudh pivoilem.”
^ Vo “tanchi poristhiti polloun ieunchem.”
^ Vo “oxem tannem tharailem.”
^ Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.
^ Mhunnche, lhan bakin.
^ Vo “tras; virodh.”
^ Xobdhkoxant “Ruʼach; Pneuʼma” polloi.
^ Utran utor, “to mornnachea nhident nhidlo.”
