1-2. Soddvonn mhunnttlear kitem, ani ti amkam kiteak gorjechem?

ADANVAN patok kelem tednam tannem apnnakuch nhoi, punn tachea bhurgeank pasun mellonk aslolem sasnachem jivit hogddailem. Tannem mud’dom patok kelem dekhun taka xikxa favo asli, punn tachim bhurgim tachea patkant bhagidar naslim. (Rom. 5:12, 14) Tor tankam mornna thaun vattaunk Jehovan kitem kelem? Adavan patok kelea uprant tachea thaun ailolea patka ani mornna thaun soddounk Jehova kitem kortolo tea vixim tachea sonstik tannem thoddem-thoddem korun sanglem. (Ut. 3:15) Ani Jehovan tharailolea vellar, ‘somestank soddvonn diunk’ tannem aplea Putak sorgar thaun prithumer dhaddlo.”​—Marku 10:45; Juanv 6:51.

² Soddvonn mhunnttlear kitem? Bible dakhoita ki soddvonn mhunnttlear, Adanvan jem kitem hogddailem tem porot mellonk Jezun farik kel’lem mol. (1 Kor. 15:22) Punn Jehovan hi manddavoll kiteak keli? Jehovachea neai-a pormonnem, jivak jiv diunk zai mhunn tannem Israelitkarank dil’lea Somurte thaun amkam kolltta. (Sutt. 21:23, 24) Tor Adanvan hogddailolo poripurnn jiv porot mellonk anik ek poripurnn jiv bhettounchi goroz asli. (Rom. 5:17) Jezun prithumer astana aplo poripurnn jiv soddvonn mhunn bhettoilolean tacher bhavarth dovortat tankam to ‘Fuddlea Iugacho vo Sasnacho Bap’ zata.​—Iz. 9:6; Rom. 3:23, 24.

3. Juanv 14:31 ani 15:13-a pormonnem, Jezu aplo jiv diunk kiteak toiar aslo?

 ³ Jezuk Jehovacho ani amcho khub mog asa dekhun to aplo jiv bhettounk toiar aslo. (Juanv 14:31; 15:13 vachat.) Takach lagon, to moro poriant visvaxi ravlo ani tannem Jehovachi khuxi purnn keli. Hea udexim munxakulla pasot ani prithume pasot Jehovacho ud’dhex purnn zatolo. Punn Jezuk morchea poilim itlem dukh kiteak sosche poddlem? Eka Bible boroupean soddvonne pasot upkariponn koxem dakhoilem? Ani Jehovan ani Jezun dil’lea soddvonne pasot ami amchem upkariponn koxem dakhounk ani vaddounk zata? Hea prosnanche zobab ami hea lekhant polloitolim.

4. Jezuk koso marlo tem sangat.

⁴ Jezu melo tea disa taka kitem soschem poddlem tem chintat. Apleak trasam thaun vattaunk to ainzachea loksorank apounk xoktalo. Punn tannem apnnakuch Romi soinikanchea hatant soddun dilo. (Mt. 26:52-54; Juanv 18:3; 19:1) Te taka poilim khub martat. Tachea kuddichi kat voddun ieta toslea chabkamnim te taka martat. Uprant te tachea ghavean bhorlolea fatticher ek vhodd lakhddacho khambo ubarun taka jivexim marunk aslolea zagear vhoronk laitat. Punn thoddeach vella uprant, to khambo ubarunk te dusrea konnank sangtat. (Mt. 27:32) Jivexim marunk aslolea zagear pavlea uprant, te tache hat ani paim tea khambear khillaitat. Jezuchi ak’khi kudd tea khilleancher vhoddtta tednam taka kitli dukh zali astoli! Tachi avoi ani ixttam roddttat. Punn Judevanche fuddari tachim fokannam kortat. (Lukas 23:32-38; Juanv 19:25) Vell voita toso tachem dukh vaddot voita ani khambear aslolean taka svas gheunk pasun kotthin zata. Xevottak, to aplea Bapa lagim magnnem korta, apli tokli bagoita ani aplo jiv soddtta. (Marku 15:37; Lukas 23:46; Juanv 10:17, 18; 19:30) Tor Jezuk zaitem dukh ani loz sosun morchem poddlem.

5. Jezuk khoinchem dukh sosunk chodd kotthin aslem?

⁵ Jezuk sosunk poddlolea soglea trasam poros, tacher ghatlolea aropak lagon taka chodd dukh zalem. Tannem Devacho ani Devachea nanvacho opman kelo mhunn tacher khotto arop ghatlolo. (Mt. 26:64-66) Taka itlem dukh zalem ki hea aropak lagon apleak marlolo naka mhunn tannem maglem. (Mt. 26:38, 39, 42) Tor, Jehovan aplea mogachea Putak itlem dukh sosun kiteak moronk dilo, tachim tin karonnam atam ami polloum-ia.

6. Jezuk khambear kiteak morcho poddlo?

⁶ Poilem, Judevank eka khas xirapa thaun soddounk Jezuk khambear morchem poddlem. (Gal. 3:10, 13) Ho xirap Adanva thaun ieta tea patka ani mornnachea xirapa thaun vegllo aslo. (Rom. 5:12) Devan Israelitkarank dilolea Somurte pormonnem, ek munis moronn favo aslolem ek patok korta zalear taka jivexim marunk zai aslem. Ani uprant ghoddie tachi kudd eka khambear umkallaunk zai asli. * (D.S. 21:22, 23; 27:26) Judev lok Devachea Somurte pormonnem jieunk nant dekhun tancher ho Somurticho xirap aslo. Punn Jezun tancher aslolo to xirap apnnacher gheun khambear jiv dilolean, taka nakarlolea teach raxttrak tachea bolidana thaun faido mellonk tannem vatt ukti keli.

7. Jezuk dukh sosunk dusrem karonn khoinchem?

 ⁷ Jezun tras sosun morchem dusrem karonn mhunnttlear, Jehova Dev taka fuddaracho Porom Iadnik zaunk proxikxonn ditalo. Ekdom kotthin poristhiticho fuddo korta tednam Devachi adnea manunk kitlem kotthin tem Jezun onnbhovlem. Tacher itlo dobhav aslo ki tannem Devak visvaxi ravonk “vhoddlean bob marun ani dukham golloun” magnnem kelem. Taka bhavnatmik ritin ani her ritin itlem soschem poddlem ki “atam zanchi porikxa zata tankam adar diunk to xokta.” Amcheo [“oskotaio somzonk,” NW] xokta toslo doiall Mha-iadnik Jehovan nemla mhunn ami tache khorench khub upkari!​—Heb. 2:17, 18; 4:14-16; 5:7-10.

8. Jezuk ekdom chodd tras sosunk tisrem karonn khoinchem?

⁸ Jezun tras sosun morchem tisrem karonn mhunnttlear, hea toren Soitanan ubarlolea prosnank to zobab diunk pavlo: Munis ekdom kotthin poristhitint Devak visvaxi ravcho na ani Adanva bhaxen Devachea mogak lagon nhoi, punn aplea svarthak lagon tachi seva korta mhunn Soitanan arop ghatla. (Job 1:9-11; 2:4, 5) Tor ek munis sosunk xokta te ekdom kotthin tras Jezuk sosunk poddlear pasun to apleak visvaxi ravtolo mhunn Jehovak khatri asli. Ani Jezun oxem kelolean Soitanan ghatlolo arop fotting mhunn tannem dakhoun dilem.

9. Apostl Juanvan amkam koslem udharonn dovorlam?

⁹ Soddvonne vixim zannam zalolean zaitea Kristanvank jivitbhor aplo bhavarth ghott dovrunk, dhumallo aslear pasun porgottunk ani sogle toreche tras sosunk modot zalea. Apostl Juanva vixim chintat. Tannem Jezu ani soddvonne vixim aslolem sot sumar 60-a poros chodd vorsam porgott kelem. Tannem ‘Devachem Utor porgottlem ani Jezu Krista vixim sakx dili dekhun’ Romi sorkarak tachi itli bhirant disli ki sumar 100 vorsanchea piraier taka tannim Patmos nanvachea zunvear koidi korun dovorlo. (Prok. 1:9) Khorench, bhavarth ani sosnikai dakhoun Juanvan ekdom borem udharonn dovorlam!

10. Juanvachea boroupantlean to soddvonne pasot upkari aslo mhunn koxem kollon ieta?

¹⁰ Juanvachim pustokam ami vachtat tednam to Jezucho kitlo mog kortalo ani soddvonne pasot to kitlo upkari aslo tem amkam dison ieta. Tantunt amkam 100 poros chodd pavtti soddvonne vixim vo soddvonne udexim melltta tea faideam vixim vachunk melltta. Udharonnak, Juanvan boroilem: ‘Konn-ui patkant poddlim zalear, Bapa mukhar amkam sogllech vatten Devak manta toslo eklo Xaroti vo modot korpi asa: to Jezu Krist.’ (1 Juanv 2:1, 2) ‘Jezu vixim sakx divop’ khub gorjechem mhunn pasun tannem aplea boroupantlean dakhoun dilem. (Prok. 19:10) Hantuntlean Juanv soddvonne pasot upkari aslo mhunn kollon ieta. Tor ami soddvonne pasot upkariponn koxem dakhounk zata?

11. Patok korchi tallnni pois korunk amkam kitem modot korunk xokta?

¹¹ Patok korchi tallnni nakarat. Soddvonne pasot ami khorench upkari asat zalear, ami oxem chintchi nant: ‘Vaitt korunk tallnni ieta tednam hanvem ti kiteak pois korchi, patok korun Deva lagim bhogsonnem maglear puro nhoi.’ Oxem chintchea bodlek ami oxem chintunk zata: ‘Jehovan ani Jezun mhojea pasot itlem soglem kelam, tor hanv hem patok koso korunk xokta? Tea bhair oxem mhunnon ami Jehova lagim modot magonk xoktat:  ‘Mhaka tallnnent poddonk dium naka.’​—Mt. 6:13.

12. 1 Juanv 3:16-18-ant dilolo sol’lo ami koso apnnaunk zata?

¹² Tumchea bhav-bhoinnancho mog korat. Soddvonne pasot upkari asat zalear ami bhav-bhoinnancho mog kortolim. Kiteak? Karonn Jezu amchea pasotuch nhoi punn amchea bhav-bhoinnam pasot-ui melo. Tor to tancho mog korta dekhun ami pasun tancho mog korunk zai. (1 Juanv 3:16-18 vachat.) Ani hem ami amchea korneamnim dakhounk xoktat. (Ef. 4:29, 31–5:2) Udharonnak, jim duent poddttat, odruxttank sampoddttat vo her torechea transancho fuddo kortat tednam ami tankam modot kortat. Konn ek bhav vo bhoinn utramnim vo korneamnim amkam dukhoitat tendam ami kitem korunk zai?

13. Ami eka-mekar kiteak bhogsunk zai?

¹³ Tumkam thodde pavtti tumchea bhav-bhoinnank bhogsunk kotthin zata kai? (Lev. 19:18) Toxem zalear ho sol’lo apnnaiat: “Dusreacher garannem korunk nimit aslear, tumi ekamekak sosunk zai ani bhogsunk zai. Somian tumkam bhogxileant, toxench tumi-i ekamekak bhogsat.” (Kol. 3:13) Dor ek pavtti ami amchea bhavak vo bhoinnik bhogxitat tednam, ami soddvonne pasot upkari asat mhunn dakhoun ditat. Tor Devan dil’lea hea dennea pasot ami amchem upkariponn koxem vaddounk zata?

14. Soddvonne vixim tumchem upkariponn vaddounk zata ti ek vatt khoinchi?

¹⁴ Soddvonne pasot Jehovache upkar attoiat. Bharotant ravpi 83 vorsanchi bhoinn Joanna mhunntta: “Hanvem dor disa mhojea magnneant soddvonne pasot upkar attovop gorjechem mhunn mhaka dista.” Tumi svotachem magnnem kortat tednam dor disak kel’leo chuki sangon Jehova lagim bhogsonnem magonk zai. Punn tumi gombhir patok kelam zalear tem vhoddilank pasun sangop gorjechem zaun asa. Te tumche aikotole ani Devachea Utrantlean tumkam sol’lo ditole. Te tumkam Jezuchea soddvonne udexim bhogsonnem mellonk magnnem kortole ani Jehova lagim tumchi ixttagot porot ghott korunk modot kortole. ​—Jak. 5:14-16.

15. Ami soddvonne vixim vachun tacher niall korop kiteak gorjechem?

¹⁵ Soddvonne vixim niallat. “Jezuk kitle  tras sosche poddle hea vixim hanv vachta tednam mhojea dolleant dukham ietat,” oxem 73 vorsanchi bhoinn Rajamani mhunntta. Tichea bhaxen tumkam-i disonk puro. Tor Jezun dil’lea bolidana vixim jitlim tumi niall kortolim titlo tumcho tachea pasot ani tachea Bapai pasot mog vaddttolo. Tor tumkam niall korunk modot zaunk tumi soddvonne vixim anik sodh korunk zata.

16. Soddvonne vixim ami dusreank xikoitat tednam amkam koso faido zata? (Masikachem fuddlem chitr polloiat.)

¹⁶ Soddvonne vixim dusreank sangat. Dor ek pavtti ami hea vixim lokank sangtat tednam soddvonne pasot amchem upkariponn vaddttolem. Jezu amchea pasot kiteak melo, hea vixim sangonk amchea lagim borim sadhonam asat. Zoxem, Devan Dil’li Bori Khobor! hea pustikecho odheai 4, “Jezu Krist Konn?” Vo Bible Khorench Kitem Xikoita? hea pustokacho odheai 5 “Devan Dilolem Moladik Dennem.” Toxench, ami dor vorsak Jezuchea mornnachea Ugddas Disak hajir zaun dusreank urben ieukar ditat tednam soddvonne pasot amchem upkariponn ami vaddoitat. Aplea Puta vixim dusreank xikounk Jehovan amkam kitlo vhodd sueog dila nhoi!

17. Soddvonn, hem Devan munxakullak dil’lem sogleam-von vhodd dennem mhunn ami kiteak mhunnonk zata?

¹⁷ Khorench, soddvonne pasot amchem upkariponn vaddounk amkam zaitim karonnam asat! Ami opurnn aslear pasun soddvonne udexim ami Jehova lagim ek ghott ixttagot zoddunk pavtat. Soddvonne udexim Devcharachea kortubancho bhosm zauncho asa. (1 Juanv 3:8) Ani soddvonne udexim prithume pasot Jehovacho ud’dhex purnn zatolo. Hacho orth, prithum ek sobit bag zatoli ani Jehovacho mog ani seva kortoleam sangata ami jietolim. Tor, Devan dil’lea hea sogleam-von vhodd dennea pasot, hoi soddvonne pasot, dor disak amchem upkariponn ami vaddoit ravum-ia!