Beginuch Dev akʼkhea prithumer Raj choloitolo. Tea vellar, prithumer ekdom bori poristhiti astoli. Lokam modem xanti ani sovoskai astoli ani sogleank borem kam astolem, zatunt tankam dhadosponn mellttolem. Hea prithumer Raj cholounk Devan konnak nemla? Devan hi zobabdari Jezu Kristak dilea. Jezu aiz aslolea choddxea rajki fuddaream sarko nhoi. Taka lokanchi khorich kallji asa ani taka sogleanchem borem zalʼlem zai. To sogleam lagim neai-nitin vagtolo ani taka lagon tachi razvottki sogleant bori astoli.—Izaias 11:4.

Devan hea sonvsara voilem vaittponn kabar kelea uprant, lok zati-katik lagon vo her koslea-i karonnak lagon bhed-bhav korchenant. (Prokasovnni 7:9, 10) Soglo lok eka-mekacho ani Devacho mog kortolo, tanchea modem ekvott astolo. Devan survatek tharailʼlea pormonnem hi akʼkhi prithum sobit bag korunk ani ticho samball korunk te sangata mellon vavurtole.—Stotr 115:16.

Aiz buddtti, bhuimkamp ani her odruxttank lagon khub luksonn zata ani zaitea lokancho jiv pasun voita. Punn Devachea razvottke khala oslem kainch zaunchem na. (Stotr 24:1, 2) Karonn sumar don hozar vorsam poilim, Jezu prithumer aslo tednam tannem Devachea xokte udexim ek vhodd vadoll xant kelʼlem. (Marku 4:39, 41) Teach bhaxen, fuddarak Jezu hea prithumer raj choloitolo tednam oslim odruxttam zaunk diuncho na. Toxench, munxank zonvaram thaun vo zonvarank munxam thaun koslich bhirant aschi na ani lok khoincheach ritin prithum piddʼddear korche nant.​—Hosea 2:20.

Novea sonvsarant konnuch duent poddcho na, zanntto zauncho na vo morcho na. Thoim sogleank bori bholaiki astoli. (Izaias 35:5, 6) Hi prithum ekdom sobit zatoli ani thoim koslench produxonn aschem na. Toxench, zomin Eden bage sarki sufoll zatoli ani bhorpur jevonn astolem. (Utpoti 2:9) Adlea tempar, Devache lok taka visvaxi ravle tednam tankam jevnna-khannachem unnemponn naslem. Teach bhaxen fuddarakui zatolem.​—Levi-Xastr 26:4, 5.

Devachea sorkara khala soglea lokank khorem sukh ani khori xanti astoli. Lok eka-meka lagim mogan ani boreponnan vagtole. Tea vellar, zhuzam zaunchim nant. Munis munxacher otʼteachar korcho na. Ani Dev sogleancheo gorzo purnn kortolo. Devan Bible-ant utor dilam: “Zonn-eklo ap-aple dak-veliche savllek ani ap-aplea anjirachea zhadda ponda bostolo, konn konnak tras diuncho na.”​—Mika 4:3, 4.

Sogleam lagim ap-aplem ghor astolem ani tem soddun voichem poddot mhunn tankam bhirant aschi na. Toxench, tim kortat tea soglea kamant tankam khuxalkai mellttoli. Karonn Bible sangta: “Tim nirfollim vavurchim nant.”​—Izaias 65:21-23.

Sorg ani sonvsar rochpi Jehova Deva vixim ani tachea rochnne vixim amkam zaitem xikonk mellttolem. Karonn hi prithum Devachea vollkhin vo zannvaien bhortoli mhunn Bible sangta. (Izaias 11:9) Tea vellar, lok apli zannvai zhuzam khatir hotʼtearam toiar korunk vo dusreank luksonn korunk vapurchim nant. (Izaias 2:4) Tachea bodlek, tim hi zannvai uzar korun eka-meka sangata xantin ani mogan jietolim ani hea prithumecho samball kortolim.​—Stotr 37:11.

Devan hi prithum khub bariksannen chintun rochloli. Karonn munis sasnak khuxalkaien jielʼlo Devak zai aslo. (Stotr 37:29; Izaias 45:18) Hea pasot, Dev beginuch “sasnak mornnacho bhosm kortolo.” (Izaias 25:8) Tea vellar, “moronn anink aschem na, dukh anik korchim nant, rudon somptolem, koxtt-ui anink asche nant” mhunn Devan utor dilam. (Prokasovnni 21:4) Titlench nhoi, punn amchim mogachim moron geleant tankam-i Dev porot jivont kortolo. Tor, Dev hea jivont zalʼlea lokank ani vaittponnacho xevott zata tednam salvar zalʼlea lokank sasnak jieunk sondhi ditolo.—Juanv 5:28, 29; Itihas 24:15.

 Beginuch ho sonvsar novo zatolo! Ani lakʼkhamnim lok tea vellachi vatt polloitat. Te lok aiz Jehova Deva vixim ani Jezu Krista vixim xiktat ani tem aplea jivitant lagu kortat. Oxe toren, te novea sonvsarant jieunk toiari kortat.​—Juanv 17:3.

Sobit zalʼlea prithumer jieunk ami kitem korunk zai tea vixim Bible kitem sangta tem zannam zaunk zai zalear, eka Jehovachea Sakxea sangata tumi Sasnak Khuxalkaien Jieiat! hea pustoka thaun  Bible xikonk zata.