1. Bautizm ghetlolea Kristanvamnim kitem korit ravonk zai?

TUMI bautizm ghetla kai? Tea vellar tunvem soglea hujir tuka Jehovacher bhavarth asa ani tachea songottnne sangata tuka seva korunk zai mhunn tunvem dakhoun dilem. * Punn Jehovacher tumcho bhavarth tumi vaddoit ravonk zai ani aiz amchem kam korunk Jehova aplem songotton uzar korta hacher tumkam aslolo bhavarth ghott korit ravonk zai.

2-3. Jehova aiz aplea songottnnek khoinchea toren vatt dakhoita? Udharonnam diat.

² Aiz Jehova aplea songottnnek jea toren vatt dakhoita tantuntlean tacho sobhav, tacho ud’dhex ani tache dorje kitem tem dison ietat. Tor tachem songotton polloitana amkam dixtti poddttat tea tachea tin gunnam vixim polloum-ia.

³ Poilem, “Dev . . . ontor korina.” (Itihas 10:34) Jehovan sonvsaracho mog kelo dekhun tannem aplea Putak “somestanche soddvonnechem mol” mhunn dilem. (1 Tim. 2:6; Juanv 3:16) Tor aikonk sodhtoleank bori khobor porgottunk Jehova aplea lokank uzar korta. Hea toren, zata titlea lokank soddvonne udexim faido mellonk, mhunnche soddvonn mellonk Jehova modot korta. Dusrem, Jehova soglem manddavollin ani xantin korta. (1 Kor. 14:33, 40) Tor tachea songottnnent pasun tache sevok sogle xantin ani manddavollin kortole mhunn ami khatri dovrunk zata. Tisrem, Jehova ‘Vhodd Guruji’ zaun asa. (Iz. 30:20, 21) Taka lagon, sobhent ani porgottnnechea kamam udexim lokank Devachea Utrantlean xikounk tachem songotton khub vavurta. Jehovache he tin gunn adlea Kristi sobhent koxe dison aile? He gunn Jehovache lok amchea disamnim koxe dakhoitat? Ami Jehovachea songottnnent tachi seva kortana povitr xokti tumkam koxi modot korunk xokta?

4. Itihas 1:8-ant sanglolea pormonnem, Jezun aplea xisank kitem adnea dili, ani tankam kiteachi modot mellchi asli?

⁴ Poilea xekddeant. Jezun porgottlolea sondex-a udexim munxakullak bhorvonso mell’llo. (Lukas 4:43) Apnnem suru kelolem kam fuddem vhoronk tannem aplea xisank adnea dili. “Sonvsarachea ximam porian” sakx diunk tannem tankam sanglem. (Itihas 1:8 vachat) Punn tem kam te aplea svotachea bollan korunk xokonasle. Jezun bhasailolea ‘eka xarotichi vo modot korpeachi’ mhunnchem povitr xoktechi tankam goroz asli.—Juanv 14:26; Zek. 4:6.

5-6. Jezuchea xisank povitr xokten khoinchea vattamnim modot keli?

⁵ 33 K.X-achea Pon’nasavea disa, Jezuchea xisank povitr xokti mell’lli. Tea xokte udexim tim rokddich porgottnni suru korunk pavlim ani thoddeach tempa bhitor hozaramnim lokamnim bori khobor manun ghetli. (Itihas 2:41; 4:4) Dhumallo suru zalo tednam tim bhieunk nant, punn modot kor mhunn tannim Jehova lagim maglem. Tannim mhunnttlem: “Sogllea kalljidarponnan Tuzo nirop porgottunk Tujea sevokank nirmi.” Tednam tim povitr xokten bhorlim ani “kalljidarponnan Devachem utor porgottit ravlim.”—Itihas 4:18-20, 29, 31.

⁶ Jezuchea xisank her oddchonneo pasun asleo. Udharonnak, tea vellar Devachea Utracheo thoddeoch kopi asleo. Tea bhair, Bible-a vixim somzonni diunk tanche lagim prokaxonam naslim ani veg-veglleo bhaso uloitat toslea lokank xisamnim porgottunk zai aslem. Heo sogleo oddchonneo aslear pasun tea urbebhorit xisamnim, korunk zaunchem na oxem dislolem tem kam kelem. Sumar 30 vorsam bhitor, tannim “mollba khala aslolea sogllea monxam modem” porgottnni keli.—Kol. 1:6, 23.

7. 100-von chodd vorsam poilim, Jehova tanchea thaun kitem magta tem tachea sevokank koxi khobor asli, ani tannim kitem kelem?

⁷ Amchea disamnim. Jehova aplea lokank vatt dakhoit asa ani apli khuxi korunk tankam ghottai di-it asa. To chodd korun povitr xokte udexim prerit kel’lea Bible-a udexim amkam vatt dakhoita. Tantunt amkam Jezuchea porgottnne vixim ani tannem suru kel’lem kam korit ravonk tachea xisank tannem dil’li adnea vachunk melltta. (Mt. 28:19, 20) Julay 1881-antuch, hea masikent oxem boroil’lem: “Amkam munxam thaun man mellonk vo ami girest zaunk Jehovan amkam apounk na, vo obhixit korunk na, punn amchea lagim asa tem soglem porgottnni korunk uzar korunk lagon tannem amkam apoilam.” 1919 hea vorsak, To Whom the Work Is Entrusted, he lhan pustikent oxem sanglolem: “Kam khub asa, punn hem kam Somiachem zal’lean tacheach xokte vorvim tem ami korunk pavtolim.” Hoi, adlea Kristanvam sarke he bhav hea kamant dhiran khub vavurle karonn povitr xokti tankam veg-vegllea torechea lokank porgottunk modot kortoli mhunn tankam khatri asli. Teach bhaxen, aiz pasun povitr xokti amkam modot kortoli mhunn khatri asa.

8-9. Porgottnnechem kam fuddem vhoronk, Jehovachea songottnnen khoincheo riti apnnailea?

⁸ Bori khobor porgottun, Jehovachea songottnnen ekdom borim sadhonam uzar kel’leant. Hi sadhonam mhunnttlear, chhaplolim prokaxonam, “Photo-Drama of Creation,” phonograph, sound car, radio broadcast ani amchea disamnim kompuittor ani internet. Tea bhair, songottnnen hachea poili kednanch bhaxantor korunk na titlea bhasamnim mahiti bhaxontor kelea. Kiteak? Oxem kelolean soglea torechea lokank aplea mai-bhaxen bori khobor aikonk melltta. Jehova bhed-bhav korina dekhun “dor-eka desak, dor-eka kullak, dor-eke bhaxechea lokak, ani dor-eke porjek” bori khobor porgott zatoli mhunn tannem bhasailam. (Prok. 14:6, 7) Bible-antli khobor sogleank pavloli Jehovak zai.

⁹ Punn thoddea lokank tanchea ghora bhett diunk zaina. Karonn tim oslea ghoramnim vo building-amnim ravtat zoim lokank bhett  diunk porvangi na. Oslea lokam vixim kitem? Zata titlea lokank porgottunk lagon, veg-vegllea bhaxechi jahir porgottnni korunk Jehovan aplea songottnnek margdorxon dilem. Udharonnak, 2001-ant, France desant, Sonchalon Monddollan kartt ani mez uzar korun porgottunk porvangi dili. Tachea uprant her zageamnim pasun tem uzar kelem. Ani tacho porinnam khub boro zalo. 2011-ant United States hachea New York Xarant, lokanchi chodd gordi asli tea eka zagear jahir porgottnni novean suru keli. Hi manddavoll suru kel’lea poileach vorsa, 1,02,129 pustokam ani 68,911 masikam vanttlim. Ani 4,701 lokamnim Bible obheas gheunk itsa dakhoili. Tea kamak tenko diunk, Jehova apli povitr xokti uzar kortalo mhunn dison ailem. Tor Sonchalon Monddollan, sonvsarbhor kartt ani mez uzar korun porgottunk porvangi dili.

10. Porgottnnechem kam anik bore toren korunk ami kitem korunk zata?

¹⁰ Tumi kitem korunk xoktat. Porgottnni korunk Jehova mittinge udexim dita tem proxikxonn uzar korat. Tumchea sevechea grupa sangata chukonastana porgottnni korat. Tumi oxem kortat tednam tumchea grupantlim bhav-bhoinnam porgottnni ani xikounchem kam anik bore toren korunk tumkam modot korunk xoktat ani tanchea borea udharonnantlean tim tumkam urba diunk xoktat. Oddchonneo aslear pasun porgottnni korit ravat. Hea lekhachea mukhel versant sanglolea pormonnem ami Devachi khuxi amchea bollan korunk xokonant, punn povitr xoktechea bollan korunk xoktat. (Zek. 4:6) Jehova amkam goroz ti xokti ditolo mhunn amkam khatri asa, karonn ami tachem kam kortat.

11. Poilea xekddeant Jehovachea lokank songottit dovrunk Sonchalon Monddollan ekvottan koxem kam kelem?

¹¹ Poilea xekddeant. Jehovachea lokam modem manddavoll ani xanti samballunk Jerusalemant aslolea Sonchalon Monddollachea bhavamnim sangata mellon kam kelem. (Itihas 2:42) Udharonnak, sumar 49 K.X. hea vorsak zaitea Kristanvank sun’note vixim veg-vegllem chintop aslem. Tea vellar, Sonchalon Monddollan povitr xoktechea margdorxona  udexim hea vixoi-acher bhasabhas keli. Hea vixoi-acher sobha ekvottant nasleo zalear, porgottnnechem kam borea bhaxen zaunchem naslem. Sonchalon Monddollant apostl ani zantte Judev aslear pasun, sun’note vixim nirnnoi ghetana Judevancheo riti-rivazo vo sun’not gorjechi mhunn sangtat tanchem chintop apleacher probhav ghalunk tannim diunk na. Punn Devachem Utor uzar korun ani povitr xoktechea modotin tannim sarko nirnnoi ghetlo. (Itihas 15:1, 2, 5-20, 28) Hacho porinnam kitem zalo? Jehovan tanchea nirnnoi-acher besanv ghatlem. Sobhecho ekvott ani xanti tannim samball’lli ani porgottnnechem kam vaddot gelem.—Itihas 15:30, 31; 16:4, 5.

12. Aiz Jehovachea songottnnent soglem manddavollin cholta ani thoim xanti asa mhunn koxem kolltta?

¹² Amchea Disamnim. Jehovachea lokank songottit dovrunk ani tanchi xanti samballunk Jehovachea songottnnen zaito vavr kela. 1895-antuch, Novembr 15-chea Zion’s Watch Tower and Herald of Christ’s Presence hantunt 1 Korintkarank 14:40 hea versacher adarit ek lekh chhaplolo, zacho vixoi aslo “Mannsugen ani Manddavollin Kam Korop.” Tea lekhant oxem mhunnttlolem: “Songottit ravchea vixim adlea Kristi sobhank zaite vixoi boroilole . . . ‘Amcho bhorvonso upzonk adim boroilam’ tem bariksannen pallop ekdom gorjechem.” (Rom. 15:4) Teach bhaxen, aiz pasun Jehovachem songotton, Kristi sobha ekvottant dovrunk ani xanti samballunk khub vavurta. Udharonnak, tumi dusrea eka desant thoinchea eka sobhek bhett ditat zalear, mittingent Pahrogopur Obheas koso ghetat ani khoincho lekh bhasabhas kortat tem tumkam khobor asta. Tor tea novea zagear gelear pasun tumi tumcheach sobhek geleant oxem tumkam disonk puro! Osli ekvottkai fokot Devachea povitr xokte udexim asonk xokta.—Zef. 3:9.

13. Jakob 3:17 monant dovrun ami amkanch kosle prosn vicharunk zai?

¹³ Tumi kitem korunk xoktat. Xanti samballunk aplea lokamnim zata titlem kelolem Jehovak zai. (Ef. 4:1-3) Tumi tumkanch vicharat: ‘Sobhent ekvottkai ani xanti samballunk hanv proitn korta kai? Fuddakar ghetoleanchem utor hanv palltta kai? Mhaka sobhent zobabdari asat zalear, teo hanv borea bhaxen kortolo mhunn dusrim mhojer patieunk xoktat kai? Hanv sarkea vellar kam korpi, dusreank modot korpi, ani tanchi seva korunk  fuddem sorta toslo zaun asa kai?’ (Jakob 3:17.) Hea vattamnim tumi anik bore toren vavurchi goroz asa mhunn tumkam dista zalear, Jehovachi povitr xokti magat. Tumchea sobhavacher ani korneancher povitr xoktecho probhav poddtta tednam bhav-bhoinnam tumcho anik mog kortolim ani tumcho valor kortolim.

14. Koloskarank 1:9, 10 pormonnem, poilea xekddeantlea aplea lokank Jehovan koxem xikoilem?

¹⁴ Poilea xekddeant. Jehova aplea lokank xikounk khuxal zata. (St. 32:8) Tannim taka zannam zalolim, tacho mog kelolo, ani tachi opurbaiechim bhurgim zaun sasnank jielolim taka zai. Punn Jehova aplea lokank xikoina zalear, hem soglem ghoddonk xokona. (Juanv 17:3) Aplea lokank xikounk poilea xekddeant Jehovan Kristi sobha uzar keli. (Koloskarank 1:9, 10 vachat.) Jezun bhasailolo “xaroti” vo modot korpi mhunnche povitr xokte udexim pasun xisank modot mell’lli. (Juanv 14:16) Hea povitr xokte udexim tachea xisank Devachea Utrachi kholaiechi zannvai mell’lli ani Jezun kitem sanglolem ani kel’lem tem tanchea monant porot haddunk modot keli jem tannim xubhvortomanamnim boroun dovorlem. Hea gineana udexim adlea Kristanvancho bhavarth ani Devacher, tachea Putacher ani eka-mekacher tancho mog vaddlo.

15. Izaias 2:2, 3-ant Jehovan dil’li bhasaunni tannem khoinchea vattamnim purnn kelea ti tumi polloilea?

¹⁵ Amchea disamnim. “Xevottachea kallar” soglea raxttrantle lok aplea khorea sevokam sangata apli khori xikounn gheunk ektthaim zatolim mhunn Jehovan bhasailam. (Izaias 2:2, 3 vachat.) Hi bhasaunni purnn zata ti ami polloitat. Khoinchea-i khottea bhokte poros khori bhokti vorti zaun asa mhunn dison ieta. Ani Bible-a udexim Jehova aplea lokank kitli mahiti dita! (Iz. 25:6) ‘Visvaxi ani xannea chakra’ vorvim to amkam fokot bhorpur mahiti dina, punn veg-vegllea ritimnim mahiti dita, zoxi veg-vegllea prokaxonam udexim,  bhaxonnam udexim, karttuna udexim ani viddeo udexim. (Mt. 24:45) Jobacho ixtt Elihu sarkem amkam dista, zannem mhunnttlem: “tache [Deva] bhaxen konnanchean xikounk zata?”—Job 36:22.

16. Jehovachea xikounne thaun faido mellonk tumi kitem korunk zata?

¹⁶ Tumi kitem korunk zata. Devachea Utra thaun tumi jem kitem vachtat ani xiktat tem tumi tumchea jivitant apnnaunk povitr xokti tumkam modot kortoli. Tor stotrkara bhaxen magat: “Tuka visvaxi ravunk tunch mhaka vatt dakhoi, Sorvespora. Sogllea kallzan tuji bhokti korunk tunch mhaka xikoi.” (St. 86:11) Bible ani Jehovachea songottnne udexim mellttat tim prokaxonam vachat ani obheas korit ravat. Hem kortana tumcho dhei fokot ginean gheunchem nhoi, punn hem sot mhunn khatri korun gheunk ani tumchea jivitant apnnaunk asonk zai. Hem korunk Jehovachi povitr xokti tumkam modot korunk xokta. Tumi sobhentlea bhav-bhoinnank pasun urba diunk zai. (Heb. 10:24, 25) Kiteak? Tim pasun tumchea famili sarkim asat. Mittingent kallzant thaun zobab diunk, toxench tumkam ek bhag korunk melltta tednam tem borea bhaxen korunk povitr xokti di mhunn Jehova lagim magat. Hea toren, Jehova ani tachea Putachea ‘menddrancho’ tumi mog kortat mhunn dakhoitolim.—Juanv 21:15-17.

17. Tumi Jehovachea songottnnek visvaxiponnan tenko ditat mhunn khoinchea vattamnim dakhounk xoktat?

¹⁷ Beginuch prithumer ekuch songotton astolem. Tem Jehovachea povitr xoktechea margdorxona pormonnem choltolem. Tor Jehovachea songottnne sangata urben vavrat. Jehova bhed-bhav korinastana sogleancho mog korta. Teach bhaxen, tumkam mellttat tea sogleank bori khobor sangat. Sobha manddavollin ani xantin cholonk zai mhunn Jehova axeta. Taka lagon, sobhent xanti vaddouchi proitn korat. Ani tumcho Vhodd Guruji xikoita tem sogle mahitik kan diat. Oxem kelear Soitanacho sonvsar nas zata tednam tumkam bhirant dischi na. Bodlek, Jehovachea songonttnnent visvaxiponnan seva kortoleam sangata tumi dhiran poristhitincho fuddo kortolim.