Atam meren ami polloilem ki Dev beginuch vaitt lokancho ani vaittponnacho xevott kortolo. To hem kortolo mhunn ami ghott khatri dovrunk zata, karonn tannem oxem utor dilam:

“Sonvsar . . . don disam bhitor nanch” zatolo.​—1 JUANV 2:17.

Punn, Dev ho sonvsar mhunnchem hea sonvsarantlem vaittponn kabar kortolo tednam thodde lok salvar zatole, karonn heach versant tannem oxem-i sanglam:

“Jim konn Devachi khuxi palltat, tim sasnnak togtat.”

Hacho orth, vaittponnacho xevott zata tednam amkam salvar zaunk zai zalear ami Devachi khuxi korunk zai. Punn Devachi khuxi kitem? Tem zannam zaunchea poilim ami Devak vollkhonk zai.

Jezun sanglolem ki amkam sasnachem jivit mellonk zai zalear ami ekleach khorea Devak vollkhonk zai. (Juanv 17:3) Tor, Dev vaittponnacho xevott korta tednam salvar zaunk ani sasnak jieunk ami Devak vollkhon gheunk zai. Hacho orth, fokot Dev asa mhunn manop ani tachea vixim voilea-voir zannam zavop itlench puro nhoi, punn ami tache ixtt zaunk zai. Ami konnam-i lagim amchi ixttagot ghott korunk sodhtat zalear, ami tanchea sangata vell sartat. Toxench, Deva lagim ixttagot ghott korunk ami vell kaddunk zai ani Bible kitem sangta tem xikonk zai.

Ami jivim uronk jevonn jevop gorjechem, toxench Devachea Utrachi somzonni ghevop pasun gorjechem. Tea vixim Jezun sanglem: “Unddeach vorvim nhoi, punn Devachea tonddantlem, bhair sorta tea-tea utra vorvim, monis jieta.”​—Matev 4:4.

Devachim utram amkam Bible-ant vachunk mellttat. Ami sodanch Bible vachlo zalear, Devan munxa pasot adim kitem kelam, to atam kitem korta ani fuddarak kitem kortolo tem ami zannam zaunk pavtolim.

Ami Bible vachtat tednam amkam Bible-ant Devachea kaideam vixim xikonk melltta, punn te kaide pallunk ani Devachea nodren vaitt asa tem soddunk amkam ghoddie kotthin zait. Oslea vellar, Dev amkam koso adar diunk xokta tachem ek udharonn polloum-ia.

Sakura nanvachi bail pozoddponnachem jivit jietali. Ti Bible xikonk lagli tednam tika pozoddponn soddun diat hea Devachea kaidea vixim kollʼllem. (1 Korintkarank 6:18) Sakuran aplem pozoddponnachem jivit soddun diunk Deva lagim khub magnnem kelem ani tea pasot ti tem soddunk pavli. Tori astana, uprant tika khub tallnneo ietaleo. Ti sangta, “Mhojea monant bhurxim chintnam ietalim tednam mhaka koxem dista tem hanv Jehovak magnneant sangtalim. Karonn hi tallni mhojeach xokten pois korunk zaunchi na mhunn hanv zannam aslim. Magnnem kelolean Deva lagim mhozo sombond ghott zalo.” Sakura bhaxen aiz lakʼkhamnim lok Deva vixim xikonk pavleat. Tanchem jivit sudarpak Dev tankam adar dita. Hea vorvim tim taka manvota tem korunk pavtat.​—2 Korintkarank 4:7.

Jitlim tumi Devak vollkhonk pavtolim titlim tumi Devachea lagim sortolim ani Dev-ui tumkam aplim ghott ixttam mhunn lekhtolo. (Galasiekarank 4:9; Stotr 25:14) Deva lagim ixttagot kelʼlean, sonvsar novo zatolo tednam tumi tantunt jieunk xoktolim. Punn ho novo sonvsar koso astolo tem ami fuddlea lekhant polloum-ia.