1-2. Jezun xevottachim utram mhunnttlim tednam poristhiti koxi asli tem sangat.

TARIK Nisan 14, 33 K.X. Jezucher khotto arop ghatlolo ani tannem korunk naslolea guneanvak taka guneanvkari mhunn tharail’lo. Tachim fokannam kel’lim ani taka krur toren marun tache hat ani paim khambear khillail’le. Taka svas gheunk ani ulounk pasun khub tras zatale. Tori astana to uloita, karonn taka mhotvache vixoi sangche asle.

² Jezu morchea adim tannem kitem sanglem ani tantuntlean ami kitem lisanvam xikonk zata tem atam ami polloum-ia, mhunnchem atam ‘tachem aikom-ia.’​—Mt. 17:5.

3. Jezun “Bapa, tankam bhogos” mhunn maglem tednam to konnam vixim magtalo zait?

³ Jezun kitem mhunnttlem? Jezuk khambear khillail’lo astana tannem oxem maglem: “Bapa, tankam bhogos.” Jezun konnank bhogos mhunn sanglem? Tacho zobab amkam fuddlea utramnim melltta: “Apunn kitem kortat tem te nokllot.” (Lukas 23:33, 34) Tor Jezu hanga ghoddie taka khambear khillail’lea Romi soinikam vixim sangtalo zait, zankam tachi vollokh nasli. Vo tachea monant te lok asle astole zannim taka jivexim marunk lail’lo, punn je uprant tacher bhavarth dovorche asle. (Itihas 2:36-38) Tor zannim tacher on’neai kelo tancher ragar zaunchea bodlek Jezun tankam bhogos mhunn Deva lagim maglem.​—1 Ped. 2:23.

4. Jezu aplea virodheank bhogsunk toiar aslo, tantuntlean ami kitem xiktat?

 ⁴ Jezuchea utrantlean ami kitem xiktat? Jezu sarkem ami dusreank bhogsunk toiar asonk zai. (Kol. 3:13) Amchim soirim vo her zannam amchea patienniek lagon vo ami koxim jietat taka lagon amcho virodh korunk puro. Tim amchea vixim fott ulounk xoktat, dusream mukhar amkam loz korunk xoktat, amchim prokaxonam pidd’ddear korunk xoktat vo amkam martolim mhunn dhomkaunk pasun xoktat. Tor tanchea pasot monant rag dovrun ravchea bodlek, sota pasot tanchem mon uktem kor mhunn ami Jehova lagim magnnem korunk zata. (Mt. 5:44, 45) Amcher chodd on’neai zala zalear, thodde pavtti amkam herank bhogsunk kotthin zait. Punn ami ragaruch ravlim ani bhogxina zalear, tacho amcheruch vaitt porinnam zaunk xokta. Ek bhoinn mhunntta: “Dusreank bhogsop mhunnchem tannim kelam tem sarkem mhunn hanv manun gheta oxem nhoi vo tankam mhoje lagim vaitt toren vagonk dita oxem nhoi. Punn hacho orth hanv tancho rag dhorun bosona.” (St. 37:8) Tor ami bhogxitat zalear, ami rag dhorun boschim nant.​—Ef. 4:31, 32.

5. Jezun tea chorak kitem bhorvonso dilo, ani kiteak?

⁵ Jezun kitem mhunnttlem? Jezuchea donui vatten dog chorank khambear umkallailole. Survatek tea donui choramnim Jezuchim fokannam kelim. (Mt. 27:44) Punn uprant, Jezun “kainch vatt korunk na” mhunn ektteak kollon ailem. Tor tannem fokannam korchim bond kelim. (Lukas 23:40, 41) Tea bhair, Jezu moron punorjivont zatolo ani ek dis to raza zatolo mhunn pasun taka visvas aslo. Tannem mhunnttlem: “Jezu, raiponnachi podvi gheun tum ietai tednam, mhozo ugddas kor.” (Lukas 23:42) Tor tea choracho bhavarth polloun Jezun taka mhunnttlem: “Aiz hanv tuka khorench sangta, tum mhojea sangata [mhojea Raj’jeant nhoi, punn] Sobit Bhag zal’le prithumer astolo.” (Lukas 23:43, NW) Hanga Jezun “hanv” “tuka” ani “mhojea” him utram uzar korun ho bhorvonso khas korun beginuch moronk aslolea tea chora pasot aslo mhunn tannem dakhoun dilem. Karonn aplo Bapui doia dakhoupi mhunn taka khobor asli.​—St. 103:8.

6. Jezun eka chorak sanglolea utram thaun ami kitem xiktat?

⁶ Jezuchea utrantlean ami kitem xiktat? Jezun poripurnn toren aplea Bapaik aslole gunn dakhoile. (Heb. 1:3) Tor ami chuktat tednam ami poschatap korunk zai, Jezuchea bolidanacher bhavarth dovrunk zai ani Jehova lagim bhogsonnem magonk zai. Tednam Jehova amkam doia dakhoun bhogxitolo. (1 Juanv 1:7) Punn thodde pavtti tumi adim kelolim patkam Jehovan atam meren bhogsunk na mhunn tumkam dista kai? Toxem zalear, hea vixim chintat: Bhavarth dakhounk suru kelolea tea chorak doia dakhounk Jezu toiar aslo zalear, apli adnea pallunk apleachean zata tem soglem korunk proitn kortolea aplea sevokank Jehova kitli doia dakhoitolo!​—St. 51:1; 1 Juanv 2:1, 2.

7. Juanv 19:26, 27-a pormonnem, Jezun Mariek ani Juanvak kitem sanglem, ani kiteak?

⁷ Jezun kitem mhunnttlem? (Juanv 19:26, 27 vachat.) Jezuchi avoi tednam ghoddie vidva asli dekhun taka tichi chint’ta zali. Tachim bhav-bhoinnam ticheo her gorzo purnn kortolim aslim. Punn tika  Deva lagim ixttagot ghott samballunk konn modot kortolo? Jezuk aplea avoicho mog ani kallji asli dekhun tannem aplea visvaxi apostl ani ekdom lagincho ixtt Juanvak hem korunk vinchun kaddlo. Karonn tachim bhav-bhoinnam tednam meren tachim xis zal’lim mhunn Bible khoinch sangona. Punn aplea sangata Jehovachi bhokti kortoleank Jezun apli famil koxi lekhlim. (Mt. 12:46-50) Tor Juanvacher hi zobabdari sompoitana tannem aplea avoik mhunnttlem: “Ho tuzo put!” Ani Juanvak mhunnttlem: “Hi tuji avoi!” Tea disa thaun Juanvan aplea avoi sarki, Mariechi kallji ghetli. Aplea zolma vellar, mogan kallji ghetolea ani aplea mornna vellar aplea  sangata aslolea avoik Jezun kitlo mog dakhoilo!

8. Jezun Mariek ani Juanvak jem sanglem tantuntlean ami kitem xikonk zata?

⁸ Jezuchea utrantlean ami kitem xiktat? Amchea famili poros sobhent aslolea bhav-bhoinnam sangata amchi ixttagot ghott asonk xokta. Karonn amchim soirim ghoddie amcho virodh korunk puro vo amkam soddun diunk puro. Punn ami Jehovak ani tachea songottnnek lagim ravlim zalear ami kitem sanddlam tachea poros amcho mog kortat tosle put, dhuvo, avoi-o vo bapui ‘xembor pavtti chodd’ mellttolim mhunn Jezun amkam bhas dilea. (Marku 10:29, 30) Tor ek bhavarth aslolea ani eka-mekacho toxench Jehovacho mog kortolea familicho bhag zaunk tumkam koxem dista?​—Kol. 3:14; 1 Ped. 2:17.

9. Matev 27:46-ant sanglolea Jezuchea utrantlean amkam kitem kolltta?

⁹ Jezun kitem mhunnttlem? Jezu morchea thoddeach vella poilim tannem mhunnttlem: “Deva Mhojea, kiteak Tunvem Mhaka sanddloi?” (Mt. 27:46) Jezun oxem kiteak mhunnttlem tem Bible sangona. Punn ek vixoi mhunnttlear, Jezun him utram mhunnon Stotr 22:1-antlem bhakit purnn kelem. * Tea bhair, hea utrantlean Jehovan aplea Puta ‘bhonvtim ek voi ghalunk na’ mhunn kollon ieta. (Job 1:10) Khoincheach munxachi porikxa zaunk na toxi apli porikxa zaunk dusmananchea hatant Jehovan apleak soddun dila mhunn Jezu somzolo. Toxench, tannem moronn favo-sarko kosloch guneanv korunk naslo mhunn hea utrantlean kollon ieta.

10. Jezun aplea Bapaik mhunnttlolea utram thaun ami kitem xiktat?

¹⁰ Jezuchea utram thaun ami kitem xiktat? Poilem lisanv mhunnttlear, amchea bhavartak lagon amkam sosunk poddtta tea soglea trasam thaun Jehova amkam salvar korina. Jezu bhaxen, ami amchea bhavartak lagon goroz poddlear moronk pasun toiar asonk zai. (Mt. 16:24, 25) Punn amkam sosunk zaina tachea von chodd tras ieunk Jehova diuncho na mhunn ami khatri dovrunk zata. (1 Kor. 10:13) Dusrem lisanv mhunnttlear, Jezu bhaxen amkam pasun on’neai sosunk poddot. (1 Ped. 2:19, 20) Karonn ami kitem chuk kelea mhunn nhoi, punn ami hea sonvsaracho bhag nhoi, ani sota vixim sakx ditat dekhun sonvsaracho lok amcho virodh kortat. (Juanv 17:14; 1 Ped. 4:15, 16) Jehovan apnnacher tras ieunk kiteak dile tem Jezuk khobor asli. Punn thodde pavtti Jehovachea visvaxi sevokank tras ietat tednam te Jehovan kiteak ieunk dileat mhunn tim ghoddie chitunk puro. (Hab. 1:3) Tea vellar tancho bhavarth unno zaunk na, punn tankam buzvonnechi goroz asa mhunn amcho doiall ani pasiens dakhoupi Dev vollkhun gheta.​—2 Kor. 1:3, 4.

11. Juanv 19:28-ant aslolim utram Jezun kiteak mhunnttlim?

¹¹ Jezun kitem mhunnttlem? (Juanv 19:28 vachat.) “Mhaka tan laglea,” oxem Jezun kiteak mhunnttlem? Ek karonn mhunnttlear, “Povitr Pustok sompurnnaien pallon ieunche khatir” tannem oxem mhunnttlem. Tachea vixim Stotr 22:15-ant oxem sanglolem: “Kumbarache bhazlole matie bhaxen mhozo gollo sukun gelo, jib mhollear talliek chikttolea.” Dusrem karonn mhunnttlear,  tea khambear itlem dukh soslea uprant taka khorench khub tan lagli astoli.

12. “Mhaka tan laglea” hea Jezuchea utrantlean ami kitem xiktat?

¹² Jezuchea utrantlean ami kitem xiktat? Amkam koxem dista tea vixim dusreank sangonk fattim sorchem nhoi mhunn ami xiktat. Ami ghoddie amchea gorzam vixim dusreank sangonant zait. Vo amkam khorench modotichi goroz asta tednam ami modot gheunk fattim sortat astolim. Udharonnak, zantteponnak vo duensak lagon amkam bazarant vo dotora lagim vochonk konnachi tori modot zai astoli. Vo ami nirax zaleant dekhun amkam ‘doiall utramnim’ urba diunk vo amchem aikonk eka vhoddilachi vo sotant ghott aslolea bhav vo bhoinnichi goroz poddot. (Mho. 12:25) Tea vellar, amchim bhav-bhoinnam amcho mog kortat ani ‘oddchonne vellar’ amkam modot korunk sodhtat mhunn ami ugddas dovrum-ia. (Mho. 17:17) Punn amchea kallzant koxem bhogta tem tankam somzona dekhun tea vixim ami tankam sanglea xivai tim ghoddie amkam modot korunk pavchimnant.

13. Moro porian visvaxi ravon Jezun kitem dakhoun dilem?

¹³ Jezun kitem mhunnttlem? Nisan 14 tarker, donparchea sumar tin vorancher Jezun vhodd avazan mhunnttlem: “Sompadlem!” (Juanv 19:30) Hacho orth, apnnem jem kitem kel’lem Jehovak zai aslem tem tannem soglem kelem mhunn hea utrantlean kollon ieta. Jezu moro poriant visvaxi ravlolean to hem soglem korunk pavlo: Poilem, Soitanan kitlo-i virodh haddlo zalear pasun ek poripurnn munis Jehovak visvaxi ravonk xokta mhunn tannem dakhoun dilem. Oxem korun tannem Soitanak fotting mhunn dakhoun dilo. Dusrem, tannem soddvonn dili. Hea udexim opurnn munxank Jehova lagim ixttagot korunk melltta ani fuddarak sasnik jivitacho bhorvonso melltta. Ani tisrem, Jehovak sarki razvottki cholounk iena mhunn aplea Bapacher ghatlolo arop tannem kaddlo.

14. Ami dor disa koxem jieunk zai? Somzaiat.

¹⁴ Jezuchea utrantlean ami kitem xiktat? Dor disa Jehovak visvaxi ravonk amchean zata tem soglem ami korunk zai. Gilead Korsacho xikoupi Bhav Maxwell Friend-an kitem mhunnttlolem tem polloum-ia. Visvaxiponna vixim bhaxonn ditana tannem eka ontoraxttria zomatint oxem mhunnttlem: “Tumi aiz mhunnonk vo korunk zai tem faleam korum nakat. Karonn tumi faleam jivim urtolim mhunn khatren sangonk zaina. Tor tumi dor disa hea toren jieiat zoxem sasnachem jivit zoddunk purtim asat mhunn dakhounk, ho dis tumchea jivitacho nimanno dis.” Tor dor dis amchea jivitacho xevottacho dis mhunn chintun ami visvaxiponnan jieum-ia! Tednam ami melear pasun oxem sangonk pavtolim: “Jehova, tuka visvaxi ravonk, Soitan fotting mhunn dakhounk, tujem nanv Povitr korunk ani tujea razvottkek tenko diunk, mhojean zata tem soglem hanvem kelam!”

15. Lukas 23:46-a pormonnem, Jezuk kitem khatri asli?

¹⁵ Jezun kitem mhunnttlem? (Lukas 23:46 vachat.) Jezun mhunnttlem: “Bapa, Tujea hatant ghaltam Mhozo otmo.” Hantuntlean fokot Jehovakuch punorjivont korchi xokti asa ani tem to kortoloch mhunn Jezuk asloli khatri dison ieta.

16. Joshua-achea udharonnantlean tumi kitem xikonk xoktat?

 ¹⁶ Jezuchea utrantlean ami kitem xiktat? Tumchem jivit dhokeant asa zalear pasun, Jehovak visvaxi ravat. Oxem korunk tumi ‘soglea kallzan Devacher visvas dovrunk’ zai. (Mho. 3:5) Ami 15 vorsanchea Joshua-chem udharonn polloum-ia. Taka aslolea duensak lagon to morcho aslo. Punn Devachea kaidea add voita toslim vokhdam tannem nakarlim. To morchea thoddeach vella poilim tannem aplea avoik sanglem: “Mummy, Jehova mhoji kallji ghetolo mhunn mhaka purnn khatri asa. . . . To mhaka porot jivont kortolo mhunn hanv zannam ani hanv tacho kallzant thuan mog korta mhunn pasun to zannam.” * Tor ami dor eklean amkanch vicharunk zai, ‘Mhojea bhavarthachi porikxa zata tednam mhaka morchem poddlem zalear pasun hanv Jehovak visvaxi ravtolo kai ani to mhaka punorjivont kortolo mhunn hanv bhorvonso dovortolo kai?’

17-18. Hea lekhant ami koslim lisanvam xikleant? (“ Jezuchea Nimannea Utrantlean Ami Xiktat Tim Lisanvam” hem boks pasun polloiat.)

¹⁷ Ami Jezuchea nimannea utrantlean kitem xikonk zata? Poilem, ami dusreank bhogsunk zai. Dusrem, Jehova amkam bhogxitolo mhunn amkam bhorvonso asonk zai. Tisrem, sobhentlim bhav-bhoinnam amkam modot kortolim mhunn amkam khatri asonk zai. Chovtem, amkam goroz asa tednam ami modot gheunk zai. Panchvem, amcher kosle-i tras ailear pasun Jehova amkam te sosunk modot kortolo mhunn amkam khatri asonk zai. Sovem, ami dor disak Jehovak visvaxi ravonk zai. Ani satvem, ami melear pasun Jehova amkam purnorjivont kortolo mhunn amkam khatri asonk zai.

¹⁸ Khorench, Jezu khambear astana mhunnttlolea utrantlean ami zaitim lisanvam xikonk xoktat. Him lisanvam ami apnnaitat tednam Jehovan aplea Puta vixim mhunnttlolea hea utrank ami pallo ditat: “Tachem tumi aikat.”​—Mt. 17:5.