1-2. (a) Dor disache tras sosunk amkam kitem modot korta? Somzaiat. (b) Hea lekhant ami kitem bhasabhas kortolim?

“HANVEM sosleat tea trasam vixim hanv chint’tam tednam te tras hanv mhojeach bollan sosunk pavonk na mhunn hanv zannam.” Tumi kednam tori oxem mhunnttlam? Amchea modlea zaitea zannamnim oxem mhunnttlam zait. Tumcher ek bhirankull duens ailem, vo tumcho mogacho konnui melo tednam tem dukh tumi koxim sosunk pavlim tacher niall kortana tumi ghoddie oxem mhunnttlem astolem. Tea trasam vixim tumi chint’tat tednam, dor disa Jehovachea povitr xokte udexim mell’llolea ‘vorte podvek’ lagonuch tem soglem tumi sosunk pavleat mhunn tumkam kollon ieta.—2 Kor. 4:7-9.

² Hea noxttea sonvsaracho probhav nakarunk pasun amkam povitr xoktechi goroz asa. (1 Juanv 5:19) Toxench, “khottea atmeam kodde” zhuzonk pasun amkam xoktechi goroz asa. (Ef. 6:12) Hea soglea trasancho fuddo korunk povitr xokti amkam koxi modot korta, tea vixim ami don vatto polloum-ia. Magir povitr xokte thaun zata titlo faido melloun gheunk ami kitem korunk xoktat tacher-ui bhasabhas korum-ia.

3. Jehova amkam tras sosunk modot korta ti ek vatt khoinchi?

³ Amkam tras aslear pasun, ami kitem korunk zai tem soglem korunk Jehovachi povitr xokti amkam xokti vo ghottai dita. Tras aslear pasun Apostl Pauluk apunn Jehovachi seva korit ravonk xokta mhunn dislem, karonn to Kristachea bollacher patieun ravlo. (2 Kor. 12:9) Aplea dusrea mixinori bhonvdde vellar, Paulun porgottnnent khub vavr kelo tem khorem punn tachea sangata tannem aplo khorch bhagounk pasun kam kelem. To Korintant, Akuila ani Prisila-chea ghorant ravlo. Tim tombu bandpachem kam kortalim. Paulu pasun tombu bandpachem kam kortalo dekhun to thodde dis tanchea sangata tem kam kortalo. (Itihas 18:1-4) Hem kam korunk ani seva purnn toren korunk povitr xokten Pauluk ghottai dili.

4. 2 Korintkarank 12:7b-9-a pormonnem Pauluk kosli oddchonn asli?

⁴ 2 Korintkarank 12:7b-9 vachat. Hea versamnim, Paulun aplea “angant . . . ek kantto asa” oxem kiteak mhunnttlem? Tujea angant ek kantto rombla zalear tujea kuddik khub dukh zatoli. Tor Paulu hanga sangonk sodhtalo ki taka khub dukh haddtta tosli ek oddchonn asli. Hea oddchonnek tannem “Soitanacho ek dut” mhunnttlem zo taka sotait ravta. Soitan vo tache vaitt ainz Pauluchea angant kantto koxi aslolea oddchonneche zobabdar nasle astole. Punn, Pauluchea bhitor aslolo “kantto” vo oddchonn khottea otmeanim polloili tednam ti dukh anik vaddouncho tannim proitn kelo astolo. Paulun kitem kelem?

5. Jehovan Pauluchea magnneak koso zobab dilo?

⁵ Survatek Pauluk, Jehovan to “kantto” kaddlolo zai aslo. To mhunntta: “Hea vixim, hea sonnsonneantlo mhaka nivar mhonn tin pavtti prarthon korun hanven Somiak [Jehovak] . . . maglem.” Paulun maglolem tori punn, to kantto tachea angantuch urlo. Tor Pauluchea magnneak Jehovan zobab diunk na oxem kai? Na. Tannem zobab dilo. Jehovan ti oddchonn kaddunk na, punn ti sosunk tannem Pauluk xokti dili. Jehovan mhunnttlem: “Osoktaient mhojem boll sopurnnaien porzollta.” (2 Kor. 12:8, 9) Jehovachea modotin, Paulu aplo sontos ani xanti samballunk pavlo!—Filp. 4:4-7.

6. (a) Jehova amchea magnneank koso zobab diunk xokta? (b) Peregrafantlea versamnim aslolim khatrechim utram tuka koxi ghottai diunk xoktat?

⁶ Paulu bhaxen tumi pasun kednam tori tumkam aslole tras kadd mhunn Jehova lagim maglam kai? Tumi zaite pavtti magon pasun te tras toxech asat astole—vo anik chodd vaddleat astole—tednam Jehova tumcher ragar asa mhunn tumi chintlem kai? Toxem zalear, Pauluchem udharonn ugddas korat. Jehovan Pauluchea magnneak zobab dilo tosoch to tumchea magnneak pasun zobab ditolo! Jehova tumche tras ghoddie kaddun uddouncho na. Punn aple povitr xokte udexim, te sosunk to tumkam ghottai ditolo. (St. 61:3, 4) Tumkam konnui “khala” uddoit, punn Jehova tumkam kednanch sanddcho na.—2 Kor. 4:8, 9; Filp. 4:13.

7-8. (a) Povitr xokti varea sarki koxi asa? (b) Povtir xokti jea toren kam korta tachem vornnon Pedrun koxem kelem?

⁷ Povitr xokti modot korta ti anik ek vatt khoinchi? Uchamboll aslolea doreant voitana, eka tarvak faideak poddtta toslo varo taka sarke vatten oddun vhorta. Toxench, amkam uchamboll korta tosle tras aslear pasun povitr xokti amkam Devan bhasailolea novea sonvsarant pavonk fuddem vhorta.

⁸ Apostl Pedru ek nustem dhorpi aslo dekhun tarvacher provas korchea vixim taka bori khobor asli. Taka lagon tannem povitr xokti koxi kam korta tem somzaunk, varo tarvak oddun vorta taka sor kelem. Tannem boroilem: “Provadiancho khoinchoch sondex monxanche khuxentlo upzunk na; punn jedna monxamnim Devachea nanvan sondex dila, tedna Povitr Atmo tankam to sondex diunk oddun vhortalo.” “Oddun vhortalo,” hea utrank uzar kel’lea Grek utracho orth “sangata gheun vochop; vo lottun vhorop” zaun asa.—2 Ped. 1:21.

9. “Oddun vhortalo,” him utram uzar korun Pedru vachpeanchea monant koslem chitr haddtta?

⁹ “Oddun vhortalo” oxem sangon to vachpeanchea monant koslem chitr haddunk sodhtalo? Tarvak “lottun” vhorta tea varea vixim sangtana, Itihas pustok borovpi, Lukasan pasun oslech torechem Grek utor uzar kelem. (Itihas 27:15) Bible boroupeank “oddun vhelem” oxem Pedrun boroilem tednam eka Bible pondditan sanglem ki Pedrun “doria sombondit ek sobit vopar uzar keli. Eka tarvacher aslolea xiddacher vo vareachi modot gheunk tarvak bandtat tea lugttacher varo marta tednam, taka pavonk zai tea zagear vochonk modot zata. Teach bhaxen povitr xokten Bible boroupeank aplem kam korunk modot keli, mhunn Pedru sangonk sodhtalo. Toch ponddit fuddem sangta: “Te Bible boroupi, xidd ukti kelolea tarva sarke asle.” Apnnem kitem korunk zai tem Jehovan kelem. Tannem tankam “varo” mhunnche apli povitr xokti dili. Ani Bible boroupeamnim aplem kam kelem, tem mhunnttlear povitr xoktechea margdorxonam pormonnem tannim kam kelem.

10-11. Povitr xokten amkam fuddem soronk modot korunk zai zalear ami khoinchim don pavlam ghevop gorjechim? Udharonn diat.

¹⁰ Aiz Jehova apli povitr xokti diun, lokank Bible-antlim pustokam borounk uzar korina. Tori punn to apnnem korunk zai tem korta, mhunnttlear apli povitr xokti uzar korun to aplea sevokank vatt dakhoita. Punn, ami Devachea povitr xokte thaun koso faido melloun gheunk zata? Ami amkam dilam tem kam korit ravonk zai. Tem koxem?

¹¹ Hea udharonnacher dhean diat. Vareacho faido gheunk eka tarum cholovpean don vostu korunk zai. Poilem, tannem aplem tarum varo marta tea vatten dovrunk zai. Tarum cholovpi aplem tarum doriant vhorona zalear tacher varem marchem na ani tem tarum fuddem voichem na. Dusrem, tannem ti tarvachi xidd zata titli ukti korunk zai. Zaito varo marlear pasun, to varo xiddacher marlearuch tem tarum fuddem voitolem. Teach toren, amkam Jehovachea xoktechi modot aslearuch ami tachi seva korit ravonk pavtolim. Devachea povitr xokte thaun faido melloun gheunk ami don pavlam ghevop gorjechim. Poilem, aplea povitr xokte udexim Dev aplea sevokank jim kamam korunk laita tim ami korunk zai. Dusrem, ami amchi “xidd” zata titli ukti korunk zai, mhunnche, tea kamamnim ami amchean zata titlem korunk zai. (St. 119:32) Ami him pavlam ghetat tednam, dhumallo ani trasanchim lharam aslear pasun ami novea sonvsarant pavo poriant Devan dilolem kam korit ravonk povitr xokti margdorxon diun amkam modot kortoli.

12. Atam ami kitem bhasbhas kortolim?

¹² Atam poriant amkam povitr xokti koxi modot korta teo don vatto ami bhasabhas keleat. Povitr xokti amkam xokti dita ani dhumallo sostana visvaxi ravonk amkam modot korta. Toxench amkam vatt dakhoita ani Jehovak ami kitem kelolem zai tem korunk modot korta. Oxem kel’lean amkam sasnik jivit mellonk xokta. Tor atam, povitr xokte udexim purnn faido melloun gheunk ami korunk zai tea char vostum vixim ami bhasabhas korum-ia.

13. 2 Timotak 3:16, 17-ant sanglolea pormonnem Bible-antlim versam amcher koslo probhav ghalunk xoktat, punn ami kitem korunk zai?

¹³ Poilem, Devachea Utracho obheas korat. (2 Timotak 3:16, 17 vachat.) “Devachea preronnan boroilam” hea utrank uzar kelolea Grek utracho orth “Devan svas funklo” ho zata. Devan apli xokti uzar korun aplim chintnam Bible boroupeanchea monant “funkli.” Ami Bible vachtat ani vachlam tacher niall kortat tednam, Devachim chintnam amchea kallzant ani monant rigtat. Ani him chintnam Devachea khuxe pormonnem amchem jivit bodlunk amkam modot kortat. (Heb. 4:12) Punn Devachea povitr xokte thaun purnn faido melloun gheunk ami sodanch Bible vachunk zai ani vachlam tacher niall korunk vell kaddunk zai. Tednam ami jem kitem sangtat ani jem kitem kortat tacher Devachea utracho probhav poddttolo.

14. (a) Amchea mittingencher “varo marta” oxem ami kiteak mhunnonk zata? (b) Ami “xidd” ukti korun mittingent koxim hajir zaunk xoktat?

¹⁴ Dusrem, sangata mellon Devachi bhokti korat. (St. 22:22) Amcheo Kristi mitting eke toren, varo marta tosle zage zaun asat, mhunnche, Jehovachi povitr xokti amchea mittingencher asta. (Prok. 2:29) Ami oxem kiteak mhunnttat? Karonn ami amchea bhav-bhoinnam sangata bhokti korunk mellon ietat tednam ami povitr xokte pasot magtat, Devachea Utracher adarit aslolim Raj-gitam gaitat, ani Devachea xokte udexim vinchun kaddlolea bhavanchi Bible adarit bhaxonnam aikotat. Ani teach povitr xokte udexim bhoinno aple bhag toiar korun diunk pavtat. Povitr xokte thaun purnn faido melloun gheunk, ami mittingent ietat tednam zobab diunk lagon toiari korun ievop gorjechem. Oxem toren, ami mittingent ietat tednam vareacho faido melloun gheunk apli “xidd” ukti kelolea tarva sarkim ami povitr xokte thaun purnn faido melloun gheunk toiar astat.

15. Porgottnnechea kamant povitr xokti koxi kam korta?

¹⁵ Tisrem, porgottnnechea kamant bhag gheiat. Ami porgott’ttana ani xikoitana Bible uzar kortat tednam povitr xoktek amchea kamant bhag gheunk ami soddun ditat. (Rom. 15:18, 19) Povitr xoktecho zata titlo faido zoddunk lagon tumi porgottnnent sodanch bhag gheunk zai ani zata titlo Bible uzar korunk zai. Porgottnnent lokam lagim tumi bore toren ulounk lagon Jivit ani Porgottnni Mittingechi Pustika hantunt aslolea ulounk modot hea bhagachi modot gheunk zata.

16. Povitr xokti melloun gheunk ekdom sompi vatt khoinchi?

¹⁶ Chovtem, Jehova lagim magnnem korat. (Mt. 7:7-11; Lukas 11:13) Povitr xokti melloun gheunk ek sompi vatt mhunnttlear Jehova lagim magnnem korop. Amchim magnnim Jehova lagim pavonk vo povitr xoktechem dennem amkam mellonk kitench addaunk xokona—khoincheach bondkonnichim daram vo Soitan pasun. (Jak. 1:17) Povitr xokte thaun purnn toren faido mellttolo zalear ami koxem magnnem korunk zai? Hacho zobab zannam zaunk, magnneam vixim anik bariksannechi mahiti mellonk fokot Lukas-achea xubhvortomanant asloli ek vopar bhasabhas korum-ia. *

17. Lukas 11:5-9, 13-ant Jezun sanglolea voparentlean ami magnnea vixim koslem lisanv xikonk zata?

¹⁷ Lukas 11:5-9, 13 vachat. Jezun dil’lea voparentlean ami povitr xokte pasot koxem magonk zai tem kolltta. Tea voparent, “tache korandaiek lagon” vo to dhiran thambonastana magot ravlo dekhun, tea munxak goroz aslem tem taka mell’llem. Khub rat zal’li tori astana, aplea ixtta lagim modot magonk to bhieunk na. (Obheasachi ttipnni Lukas 11:8 polloiat.) Hea vopare vorvim Jezun magnnea vixim kitem sanglem? Tannem mhunnttlem: “Magat ani Dev tumkam ditolo, sodat ani tumkam mellttolem, darar marat ani tem tumkam ugoddtolem.” Tor, hantunt amkam koslem lisanv asa? Povitr xoktechi modot zai zalear, ami thambonastana magnnem korchi goroz asa.

18. Jehova apli povitr xokti ditoloch mhunn, Jezchea voparentlean amkam kiteak khatri melltta?

¹⁸ Jezuchea voparentlean Jehova amkam povitr xokti kiteak ditolo tem zannam zaunk pasun modot zata. Tea voparent aslolo munis aplea soireachi bori kallji gheunk sodhtalo. To taka jevonn diunk sodhtalo punn tea rati tachea lagim kainch naslem. To munis thambonastana vicharit ravlo dekhun tea xezarean taka unddo dilo mhunn Jezun sanglem. Jezu kitem xikounk sodhtalo? Ek oporipurnn munis aplo xezari aplea lagim magot asa mhunn taka modot korta zalear, amchea doiall sorginchea Bapa lagim povitr xokte pasot magot ravtat tankam to ti diuncho na kai? Tor, ami povitr xoktek lagon Jehova lagim magtat tednam to amkam ti ditoloch mhunn ami khatri dovrunk zata.—St. 10:17; 66:19.

19. Amkam zoit mellttolench mhunn ami kiteak khatri dovrunk zata?

¹⁹ Soitan amkam harouncho proitn korit ravlear pasun ami zoitivont zatolim mhunn ami khatri dovrunk zata. Kiteak? Karonn povitr xokti amkam don toren modot korta. Poilem, amche tras sosunk lagon ti amkam goroz ti xokti dita. Dusrem, zoso varo tarvachea xiddacher marun taka fuddem vorta, teach bhaxen povitr xokti Devachi seva korit ravon tachea novea sonvsarant pavonk amkam modot korta. Tor povitr xokte thaun purnn faido melloun gheuncho ami nichov korum-ia!