Obheasacho Lekh 41
Bible Videartheank Bautizm Gheunk Ami Koxi Modot Korunk Zata—Poilo Bhag
“Kristachem potr tumi, amchea hatamnim boroun kaddlolem.”—2 KOR. 3:3.
GIT 78 “Teaching the Word of God”
KITEM XIKTOLIM *
Ek Bible videarthi bautizm gheta tednam tacho mog kortat tim sobhentlim soglim bhav-bhoinnam khuxal zatat nhoi! (Peregraf 1 polloiat)
1. Ekleak Bible xikoun, taka bautizm gheunk modot korop hem Jehova koddlean ek moladik dennem mhunn somzonk 2 Korintkarank 3:1-3 amkam koso modot korta? (Masikachem fuddlem chitr polloiat.)
TUMCHEA sobhentlo ek Bible videarthi bautizm gheta tednam tumkam koxem dista? Tumi khub khuxal zatolim nhoi! (Mt. 28:19) Ani tachea sangata tumi Bible obheas ghetlolo zalear to bautizm gheta tem polloun tumi anikui khuxal zatolim! (1 Tes. 2:19, 20) To bautizm gheta tednam, tumi ani sobhentlea her bhav-bhoinnamnim taka modot korunk kel’lo koxtti vavr ani seva dison ieta.— 2 Korintkarank 3:1-3 vachat.
2. (a) Ami khoinchea mhotvachea prosnam vixim chintunk zai, ani kiteak? (b) Bible obheas mhunnttlear kitem? (Futtnott polloiat.)
2 Gel’lea char vorsamnim sonvsarbhor, Jehovache Sakxi dor mhoineak sumar 1,00,00,000 Bible obheas ghetat tem polloun khub khuxalkai bhogta. * Tea char vorsarcher nodor marit zalear, dor vorsa sumar 2,80,000 zann bautizm gheun Jehovache Sakxi ani Jezu Kristache xis zaleat. Anik chodd Bible videartheank bautizm gheunk ami koxi modot korunk xoktat? Aple Sakxi zaunk Jehova azun porian lokank sondhi di-it asa. Taka lagon, tannim zata title begin bautizm gheunk, ami tankam ghoddtta tea bhaxen modot korunk zai. Karonn vell ekdom unno asa!—1 Kor. 7:29a; 1 Ped. 4:7.
3. Bible obheas gheunchea vixim ami hea lekhant kitem xiktolim?
3 Xis korop aiz khub mhotvachem aslolean choddxea Bible videartheank bautizm gheunk koxi modot korunk zata tea vixim Sonchalon Monddollan xaka somitink vicharlem. Onnbhovi pioneer, mixinori, ani sorkittachi dekhrekh korpeam koddlean kitem xikonk zata tea vixim hea lekhant ani fuddlea lekhant ami xiktolim. * (Mho. 11:14; 15:22) Videartheak Bible obheasa thaun chodd faido mellonk zai zalear, Bible xikoupean ani videarthean kitem korunk zai tea vixim tannim sanglam. Bautizm gheunk dor eka videarthean kosle panch vixoi korunk zai tea vixim hea lekhant ami bhasabhas kortolim. Hem korunk Bible xikoupeamnim tankam modot korunk zai.
BIBLE OBHEAS DOR SUMANAK GHEIAT
Boson Bible obheas gheunk zata kai mhunn videartheak vicharat (Peregraf 4-6 polloiat)
4. Aiknnareachea dara lagim ubim ravon Bible obheas gheunchea vixim ami kitem ugddas dovrunk zai?
4 Zaitim bhav-bhoinnam aiknnareachea dara lagim ubim ravon Bible obheas ghetat. Bible-a vixim umed vaddounk hi ek bori vatt zaun asa. Punn oslea obheasant chodd vell ulounk mellona ani osle obheas chodd korun dor sumanak asonant. Tor oslea Bible videartheanchi umed vaddounk thoddim bhav-bhoinnam tancho fon nombor ghetat ani tankam mellonk zaina tednam Bible-a vixim sangonk tankam fon kortat vo message-i dhaddttat. Oxem zaite mhoine zaunk xokta, punn to Bible videarthi vaddavoll korunk pavona. To videarthi Devachem Utor xikonk titloch vell ghalta zalear to somorponn korun bautizm gheunk pavtolo kai? * Ghoddie na.
5. Lukas 14:27-33-ant Jezun sanglolem tem, amchea Bible videartheank modot korunk ami koxem uzar korunk zata?
5 Aplo xis zaunk sodhta zalear eklean kitem korunk zai tem somzaunk Jezun ek vopar uzar keli. Ek gopur bandunk sodhta tea munxa vixim ani zhuzant vochonk toiar zata tea raza vixim tannem sanglem. Gopur bandpean, gopur bandunk “khorch korunk apnna lagim zait ki na, hacho adim-poilo bosun odmas” korunk zai. Ani zhuzant zoit melloun gheunk sodhta tea razan, apnna lagim zai titli fouz asa kai na tem “adim-poilem bosun” chintunk zai. (Lukas 14:27-33 vachat.) Teach toren, Jezucho xis zaunk sodhta tannem Jezucho pattlav korunk apnnank kitem korchem poddttolem tem adim fuddench bariksannen chintop gorjechem. Takach lagon, Jezuche xis zaunk sodhtolea amchea Bible videartheam sangata dor sumanak Bible obheas ghevop gorjechem zaun asa. Tor ami hem koxem korunk xoktat?
6. Amchea videartheamnim vaddavoll korunk ami kitem korunk zata?
6 Dara lagim ubim ravon ghetat tea Bible obheasacho vell tumi vaddounk xoktat. Tumi dor ek pavtt bhett ditana ek vers somzaunchea bodlek don versam somzaunk zatat. Tea Bible videartheak chodd vell ulounk addkoll na zalear sangata boson ulounk zata kai mhunn tumi taka vicharunk zata. Tachea zobabantlean Bible obheas taka kitlo mhotvacho tem tumkam kollttolem. Punn magir vell voita toso, rokddich vaddavoll korunk to sumanak don pavtti Bible obheas gheunk sodhta kai mhunn tumi taka vicharunk zata. Hachea bhair ami anikui kitem korunk zai.
DOR EKA BIBLE OBHEASA PASOT TOIARI KORAT
Tumchea Bible obheasak bori toiari korat ani toiari koxi korchi tem tumchea videartheak dakhoiat (Peregraf 7-9 polloiat)
7. Dor ek pavtti Bible obheas ghetana Bible xikoupean bore toren koxi toiari korunk zata?
7 Tumi xikoupi zal’lean tumchea dor eka Bible obheasak tumi bori toiari korunk zai. Poilim, tumi xikounk aslolo bhag vachunk zata ani tantuntlim versam pollounk zatat. Tea bhagantlea mukhel mud’dheancher dhean diat. Odheai-achea mukhel vixoi-acher ani tachea khala aslolea vixoi-a vixim niall korat. Toxench, peragrafachea adarit aslolea prosnam vixim, “vachat” mhunn aslolea versam vixim, chitram vixim ani to vixoi somzonk modot korunk xoktat toslea viddeo vixim niall korat. Uprant, tumchea videartheak motint dovrun, hi mahiti tannem somzon apnnaunk taka sompem zata tea toren tumi koxim somzaitolim tem niall korat.—Ne. 8:8; Mho. 15:28a.
8. Amchea Bible videarthea pasot ami kitem magonk zai tea vixim Koloskarank 1:9, 10-ant apostl Paulun sanglolea utram thaun ami kitem xiktat?
8 Toiari kortana videarthea pasot ani tachea gorzam pasot Jehova lagim magnnem korat. Tachea kallzak lagta tea toren Bible-antlean xikounk modot kor mhunn Jehova lagim magat. (Koloskarank 1:9, 10 vachat.) Tumi obheas ghetat tea bhagant tumchea videartheak somzonk vo manun gheunk kitem kotthin zaunk xokta tea vixim chintat. Bible videartheak bautizm gheunk modot korop ho tumcho dhei zaun asa mhunn kednanch visornakat.
9. Obheasa pasot toiari korunk eka xikoupean aplea videartheak koxi modot korunk zata? Somzaiat.
9 Amcho Bible videarthi chukonastana Bible obheas gheta tednam, Jehovan ani Jezun kitem kelam tachea pasot upkariponn ani chodd zannam zaunchi tachi urba vaddloli amkam zai. (Mt. 5:3, 6) Obheasa thaun faido zaunk videarthean apunn xikta tacher purnn dhean diunk zai. Hem korunk, dor eka Bible obheasa poilim toiari korun, ti mahiti koxi apnnaunk zata tacher niall korop kitlem gorjechem tem videartheak somzaiat. Toiari korunk tumi taka koxi modot korunk xoktat? Tumchea videarthea sangata mellon ek odheai toiar korat. * Tankam prosnanche zobab peregrafant sodhunk ani mark korunk xikoiat. Uprant, mark kelam tem polloun obheasachea vellar zobab diunk koxem faideak poddtta tem somzaiat. Magir taka tachea utramnim zobab diunk sangat. Tednam ti mahiti taka kitlea borea toren somzolea tem tumkam kollttolem. Punn, tumchea videartheak urba diunk tumi anik kitem tori korunk zai.
DOR DISA JEHOVA LAGIM ULOUNK ANI TACHEM AIKONK TUMCHEA VIDEARTHEAK XIKOIAT
Jehovachem aikon tache lagim ulounk tumchea videartheak xikoiat (Peregraf 10-11 polloiat)
10. Eka videarthean dor disa Bible vachop kiteak gorjechem, ani tachea vachpantlean purnn faido zoddunk tannem kitem korunk zai?
10 Tumchea videarthean tumchea sangata Bible obheas korchea bhair, tannem dor disa thoddeo vostu kelear taka faido zaunk xokta. Tannem Jehovachem aikonk zai ani tache lagim ulounk zai. To dor disa Bible vachta tednam Devachem aikota. (Josh. 1:8; St. 1:1-3) jw.org-cher, print korunk zata toslo “Bible Vachunk Manddavoll” koso uzar korunk zata tem taka dakhoiat. * Punn tachea Bible vachpantlean taka purnn faido mellonk ti mahiti Jehova vixim taka kitem xikoita ani tachea jivitant tem to koxem apnnaunk xokta, tacher niall korunk taka urba diat.— Itihas 17:11; Jak. 1:25.
11. Ek videarthi sarke toren magnnem korunk koso xiktolo, ani tannem zaite pavtti Jehova lagim kiteak magnnem korunk zai?
11 Dor disak magnnem korun Jehova lagim ulounk tumchea videartheak urba diat. Dor ek pavtti Bible obheas gheunchea poilim ani uprant, tumche videarthea sangata ani tachea pasot kallzantlean magnnem korat. Oxem kelolean to apunnui kallzantlean Jehova Deva lagim Jezu Kristachea nanvan magnnem korunk xiktolo. (Mt. 6:9; Juanv 15:16) Tumcho Bible videarthi dor disa Jehovachem aikota tednam mhunnche Bible vachta tednam ani dor disa Jehova lagim uloita tednam mhunnche magnnem korta tednam to Jehovachea kitlo lagim sortolo tem chintat. (Jak. 4:8) Oxem to dor disa korta tednam, aplem jivit somorponn korun bautizm gheunk taka modot zatoli. Punn ani kitem kelolean taka modot zaunk xokta?
JEHOVA SANGATA IXTTAGOT KORUNK TAKA MODOT KORAT
12. Videarthean Jehova sangata ixttagot korunk Bible xikoupean taka koxi modot korunk zata?
12 Amchea videarthean Bible obheasa thaun Jehova vixim xiklolem amkam zai. Punn ami xikoitat tem tachea kallzak laglearuch to xikta tem apnnaitolo. Jezu lokank zaiteo vostu xikoitalo ani tankam tachem aikonk borem distalem. Punn tannem xikoilem tem tanchea kallzak laglem dekhun te tacho pattlav korunk pavle. (Lukas 24:15, 27, 32) Tor Jehova ek khoro Dev ani tachea sangata ixttagot korunk zata toslo to Bapui ani Ixtt zaun asa mhunn tumchea Bible videartheak khatri zaunk zai. (St. 25:4, 5) Obheas ghetana Jehovachea gunnancher dhean diunk tumchea videartheak modot korat. (Sutt. 34:5, 6; 1 Ped. 5:6, 7) Tumi obheas kortat to vixoi khoincho-i asum, tantunt Jehova vixim kitem xikonk melltta tacher dhean diunk tumchea videartheak modot korat. Jehovache sobit gunn zoxe mog, doiallai ani doia-maia somzonk tumchea videartheak modot korat. Sogleam-von vhoddli ani poili adnea mhunnttlear, ‘Jehova tujea Devacho mog korop’ mhunn Jezun sanglem. (Mt. 22:37, 38) Jehovacho mog korunk tumchea videartheak modot korat.
13. Jehovachea sobit gunnam vixim xikonk eka videartheak koxi modot korunk zata tachea vixim ek udharonn diat.
13 Tumi kiteak Jehovacho mog kortat tem tumchea videartheak sangat. Tednam to pasun Jehovacho mog korunk pavtolo ani tachea sangata ixttagot zoddop gorjechem mhunn taka kollttolem. (St. 73:28) Udharonnak, tumi obheas kortat tea peregrafant vo versant Jehovacho mog, zannvai, neai vo xokti hea gunnam vixim sanglolem tem tumchea kallzak laglem kai? Toxem zalear, hea eka karonnak lagon tumi tumchea sorginchea Bapacho mog kortat mhunn tumchea videartheak sangat. Punn bautizm gheunk zai zalear tannem anik kitem tori korunk zai.
MITTINGEK HAJIR ZAUNK TAKA URBA DIAT
Zata titlea begin tumchea videartheak mittingek ieunk urba diat (Peregraf 14-15 polloiat)
14. Eka Bible videarthean vaddavoll korunk mittingek hajir zavop koxi modot korta tea vixim Hebrevank 10:24, 25 kitem sangta?
14 Amchea videartheamnim bautizm ghetlolo amkam zai. Oxem korunk ek mhotvachi vatt mhunnttlear mittingek hajir zaunk tankam urba divop. Rokddech mittingek ieunk suru kortat te videarthi begin vaddavoll kortat mhunn onnbhovi xikoupi sangtat. (St. 111:1) Bible obheasa thaun zaitem xikonk melltta tori astana thoim xikonk mellona ti mahiti, mittingek hajir zalolean melltta mhunn thodde xikoupi aplea videartheank sangtat. Tumchea videarthea sangata Hebrevank 10:24, 25 vachat ani mittingek ailolean taka koso faido zatolo tem taka somzaiat. Taka Raj-ghorant Kitem Ghoddta? * ho viddeo dakhoiat. Chukonastana mittingek hajir zavop gorjechem mhunn zannam zaunk tumchea videartheak modot korat.
15. Chukonastana mittingek hajir zaunk ami eka videartheak koxi urba diunk xoktat?
15 Tumcho videarthi ekui pavtti mittingek hajir zaunk na zalear vo thoddech pavtti mittingek hajir zata zalear tumi kitem korunk zata? Tumi halinchea eka mittingek xikleant tem, urben taka sangonk xoktat. Mittinge vixim tumkam koxem dista tem to polloita tednam mittingek ieunk taka pasun urba mellttoli. Mittingent jea prokaxonancher obheas kortat tim tankam diat, zoxe Pahrogopur vo Jivit ani Porgottnni Mittingechi Pustika. Fuddlea mittingent kitem xikchim asat tem taka dakhoiat ani tantunt khoincho vixoi taka aikonk avoddttolo tem taka vicharat. Hachea poilim tumcho videarthi dusrea eka dhormachea kariavollik hajir zala astolo. Punn amchea mittingek poile pavtti hajir zata tednam to jem kitem polloita ani aikota tem tachea poros ekdom vortem mhunn taka onnbhovunk mellttolem. (1 Kor. 14:24, 25) Mittingek hajir zata tednam to bhav-bhoinnank mellttolo ani tanchi bori dekh gheunk pavtolo jim taka bautizm gheunk modot kortolim.
16. Amchea Bible videartheank bautizm gheunk ami koxi modot korunk xoktat, ani fuddlea lekhant ami kitem xiktolim?
16 Amchea Bible videartheank bautizm gheunk ami koxi modot korunk xoktat? Dor sumanak obheas gheunk ani tachea poilim toiari korunk tumi tumchea videartheak urba ditat tednam to obheas kitlo mhotvacho tem taka kollttolem. Dor disa Jehova lagim uloun tachem aikon, tachea sangata ek ghott ixttagot korunk pasun taka ami urba diunk zai. Tea bhair, ami amchea videartheak mittingek ieunk urba diunk zai. (“ Videartheamnim Bautizm Gheunk Kitem Korunk Zai”.) Punn Bible videartheamnim bautizm gheunk anik panch vixoi korunk zai. Tea vixim ami fuddlea lekhant xiktolim.
^ per. 5 Eka munxak xikovop mhunnche tachea chintpant, bhavnant ani vagnnukent bodlav korunk modot korop. 2020 vorsachem vers, Matev 28:19-acher adarit asa. Tem vers amkam lokank Bible xikovop kitlem mhotvachem tem ani tannim bautizm gheun Jezu Kristacho xis zaunk ami koso adar diunk zata tem amchea ugddasak haddtta. Hem mhotvachem kam ami anik bore toren koxem korunk zata tea vixim ho lekh ani fuddlo lekh amkam modot kortolo.
^ per. 2 UTRACHI SOMZONNI: Tumi konnakui umkea disa vo vellar manddavollin Bible xikoitat zalear, tumi ek Bible obheas ghetat oxem zata. Eklean Bible obheas koso gheunk zata tem tumi taka dakhoilea uprant, tachea lagim hea toren don pavtti Bible obheas ghetlo zalear ani to Bible obheas ghe-it ravtolo mhunn tumkam dista zalear tumi ho Bible obheas mhunn tumchea sevechea riporttant ghalunk zata.
^ per. 3 Julay 2004 tem May 2005-achea, Our Kingdom Ministry hantunt “Conducting Progressive Bible Studies,” he lekh asle. Tea lekhamnim asloleo suchounneo pasun hea lekhant dileat.
^ per. 4 Hea lekhant ami Bible videarthi mhunnttat tednam, to videarthi dadlo vo bail-ui zaunk xokta.
^ per. 9 JW Library®-cher MEDIA > OUR MEETINGS AND MINISTRY > IMPROVING OUR SKILLS, hantunt Amchea Vid’dhearteamnim Koxi Toiari Korchi Tem Xikoun, ho char minttacho viddeo polloiat.
^ per. 10 LIBRARY > PUSTOKAM ANI PUSTIKA, hantunt vochat.
^ per. 14 JW Library®, hacher MEDIA > OUR MEETINGS AND MINISTRY > TOOLS FOR THE MINISTRY hantunt vochat.
