1. Tumi dusream sangata ghott ixttagot koxi korunk zata?

CHODDXE pavtti, eka munxa sangata laginchi ixttagot korunk zaito vell sarcho poddtta. Jitlim tumi ekameka sangata uloitat, tumche vichar ani onnbhov ekamekak sangtat, titli tumchi ixttagot ghott zatoli. Jezu sangata laginchi ixttagot kortolim zalear amkam thoddea oddchonneancho fuddo korcho poddtta. Teo khoincheo?

2. Ami fuddo kortat ti poilim oddchonn khoinchi?

² Poili oddchonn mhunnttlear, ami Jezuk kednanch pollounk na. Ani poilea xekddeantlea Kristanvamnim pasun Jezuk kednanch pollounk naslo. Punn, apostl Pedrun oxem mhunnttlem: “Tumi Taka polleunk na, tori tumi Tacho mog kortat; tumi ozun Taka pollenant, tori Tacher tumi bhavarth dovortat.” (1 Ped. 1:8) Tor ami Jezuk pollounk na tem khorem, punn ami tachea sangata ek ghott ixttagot korunk zata.

3. Ami fuddo kortat ti dusri oddchonn khoinchi?

³ Dusri oddchonn mhunnttlear, ami Jezu lagim ulounk xokonant. Ami Jehova lagim magnnem kortat tednam, ami tachea lagim uloitat. Ami Jezuchea nanvan magnnem kortat tem khorem, punn ami Jezu lagim magnnem korinant. Khorem mhunnttlear, Jezuk ami tachea lagim magnnem kelolem naka. Kiteak lagon? Karonn magnnem ek bhokti zaun asa, ani ti fokot Jehovakuch vochonk zai. (Mt. 4:10) Tori astana, ami Jezu pasot amcho mog dakhounk zata.

4. Tisri oddchonn khoinchi, ani hea lekhant ami kitem bhasbhas kortolim?

 ⁴ Tisri oddchonn mhunnttlear, Jezu sorgar asa, tor amkam tachea sangata vell sarunk mellona. Tori astana ami Jezu vixim zannam zaunk zata. Tachea sangata ixttagot ghott korunk khoincheo char vostu amkam modot kortoleo teo ami polloum-ia. Punn poilim, ami Jezu sangata ek ghott ixttagot zoddop kiteak gorjechem tea vixim bhasbhas korum-ia.

5. Ami Jezuche ixtt kiteak zaunk zai? (“ Jezu Sangata Ixttagot Zoddlolean Ami Jehovache Ixtt Zatat” ani “ Jezuk Aslolea Podve Vixim Sarkem Chintop Dovrat,” him boksam polloiat.)

⁵ Jehova sangata ek ghott ixttagot korunk zai zalear, ami Jezuche ixtt zavop gorjechem. Kiteak? Ami fokot don karonnam polloum-ia. Poilem, Jezun aplea xisank sanglem: “Bap khaxa tumcho mog korta, kiteak tumi Mhozo mog kela.” (Juanv 16:27) Tannem oxem-i sanglem: “Konnuch Bapa-xim vochona bogor Mhoje-vorvim.” (Juanv 14:6) Jezu sangata ixttagot zoddinastana, Jehova lagim ixttagot zoddunk proitn korop mhunnche dar uzar korinastana eka ghora bhitor vochonk proitn korop, oxem zaun asa. Jezun oslich ek vopar uzar korun apnnak “menddramchem dar,” oxem mhunnttlem. (Juanv 10:7) Dusrem, aplea Bapak aslole gunn tannem purnn toren dakhoile. Tannem aplea xisank sanglem: “Jim konn Mhaka polletat, tim Mhojea Bapak polletat.” (Juanv 14:9) Tor Jehovak vollkhon gheunk ek mhotvachi vatt mhunnttlear, Jezuchea jivita vixim xikop. Ami jitlim Jezu vixim xiktat titlo tachea pasot amcho mog vaddttolo. Ani jitlo ami Jezucho mog kortat, titlo tachea Bapaicho ami mog korunk pavtolim.

6. Jezu sangata ixttagot zoddunk anik ek karonn kitem? Somzaiat.

 ⁶ Devan amchim magnnim aikonk zai zalear ami Jezuche ixtt zavop gorjechem. Hacho orth ami fokot magnneachea xevottak “Jezuchea nanvan” mhunnttlem mhunn zaina. Bodlek, amchea magnneacho zobab diunk Jehova, Jezuk koso uzar korta tem ami zannam zaunk zai. Jezun aplea apostlank sanglem: “Tumi Mhojea nanvan magxat titlem-i Hanv kortolom.” (Juanv 14:13) Jehova amchem magnnem aikota ani zobab dita, tem khorem. Punn apnnem tharailolem tem korunk tannem Jezuk odhikar dila. (Mt. 28:18) Tor amchea magnneank zobab diunchea poilim, ami Jezun sangloli adnea pall’llea kai mhunn to polloita. Udharonnak, Jezun sanglem: “Tumi dusreancheo chuki bhogxitat zalear, tumcho sorgincho Bap tumkam-i bhogxitolo. Punn tumi dusreank bhogxina zaxat zalear, tumcho Bap tumcheo-i chuki bhogxicho na.” (Mt. 6:14, 15) Tor Jehova ani Jezu amchea sangata jea toren vagtat, teach toren ami dusream lagim vagop kitlem gorjechem!

7. Jezuchea bolidana thaun konnak faido melltta?

⁷ Jea konnak Jezu sangata ghott ixttagot asa tankach tachea bolidana thaun faido melltta. Ami hem koxem zannam? Apunn aplo jiv “aplea ixttam pasot” ditolo mhunn Jezun sanglem. (Juanv 15:13) Jezu prithumer ieunchea poilim Jehovachi seva visvaxiponnan kelolea lokank Jezu vixim xikchem poddttolem ani uprant tacho mog korunk poddttolo. Abraham, Sara, Moizes ani Rahab oslea dadlea ani bailanchem punorjivontponn zatolem. Tea vellar Jehovachea hea nitivont sevokank pasun sasnachem jivit zoddunk Jezu sangata ghott ixttagot zoddchi poddttoli.—Juanv 17:3; Itihas 24:15; Heb. 11:8-12, 24-26, 31.

8-9. Juanv 15:4, 5-ant somzail’lea pormonnem, ami Jezuchim ixtt aslolean amkam kitem melltta, ani tem kiteak gorjechem?

⁸ Devachea Rajeachi bori khobor porgottunk ani xikounk Jezu sangata kam korchi amkam ek vhodd sondhi asa. Jezu prithumer ek xikxok zaun aslo. Ani to sorgar gelea uprant sobhecho mostok zaun, porgottnnechea ani xikoupachea kamant margdorxon di-it asa. Apli ani aplea Bapachi vollokh gheunk tumi dusreank modot korunk ghaltat to proitn to polloita ani tacho valor korta. Khorem mhunnttlear, Jehova ani Jezuchea modoti bogor ami hem kam korunkuch xokonant.—Juanv 15:4, 5 vachat.

⁹ Jehovak khuxal kortolim zalear ami Jezucho mog korunk zai ani to mog sodanch sambhallunk zai mhunn Devachem Utor amkam spoxttponnin sangta. Tor Jezuchim ixtt zaunk ami gheunk zai tim char pavlam polloum-ia.

10. Jezu sangata bori ixttagot zoddunk ami gheunk zai tem poilem pavl khoinchem?

¹⁰ (1) Jezu vixim zannam zaiat. Hem ami Matev, Marku, Lukas, ani Juanvachem pustok vachlolean korunk zata. Hea pustokanmnim Jezuchea jivita vixim sanglam tacher ami niallttat tednam, Jezu lokam sangata doiallaien vaglo mhunn amkam kollon ieta. Taka lagon Jezu pasot amcho mog ani resped vaddtta. Udharonnak, Jezu xisancho dhoni asonui, tannem tankam chakram bhaxen lekhunk na. Bodlek, tannem aplim chintnam ani bhavnam tankam sanglim. (Juanv 15:15) Te dukhi zatale tednam Jezu pasun dukhi zalo ani tanchea sangata roddlo. (Juanv 11:32-36) Zannem tacho sondex aikolo tancho Jezu ixtt zalo mhunn Jezuchea virodheank pasun khobor asli. (Mt. 11:19) Jezu jea  toren aplea xisam sangata vaglo, tachi ami dekh ghetli zalear, dusream sangata ami bori ixttagot korunk pavtolim, ami chodd dadhoxi ani khuxal astolim, ani Jezu pasot amcho mog ani resped anik vaddttolo.

11. Jezuchi ixttagot zoddunk dusrem pavl khoinchem, ani tem kiteak gorjechem?

¹¹ (2) Jezuchem chintop ani vagnnuk apnnaiat. Jitlim ami Jezuk vollkhotat ani tachem chintop apnnaitat, titli tachea sangata amchi ixttagot ghott zatoli. (1 Kor. 2:16) Ami Jezuchi dekh koxi gheunk zata? Ami ek udharonn polloum-ia. Apli khuxi korunk chintchea poros, tannem dusreank modot korchea vixim chintlem. (Mt. 20:28; Rom. 15:1-3) Taka ho sobhav aslo dekhun, to svotacho teag korunk ani dusreank bhogsunk toiar aslo. Lokamnim taka kitem-i mhunnttlem zalear to rokddoch ragar zainaslo. (Juanv 1:46, 47) Konnui chuk korta zalear, ti chuk to monan gheun bosonaslo. (1 Tim. 1:12-14) Jezun sanglem: “Ekamekacho mog korxat zalear, hache voilean tumi Mhoje xis mhonn sogllea monxank kolltolem.” (Juanv 13:35) Tumi tumkanch vicharat, “Jezuchi dekh gheun, hanv mhojea bhav-bhoinnam sangata xanti sambhallunk zata titlo proitn kortam kai?”

12. Jezuche ixtt zaunk ami gheunk zai tem tisrem pavl khoinchem, ani ami hem pavl koxem gheunk zata?

¹² (3) Kristachea bhavank tenko diat. Aplea obhixikt bhavam pasot ami jem kortat tem Jezu apleak kel’lea sarkem oxem to polloita. (Mt. 25:34-40) Ami Kristachea bhavank tenko diunchi ek mukhel vatt mhunnttlear, Jezun aplea xisank sanglolea porgottnnechea kamant ani xis korpachea kamant purnn toren vantto ghevop. (Mt. 28:19, 20; Itihas 10:42) Jezuche bhav, hem sonvsarbhor cholta tem porgottnnechem kam ‘her menddranchea’ adaranuch korunk xoktat. (Juanv 10:16) Tum her menddrantlo eklo asa zalear, dor ek pavtti tum hea kamant bhag gheta tednam tuka fokot obhixiktanchoch nhoi, punn Jezucho pasun mog asa mhunn tum dakhoun dita.

13. Lukas 16:9-ant sanglolea pormonnem, ami Jezuchim utram koxim pallunk zata?

¹³ Jehova ani Jezu margdorxon ditat tea kamant ami dan ditat tednam pasun ami tanchea sangata ixttagot zoddttat. (Lukas 16:9 vachat.) Udharonnak, sonvsarbhorchea kamak lagon ami dan korunk xoktat, zoxem poixil’lea ganvant vochon porgottnni korunk lagta to khorch bhagounk, Raj-ghoram ani her osle zage bandunk ani dekhrekh korunk lagta to khorch, ani odruxttank sampoddlolea bhav-bhoinnank modot korunk lagon poixe diunk zata. Amchea sobhent lagta to khorch bhagounk pasun ami poixe diunk zata ani zankam poixeanchi goroz asa mhunn ami zannant, tankam pasun ami modot korunk zata. (Mho. 19:17) Hea thoddea ritimnim ami Kristachea bhavank modot korunk xoktat.

14. Efezkarank 4:15, 16-ant dakhoil’lea pormonnem, Jezuche ixtt zaunk chovtem pavl khoinchem?

¹⁴ (4) Kristi sobhent aslolea manddavollik tenko diat. Amchi kallji gheunk bhav ghetat tea nirnnoi-ank ami tenko ditat tednam sobhecho mostok zaun aslolea Jezu sangata amchi ixttagot anik ghott zata. (Efezkarank 4:15, 16 vachat.) Udharonnak, aiz songotton soglim Raj-ghoram purnn toren uzar korunk sodhta. Taka lagon, sonvsarbhor ek sobha dusrea sobhe sangata zoddchi manddavoll thoddea sobhamnim kelea. Ani tankam tea toren vattar vattun dileat. Hea manddavolli udexim zaito khorch unno zala. Haka lagon, thoddea porgottnnarank thodde bodlav pasun korche poddleat. Zoxem, thoddim bhav-bhoinnam zaitea vorsam thaun ekach  sobhent voitalim ani thoim tankam zaite bore ixtt asle astole. Punn atam tankam dusre eke sobhent vochonk poddlem. Jezuche visvaxi xis hea manddavollik tenko ditat tem polloun to kitlo khuxal zalo astolo!

15. Fuddarak Jezu sangata amchi ixttagot anik ghott koxi zatoli?

¹⁵ Povitr xokten obhixikt zal’leank, Devachea Rajeant Jezu sangata sodankall raj korpachi sondhi asa. Te Jezu sangata astole, taka polloitole, tachea lagim uloitole, ani tachea sangata vell sartole. (Juanv 14:2, 3) Prithumer jieunk bhorvonso asloleank Jezucho mog mellttolo ani to tanchi kallji ghetlolo. Tim Jezuk pollounchim nant tem khorem, punn Jehova Devan ani Jezu Kristan tankam khuxalkaiechem jivit dilam tem jietana, tanchi Jezu sangata ixttagot ghott zait voitoli.—Iz. 9:5, 6.

16. Jezu sangata ixttagot kel’lean amkam koslim besanvam mellttat?

¹⁶ Ami Jezuche ixtt zaunk fuddem sortat tednam, amkam zaitim besanvam mellttat. Udharonnak, amkam atam tacho mog ani tenko melltta. Amkam sasnank jieunchi sondhi asa. Ani sogleant mhotvachem mhunnttlear, amchi Jezu sangata ixttagot aslear tacho Bapui Jehova sangata amkam laginchi ixttagot korunk modot zatoli. Jezuche ixtt mhunn vollkhonk kitlo vhoddlo ek sueog zaun asa!