1. Sogleant boro nirnnoi khoincho?

CHODDXE pavtt avoi-bapui ghetat tea nirnnoi-ank lagon bhurgeancher chodd temp probhav poddonk xokta. Tor avoi-bapaimnim sarke nirnnoi gheunk nant zalear tanchea bhurgeank tras zaunk xoktat. Punn tannim sarke nirnnoi ghetle zalear tanchea bhurgeanchem jivit khuxalkaiechem zaunk tim modot korunk xoktat. Punn tanchea bhurgeamnim pasun sarke nirnnoi gheunchi goroz asa. Ani sogleant boro nirnnoi mhunnttlear amchea mogall bapa Jehovachi seva korop.—St. 73:28.

2. Jezun ani tachea avoi-bapain kosle bore nirnnoi ghetle?

² Juzek ani Mariek aplea bhurgeamnim Jehovachi seva keloli zai asli. Ani ho tancho mukhel dhei aslo mhunn tannim ghetlolea nirnnoi-antlean dison ietalem. (Lukas 2:40, 41, 52) Jezun pasun bore nirnnoi ghetle. Taka lagon Jehovak kitem zai tem to korunk pavlo. (Mt. 4:1-10) Jezu ek doiall, visvaxi, ani dhirvont munis zalo. Jehovacho mog kortolea avoi-bapaink oslo ek put aslo zalear tim kitlim khuxal zata aslim!

3. Hea lekhant amkam khoinchea prosnanche zobab mellttole?

³ Hea lekhant ami hea fuddlea prosnanche zobab polloitolim: Jezu vixim Jehovan kosle bore nirnnoi ghetle? Juzen ani Marien ghetlolea nirnnoi-am thaun avoi-bapaimnim kitem xikonk zata? Ani Jezun ghetlolea nirnnoi-am thaun tornnatteamnim kitem xikonk zata?

4. Aplea puta pasot Jehovan khoincho mhotvacho nirnnoi ghetlo?

⁴ Jehovan Jezu pasot ekdom borim avoi-bapui vinchun kaddlim. (Mt. 1:18-23; Lukas 1:26-38) Marien kallzantlean mhunnttlolim utram amkam Bible-ant vachunk mellttat. Tantuntlean tika Jehova ani tachea Utra pasot aslolo kholaiecho  mog dison ieta. (Lukas 1:46-55) Ani Juzen Jehovachem aikolem tantuntlean to Jehovacho kitlo mog kortalo ani taka manvota tem korunk sodhtalo mhunn kollon ieta.—Mt. 1:24.

5-6. Jehovan aplea putak kitem onnbhovunk dilem?

⁵ Dhean diat, Jehovan Jezu pasot girest avoi-bapaink vinchun kaddunk nant. Jezu zolmolea uprant Juzen ani Marien bhettoilolea iodna udexim, tim gorib aslim mhunn kollon ieta. (Lukas 2:24) Nazaretant aplea ghora laginch Juzechem thovoi-achem kam korchem ek lhan dukhan aslem astolem. Tankam ghoddie uprant sat vo tachea poros chodd bhurgim posunk aslim dekhun tanchea lagim ghoddie chodd poixe vo vostu nasleo astoleo.—Mt. 13:55, 56.

⁶ Jehovan Jezuk thoddea dhokeam thaun vattailo. Punn tannem aplea putak soglea oddchonneam thaun rakhunk na. (Mt. 2:13-15) Udharonnak, Jezuchim thoddim soirim tacher patienaslim. Jezuchea familiche sodoxio to Mesias mhunn manun ghenasle. Haka lagon Jezu kitlo nirax zalo astolo tem chintat. (Marku 3:21; Juanv 7:5) Jezu tornnatto astanach, Juze ghoddie melo astolo. Tor taka khub kotthin zalem astolem. Karonn to bhurgeam modem malgoddo aslolean, thovoi-achem kam korchi zobabdari atam tacher aili astoli. (Marku 6:3) Jezu vhodd zalo toso to aplea familicho samball korunk xiklo. Tachea familicheo gorzo purnn korunk taka ghoddie khub koxtti vavr korcho poddlo zait. Tor disachea xevottak munis kam korun koso thokta tem Jezun onnbhovlem.

7. (a) Kazari zoddpeamnim aplea bhurgeank vaddounchea vixim apleakuch kosle prosn vicharunk zai? (b) Avoi-bapaink aplea bhurgeank proxikxonn diunk Mhonn’nneo 2:1-6-ant aslolim utram koxim modot korunk xoktat?

⁷ Tumi kazari, ani tumkam bhurgim asonk zai oxem tumkam dista zalear tumi tumkanch he prosn vicharunk zatat. ‘Eka bhurgeak zolm diun tacho samball korunk Jehovacho ani tachea Utracho mog kortat toslim khaltim avoi-bapui mhunn Jehova amkam lekhta kai?’ (St. 127:3, 4) Tumkam bhurgim asat zalear tumi tumkanch he prosn vicharat. ‘Koxtti vavr korop borem mhunn hanv mhojea bhurgeank xikoitam kai?’ (Up. 3:12, 13) ‘Soitanachea sonvsarant fuddo korunk poddonk xoktat toslea noitik ani her dokheam thaun hanv mhojea bhurgeank rakhunk mhojean zata titlem kortam kai?’ (Mho. 22:3) Tumi tumchea bhurgeank soglea oddchonneam thaun rakhunk xokonant ani xokchim-i nant. Punn tanchea jivitant ietat tea trasancho fuddo korunk tumi tankam toiar korunk xoktat.  Hem korunk tumi tankam Bible-antleantle sol’le koxe apnnaunk zatat tea vixim mogan xikounk zata. (Mhonn’nneo 2:1-6 vachat.) Udharonnak, tumcho ek soiro Jehovachi seva korop bond korta zalear tumi tumchea bhurgeank Jehovak sodanch visvaxi ravop kiteak gorjechem tem Bible-antlean somzaiat. (St. 31:23) Vo tumcho konnui mogacho melo zalear tea vellar dukhacho fuddo korun xanti mellonk Bible-antlim versam koxim modot korunk xoktat tem tumchea bhurgeank dakhoiat.—2 Kor. 1:3, 4; 2 Tim. 3:16.

8. Juzen ani Marien Dusri Somurt 6:6, 7-ant sanglolea pormonnem kitem kelem?

⁸ Jehovan avoi-bapaink dil’lea margdorxona pormonnem, Juzen ani Marien Jezuk vaddoilo. Taka lagon to vhodd zalo tednam taka Devachi maniotai mell’lli. (Dusri Somurt 6:6, 7 vachat.) Juze ani Mari Jehovacho khub mog kortalim. Ani osloch mog tanchea bhurgeanchea kallzant vaddovop, ho tancho mukhel dhei aslo.

9. Juzen ani Marien kosle bore nirnnoi ghetle?

⁹ Juzek ani Mariek aplea bhurgeam sangata chukonastana Devachi bhokti korchi sonvoim asli. Tim Nazaretant aslolea devsthanant choltolea dor sumanachea mittingek hajir zatalim. Ani toxench tim Jerusalemant Pask monounk voitalim. (Lukas 2:41; 4:16) Jerusalemak provas kortana tim ghoddie Jezuk ani aplea her bhurgeank adim Jehovachea lokank kitem ghoddlem tea vixim sangtalim astolim. Tea bhair, provas kortana tim ghoddie Devachea Utrant sanglolea zageank bhett ditalim zait. Juzechi famil vaddlolean, Jehovachi bhokti korchi sonvoim samballunk tankam ghoddie kotthin zalem astolem. Toriastana, tim Jehovachi bhokti chukonastana korit ravlim. Punn tannim toxem kelolean tankam mell’llolea faidea vixim chintat! Tannim Jehovachi bhokti poilea zagear dovorlolean tanchi famil Jehova sangata ghott ixttagot samballunk pavli.

10. Juze ani Marie thaun Kristi avoi-bapui kitem xikonk xoktat?

¹⁰ Avoi-bapaimno, tumi Juze ani Mariechi dekh koxi gheunk zata? Chodd mhotvachem mhunnttlear, tumi Jehovacho kitlo mog kortat tem tumchea utramnim ani korneamnim tumchea bhurgeank dakhoun diat. Tumi tumchea bhurgeank diunk xoktat tem vhoddantlem vhodd dennem mhunnttlear,  tankam Jehovacho mog korunk modot korop. Ani tumi tankam xikounk zata tem ekdom borem lisanv mhunnttlear, obheas ani magnnem korchi, toxench mittingent ani porgottnnent bhag gheunchi bori sonvoim vaddounk xikovop. (1 Tim. 6:6) Tumi tumchea bhurgeank gorjecheo vostu diunk zai tem khorem. (1 Tim. 5:8) Punn ugddas dovrat, Soitanacho sonvsar nas zatolo tednam, poixe ani girestkai tumchea bhurgeancho jiv vachouncho na. Tachea bodlek, Jehova sangata tanchi ixttagot ghott asa zalear tim novea sonvsarant pavtolim. *—Ez. 7:19; 1 Tim. 4:8.

11. (a) Aplea bhurgeank vaddoitana, tanchea pasot bore nirnnoi gheunk avoi-bapaimnim 1 Timotak 6:17-19-ant dilolo sol’lo koso apnnaunk zata? (b) Tumchea familin khoinche dhei dovrunk zata, ani taka lagon tumkam koslim besanvam mellonk xoktat? (“ Tumi Khoinche Dhei Melloun Gheunk Proitn Kortolim?” hem boks polloiat.)

¹¹ Aiz zaitea Kristi avoi-bapaimnim, aplea bhurgeank Jehovachea lagim soronk bore nirnnoi ghetleat mhunn ami kitlim khuxal asat! Tim tanchea sangata mellon chukonastana Jehovachi bhokti kortat. Tim sobhechea mittingek ani odhivexonak voitat ani sevent bhag ghetat. Thoddeo famil chodd porgottnni zaunk na toslea vattarant vochon seva kortat. Ani thoddim Bethel-ak bhett ditat vo songottnnek sombondit aslolea bandkamant pasun tenko ditat. Hem korunk tankam zaito khorch ani ghoddie thoddea oddchonneancho fuddo korcho poddot. Punn tim kortat tea soglea vavracher Jehova khub besanv ghaltolo. (1 Timotak 6:17-19 vachat.) Oslea familimnim vaddlolim bhurgim, chodd korun vhodd zalea uprant heo sonvoim-o samballttat. Ani apleak xikoilʼlea pasot tim aplea avoi-bapaichim khub upkari astat! *—Mho. 10:22.

12. Jezu vhodd zalea uprant taka kitem korchem poddlem?

¹² Jezucho sorgincho Bap sodanch bore nirnnoi gheta. Ani Jezu prithumer astana tachea avoi-bapain pasun bore nirnnoi ghetle. Punn Jezu vhodd zal’lea uprant, taka aple svotache nirnnoi gheunche poddle. (Gal. 6:5) Taka pasun amchea bhaxen borem ani vaitt vinchun kaddchi tank asli. Taka zai zalear Devachi khuxi soddun tannem apli khuxi korunk zatali. Punn toxem korchea bodlek tannem Jehova sangata ek ghott ixttagot samball’lli. (Juanv 8:29) Aiz tornnatteamnim tachi dekh koxi gheunk zata?

13. Jezun lhan astananch kitem kelem?

¹³ Jezu prithumer ek lhan bhurgo aslo tednam, tannem aplea avoi-bapaichem aikolem. Apnnank tanchea poros chodd zannam mhunn chintun tannem kednanch tanchem margdorxon nakarunk na. Bodlek, “to tankam khalto ravlo.” (Lukas 2:51) Jezu malgoddo put aslo dekhun, taka zobabdari asli. Ani teo zobabdari samballunk apleachean zata tem  soglem tannem kelem astolem. Aplea bapai Juze thaun thovoiachem kam xikon aplea familicheo gorzo purnn korunk to khub vavurlo astolo.

14. Jezu Devachea Utracho boro videarthi aslo mhunn ami koxim zannant?

¹⁴ Jezucho zolm ek vizmit aslem ani tachea zolma vellar devdutamnim kitem sanglem tem ghoddie Juzen ani Marien, Jezuk sanglem astolem. (Lukas 2:8-19, 25-38) Jezu fokot dusream thaunuch xikonk na. Punn to Devachem Utor obheas korun pasun xiktalo. To Devachea Utracho ek boro videarthi aslo mhunn ami koxim zannant? Jezu 12 vorsancho aslo tednam, Jerusalemant aslolea xikoupeank, “tachea gineanachem ani tachea zobabanchem mottem ojap dislem.” (Lukas 2:46, 47) Tea lhan piraieruch tannem Jehova aplo Bapui mhunn khatri korun ghetloli.—Lukas 2:42, 43, 49.

15. Jezun Jehovachi khuxi korcho nirnnoi ghetlo mhunn ami koxim mhunnonk xoktat?

¹⁵ Apnnen kitem kelolem Jehovak zai tem Jezuk koll’llea uprant tannem tachi khuxi korunk nirnnoi ghetlo. (Juanv 6:38) Hem kortana lok tacho dves kortolo ani tem sosunk apleak sompem zaunchem na mhunn pasun taka khobor asli. Tori astana, Jehovachi khuxi purnn korunk tannem nichov kelo. Jezun 29 K.X.-ant bautizm ghetlo tednam thaun moro porian, tannem Jehovachi khuxi keli ani hoch tachea jivitacho ud’dhex aslo. (Heb. 10:5-7) Ani khambear vollvollttalo tednam pasun to Jehovachi khuxi korit ravlo.—Juanv 19:30.

16. Bhurgeamnim Jezu koddlean koslem ek lisanv xikonk zata?

¹⁶ Avoi-bapaichem utor aikat. Juze ani Marie bhaxen tumchim avoi-bapui pasun poripurnn nant mhunn ugddas dovrat. Tori astana, tumcho samball korunk, tumkam proxikxonn diunk ani tumkam vatt dakhounk tannem tumchea avoi-bapaink zobabdari dilea. Tor tumi tumchea avoi-bapaichem utor aikotat ani tankam khaltim ravtat zalear ‘tumchem borem zatolem.’—Ef. 6:1-4.

17. Joshua 24:15-a pormonnem, bhurgeamnim svota koslo nirnnoi gheunk zai?

¹⁷ Tumi konnanchi seva kortolim, to nirnnoi gheiat. Jehova koslo, tacho ud’dhex kitem, tachi khuxi kitem, ani amchea jivitant ami tachi khuxi koxim kortat tem ami dakhoun diunk zai. (Rom. 12:2) Tednam, tumi tumchea jivitant sogleant mhotvacho nirnnoi gheunk pavtolim. To mhunnttlear, Jehovachi seva korcho nirnnoi. (Joshua 24:15 vachat; Up. 12:1) Tumi chukonastana Bible vachtat ani tacho obheas kortat zalear, Jehova pasot  tumcho mog vaddttolo ani tacher aslolo tumcho bhavarth ghott zait ravtolo.

18. Bhurgeamnim koslo nirnnoi gheunk zai, ani toxem kel’lean tankam kitem mellttolem?

¹⁸ Tumi tumchea jivitant Jehovachi khuxi poilea zagear dovortolim mhunn nirnnoi gheiat. Ami amchi tank amchea faideak lagon uzar kortat zalear ami khuxal astolim mhunn Soitanacho sonvsar sangta. Punn khorem mhunnttlear, sonvsarik vostu melloun gheunche dhei dovortat tim apleacheruch ‘sobar koxtt-dogd voddun haddttat.’ (1 Tim. 6:9, 10) Tachea bodlek, tumi Jehovachem aikon tachi khuxi tumchea jivitant poili dovorli zalear ‘tumkam ies mellttolo ani tumchim soglim kamam xarti pavtolim.’—Josh. 1:8.

19. Avoi-bapaimnim kitem ugddas dovrunk zai?

¹⁹ Avoi-bapaimno tumchea bhurgeank Jehovachi seva korit ravonk zata titli modot korat. Jehovacher patieun ravat ani tachea modotin tumi sarke nirnnoi gheunk pavtolim. (Mho. 3:5, 6) Tumi tumchea bhurgeank kitem sangtat, tachea poros tumi kitem kortat tacho tancher chodd probhav poddttolo. Tor tumi nirnnoi ghetana tumchea bhurgeank Jehovachi maniotai melltta tosle nirnnoi gheiat.

20. Bhurgeamnim Jehovachi seva korcho nirnnoi ghetlo zalear tankam koslim besanvam mellttolim?

²⁰ Bhurgeamno tumchea jivitant tumi bore nirnnoi gheunk tumchim avoi-bapui tumkam modot korunk xoktat. Punn tumi Jehovak khuxal kortolim vo na, tem tumcher asa. Tor Jezuchi dekh gheun tumchea mogall sorginchea Bapachi seva korcho nirnnoi gheiat. Tumi oxem kortat zalear, atam pasun tumi dhadosponnachem jivit jieunk xoktolim ani Jehovachea sevent tumi zaitem korunk pavtolim. (1 Tim. 4:16) Toxench fuddarak, novea sonvsarant tumchean chintunk zaina titli khuxalkai tumkam onnbhovunk mellttoli!