“Hanv lhan aslem tednam dor disa mhozo bhav mhaka martalo ani mhozo opman kortalo. Kazar zalea uprant mhoji sasumai mhojea sangata toxinch vagtali. Ti ani mhozo sasupai mhaka kamvali koxim lekhtalim. Mhaka mhozo jiv dium koxem distalem.”—Madhu, a Bharot

 “Sonvsarbhor bailancher otʼteachar zavop sodanchench zalam,” oxem World Health Organization sangta. Oxem dison ailam ki tin bailam modlea eka bailek tanchea jivitant kednam tori mar khauncho poddtta vo loingik otʼteachar soscho poddtta.

 Tumchea sangata oxem kednam-i ghoddlam zalear tumi khoinsorui gelear thoim tumcho konnui opman korit, vo tumcher hat ubarit, vo loingik otʼteachar korit mhunn tumchea monant bhirant astoli. Ani hem soglem polloun bailank kainch valor na oxem ghoddie tumkam disot. Punn Dev pasun bailank osoch lekhta kai?

 Vers: ‘Devan tankam dadlo ani bail mhunn rochlim.’—Utpoti 1:27.

 Orth: Dadleak toxench bailek Devan rochlim. Tor tankam dogainkui resped mellʼllolo taka zai. Toxench, Devak zai ki ghovan “aplo mog korta tosoch aplea bailecho mog korcho.” Tor, ghovan aplea bailek aplea tabeant dovorcho proitn korcho nhoi, topta toslim utram ulounchim nhoi ani marchem nhoi. (Efezkarank 5:33; Koloskarank 3:19) Khorench, bailo surokxit asloleo Devak zai.

 “Hanv lhan astana, mhojim soirim mhojer loingik otʼteachar kortalim. Uprant, hanv 17 vorsanchem zalem tednam mhojea patranvan mhaka tachea sangata sex korunk dobhav ghatlo ani oxem korina zalear mhaka kama voilean kaddttolo mhunn dhomkailem. Toxench, hanv vhodd zalea uprant mhozo ghov, avoi-bapui ani xezarim mhaka kainch resped dinaslim. Punn, magir hanv amcho Rochnnar Jehova  b vixim xiklem. To bailank respedan lekhta mhunn hanv zannam zalem. Hantuntlean to mhozo mog korta ani hanv tachea nodren moladik asam mhunn mhaka khatri mellʼlli.”—Maria, Argentina

 Vers: “Thodde ixtt . . . bhavam poros legit tuka visvaxi astat.”—Mhonnʼnneo 18:24.

 Orth: Ek khoro ixtt tumkam modot kortolo. Tumkam koxem bhogta tem tumi tumchea oslea ixttak sangat zacher tumi visvas dovrunk zata. Oxem kelʼlean tumkam khub adar zatolo.

 “Mhojer loingik ritin otʼteachar zalʼlo mhunn hanvem 20 vorsam meren konnakuch sangonk na. Tea pasot, hanv khuxal naslem, mhaka usko zatalo ani hanv niraxi zatalem. Punn, mhojea sangata kitem ghoddlolem tem hanvem konnank tori sanglem ani tannem mhojem dhean diun aikolem tednam mhaka khub borem dislem.”—Elif, Turkiye.

 Vers: “Tumchea soglea uskeancho bhar [Devacher] ghalat, karonn taka tumchi kallji asa.”—1 Pedru 5:7.

 Orth: Tumi magnnem kortat tednam to tumchem aikota. (Stotr 55:22; 65:2) Taka tumchi kallji asa dekhun tumi kitlim moladik tem somzonk to tumkam modot kortolo.

 “Jehova vixim xiklolean mhojea kallzak zalʼle ghave pekonk lagle. Atam hanv mhaka koxem bhogta tem soglem Devak sangonk xokta. Eka ixtta bhaxen to mhojim bhavnam ekdom bore toren somzota.”—Ana, Belize.

 Vers: ‘Jehova . . . onathanche ani zulum bhogtoleanche hokʼk neainit korun samballtta, oso dhortorevelo monis aplea peleak anink bhenkddaunk xokcho na.’—Stotr 10:17, 18.

 Orth: Dev soglea torecho onʼneai pusun kaddttolo. Bailancher kosleach torecho onʼneai vo otʼteachar zaunchona.

 “Bailancher ani cheddvancher zata to otʼteachar Jehova beginuch kabar kortolo mhunn hanv zannam zalem tednam mhojea ghaveancher molom lailʼlea bhaxen zalem. Mhojea monak xanti mellʼlli.”—Roberta, Mexico.

 Bible-ant anik koslo bhorvonso dila, tantunt dilʼlea bhasaunneancher ami kiteak visvas dovrunk zata ani Jehovachim Sakxi tumkam Bible-antlean koxi bhuzvonn diunk xoktat? Hea prosnanche zobab zannam zaunk sompork korat.

 Ho lekh print korunk zata tosli kopi download korat.